မိူဝ်ႈၽွင်းပဵၼ်ပၢင်တိုၵ်းၼႂ်းၵႄႈ တပ်ႉသိုၵ်းၸိုင်ႈတႆး (RCSS/SSA) လႄႈ တပ်ႉသိုၵ်းမၢၼ်ႈ ၼႂ်းဢိူင်ႇ တူင်ႇလၢဝ်း ၸႄႈဝဵင်းမိူင်းၵိုင်ၼၼ်ႉ ၾၢႆႇတပ်ႉသိုၵ်းမၢၼ်ႈတီႉၺွပ်းၵူၼ်းဝၢၼ်ႈ ၸွမ်ႇၸိမ်ၼႂ်းၵႄႈသၢႆသိုၵ်း ၶဝ်သေ ႁွင်ႉပႃးၵႂႃႇၸွမ်း ။

သၢႆသိုၵ်းမၢၼ်ႈဢၼ်ႁွင်ႉၵူၼ်းဝၢၼ်ႈ ၵႂႃႇၸွမ်းငႃးသိုၵ်းၶဝ် ႁိမ်းတူင်ႇလၢဝ်း

တင်ႈတႄႇဝၼ်းတီႈ 01/10/2016 တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းမၢၼ်ႈတပ်ႉမတေႃႇ ပဵၼ်ပၢင်တိုၵ်းၵၼ်တီႈၼႂ်း ဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တူင်ႇလၢဝ်းၼႆႉ ပဵၼ်လႅၼ်ၶႅၼ်ႈၸိုင်ႈတႆးပွတ်းၸၢၼ်း တင်းပွတ်းႁွင်ႇ။ ၽွင်းပဵၼ်ပၢင်တိုၵ်းၵၼ်ၼၼ်ႉ ၾၢႆႇတပ်ႉသိုၵ်းမၢၼ်ႈ တီႉၺွပ်းဢဝ်ၵူၼ်းဝၢၼ်ႈ ၼႂ်းဢိူင်ႇတူင်ႇလၢဝ်း မိူၼ်ၼင်ႇဝၢၼ်ႈပၢင်ပွႆး၊ ၵုင်းသႃႇ၊ ၼႃးလွႆ၊ ၽွင်းသႅင်ၸိူဝ်းၼႆႉသေ ႁွင်ႉၵႂႃႇၸွမ်းသၢႆသိုၵ်းၶဝ်- ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈၸွႆႈၵူၼ်းပၢႆႈၽေးသိုၵ်း ၸၢႆးလႅင်း လၢတ်ႈဝႃႈ- ဢၼ်သိုၵ်းမၢၼ်ႈၶဝ်ႈမႃးတီႈၼႂ်းဝၢၼ်ႈၼႆႉ မီး 30 ၵေႃႉ၊ ၼႂ်းၼၼ်ႉ တေမီးၵူၼ်းဝၢၼ်ႈမွၵ်ႈ 10 ၵေႃႉပၢႆ၊ ၶဝ်ဢဝ်ၵူၼ်းဝၢၼ်ႈၸွမ်ႇၼႂ်းၵၢင်သၢႆသိုၵ်းၶဝ်သေ ႁွင်ႉၵႂႃႇၸွမ်း- ဝႃႈၼႆ ။


ၽူႈၵွၼ်းဢိူင်ႇၵေႃႉၼိုင်ႈလၢတ်ႈဝႃႈ- ဢၼ်တပ်ႉသိုၵ်းမၢၼ်ႈၶဝ်တီႉၺွပ်းၵႂႃႇၼႆႉ ပႃးၵူၼ်းဝၢၼ်ႈတူင်ႇလၢဝ်း 2 ၵေႃႉ၊ ၶဝ်ၶဝ်ႈမႃးၼႂ်းဝၢၼ်ႈသေတီႉၵႂႃႇ မိူဝ်ႈပဵၼ်ပၢင်တိုၵ်းၵၼ်တင်း RCSS/SSA ၼၼ်ႉ။ ၶဝ်သွင်ၵေႃႉၼႆႉ ပဵၼ်ၵူၼ်းႁုင်ၶဝ်ႈၽၵ်း တီႈႁူင်းတိုတ်းယႃႈ ဢၼ် RCSS/SSA ပိုတ်ႇဝႆႉၼၼ်ႉ။ ၶဝ်ႁွင်ႉၵႂႃႇပႃးၸွမ်းသၢႆသိုၵ်း ၶဝ်သေ တေႃႇထိုင်မိူဝ်ႈလဵဝ်ၵေႃႈ ပႆႇပွႆႇပၼ်ၶိုၼ်း- ဝႃႈၼႆ ။


ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းႁွင်ႈၵၢၼ် PI ၾၢႆႇၵမ်ႉၸွႆႈၵၢၼ်ငမ်းယဵၼ်မိူင်းႁူမ်ႈတုမ် လၢတ်ႈဝႃႈ- RCSS/SSA ၼႆႉ လူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း NCA ယဝ်ႉ၊ ၸုမ်းလႂ်ၽိတ်း ၸုမ်းလႂ်ထုၵ်ႇ ၵေႃႈယဝ်ႉ ဢမ်ႇထုၵ်ႇလီဢဝ်ဢဵၼ်ႁႅင်းသေ ၵႄႈလိတ်ႈ၊ မိူဝ်ႈလဵဝ် မီးၶွမ်ႊမတီႊပၵ်းတႃပႂ်ႉတူၺ်း လွင်ႈၵိုတ်းတိုၵ်းယဝ်ႉ၊ လီလႆႈဢဝ်ၶွမ်ႊမတီႊၼႆႉသေၵႄႈလိတ်ႈ- ဝႃႈၼႆ ။


ၽူႈလဵပ်ႈႁဵၼ်းၵၢၼ်သိုၵ်းၵၢၼ်မိူင်းၶဝ် ထတ်းသၢင်ဝႃႈ ယွၼ်ႉ RCSS/SSA ၼႆႉ မိူဝ်ႈၶဝ်ႈတီႉၺွပ်း ၵူၼ်းသူႇသမ်းၵိၼ်ယႃႈမဝ်းၵမ် တီႈၼမ်ႉလၼ်ႈၼၼ်ႉ လႆႈတီႉၺွပ်းၵႂႃႇပႃးၵူၼ်းသိုၵ်းမၢၼ်ႈၵေႃႉၼိုင်ႈ၊ ၾၢႆႇတပ်ႉသိုၵ်းမၢၼ်ႈ ၸင်ႇလႆႈမႃးတိုၵ်းယိုဝ်းၶိုၼ်း- ၼႆယဝ်ႉ ။