ဝၼ်းဢွၵ်ႇဝႃႇသႃ ပီၼႆႉ FM 99 Mhz ဢွၼ်ႁူဝ်ၼုမ်ႇႁၢႆးၸၢႆးယိင်း 50 ပၢႆၵႂႃႇၼွမ်းတမ်ႇလမ်ႇႁူဝ် ႁုၼ်ႇႁၢင်ႈ ၸဝ်ႈၶုၼ်ၵၼ်း ။

ဝၼ်းတီႈ 16/10/2016 ယၢမ်း 11:00 မူင်း ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99.00 MHZ (ႁူင်းပွႆႇသဵင်ပၼ်ပိုၼ်ႉႁူႉၸၢဝ်းၶိူဝ်း) ဢွၼ်ႁူဝ်ၼမ်းၼႃႈ ပီႈၼွင်ႉတႆး ၼႂ်းၵဵင်းမႆႇ ႁူမ်ႈၵၼ် ၵၼ်ႇတေႃးၼပ်ႉယမ်ၵႃရႃဝ ႁုၼ်ႇႁၢင်ႈ ၸဝ်ႈၶုၼ်ၵၼ်း ၼႂ်းဝၼ်းဢွၵ်ႇဝႃႇသႃ တီႈၵူတ်ႉၸၼ်ႉ ႁိမ်းထၢတ်ႈ လွႆသုထဵပ်ႈ ႁၢင်ႇၵႆမွၵ်ႈ 1 ၵီးလူဝ်း ၵဵင်းမႆႇ ၸိုင်ႈထႆး။ ၼင်ႇႁိုဝ် ပီႈၼွင်ႉတႆး ပေႃး တေ လႆႈႁပ်ႉႁူႉလွင်ႈပိုၼ်းၶုၼ်ၵၼ်း၊ ၵေႃႉလႆႈၶဝ်ႈႁူမ်ႈႁဵတ်းသၢင်ႈ သဵၼ်ႈတၢင်း ၶိုၼ်ႈထၢတ်ႈလွႆ သုထဵပ်ႈလႄႈ ႁႂ်ႈပီႈၼွင်ႉတႆး ဢွၼ်ၵၼ်တွင်းၵိုမ်းႁဵတ်းသၢင်ႈလုမ်းလႃးၵႂႃႇ ဝႃႈၼႆ ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99.00 MHZ လၢတ်ႈဝႃႈ “ ဝၼ်းမိူဝ်ႈၼႆႉ တေလႆႈဝႃႈ ပဵၼ်ဝၼ်းလီ ဝၼ်းမျၢတ်ႈ ဝၼ်းဢွၵ်ႇဝႃႇသႃ ဢၼ်ပဵၼ်ဝၼ်းၾိင်ႈထုင်း တႆးႁဝ်း၊ ႁဝ်းၶႃႈ ဢွၼ်ၵၼ်မႃးယုၵ်ႉယွင်ႈ ၼပ်ႉယမ်ၵႃရႃဝ ၵၼ်ႇတေႃး ၽူႈယႂ်ႇၵူၼ်းလူင် တႆးႁဝ်းဢၼ်ၵိုၵ်း ပိုၼ်းၼႂ်း ၵဵင်းမႆႇ၊ ၶုၼ်ၵၼ်းၼႆႉ ပႃးၼႂ်းသိူၵ်ႈပိုၼ်း ႁဵတ်းသဵၼ်ႈတၢင်းၶိုၼ်ႈလွႆသုထဵပ်ႈ ၸဝ်ႈၼိုင်ႈ ၼႂ်းတႆးႁဝ်း” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ၼင်ႇႁိုဝ် ပေႃးတေလႆႈၵိုၵ်းပိုၼ်း ၵႂႃႇဝၼ်းတႃမိူဝ်းၼႃႈ သမ်ႉပေႃးတေ လႆႈပိုၼ်ၽႄႈႁူႉၸၵ်းၵၼ် လွင်ႈသၢႆၼိူဝ်ႉသၢႆၸႂ် ပီႈၼွင်ႉတႆးလႄႈ ပီႈၼွင်ႉၵဵင်းမႆႇ၊ မၼ်းဢမ်ႇၸႂ်ႈဝႃႈ ပဵၼ်မႃးၶၢဝ်းတၢင်း 10-20 ပီၼႆႉၵူၺ်း မၼ်းပဵၼ်မႃးတင်းႁိုင်ယဝ်ႉ။ ၵွပ်ႈၼႆလႄႈ ႁဝ်းၶႃႈထုၵ်ႇလီ ယုၵ်ႉယွင်ႈလႄႈ သိုပ်ႇႁဵတ်းၵႂႃႇ၊ မုင်ႈမွင်းဝႃႈ ပီႈၼွင်ႉႁဝ်းၶႃႈတေပွင်ႇၸႂ်လႄႈ သိုပ်ႇပိုၼ်ၽႄႈၵႂႃႇ၊ ပေႃးမိူဝ်းၼႃႈထႃႈပၢႆမႃး ႁဝ်းၶႃႈတေၸၢင်ႈႁဵတ်းၵႂၢင်ႈၶႂၢင်လိူဝ်ၼႆႉသေ ႁႂ်ႈဢွၼ်ၵၼ်တူၺ်းလူၵႂႃႇ၊ ဢၼ်ၼႆႉ ပဵၼ်ပုၼ်ႈၽွၼ်းတႆးႁဝ်းၶႃႈၵူႈၵေႃႉ” ဝႃႈၼႆ ။


လိူဝ်သေၼၼ်ႉ ပီႈၼွင်ႉတႆးၸိူဝ်းၶဝ်ႈႁူမ်ႈ ဢွၼ်ၵၼ်ၵႃရႃဝ ထိုင်မုၼ်ငဝ်းမၼ်းၸဝ်ႈ ၸွမ်းၼင်ႇ ၾိင်ႈႁိတ်ႈ ႁွႆးတႆး၊ တိူင်ႇၵၢဝ်ႇဝိၺၢၼ်ႇၶွၼ်ငဝ်းမၼ်းၸဝ်ႈ ႁွတ်ႈသူႇတီႈၵတ်းယဵၼ် ဝႃႈၼႆ ။


ၼၢင်းၸၢမ်ပၢဝ်း ၸွႆႈၽူႈၶပ်းၶိုင် လၢတ်ႈဝႃႈ “ ႁဝ်းၶႃႈယိူင်းဢၢၼ်းဝႆႉ ဢဵၼ်ႁႅင်းၵူၼ်း မွၵ်ႈ 100 ပၢႆ ၵူၺ်းၵႃႈ ႁၼ်ပီႈၼွင်ႉတႆးႁဝ်း မႃးၶဝ်ႈႁူမ်ႈဢေႇဝႆႉ။ ယွၼ်ႉဝႃႈ ၾူၼ်တူၵ်းႁၢဝ်ႈႁႅင်း သဵၼ်ႈ တၢင်း ၶိုၼ်ႈၵေႃႈသမ်ႉမိုၼ်ႈ၊ ပီႈၼွင်ႉႁဝ်းမၢင်ၵေႃႉဢမ်ႇၸၢင်ႈမႃးၶဝ်ႈႁူမ်ႈၸွမ်းႁဝ်းၶႃႈၵေႃႈ မီးၼမ်၊ ယုမ်ႇယမ်ဝႃႈ ပီႈၼႃႈမႃး ပီႈၼွင်ႉတႆးႁဝ်းတေဢွၼ်ၵၼ်မႃးၶဝ်ႈႁူမ်ႈၼမ်ယူႇ” ဝႃႈၼႆ ။


ပိုၼ်းပဵၼ်မႃး လွင်ႈလႆႈသၢင်ႈသဵၼ်ႈတၢင်းၶိုၼ်ႈလွႆသုထဵပ်ႈၼႆႉ ပႃးၸၢဝ်းတႆး ၸဝ်ႈၶုၼ်ၵၼ်း (သၢင်ႇ ၵၼ်ႇၼ) ပဵၼ်ၵူၼ်းၸႃႇတိ ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ၵူပ်ႉၵူႈၵၼ်တင်း ၼၢင်းဝၼ်းလီ ၵူၼ်းမိူင်းၵဵင်းမႆႇ ၸိုင်ႈထႆး ဝႃႈၼႆ ။


သဵၼ်ႈတၢင်းၶိုၼ်ႈလွႆသုထဵပ်ႈၼႆႉ လႆႈၵေႃႇသၢင်ႈႁဵတ်းမႃး တႄႇဢဝ် ဝၼ်းတီႈ 08/11/1934 ၸဝ်ႈၶူးဝႃးသီဝိၶျႆး ဢွၼ်ႁူဝ်ၼမ်းၼႃႈ ႁူမ်ႈပႃးၵူၼ်းမိူင်းၵဵင်းမႆႇ တင်းသဵင်ႈ ႁဵတ်းသၢင်ႈမႃး ၼႂ်းၶၢဝ်း တၢင်း 1 ပီပၢႆ တေႃႇႁွတ်ႈထိုင်တီႈ(ၵူတ်ႉၸၼ်း)ၶူင်ႉၸၼ်း ယၢၼ်ၵႆထၢတ်ႈလွႆသုထဵပ်ႈ 1 ၵီးလူဝ်း။ ၽိူဝ်ႇထိုင်မႃး တီႈၵူတ်ႉငွၵ်းသွၵ်ႇသမ်ႉၸၼ်းထႅင်ႈလႄႈ  ႁႅင်းငိုၼ်းႁႅင်းၵူၼ်းမူတ်း သဵင်ႈၼႆလႄႈ ဢမ်ႇပွင်ပဵၼ်လႆႈထႅင်ႈ။ ၶုၼ်ၵၼ်း ၸင်ႇလႆႈဢဝ် ငိုၼ်းတွင်းသုၼ်ႇတူဝ်ၸဝ်ႈၵဝ်ႇ ပႃႈၸဵမ် ၸၢင်ႉ ၶိူင်ႈမိုဝ်း ၵူႈဢၼ်ဢၼ် ႁူမ်ႈ လူၺ်ႈလုၵ်ႈၼွင်ႉ မၼ်းၸဝ်ႈ ဢဝ်ပုၼ်ႈၽွၼ်းၵေႃႈသၢင်ႈ သဵၼ်ႈတၢင်း တေႃႇထိုင်ထၢတ်ႈလွႆသုထဵပ်ႈ၊ ႁပ်ႉပဵၼ်ၸဝ်ႈတႃႇၼလူင်ႁဵတ်းသၢင်ႈ ယဝ်ႉတူဝ်ႈၵႂႃႇ ဝႃႈၼႆ။ ၸဝ်ႈၶူးဝႃး သီဝိၶျႆး ၸင်ႇလႆႈမၵ်းမၼ်ႈ ပၼ်တီႈၵူတ်ႉၸၼ်း/ၶူင်ႉၸၼ်းၼၼ်ႉ တၢင်ႇပၼ်ၸိုဝ်ႈဝႃႈ ၶူင်ႉၶုၼ်ၵၼ်း ဝႃႈၼႆ။ယွၼ်ႉၼၼ် ၶဝ်ႈပႃးသဵၼ်ႈသၢႆမၢႆ သိူၵ်ႈပိုၼ်း ၽူႈၵေႃႇသၢင်ႈသဵၼ်ႈတၢင်း ၶိုၼ်ႈလွႆ ထၢတ်ႈသုထဵပ်ႈၵေႃႉၼိုင်ႈ၊ ထၢတ်ႈလွႆသုထဵပ်ႈၼႆႉ ပဵၼ်ထၢတ်ႈ ၸိုဝ်ႈသဵင်ယႂ်ႇ ၼႂ်းမိူင်းၸိုင်ႈ ထႆး ဢၼ်ၼိုင်ႈ ။