ၶွင်ႇသီႇဢဝ်ၶိုၼ်းၸိုင်ႈတႆး (RCSS) လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း တီႈဝဵင်းလူင်တူၼ်ႈတီး၊ သပ်းလႅင်း လၢတ်ႈၼႄ လွင်ႈလႆႈႁဵတ်းသၢင်ႈၵၢၼ်ငၢၼ်းမႃး၊ တွင်ႈထၢမ်သဵင်ႁူဝ်ၸႂ်ၵူၼ်းမိူင်း ၵဵပ်းၵၢင်ၸႂ်ၵူၼ်းမိူင်း ပိူဝ်ႈတႃႇၼမ်းဢဝ်ၵႂႃႇဢုပ်ႇဢူဝ်းၵၢၼ်မိူင်း ၶၢဝ်းတၢင်းၼႃႈ ။

မိူဝ်ႈဝၼ်းၽတ်းတီႈ 06/10/2016 ၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လူင်းႁူပ်ႉထူပ်းၵူၼ်းမိူင်း တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း၊ တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး။ ပိူင်လူင်မၼ်း သပ်းလႅင်းၼႄပေႃႈမႄႈပီႈၼွင်ႉၵူၼ်းမိူင်း လွင်ႈမူႇၸုမ်းလႆႈ ႁဵတ်းသၢင်ႈၵၢၼ်ငၢၼ်းမႃး မိူၼ်ၼင်ႇလႆႈၶဝ်ႈႁူမ်ႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်၊ တွင်ႈထၢမ်သဵင်ႁူဝ်ၸႂ် ၵူၼ်းမိူင်း ၵဵပ်းၵၢင်ၸႂ်ၵူၼ်းမိူင်း ပိူဝ်ႈတႃႇၼမ်းဢဝ်ၵႂႃႇဢုပ်ႇဢူဝ်းၵၢၼ်မိူင်း ၼႂ်းပၢင်ၵုမ်ၶၢဝ်းၼႃႈ ဢမ်ႇဝႃႈပၢင်ၵုမ်လူင်ၸၼ်ႉၸိူဝ်ႉၸၢတ်ႈ ၸၼ်ႉၸိုင်ႈမိူင်း ၸိူဝ်းၼႆႉ ။


ၽူႈၼမ်းၼႂ်းၶွမ်ႊမတီႊဢုပ်ႇၵုမ်လွင်ႈငမ်းယဵၼ် RCSS/SSA  ၸဝ်းသိုၵ်းၸၢႆးငိုၼ်း လၢတ်ႈဝႃႈ- “ဢၼ်ႁဝ်းၶႃႈလႆႈမႃးၸတ်းႁဵတ်း ပၢင်ႁူပ်ႉထူပ်းၵူၼ်းမိူင်းဝၼ်းမိူဝ်ႈၼႆႉ ဢိင်ၼိူဝ်ပေႃႇလသီႇ မုၵ်ႉၸုမ်းႁဝ်း မီးဝႆႉဝႃႈ ၵေႃႇသၢင်ႈလွင်ႈငမ်းယဵၼ်ၶေႃႈၼိုင်ႈ။ ထႅင်ႈၶေႃႈၼိုင်ႈ ဢိင်ၼိူဝ်ၶၵ်ႉတွၼ်ႈၵၢၼ်ငမ်းယဵၼ် ဢၼ်လူင်ပွင်ၸိုင်ႈလႄႈႁဝ်းၶႃႈ မုၵ်ႉၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ႁူမ်ႈၵၼ်ၸတ်းႁဵတ်းမႃး၊ မိူၼ်ၼင်ႇ ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်၊ ႁဝ်းၶႃႈၸင်ႇလႆႈမႃးတီႈဝဵင်းတူၼ်ႈတီးၼႆႉသေ ၸတ်းႁဵတ်းပၢင်ႁူပ်ႉထူပ်း ၵူၼ်းမိူင်း”- လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈဝႃႈ- ပိူင်လူင်မၼ်းတႄႉ ယိူင်းဢၢၼ်းပိူဝ်ႈတႃႇမႃးထွမ်ႇသဵင်ႁူဝ်ၸႂ်ၵူၼ်းမိူင်း၊ ပေႃးႁဝ်းတေဢုပ်ႇၵၢၼ်မိူင်းၶၢဝ်းတၢင်းၼႃႈ ႁဝ်းတေလႆႈဢဝ်ၵၢင်ၸႂ်ၵူၼ်းမိူင်းဝႃႈ၊ ၵူၼ်းမိူင်းမီးၵၢင်ၸႂ်ၸိူင်ႉႁိုဝ်၊ ၶႂ်ႈႁႂ်ႈမုၵ်ႉၸုမ်းႁဝ်းၶႃႈႁဵတ်းၸိူင်ႉႁိုဝ်၊ ထုၵ်ႇလီပႆသဵၼ်ႈတၢင်းလႂ်၊ ဢမ်ႇဝႃႈၵၢၼ်မိူင်း ၵၢၼ်သိုၵ်း ၵၢၼ်မၢၵ်ႈမီး ၵၢၼ်ပူၵ်းပွင် ၵၢၼ်ၵူႈသမ်ႇသႅၼ်ပိူင်ၼႆႉ ၵူၼ်းမိူင်းမီးၵၢင်ၸႂ်ၸိူင်ႉႁိုဝ်ၸိူဝ်းၼႆႉ ႁဝ်းၶႃႈမႃးထွမ်ႇတူၺ်းသဵင်ႁူဝ်ၸႂ် ၵူၼ်းမိူင်းႁဝ်း၊ တေဢဝ်ၶေႃႈမုလ်းဢၼ်လႆႈမႃးတီႈၵူၼ်းမိူင်းတင်းသဵင်ႈ ပွတ်းဢွၵ်ႇ ပွတ်းၸၢၼ်း ပွတ်းႁွင်ႇတင်းသဵင်ႈၸိူဝ်းၼၼ်ႉမႃးႁုပ်ႈႁူမ်ႈတုမ်ၵၼ်သေ တေၶိုၼ်းၵႂႃႇတၢင်တူဝ်သေလၢတ်ႈၼႂ်း ပၢင်ၵုမ်ၶၢဝ်းတၢင်းမိူဝ်းၼႃႈ၊ ဢမ်ႇဝႃႈပၢင်ၵုမ်လူင်ၸၼ်ႉမိူင်းႁူမ်ႈတုမ်၊ ဢမ်ႇဝႃႈပၢင်ၵုမ်လူင်ၸၼ်ႉၸိူဝ်ႉၸၢတ်ႈ- ဝႃႈၼႆ ။


တီႈပၢင်ႁူပ်ႉထူပ်းၵူၼ်းမိူင်းၼႆႉ RCSS/SSA လႆႈသပ်းလႅင်းၼႄၵူၼ်းမိူင်းလွင်ႈ ပေႃႇလသီႇမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ႁႂ်ႈၵူၼ်းမိူင်းလႆႈႁပ်ႉႁူႉဝႃႈ RCSS/SSA တိုၵ်ႉပႆသဵၼ်ႈတၢင်းလႂ်၊ တိုၵ်ႉႁဵတ်းသၢင်ႈၸိူင်ႉႁိုဝ်ယူႇၸိူဝ်းၼႆႉ။ ပႃးၸဵမ်ၶၵ်ႉတွၼ်ႈၵၢၼ်ငမ်းယဵၼ် ၼႂ်းၶၢဝ်းတၢင်း 5 ပီၼႆႉ RCSS/SSA လႆႈႁဵတ်းသင်ၽွင်ႈလၢႆလၢႆ၊ မိူၼ်ၼင်ႇၵၢၼ်ဢုပ်ႇဢူဝ်းၵၢၼ်မိူင်း ၵၢၼ်သိုၵ်း ၵၢၼ်ပူၵ်းပွင်ၵူႈလွင်ႈလွင်ႈ၊ ႁဝ်းၶႃႈမီးလွင်ႈယၢပ်ႇၽိုတ်ႇၸိူင်ႉႁိုဝ်၊ မီးလွင်ႈၶိုပ်ႈၼႃႈၶိုၼ်ႈယႂ်ႇမႂ်ႇသုင်ၸိူင်ႉႁိုဝ် ၸိူဝ်းၼႆႉၵေႃႈ လၢတ်ႈပႃး ။


“ ထႅင်ႈတွၼ်ႈၼိုင်ႈ ႁဝ်းၶႃႈၶိုၼ်းမႃးတေႃႉတႆႇၶႆႈၼႄၵၼ်ဝႃႈ ပၢင်ၵုမ်လူင်ငမ်းယဵၼ် ၸၼ်ႉမိူင်းႁူမ်ႈတုမ် ဢၼ်ၸတ်းၵႂႃႇမိူဝ်ႈၵမ်းတီႈ 1 မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇၼၼ်ႉ ၶဝ်ၸတ်းႁဵတ်းၸိူင်ႉႁိုဝ်ၽွင်ႈ၊ ထိုင်မႃးပၢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁူမ်ႈၵၼ်သေၸတ်းႁဵတ်း ပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21 ၼႆႉ ပဵၼ်ၸိူင်ႉႁိုဝ်။ မုၵ်ႉၸုမ်းႁဝ်းၶႃႈသမ်ႉ ၵႂႃႇတၢင်ႇထိုင်ၸိူင်ႉႁိုဝ်၊ ငဝ်းလၢႆးပၢင်ၵုမ်လူင် 2 ပွၵ်ႈၼႆႉၵေႃႈ ႁဝ်းမႃးတေႃႉတႆႇၶႆႈၼႄၵၼ်-ၸဝ်ႈသိုၵ်းၸၢႆးငိုၼ်း လၢတ်ႈထႅင်ႈၼင်ႇၼႆ ။


လိူဝ်သေၼၼ်ႉ ၽူႈမီးပုၼ်ႈၽွၼ်းၼႂ်း RCSS/SSA ၾၢႆႇၵပ်းသၢၼ်လူင်ပွင်ၸိုင်ႈမၢၼ်ႈ၊ ၾၢႆႇၵပ်းသၢၼ်ၵူၼ်းမိူင်း၊ ၾၢႆႇၶွမ်ႊမတီႊလူလွမ်ၵုမ်းတူၺ်းလွင်ႈငမ်းယဵၼ် (JMC) ၸိူဝ်းၼႆႉၵေႃႈ သပ်းလႅင်းလၢတ်ႈၼႄပႃးၸွမ်း ။


ပီႈၼွင်ႉၵူၼ်းမိူင်း ၸိူဝ်းမႃးၶဝ်ႈႁူမ်ႈထွမ်ႇငိၼ်း တီႈပၢင် RCSS/SSA ႁူပ်ႉထူပ်းၵူၼ်းမိူင်း သပ်းလႅင်းလၢတ်ႈ ၼႄၵူၼ်းမိူင်းပွၵ်ႈၼႆႉ မီးၵူၼ်းမိူင်းၼႂ်းဝဵင်းတူၼ်ႈတီး၊ ထုင်ႉၼွင်ႁၢႆးယႃႈ၊ မိူင်းပွၼ်၊ ႁူဝ်ပူင်း၊ လွၵ်ႈၸွၵ်ႇ၊ မိူင်းပဵင်းၸိူဝ်းၼႆႉ။ ၼႂ်းတူၼ်ႈတီးၼႆႉ ပႃးၾၢႆႇၸုမ်းတူင်ႇဝူင်းၵူၼ်း၊ ၵေႃလိၵ်ႈလၢႆးလႄႈၾိင်ႈငႄႈတႆး၊ ၸုမ်းၵူၼ်းၼုမ်ႇ ၸိူဝ်းၼႆႉ။ ၼႂ်းပႃႇတီႇၵၢၼ်မိူင်း မီးမိူၼ်ၼင်ႇပႃႇတီႇသိူဝ်ၽိူၵ်ႇ (SNDP) ၊ ပႃႇတီႇႁူဝ်သိူဝ် (SNLD) ၸိူဝ်းၼႆႉၶဝ်ႈႁူမ်ႈ- ၼႆယဝ်ႉ ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ဢွၼ်ၼႃႈၼႆႉ ပူၼ်ႉမႃးမိူဝ်ႈဝၼ်းတီႈ 04/10/2016 လူင်းပိုၼ်ႉတီႈ ၸတ်းပၢင်ႁူပ်ႉထူပ်းၵူၼ်းမိူင်း တီႈဝဵင်းၼမ်ႉၸၢင်၊ မီးၸုမ်းတူင်ႉၼိုင်တူင်ႇဝူင်း ၵူၼ်းတႆး၊ ၸုမ်းပႃႇတီႈ ၵၢၼ်မိူင်းလႄႈ ပီႈၼွင်ႉၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈလဵပ်ႈႁဵၼ်း 250 ပၢႆ။ ပူၼ်ႉမႃး မိူဝ်ႈဝၼ်းတီႈ 2 လူင်းႁူပ်ႉထူပ်းပီႈၼွင်ႉၵူၼ်းမိူင်း ၸႄႈဝဵင်းလၢႆးၶႃႈ တီႈဝတ်ႉၵျွင်း တေႃႇႁူဝ်ဝဵင်း။ ဝၼ်းတီႈ 3 ႁူပ်ႉထူပ်းၵူၼ်းမိူင်း တီႈၵျွင်းၵၢင်ဝဵင်း သႅၼ်ဝီ ၸိုင်ႈတႆးပွတ်းႁွင်ႇ။ ၼွၵ်ႈသေၼၼ်ႉ ဝၼ်းတီႈ 4 ႁူပ်ႉထူပ်းပီႈၼွင်ႉၵူၼ်းမိူင်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ၸိူဝ်းၼႆႉ ။


ပၢင်ႁူပ်ႉထူပ်းၵူၼ်းမိူင်းပွၵ်ႈၵမ်းၼႆႉ ယူႇတီႈ RCSS/SSA  ၸတ်းႁဵတ်းပဵၼ် 3 ၸုမ်းသေ လူင်းႁူပ်ႉထူပ်း ၵူၼ်းမိူင်း ၼႂ်းမိူင်းတႆး 3 ပွတ်းတွၼ်ႈ  ပွတ်းဢွၵ်ႇၶူင်း၊ ပွတ်းၸၢၼ်း လႄႈ ပွတ်းႁွင်ႇ တႃႇၶၢဝ်းတၢင်း 10 ဝၼ်းပၢႆ-ၼႆယဝ်ႉ ။