ပီမႂ်ႇတႆး 2111 ၼီႈ ၼႂ်းမိူင်းတႆးလၢႆၸႄႈဝဵင်း၊ ပိူင်လူင်မၼ်း ၼႂ်းၸိုင်ႈတႆးပွတ်းႁွင်ႇၼၼ်ႉ ဢိင်ၼိူဝ်ငဝ်းလၢႆး ဝၢၼ်ႈမိူင်း ဢမ်ႇမၼ်ႈၼိမ်သဝ်းသေ တေဢမ်ႇႁဵတ်းပွႆးယႂ်ႇလၢမ်းလူင်၊ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး တေဢွၼ်ႁူဝ်ၼမ်းၼႃႈၸတ်း ၼႂ်းပွၵ်ႉယွမ်ႇၽႂ်မၼ်းၵူၺ်း။ ၵူၺ်းၵႃႈ တီႈဝဵင်းၵဵင်းတုင်ၼၼ်ႉ ၸၢဝ်းၶိူဝ်းတႆး တေၸတ်းႁူမ်ႈၵၼ် ။

ပီမႂ်ႇတႆး ဢၼ်ပီႈၼွင်ႉၸၢဝ်းၶိူဝ်းတႆးတင်းလၢႆ ၼႂ်းမိူင်းၸိုင်ႈတႆး၊ ၼႂ်းၸိုင်ႈမိူင်းႁူမ်ႈတုမ် ဢိၵ်ႇၼႂ်းမိူင်းၼွၵ်ႈမိူင်း ႁဵတ်းပၢင်ပွႆးႁပ်ႉတွၼ်ႈပီမႂ်ႇ- သူင်ႇသင်ႇပီၵဝ်ႇ ႁွင်ႉဝႃႈပွႆးပီမႂ်ႇတႆးၼႆႉ ပီၼႆႉၶွပ်ႈၶူပ်ႇႁွတ်ႈထိုင်မႃး 2111 ၼီႈ မိူင်းႁဝ်ႉ (ပီၵႆႇ)။ ၵူၺ်းၵႃႈပီၼႆႉ ဢိင်ၼိူဝ်ငဝ်းလၢႆးၼႂ်းမိူင်းတႆး ဢမ်ႇၼိမ်သဝ်းသေ လၢႆတီႈလၢႆၸႄႈဝဵင်း ဢမ်ႇၸၢင်ႈၸတ်းပၢင်ပွႆးႁပ်ႉတွၼ်ႈပီမႂ်ႇတႆး 2111 ၼီႈ ပဵၼ်ပွႆးယႂ်ႇလၢမ်းလူင်။ ဝၼ်းႁပ်ႉတွၼ်ႈပီမႂ်ႇတႆး 2111 ၼီႈၼႆႉ ပီၼႆႉတူၵ်းမႅၼ်ႈဝၼ်းတီႈ 29/11/2016 ၊ ၶမ်ႈၶိုၼ်းလိူၼ်သိပ်းသွင်လပ်း။ ဝၼ်းတီႈ 30 ပဵၼ်ဝၼ်းပီမႂ်ႇတႆး လိူၼ်ၸဵင်မႂ်ႇဝၼ်းၼိုင်ႈ ။


တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ဢိၵ်ႇတင်း ပေႃႈမႄႈပီႈၼွင်ႉၵူၼ်းမိူင်းဝဵင်းတူၼ်ႈတီး တေႁူမ်ႈမိုဝ်းၵၼ် ၸတ်းႁဵတ်းတီႈပၢင်ႇပွႆႇႁူင်းၾႆးမိၼ် ဢဝေႇယႃႇ၊ တေႁဵတ်းပႃးပၢင်ယုၵ်ႉယုင်ႈၵုၼ်းမုၼ် မေႃတႅမ်ႈၽဵင်းၵႂၢမ်းတႆး ၸၢႆးလၢဝ်သႂ် ဢႃယုၶွပ်ႈၶူပ်ႇ 75 ပီ (ပီၵွၼ်းသႅင်)၊ တေပဵၼ်ပၢင်ပွႆးၵိုၼ်းယႂ်ႇလူင် တႃႇၶၢဝ်းတၢင်း 5 ဝၼ်း။ ဝူင်းၸိူင်းလႅဝ်း ဢွၼ်ႁူဝ်ၼမ်းၼႃႈ ၾၢႆႇတွႆႇတိုင်ႈႁွင်ႉၽဵင်းၵႂၢမ်းပၢၼ်မႂ်ႇ၊ တေမီးမေႃႁွင်ႉၽဵင်းၵႂၢမ်း လၢႆၵေႃႉလၢႆၵူၼ်း လၢႆတီႈလၢႆတၢင်း မႃးၶဝ်ႈႁူမ်ႈလဝ်ႇမူၼ်ႈတူၼ်ႈၸႂ်ပၼ်- ၼႆယဝ်ႉ ။


တီႈဝဵင်းမူႇၸေႈ ၸိုင်ႈတႆးပွတ်းႁွင်ႇၼႆႉ ဢွၼ်ၼႃႈၼႆႉလႆႈပိုၼ်ၽၢဝ်ႇၵႂႃႇဝႃႈ တေမီးပႃးပၢင်ၶႄႉၶႅင်ႇၼၢင်းလဝ်း (ၼၢင်းငၢမ်း)၊ ၵူၺ်းၵႃႈ ဢိင်ၼိူဝ်ငဝ်းလၢႆးလႅၵ်ႈလၢႆႈ ဢမ်ႇမီးလွင်ႈၼိမ်သဝ်းငမ်းယဵၼ်သေ လႆႈႁူႉဝႃႈ တေၸတ်းၼႂ်းပွၵ်ႉယွမ်ႇ ၽႂ်မၼ်းၵူၺ်း။ လွင်ႈပၢင်ပွႆးၼႆႉ မိူဝ်ႈၼႆႉ ဝၼ်းၽတ်းတီႈ 24/11/2016 ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမူႇၸေႈ မီးလွင်ႈဢုပ်ႇဢူဝ်းၵိူဝ်းၵုမ်ၵၼ်ထႅင်ႈ။ ဢွၼ်ၼႃႈၼႆႉ ယိူင်းဢၢၼ်းဝႆႉတေၸတ်းၵိုၼ်းၶွၼ်ႈၶိုၵ်ႉယႂ်ႇ၊ တေမီးပၢင်ၶေႉၶဵင်ႇၼၢင်းလဝ်း (ၼၢင်းငၢမ်း) ၸိူဝ်းၼႆႉပႃး ။


တီႈဝဵင်းပၢင်လူင် ဝဵင်းၵိုၵ်းပိုၼ်းလိၵ်ႈႁူမ်ႈမၢႆပၢင်လူင်ၼၼ်ႉ ၵေႃၽႄပႃႈတႂ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် တေၸတ်းတီႈၽႂ်တီႈမၼ်းလၢႆတီႈ။ တေဢမ်ႇႁူမ်ႈၵၼ်ၸတ်းတီႈလဵဝ်။ ယိူင်းဢၢၼ်း ပိူဝ်ႈတႃႇပူၵ်းပွင်ၼမ်ႉၵတ်ႉၵူၼ်းၼုမ်ႇ၊ ႁႂ်ႈၵူၼ်းၼုမ်ႇမီးတူဝ်ထူပ်း မေႃၵၢၼ်ငၢၼ်း။ ဝၼ်းတီႈ 29 ၶမ်ႈၶိုၼ်းလိူၼ်သိပ်းသွင်လပ်း ႁပ်ႉတွၼ်ႈပီမႂ်ႇတႆး၊ ဝၼ်းတီႈ 30 လိူၼ်ၸဵင်ႇမႂ်ႇဝၼ်းၼိုင်ႈၵေႃႈ သိုပ်ႇၸတ်းပွႆးပီမႂ်ႇတႆး ႁူမ်ႈတင်းပၢင်ပွႆး ပိုတ်ႇလုမ်းငဝ်ႈငုၼ်းလူင်သင်ၶၸိုင်ႈတႆး တီႈဝတ်ႉပိတၵၢတ်ႈ- ၼႆယဝ်ႉ ။


တီႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ပီႈၼွင်ႉၵူၼ်းမိူင်းတူင်ႇဝဵင်းလၢႆးၶႃႈ တေႁူမ်ႈၵၼ်ၸတ်းဝၼ်းတီႈ 28-29-30/11/2016 ။ ၶၢဝ်းတၢင်းပၢင်ပွႆးႁပ်ႉတွၼ်ႈပီမႂ်ႇတႆး 2111 သၢမ်ဝၼ်းၼႆႉ တေမီးပၢင်ၵိၼ်ၶဝ်ႈသုမ်လီ၊ ပၢင်ၵိၼ်တၢင်းၵိၼ်တႆး၊ ၵႃႈပၼ်ႇၵွင်ႁူမ်ႈၵၼ်၊ ၵမ်ႉထႅမ်ပၼ်ပေႃႈမႄႈၸိူဝ်းမီးလုၵ်ႈလၢင်းၼမ် 7 ၵေႃႉၶိုၼ်ႈၼိူဝ်၊ ပၢင်ၶေႉၶဵင်ႇလဵၼ်ႈႁႅင်း။ ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း ၵေႃႈတေယေႃးတူဝ်ၶဝ်ႈႁူမ်ႈ ပွၼ်ႈထမ်းတြႃး တၢင်းႁူႉတၢင်းႁၼ်ၸိူဝ်းၼႆႉ- ၼႆယဝ်ႉ ။


တီႈမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ ပၢင်ပွႆးႁပ်ႉတွၼ်ႈပီမႂ်ႇတႆးၼႆႉ ၵူၼ်းၼုမ်ႇၶဝ် ဢွၼ်ၵၼ်တူၵ်းသူး တေႃႇပေႃးထိုင်ၶမ်ႈၶိုၼ်းႁပ်ႉပီမႂ်ႇ။ တူၵ်းသူးၵႂႃႇပဵၼ်ပွၵ်ႉပဵၼ်ႁိူၼ်းတိၵ်းတိၵ်းသေ ၶမ်ႈၶိုၼ်းႁပ်ႉပီမႂ်ႇ လိူၼ်သိပ်းသွင်လပ်းၼၼ်ႉ ၵႂႃႇၺႃးပွၵ်ႉလႂ်ႁိူၼ်းၽႂ်ၵေႃႈ ႁပ်ႉပီမႂ်ႇတီႈပွၵ်ႉၼၼ်ႉႁိူၼ်းၼၼ်ႉ။ ငိုၼ်းတွင်း ၸိူဝ်းဢၼ်လႆႈမႃးတီႈၵၢၼ်တူၵ်းသူးၵေႃႈ ဢဝ်ၵႂႃႇၸႂ်ႉၶိုၼ်းၼႂ်းႁူင်းႁဵၼ်း- ၼႆယဝ်ႉ ။


တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇသမ်ႉ ပီၼႆႉမီးလွင်ႈလၢၵ်ႇလၢႆးလီၶိုၼ်ႈ၊ ပီႈၼွင်ႉတႆးၶိုၼ် တႆးလိုဝ်ႉ တႆးၸိူဝ်းၼႆႉ တေႁူမ်ႈၵၼ်ၸတ်းတီႈလဵဝ်ၵၼ်၊ တေပဵၼ်ပၢင်ပွႆးၵိုၼ်းၶွၼ်ႈယႂ်ႇ။ ပၢင်ပွႆးႁပ်ႉတွၼ်ႈပီမႂ်ႇတႆး တီႈၵဵင်းတုင်ၼႆႉ ၵႃႈပူၼ်ႉမႃး ပီႈၼွင်ႉတႆးၶိုၼ် တႆးလိုဝ်ႉလႄႈတႆးၼႆႉ ပႆႇယၢမ်ႈႁူမ်ႈၵၼ်ၸတ်းမႃးသေပွၵ်ႈ၊ ပီၼႆႉပဵၼ်ပီႁႅၵ်ႈသုတ်း-ၼႆယဝ်ႉ ။


တီႈဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇ ဢၼ်ၵမ်ႈၽွင်ႈႁွင်ႉဝႃႈမိူင်းၵိုၵ်းလႅၼ်လိၼ် (တႆး-ထႆး)ၼႆႉ ဢိင်ၼိူဝ်ငဝ်းလၢႆးမိူင်းထႆးၼၼ်ႉ ပီႈၼွင်ႉၵူၼ်းမိူင်းထႆးမွင်ၸႂ်ၸွမ်း ၸဝ်ႈၸွမ်မိူင်းထႆး ဢၼ်သဵင်ႈမုၼ် ၼွၼ်းၽႄးၵႂႃႇၵေႃႈပိူင်ၼိုင်ႈ။ ၾၢႆႇတၢင်းမိူင်းတႆးသမ်ႉ ဢိင်ၼိူဝ်ငဝ်းလၢႆးၼႂ်းၸိုင်ႈတႆးပွတ်းႁွင်ႇ မီးပၢင်တိုၵ်းသိုၵ်းသိူဝ်၊ ၵူၼ်းမိူင်းလႆႈပၢႆႈၽၢတ်ႇယၢၼ်ႁိူၼ်းယေး ပဵၼ်ၼမ်ႉႁူၼမ်ႉတႃပိူင်ၼိုင်ႈသေ လႆႈငိၼ်းဝႃႈပီၼႆႉ တေဢမ်ႇၸတ်းယဝ်ႉ-ဝႃႈၼႆ ။


တီႈဢိူင်ႇမိူင်းပူးဢွၼ်ႇ ၸႄႈဝဵင်းမိူင်းပဵင်း ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ၊ ၵေႃလိၵ်ႈလၢႆးလႄႈၾိင်ႈငႄႈတႆး မိူင်းပူးဢွၼ်ႇ တေဢွၼ်ႁူဝ်ၼမ်းၼႃႈ ပီႈၼွင်ႉၵူၼ်းမိူင်းသေ ၸတ်းႁဵတ်းတီႈဝၢၼ်ႈပႅၵ်ႇ-ၼႆယဝ်ႉ ။


ထႅင်ႈၾၢႆႇၼိုင်ႈတၢင်းၼိုင်ႈ ၼႂ်းမိူင်းထႆးၵေႃႈ ပီႈၼွင်ႉတႆးလၢႆမူႇလၢႆၸုမ်း ႁူမ်ႈၵၼ်ၸတ်းႁဵတ်းၼင်ႇၵဝ်ႇ။ ၵူၺ်းၵႃႈ ပီၼႆႉပႅၵ်ႇပိူင်ႈၵၼ်တင်းၵူႈပီပူၼ်ႉမႃး။ ဢိင်ၼိူဝ်ၸဝ်ႈၸွမ်မိူင်းထႆး သဵင်ႈမုၼ်ၼွၼ်းၽႄးၵႂႃႇသေ တီႈဝဵင်းၵဵင်းမႆႇၼၼ်ႉ   ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ တေဢွၼ်ႁူဝ်ၼမ်းၼႃႈ ပီႈၼွင်ႉတႆး ၼႂ်းဝဵင်းၵဵင်းမႆႇသေၸတ်းႁဵတ်းပၢင်ႁႅၼ်းတၢၼ်း ၸွမ်းၾိင်ႈထုင်းပုတ်ႉထသႃသၼႃ၊ ႁဵတ်းတၢင်းလီ ပိုၼ်ၽႄၵုသူလ်ၼႃးမုၼ် တီႈဝတ်ႉၵူႇတဝ်ႈ ဢိူင်ႇသီၽုမ်း။ တေမီးၵၢၼ်ၵၢပ်ႈသွမ်းသင်ၶ တႆးတဵၼ်း ဝၢၼ်းပရိတ်ႈ ယိုၼ်ႈသူင်ႇမုၼ်တၢင်းလီ ထိုင်ၸဝ်ႈမုၼ်ယႂ်ႇၶုၼ်ႁေႃၶမ်းထႆး (တူၼ်တီႈ 9) ၽူးမိၽူလ်း ဢၻုလ်းယၻဵတ်ႇ ဢၼ်ၼွၼ်းၽႄး ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ ။


တီႈဝတ်ႉၻွၼ်းၸၼ်ႇ ဢိူင်ႇတႃႈသႃလႃးၵေႃႈ ၵၢင်ၶမ်ႈၶိုၼ်းဝၼ်းတီႈ 29/11/2016 (ဝၼ်းလိူၼ်သိပ်းသွင်လပ်း) ဢၼ်ပဵၼ်ဝၼ်းႁပ်ႉတွၼ်ႈပီမႂ်ႇတႆး 2111 ၼီႈၼၼ်ႉ တေမီးပၢင်ႁႅၼ်းတၢၼ်း ဝၢၼ်းပရိတ်ႈၶၢမ်ႈပီ ပိူဝ်ႈတႃႇပဵၼ်မင်ႇၵလႃႇလီလူင်ႁူင်ႁၢင်း ပုၼ်ႈပၢင်ႈၸိူဝ်ႉၶိူဝ်းတႆး၊ ထိုင်ၵၢင်ၼႂ်မိူင်းလႅင်း လိူၼ်ၸဵင်မႂ်ႇဝၼ်းၼိုင်ႈ ဝၼ်းပီမႂ်ႇတႆးၼၼ်ႉ မီးပၢင်လွင်းသုမ်း သင်ၶၸဝ်ႈတုင်းသွမ်း၊ ပၢင်လူႇတၢၼ်း ႁဵတ်းတၢင်းလီ ၸႅၵ်ႇဝၢၵ်ႈၵုသူလ်တၢင်းလီ- ၼႆယဝ်ႉ ။


တီႈပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇၵေႃႈ ဝၼ်းတီႈ 29-30/11/2016 ပီမႂ်ႇတႆး 2111 ၼႆႉ တၢင်းသင်ၶၸဝ်ႈလႄႈ တၵ်ႉၵႃႇသတ်ႉထႃး တေႁူမ်ႈၵၼ်ႁဵတ်းပၢင်ႁႅၼ်းတၢၼ်း ႁဵတ်းတၢင်းလီ ၸႅၵ်ႇဝၢၵ်ႈၵုသူလ်ၼႃးမုၼ်မွပ်ႈယိုၼ်ႈထိုင် ၸဝ်ႈမုၼ်ယႂ်ႇၶုၼ်ႁေႃၶမ်းမိူင်းထႆး ၼင်ႇၵဝ်ႇ။ ပွႆးႁပ်ႉတွၼ်ႈပီမႂ်ႇတႆး 2111 ၼီႈလႄႈ ပၢင်ပွႆးႁႅၼ်းတၢၼ်း ၸတ်းႁဵတ်းတီႈဝတ်ႉပဵင်းလူင်၊ တေမီးဝူင်းႁိူဝ်းမႂ်ႇ လဝ်ႇမူၼ်ႈတူၼ်ႈၸႂ်ပၼ်- လႆႈႁူႉၼင်ႇၼႆ ။


ထႅင်ႈၾၢႆႇၼိုင်ႈတၢင်းၼိုင်ႈ တီႈၽႃၵၢၼ်ႉ ၸႄႈမိူင်းၶၢင် ဢၼ်ပဵၼ်တီႈပီႈၼွင်ႉၸၢဝ်းၶိူဝ်းတႆး ယူႇသဝ်းၼမ်ၼၼ်ႉၵေႃႈ ပီမႂ်ႇတႆး 2111 ၼီႈၼႆႉ ပီႈၼွင်ႉတႆးတီႈၽႃၵၢၼ်ႉ ႁူမ်ႈၵၼ်တေၸတ်းႁဵတ်း ပၢင်ပွႆးႁပ်ႉတွၼ်ႈပီမႂ်ႇတႆး။ မိူဝ်ႈလဵဝ် မီးၵၢၼ်ႁၢင်ႈႁႅၼ်းဝႆႉယဝ်ႉ- လႆႈႁူႉၼင်ႇၼႆ ။


ပၢင်ပွႆးႁပ်ႉတွၼ်ႈပီမႂ်ႇတႆးၼႆႉ မူႇၸုမ်းၸိူဝ်ႉၸၢတ်ႈၸၢဝ်းၶိူဝ်းတႆး လႆႈၸတ်းမႃးလၢႆသိုပ်ႇလၢႆပၢၼ် ၵူႈပီပီ၊ ပဵၼ်ပၢင်ပွႆးၵိုၵ်းပိုၼ်းၾိင်ႈငႄႈၾိင်ႈထုင်းတႆးဢၼ်ၼိုင်ႈ။ ၼင်ႇႁိုဝ်တေလႆႈလွင်ႈၸမ်ၸႂ်ၵၼ်တင်း ပီႈၼွင်ႉတႆးတီႈၸမ်တီႈၵႆ ၵူႈတီႈတီႈၼႆသေ ၵူႈပီဢၼ်လႆႈၸတ်းႁဵတ်းမႃးၸိူဝ်းၼႆႉၵေႃႈ လႆႈၸတ်းႁဵတ်းပႃး ပၢင်လႅၵ်ႈလၢႆႈပိုၼ်ႉႁူႉ၊ ပၢင်တၢၼ်ႈၶႆႈၵဵဝ်ႇၵပ်း လွင်ႈၾိင်ႈငႄႈၾိင်ႈထုင်းလႄႈ လွင်ႈလိၵ်ႈလၢႆးတႆးၸိူဝ်းၼႆႉၵေႃႈ လႆႈၸတ်းႁဵတ်းမႃး ။