ၵူၼ်းၼုမ်ႇၸၢဝ်းၶိူဝ်း တီႈဝဵင်းပၢင်လူင် ႁူမ်ႈၵၼ်ၸတ်းႁဵတ်း ပၢင်ယွၼ်းသူးပၼ် ႁႂ်ႈပၢင်တိုၵ်းၼႂ်းၸိုင်ႈတႆး ၵိုတ်းဝႆးဝႆး တၢင်းၼႃႈထၢတ်ႈၸေႇၻီႇ မႁႃႇရတ်ႉထႃႇၽိတႃႇမၵ်ႉၵီႇ (ၵွင်းမူးသူၺ်ႇတၵူင်ႇ)ဝဵင်းပၢင်လူင်၊ ၼႂ်းဝၢင်းသဝ်ႁိၼ် ဝဵင်းပၢင်လူင် ။

ပၢင်ယွၼ်းသူးၼႆႉ လႆႈၸတ်းႁဵတ်းမိူဝ်ႈဝၼ်းတီႈ 17/10/2016 ယၢမ်းၵၢင်ၶမ်ႈ 7 မူင်း၊ မီးဢဵၼ်ႁႅင်းၵူၼ်းၼုမ်ႇ ပၢင်လူင် မႃးၶဝ်ႈႁူမ်ႈယွၼ်းသူးမွၵ်ႈ 100 ပၢႆ။ ယွၼ်းသူးပၼ်ပီႈၼွင်ႉၵူၼ်းပၢႆႈၽေး ၼႂ်းမိူင်းတႆး ဢၼ်ႁူပ်ႉထူပ်းတၢင်းယၢပ်ႇၽိုတ်ႇယူႇ ယၢမ်းလဵဝ် ႁႂ်ႈၸဵဝ်းလႆႈယူႇမူၼ်ႈသိူဝ်းၵတ်းယဵၼ်။ ဝၢႆးယွၼ်းသူးယဝ်ႉ ႁွင်ႉၽဵင်းၵႂၢမ်းႁႂ်ႈၵိုတ်းပၢင်တိုၵ်း ၸိူဝ်းၼႆႉ- ၼႆယဝ်ႉ ။


ၼၢင်းၸၢမ်ၼူၼ်းမူဝ် ၵူၼ်းၼုမ်ႇပၢင်လူင်လၢတ်ႈဝႃႈ- ပေႃးပဵၼ်ပၢင်တိုၵ်းၼႆ ၵူၼ်းမိူင်းၵေႃႈတေဢမ်ႇမီး တၢင်းသိူဝ်းၸႂ်လႆႈ။ ၵူၼ်းမိူင်းဢၼ်ဢမ်ႇမီးတၢင်းၽိတ်းသင်ၼႆႉ ဢမ်ႇၶႂ်ႈႁႂ်ႈတူၵ်းပဵၼ်ယိူဝ်ႇပၢင်တိုၵ်းသိုၵ်းသိူဝ်၊ ၶႂ်ႈႁႂ်ႈၵူၼ်းမိူင်းလႆႈယူႇႁိူၼ်းယေး ဝၢၼ်ႈဢိူင်ႇတူဝ်ၵဝ်ႇၵတ်းၵတ်းယဵၼ်ယဵၼ်၊ ဢမ်ႇၶႂ်ႈႁႂ်ႈလႆႈပၢႆႈၼီ လႆႈႁွင်ႉလႆႈႁႆႈ လႆႈမႆႈၸႂ်ယွၼ်ႉပၢင်တိုၵ်း။ ယွၼ်ႉပိူဝ်ႈၼႆလႄႈ ၵူၼ်းၼုမ်ႇပၢင်လူင် ၸင်ႇလႆႈၸႂ်ၵၼ်တႅပ်းတတ်း မႃးၸတ်းႁဵတ်းပၼ်ပၢင်ယွၼ်းသူး ဝၼ်းတီႈ 17 ၵၢင်ၶမ်ႈၼႆႉ၊ ႁႂ်ႈၵိုတ်းပၢင်တိုၵ်းၼႂ်းမိူင်းတႆးဝႆးဝႆး- ဝႃႈၼႆ ။


ၸၢႆးႁွမ်သိုၵ်း ၵူၼ်းၼုမ်ႇပၢင်လူင် ၵေႃႈလၢတ်ႈဝႃႈ- လႆႈတုၵ်းယွၼ်း ႁႂ်ႈၾၢႆႇတၢင်းတပ်ႉသိုၵ်းလူင်ပွင်ၸိုင်ႈမၢၼ်ႈ ၵိုတ်းပၢင်တိုၵ်းပၼ်ဝႆးဝႆး၊ ယႃႇပေႁႅၼ်းသိုၵ်းမႃးလေႃႇတိုၵ်းၸၢဝ်းၶိူဝ်း။ ၼွၵ်ႈသေၼၼ်ႉ ၵူၼ်းၼုမ်ႇပၢင်လူင် ယွၼ်းသူးၽႄႇမဵတ်ႉတႃႇပၼ် ပီႈၼွင်ႉၵူၼ်းပၢႆႈၽေးသိုၵ်း ႁႂ်ႈလႆႈပွၵ်ႈမိူဝ်းၶိုၼ်းႁိူၼ်းၽႂ်မၼ်း၊ ႁႂ်ႈဢဝ်လၢႆး ၵတ်းယဵၼ်ၵႄႈလိတ်ႈပၼ်ႁႃၵၢၼ်မိူင်း၊ ယႃႇဢဝ်လၢႆးၵၢၼ်သိုၵ်းသိူဝ်သေ ၵႄႈလိတ်ႈပၼ်ႁႃၵၢၼ်မိူင်း ၸိူဝ်းၼႆႉ ။


“ ႁဝ်းၶႃႈၵေႃႈ လႆႈၵႂႃႇဢႅဝ်ႇယဵမ်ႈထိုင်ဢွင်ႈတီႈ ဢၼ်ၵူၼ်းပၢႆႈၽေးသိုၵ်းၶဝ် ဢွၼ်ၵၼ်မႃးယူႇမႃးၵိၼ်၊ ႁဝ်းၶႃႈလႆႈႁၼ်ဝႃႈ ၶဝ်ႁူပ်ႉထူပ်းတၢင်းယၢပ်ႇၽိုတ်ႇတႄႉတႄႉ၊ ၵွပ်ႈၼၼ်လႄႈ ၼင်ႇႁိုဝ်ၶဝ်ပေႃးတေ လႆႈၸဵဝ်းပွၵ်ႈၶိုၼ်းႁိူၼ်းဝႆးဝႆးၼၼ်ႉ ႁဝ်းၶႃႈလႆႈမႃးတုၵ်းယွၼ်း တင်းလႆႈမႃးယွၼ်းသူးၸွမ်းၵၼ်”- ဝႃႈၼႆ ။


ပၢင်ယွၼ်းသူးပၼ် ႁႂ်ႈၵိုတ်းပၢင်တိုၵ်းဝႆးဝႆး (17/10/2016)ၼႆႉ ၼွၵ်ႈၼိူဝ်သေတီႈပၢင်လူင်ယဝ်ႉ ၽွင်းၶၢဝ်းယၢမ်းလဵဝ်ၵၼ်ၼႆႉ ယင်းလႆႈၸတ်း ၼႂ်းၸိုင်ႈတႆးထႅင်ႈလၢႆလၢႆတီႈ မိူၼ်ၼင်ႇၼႂ်းၸိုင်ႈတႆးပွတ်းၸၢၼ်း တီႈဝဵင်းလူင်တူၼ်ႈတီး၊ ဝဵင်းၶူဝ်လမ် (ၶူဝ်ၶမ်း)။ ၼႂ်းၸိုင်ႈတႆးပွတ်းႁွင်ႇ တီႈဝဵင်းၵျွၵ်ႉမႄး၊ ဝဵင်းၼမ်ႉလၼ်ႈ။ ၼွၵ်ႈသေၼၼ်ႉ တီႈၼႂ်းတိူင်းၸႄႈၵႅင်း၊ တိူင်းမၼ်းတလေး ၸိူဝ်းၼႆႉၵေႃႈလႆႈၸတ်းႁဵတ်း-ၼႆယဝ်ႉ ။