ၶွင်ႇသီႇဢဝ်ၶိုၼ်းၸိုင်ႈတႆး (RCSS) လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း တီႈ ဝတ်ႉဢူးယဵၼ်ႇ ဝဵင်းမိူင်းတူၼ်၊ သပ်းလႅင်း လၢတ်ႈၼႄ လွင်ႈလႆႈႁဵတ်းသၢင်ႈၵၢၼ်ငၢၼ်းမႃး ဢိၵ်ႇ ၽွၼ်းၸႃႉ ယႃႈမဝ်းၵမ် ၸိူဝ်းၼႆႉ ။

ဝၼ်းတီႈ 13/10/2016 ၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လူင်းႁူပ်ႉထူပ်းၵူၼ်းမိူင်း တီႈဝတ်ႉဢူးယဵၼ် ဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်း ဢွၵ်ႇ။ မီးၽူႈယႂ်ႇၵူၼ်းလူင်၊ ၸဝ်ႈၼႃႈတီႈၶွင်ႇသီႇဢဝ်ၶိုၼ်းၸိုင်ႈတႆး လၢႆၸဝ်ႈလၢႆၵေႃႉ မႃးမွၵ်ႇ လၢတ်ႈ။ မိူၼ်ၼင်ႇ ၸဝ်ႈပိုၼ်ၶမ်း သပ်းလႅင်းၼႄလွင်ႈပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21၊ ၸဝ်ႈသိုၵ်းႁိူင်းၾႃႉ သပ်းလႅင်းၼႄလွင်ႈပေႃႇလသီႇမုၵ်ႉၸုမ်း၊ ၸဝ်ႈသိုၵ်းယီႈတိပ်ႉသပ်းလႅင်းလွင်ႈ NCA / JMC-U/JMC-S ၊ ၸဝ်ႈလွၼ်ႉသၢင် ၽူႈၼင်ႈလုမ်းၵပ်းသၢၼ် RCSS မိူင်းတူၼ် သပ်းလႅင်း ၼႄလွင်ႈၽွၼ်းၸႃႉယႃႈမဝ်းၵမ်၊ ၸဝ်ႈသႅင်လီ ၽူႈၼင်ႈလုမ်းၵပ်းသၢၼ် ဝဵင်းတႃႈၶီႈလဵၵ်း သပ်းလႅင်းၼႄလွင်ႈႁပ်ႉတိုတ်းယႃႈ ပၼ်ၵူၼ်းမိူင်း၊ ၼၢင်းႁၢၼ်ၸၢမ်ၽွင်း ၽူႈၵႅဝ်ပၢင် သပ်းလႅင်းၼႄပႃးလွင်ႈ NCA ၸိူဝ်းၼႆႉ ။


ၸဝ်ႈလွၼ်ႉသၢင် ၽူႈၼင်ႈလုမ်းၵပ်းသၢၼ် RCSS/SSA မိူင်းတူၼ် လၢတ်ႈဝႃႈ - “ဢၼ်ႁဝ်းၶႃႈလႆႈ မႃးၸတ်းႁဵတ်းပၢင်ႁူပ်ႉထူပ်းၵူၼ်းမိူင်းဝၼ်းမိူဝ်ႈၼႆႉ ဢိင်ၼိူဝ်ပေႃႇလသီႇ မုၵ်ႉၸုမ်းႁဝ်း မီးဝႆႉၼၼ်ႉ ႁဝ်းၶႃႈၸတ်းႁဵတ်း 3 ၸုမ်းသေ လူင်းႁူပ်ႉထူပ်းၵူၼ်းမိူင်းပွတ်းဢွင်ႇ၊ပွတ်းႁွင်ႇ၊ပွတ်းၸၢၼ်း ။ သပ်းလႅင်းပၼ်ၵူၼ်းမိူင်းလွင်ႈပေႃႇလသီႇမုၵ်ႉၸုမ်းမီးၸိူင်ႉႁိုဝ်၊လွင်ႈNCA /JMC-U/JMC-s ၊လွင်ႈၽွၼ်းၸႃႉယႃႈမဝ်းၵမ်၊ ထၢမ်သဵင်ႁူဝ်ၸႂ်ၵူၼ်းမိူင်းၸိူဝ်းၼႆႉ” ဝႃႈၼႆ ။


မၼ်းၸဝ်ႈသိုပ်ႇလၢတ်ႈထႅင်ႈဝႃႈ - “ ဢၼ်ၶႂ်ႈၾၢၵ်ႇထိုင်ၵူၼ်းမိူင်းတႄႉၵေႃႈ လွင်ႈယႃႈမဝ်းၵမ်ၼႆႉ ယႃႇပႂ်ႉႁႂ်ႈတပ်ႉသိုၵ်းမႃးၵႄႈလိတ်ႈပၼ်ၵူၺ်း ၵူၼ်းမိူင်းၵူႈၵေႃႉလူဝ်ႇႁူမ်ႈမိုဝ်းၵၼ်ႁဵတ်းသၢင်ႈၵႂႃႇယဝ်ႉ” ဝႃႈၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ဢွၼ်ၼႃႈၼႆႉ ပူၼ်ႉမႃးမိူဝ်ႈ ဝၼ်းတီႈ 04/10/2016 လူင်းပိုၼ်ႉတီႈ ၸတ်းပၢင်ႁူပ်ႉထူပ်းၵူၼ်းမိူင်း တီႈဝဵင်းၼမ်ႉၸၢင်၊ မီးၸုမ်း တူင်ႉၼိုင်တူင်ႇဝူင်း ၵူၼ်းတႆး၊ ၸုမ်းပႃႇတီႈ ၵၢၼ်မိူင်းလႄႈ ပီႈၼွင်ႉၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈ လဵပ်ႈႁဵၼ်း 250 ပၢႆ။ ပူၼ်ႉမႃး မိူဝ်ႈဝၼ်းတီႈ 2 လူင်းႁူပ်ႉထူပ်းပီႈၼွင်ႉၵူၼ်းမိူင်း ၸႄႈဝဵင်းလၢႆးၶႃႈ တီႈဝတ်ႉၵျွင်း တေႃႇႁူဝ်ဝဵင်း။ ဝၼ်းတီႈ 3 ႁူပ်ႉထူပ်းၵူၼ်းမိူင်း တီႈၵျွင်းၵၢင်ဝဵင်းသႅၼ်ဝီ ၸိုင်ႈတႆး ပွတ်းႁွင်ႇ။  ဝၼ်းတီႈ 4 ႁူပ်ႉထူပ်းပီႈၼွင်ႉၵူၼ်းမိူင်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ လႄႈ ဝၼ်းတီႈ 6 ႁူပ်ႉထူပ်းပီႈၼွင်ႉၵူၼ်းမိူင်းတီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၸိူဝ်းၼႆႉ ။


ပၢင်ႁူပ်ႉထူပ်းၵူၼ်းမိူင်းပွၵ်ႈၵမ်းၼႆႉ ယူႇတီႈ RCSS/SSA ၸတ်းႁဵတ်းပဵၼ် 3 ၸုမ်းသေ လူင်းႁူပ်ႉထူပ်း ၵူၼ်းမိူင်း ၼႂ်းမိူင်းတႆး 3 ပွတ်းတွၼ်ႈ ပွတ်းဢွၵ်ႇၶူင်း၊ ပွတ်းၸၢၼ်း လႄႈ ပွတ်းႁွင်ႇ တႃႇၶၢဝ်းတၢင်း 10 ဝၼ်းပၢႆ-ၼႆယဝ်ႉ ။