ပီႈၼွင်ႉတႆး ၼႂ်းၵဵင်းမႆႇ တီႈၸမ်/ၵႆ တေဢွၼ်ၵၼ်ၵႂႃႇၶူၼ်ႉၶႂႃႉလဵပ်ႈႁဵၼ်း လွင်ႈပိုၼ်းၶုၼ်ၵၼ်း ၸၢဝ်းတႆး ၵေႃႉႁူမ်ႈလူႇတႃႇႁဵတ်းသၢင်ႈပႃး သဵၼ်ႈတၢင်းၶိုၼ်ႈလွႆႈသုထဵပ်ႈ ။

ဝၼ်းတီႈ 16/10/2016 ယၢမ်းၵၢင်ၼႂ် 10:00 မူင်း ၸၢႆးသႅင်မိူင်း မင်းၵွၼ်း လႄႈ ႁူမ်ႈလူၺ်ႈပီႈ ၼွင်ႉတႆးႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ တေႁူမ်ႈၵၼ် ၵႂႃႇၶူၼ်ႉၶႂႃႉ လဵပ်ႈႁဵၼ်း ပိုၼ်းၶုၼ်ၵၼ်း ၽူႈၶဝ်ႈႁူမ်ႈလူႇတၢၼ်းၼ်ႂ်းၵၢၼ်ၵေႃႇသၢင်ႈသဵၼ်ႈတၢင်းၶိုၼ်ႈလွႆသုထဵပ်ႈ။ ၶုၼ်ၵၼ်းၼႆႉ ပဵၼ်ၵူၼ်း ၸႃႇတိ ၸႄႈဝဵင်းမွၵ်ႇမႆႇ ၸိုင်ႈတႆး ပွတ်းၸၢၼ်း။  သဵၼ်ႈတႃႈသၢႆတၢင်း ၶိုၼ်ႈထၢတ်ႈ လွႆသုထဵပ်ႈ ပဵၼ်ထၢတ်ႈၸိုဝ်ႈသဵင်ယႂ်ႇ ၼႂ်းမိူင်းထႆးဢၼ်ၼိုင်ႈ ၼႂ်းဝဵင်းၵဵင်းမႆႇလႄႈ ၼင်ႇႁိုဝ် ပီႈၼွင်ႉၵူၼ်း မိူင်းတႆးပေႃးတေလႆႈႁပ်ႉႁူႉ လွင်ႈပဵၼ်မႃး သဵၼ်ႈတၢင်း ၶိုၼ်ႈထၢတ်ႈ လွႆသုထဵပ်ႈၼႆႉ ပႃးတႆးၸွႆႈ ႁဵတ်းသၢင်ႈမႃးယူႇ ၼႆၼၼ်ႉ ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁွင်ႈၵၢၼ် ႁူင်းပွႆႇသဵင် FM 99 MHZ (ႁူင်းပွႆႇသဵင်ပၼ်ပိုၼ်ႉႁူႉ ႁႅင်းၵၢၼ်) လၢတ်ႈဝႃႈ “ ဢွၼ်တၢင်းသုတ်း ႁဝ်းတေဢွၼ်ၵၼ်ၵႂႃႇ ၵၼ်ႇတေႃးၵႃရဝ ၽူႈယႂ်ႇၵူၼ်း လူင် ပႃးလူၺ်ႈဢၼ်ထွတ်ႈဢၼ်မျၢတ်ႈ ယွၼ်ႉဝႃႈ ပဵၼ်ဝၼ်းဢွၵ်ႇဝႃႇသႃၵေႃႈၸႂ်ႈ၊ ထႅင်ႈၶေႃႈ ၼိုင်ႈသမ်ႉ ႁဝ်းၶႃႈတေၵႂႃႇ ၶူၼ်ႉၶိုၼ်းပိုၼ်း ၸဝ်ႈၶုၼ်ၵၼ်း ၵေႃႉဢၼ်ပႃးႁူမ်ႈၼႂ်း သိူၵ်ႈပိုၼ်း လွင်ႈႁဵတ်းသဵၼ်ႈတၢင်း တႄႇတိၼ်လွႆသုထဵပ်ႈ တေႃႇထိုင် တီႈထၢတ်ႈလွႆသုထဵပ်ႈၼၼ်ႉ ပႃးပီႈၼွင်ႉ တႆးႁဝ်းၵေႃႈၼိုင်ႈ ဢၼ်လႆႈၸွႆႈႁဵတ်းမႃး။ ၵွပ်ႈၼႆလႄႈ မၼ်းပဵၼ်သိူၵ်ႈပိုၼ်း ဝဵင်းၵဵင်းမႆႇ ဢၼ်ၼိုင်ႈ ဢၼ်ပႃးတႆးႁဝ်း ၸင်ႇလႆႈဢွၼ်ဢဝ်ၵူၼ်းၼုမ်ႇပီႈၼွင်ႉတႆးႁဝ်းၵႂႃႇလဵပ်ႈႁဵၼ်း ပိုၼ်း လႄႈ ႁဵတ်းၵၢၼ်ၵူႉသူလ်ႇတၢင်းလီ ၼႂ်းဝၼ်းဢွၵ်ႇဝႃႇသႃၸွမ်းၵၼ်” ဝႃႈၼႆ ။


ၼၢင်းၸၢမ်ပဝ်း ၽူႈၸွႆႈပွင်ၵၢၼ် လၢတ်ႈဝႃႈ “ တေႃႈလဵဝ် မီးပီႈၼွင်ႉႁႅင်းၵၢၼ်တႆးႁဝ်း ပၼ်ၸိုဝ်ႈ သဵၼ်ႈသၢႆမၢႆမႃး မီးႁိမ်း 100 ယဝ်ႉ ဢၼ်တေမိူဝ်းၶဝ်ႈႁူမ်ႈၼႂ်းဝၼ်းတီႈ 16 တေထိုင်ၼႆႉ၊ ယူႇတီႈ ႁဝ်းၶႃႈသေ တုၵ်းယွၼ်းထိုင် ပီႈၼွင်ႉတႆးႁဝ်း ၸိူဝ်းတေၶဝ်ႈႁူမ်ႈလဵပ်ႈ ႁဵၼ်းလွင်ႈပိုၼ်း ၶုၼ်ၵၼ်း လႄႈ ႁဵတ်းၵၢၼ်လီၵုသူလ်တၢင်းလီ တီႈထၢတ်ႈလွႆသုထဵပ်ႈၼၼ်ႉ ႁႂ်ႈဢွၼ်ၵၼ် ၼိုင်ႈၶူဝ်းတႆးၵူႈၵေႃႉ ဢမ်ႇဝႃႈယိင်း ဢမ်ႇဝႃႈၸၢႆး” ဝႃႈၼႆ ။


ဝၼ်းတီႈ 16 ယၢမ်းၵၢင်ၼႂ် 10:00 မူင်း ၶွၼ်ႈတုမ်ၵၼ်တီႈ ႁုၼ်ႁၢင်ႈၸဝ်ႈၶူးဝႃး သီဝိၶျႆး တိၼ်လွႆ သုထဵပ်ႈ၊ ယၢမ်းၵၢင်ၼႂ် 11:00 မူင်းသမ်ႉ ဢွၼ်ၵၼ်ၶိုၼ်ႈၵႂႃႇတီႈႁုၼ်ႇႁၢင်ႈၸဝ်ႈၶုၼ်ၵၼ်း ဢၼ်မီး တီႈၶူင်ႉၸၼ်း တီႈၸမ်တေထိုင်တီႈထၢတ်ႈလွႆသုထဵပ်ႈ၊ တေဢွၼ်ၵၼ်ၵႃရဝ ၼပ်ႉထိုဝ် ႁုၼ်ႇႁၢင်ႈၶုၼ်ၵၼ်း(သၢင်ႇၵႃႇၼ)၊ သိုပ်ႇၼၼ်ႉ ၸၢႆးသႅင်မိူင်း မင်းၵွၼ်း လႄႈ ၸဝ်ႈၼႃႈတီႈ ၾၢႆႇမူလၼိထိ လွႆသုထဵပ်ႈ တေသပ်းလႅင်းလၢတ်ႈၼႄ လွင်ႈပဵၼ်မႃး ပိုၼ်းၶုၼ်ၵၼ်း ႁဵတ်းႁိုဝ်သမ်ႉ လႆႈႁူမ်ႈႁဵတ်း သၢင်ႈသဵၼ်ႈတၢင်းမႃး။ ဝၢႆးၼၼ်ႉ တေသိုပ်ႇၶိုၼ်ႈၵႂႃႇထိုင် ထၢတ်ႈလွႆသုထဵပ်ႈသေ ႁဵတ်းၵုသူလ် တၢင်းလီ ၼႂ်းဝၼ်းဢွၵ်ႇဝႃႇသႃလႄႈ ႁူမ်ႈၵၼ်တႆႈတဵၼ်း ယွၼ်းသူးတိူင်ႇၵၢဝ်ႇ ပၼ်ၸဝ်ႈမုၼ်ယႂ်ႇၶုၼ်ႁေႃၶမ်းထႆး တီႈလႆႈလူႉသဵင်ႈၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇၼၼ်ႉ ဝႃႈၼႆ ။