ပွႆးလိူၼ်သိပ်းသွင် ၶႄႉၶႅင်ႇႁူင်းၾႆးမိၼ် ၸႄႈဝဵင်းတူၼ်ႈတီး ပီၼႆႉ ၽူႈၶဝ်ႈႁူမ်ႈ ၶႄႉၶႅင်ႇ ႁူင်းၾႆးမိၼ် ၵၢင်ဝၼ်း၊ ၵၢင်ၶမ်ႈ တင်းမူတ်း မီး 400 ပၢႆ ဝႃႈၼႆ ။

Photo By Sai Arntai

တႄႇဢဝ် ဝၼ်းတီႈ 06-14/11/2016 ပၢင်ပွႆး လိူၼ်သိပ်းသွင် ၶႄႉၶႅင်ႇႁူင်းၾႆးမိၼ် ၸတ်းႁဵတ်းတီႈ ပၢင်ဢႃဝုၺ်ႇယႃႉ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ ၸွမ်းၼင်ႇၾိင်ႈ ႁိတ်ႈႁွႆး ၶွပ်ႈၶူပ်ႇပီ လႂ်ၼိုင်ႈပွၵ်ႈ။ ပၢင်ၶႄႉၶႅင်ႇႁူင်းၾႆးမိၼ်ၼႆႉ ၼိုင်ႈဝၼ်းလႂ် ၸတ်းႁဵတ်းသွင်ပွၵ်ႈ ယၢမ်းၵၢင်ဝၼ်း 12:00-17:00 မူင်းၵမ်းၼိုင်ႈ၊ ပွႆႇႁူင်းၾႆးႁၢင်ႈ ဢၼ်ႁၢင်ႈၶိူင်ႈႁဵတ်းပဵၼ်ၼူၵ်ႉ/ ႁၢင်ႈသတ်း၊ ယၢမ်းၵၢင် ၶိုၼ်း 09:00-02:00 မူင်း ၼႃႈမိူင်းလႅင်း ၵမ်းၼိုင်ႈ ပဵၼ်ႁူင်းၾႆးလူင် သႅၼ်းယႂ်ႇသႅၼ်းလူင် ဝႃႈၼႆ ။


ၼၢင်းသႅင် ၽူႈၶဝ်ႈႁူမ်ႈ ၼႂ်းပၢင်ပွႆးလၢတ်ႈဝႃႈ “ ပီၼႆႉ ပၢင်ပွႆးႁူင်းၾႆးမိၼ် တီႈတူၼ်ႈတီးၼႆႉ ၾူၼ် ၵေႃႈတူၵ်း  လူမ်းၵေႃႈပဝ်ႇ ၵူၼ်းၶဝ်ႈပွႆးၵေႃႈၵိုၼ်းလိူဝ်ၵူႈပီ၊ ၵူၺ်းၵႃႈ မီးလွင်ႈမႆႈၸႂ် ဢၼ်ၼိုင်ႈ၊ သင် ဝႃႈ မိူဝ်းၽွင်းတိုၵ်ႉပွႆႇႁူင်းၾႆးၶိုၼ်ႈယူႇၼၼ်ႉ လူမ်းသမ်ႉပတ်ႉၸိုင် တေၸင်ႈ တုမ်ႉတိူဝ်ႉ တူၵ်းသႂ်ႇ ၵူၼ်းတူၺ်းပွႆးၵေႃႈၸၢင်ႈပဵၼ်လႆႈ၊ သင်ပဵၼ်လႆႈၼႆ ၶႂ်ႈႁႂ်ႈၵူၼ်းတူၺ်းပွႆးၶဝ် ဢွၼ် ၵၼ်ယူႇတီႈ ၵႆသေ တူၺ်းၼႆ ယိုင်ႈၶႅၼ်းလီ” ဝႃႈၼႆ ။


ၶွမ်ႊမတီႊပွင်ပဵၼ်ပၢင်ပွႆးဝႃႈ ၼႂ်းဝၼ်းတီႈ 12-13/11/2016 သွင်သၢမ်ဝၼ်းၼႆႉ တေပဵၼ်ဝၼ်း ဢၼ်ၵိုၼ်းယႂ်ႇၵိုၼ်းလူင် ႁူင်းၾႆးၵေႃႈ တေပွႆႇၼမ်၊ ယၢမ်းၵၢင်ဝၼ်းၼႆႉ တေပွႆႇႁၢင်ႈသတ်း 33 လုၵ်ႈ၊ ယၢမ်းၵၢင်ၶိုၼ်းသမ်ႉ တေပွႆႇႁူင်းၾႆးလူင်လၢႆလၢႆသႅၼ်း ဝႃႈၼႆ ။


ပၢင်ပွႆးၶႄႉၶႅင်ႇႁူင်းၾႆးမိၼ် တီႈတူၼ်ႈတီးၼႆႉ ၸတ်းႁဵတ်းပၢင်ၶႄႉၶႅင်ႇ ၼိုင်ႈဝၼ်းလႂ် သွင်ပွၵ်ႈ ယၢမ်း ၵၢင်ဝၼ်း ၶႄႉၶႅင်ႇပွႆႇ ႁူင်းၾႆးမိၼ် ႁၢင်ႈတူဝ်သတ်း မိူၼ် တူဝ်သတ်းသွင်တိၼ်၊ သီႇတိၼ် ၸဵမ် ၸိူဝ်းၼႆႉ  တႄႇဢဝ် ဝၼ်းတီႈ 06-08/11/2016 ၶၢဝ်းတၢင်း 3 ဝၼ်းၼႆႉ လႆႈပွႆႇၵႂႃႇ တင်း မူတ်း 126 လုၵ်ႈ ဝႃႈၼႆ ။


ပၢင်ပွႆးႁူင်းၾႆးမိၼ် လိူၼ်သိပ်းသွင်မူၼ်းၼႆႉ ၸွမ်းၼင်ႇၾိင်ႈႁိတ်ႈႁွႆးသေ လႆႈၸတ်းႁဵတ်းမႃးၵူႈပီ၊ သမ်ႉပဵၼ်ပၢင်ပွႆးၸိုဝ်ႈသဵင်ယႂ်ႇၵိုၵ်းမိူင်းတႆး ဢၼ်ၼိုင်ႈလႄႈ ပဵၼ်ပိုၼ်းႁၢင်ႈလီဢၼ်ၵိုၵ်း ဝဵင်းတူၼ်ႈ တီးထႅင်ႈ၊ ယွၼ်ႉၼၼ် ၵူၼ်းမိူင်းၼွၵ်ႈမိူင်း/ၼႂ်းမိူင်း တီႈၸမ်ၵႆ မႃးၶဝ်ႈႁူမ်ႈတင်းၼမ်လၢႆ ဝႃႈၼႆ ။


ပၢင်ပွႆးႁူင်းၾႆးမိၼ်ၼႆႉ ဝၢႆးဢိင်းၵလဵတ်ႈ ၵေႃႇတင်ႈပဵၼ်ဝဵင်း 1890 ပၢႆမႃး၊ ၵၢၼ်ႁဵၼ်း၊ ၵၢၼ်လုမ်း ၸိုင်ႈတႆး လႆႈၶိုၼ်ႈႁႃဢိင်းၵလဵတ်ႈ တီႈတူၼ်ႈတီး။ လုၵ်ႈလၢင်းၸဝ်ႈၾႃႉၶႆႇသႅင်ၽၼ်းၶမ်း တင်းလၢႆ ၵေႃႈလႆႈၵႂႃႇၶဝ်ႈႁူင်းႁဵၼ်းတီႈတူၼ်ႈတီး။ ၽွင်းၶၢဝ်းဢွၵ်ႇဝႃႇ ဢမ်ႇလႆႈပွၵ်ႈႁၢင်ႈႁေႃဝၢၼ်ႈ မိူင်းတီႈ ၵိူတ်ႇ၊ ၸဝ်ႈၾႃႉတင်းလၢႆၵေႃႈ မီးႁေႃလိုဝ်ႈ/ႁေႃသဝ်း တီႈတူၼ်ႈတီး တႃႇလုၵ်ႈတႃႇလၢင်းၽႂ်မၼ်း၊ လုၵ်ႈလၢင်းၶဝ်ၸဝ်ႈသမ်ႉဢမ်ႇလႆႈၶဝ်ႈပွႆးဢွၵ်ႇဝႃႇ တူၺ်းၼူၵ်ႉတူဝ်း/ပွႆးႁူင်းၾႆးမိၼ်လႄႈ ၵူၼ်းဝၢၼ်ႈၵူၼ်းမိူင်းၸင်ႇၶွၼ်ႈၵၼ်မႃး ၸတ်းႁဵတ်းမွၵ်ႇၾႆး/ႁူင်းၾႆး လူႇတၢၼ်းၵိုၵ်းပွႆး သၢင်ႇၵၢၼ်းလႄႈ ဢဝ်ပဵၼ်ၾိင်ႈထုင်းမႃး။ တႄႇမီးပၢင်ပွႆး ပွႆႇႁူင်းၾႆးမိၼ်/ပွႆးမွၵ်ႇၾႆး ၸိူင်ႉၼႆႉမႃး ၵူႈပီတေႃႇယၢမ်းလဵဝ် ။