ထဝ်ႈဝၢၼ်ႈထဝ်ႈၼႃးလႄႈၵူၼ်းၼုမ်ႇမိူင်းပၼ်ႇႁူမ်ႈၵၼ် ၸတ်းႁဵတ်းပၢင်ဢုပ်ႇၵုမ် ၼႂ်းဢိူင်ႇဝၢၼ်ႈ တႃႇႁႃတၢင်းၵႄႈလိတ်ႈပၼ်ႁႃယႃႈမဝ်းၵမ်ၼႂ်းပိုၼ်ႉတီႈၽႂ်မၼ်း ။

ဝၼ်းတီႈ 05/10/2016 ၶၢဝ်းယၢမ်း ၵၢင်ၶမ်ႈ 07:00- 8:30 ၵူၼ်းမိူင်းပၼ်ႇ ၸတ်းႁဵတ်းပၢင်ၵုမ်ဝၢင်း ၽႅၼ်တႃႇၽဵဝ်ႈမူၺ်ႉယႃႈမဝ်းၵမ် ၼႂ်းဢိူင်ႇပိုၼ်ႉတီႈၽႂ်မၼ်း။ ပၢင်ၵုမ်ၸတ်းႁဵတ်းတီႈ ဝၢၼ်ႈႁူဝ် လိၼ်းၵုင်းၵႅင်း ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၵူၼ်းၼႂ်းပိုၼ်ႉ တီႈၶဝ်ႈႁူမ်ႈ 29 ၵေႃႉ။ ဢုပ်ႇဢူဝ်းၵၼ်တႃႇဝၢင်းၽႅၼ်ႁူမ်ႈၵၼ်ၽဵဝ်ႈမူၺ်ႉယႃႈမဝ်းၵမ်၊ တႃႇႁူၺ်း သူၼ်းႁႂ်ႈၵူၼ်းၼုမ်ႇ ၵႆယၢၼ်ယႃႈမဝ်းၵမ် ၸိူဝ်းၼႆႉ ။


လုင်းၸၢႆးၵျေႃႇ ပူႇႁဵင်ဝၢၼ်ႈႁူဝ်လိၼ်း ၵုင်းၵႅင်း လၢတ်ႈဝႃႈ- “ ပေႃးၵူၼ်းဝၢၼ်ႈ ၸပ်းယိၼ်ႉယႃႈမဝ်း ၵမ်ယဝ်ႉၸိုင် ဢမ်ႇပႃးၸႂ်တီႈတေပူၵ်းပွင် ၼႃႈဝၢၼ်ႈတႃသူၼ်ယဝ်ႉသေဢမ်ႇၵႃး ၼႃႈႁိူၼ်းၵေႃႈ တေတႅၵ်ႇယၢႆႈ ဢမ်ႇမီးၸႂ်ၶႂ်ႈပူၵ်းပွင်ၽဝၸၢတ်ႈပၢၼ်တူဝ်ၸဝ်ႈၵဝ်ႇႁႂ်ႈၶိုၼ်ႈယႂ်ႇလႆႈ၊ ၵွပ်ႈၼၼ်ႁဝ်း ထုၵ်ႇလီႁူမ်ႈၵၼ် သၢၼ်ၶတ်းယႃႈမဝ်းၵမ်  ” ဝႃႈၼႆ ။


ၸၢႆးသိူဝ်တႆး  ၵူၼ်းၼုမ်ႇဝဵင်းမိူင်းပၼ်ႇ လၢတ်ႈဝႃႈ- “ ၵူၼ်းၼုမ်ႇႁဝ်းၶႃႈၼႆႉပဵၼ်ဢဵၼ်ႁႅင်းတႃႇ မိူဝ်းၼႃႈ။  ၶႂ်ႈႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ်။ ႁူမ်ႈၵၼ်သၢၼ်ၶတ်းယႃႈမဝ်းၵမ်သေ ဢွၼ်ၵၼ် လဵပ်ႈႁဵၼ်းႁႃတၢင်းႁူႉတၢင်းႁၼ်ၼမ်ၼမ်။ ယဝ်ႉၵေႃႈဝၼ်းတီႈ 10 ၼႆႉႁဝ်းၶႃႈတေၶိုၼ်းဢုပ်ႇၵၼ် ထႅင်ႈၵမ်းၼိုင်ႈ၊ တေႁွင်ႉပႃးၸဝ်ႈႁႆႈၸဝ်ႈၼႃး၊ ၼၢင်းယိင်းၸိူဝ်းၼႆႉၶဝ်ႈပႃး ” ဝႃႈၼႆ ။


ၵဵဝ်ႇလူၺ်ႈလွင်ႈယႃႈမဝ်းၵမ်ၼႆႉသေ မိူဝ်ႈဝၼ်းတီႈ17/9/2016 ၸဝ်ႈၼႃႈတီႈလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၊ ၽူႈၵွၼ်းၸႄႈဝဵင်း၊ ပလိၵ်ႈယႄး ဢိၵ်ႇၵူၼ်းၼႂ်းပိုၼ်ႉတီႈ ဝဵင်းမိူင်းပၼ်ႇ ႁူမ်ႈၵၼ်ၸတ်းႁဵတ်းပၢင်ဢုပ်ႇၵုမ်ပၼ်တၢင်းႁူႉ ဢၼ်မီး ၸိုဝ်ႈဝႃႈ “ၽေးယႃႈမဝ်းၵမ်လႄႈၽေးၵိုင်ႉၵၢင်ႉၼိူဝ်သဵၼ်ႈတၢင်း ” မီးၵူၼ်းၼႂ်းပိုၼ်ႉတီႈ ၶဝ်ႈႁူမ်ႈ ႁဵၼ်းဢဝ် 141 ၵေႃႉ ။ ၸတ်းႁဵတ်းတီႈဝၢၼ်ႈၵုင်းၵႅင်း ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ။


ၾၢႆႇၽဵဝ်ႈမူၺ်ႉယႃႈမဝ်းၵမ်လႄႈရႃၸဝတ်ႈၸၢတ်ႈၸိုင်ႈလုမ်ႈၾႃႉ (UNODC)  ပိုၼ်ၽၢဝ်ႇဝႃႈ -ၼႂ်းၸိုင်ႈမိူင်းႁူမ်ႈတုမ်မၢၼ်ႈၼႆႉ ယႃႈမဝ်းၵမ် 96% ဢွၵ်ႇၼႂ်း ၸိုင်ႈတႆး။ ၼႂ်းပီၼႆႉၵၢၼ်ႁဵတ်းသူၼ်ယႃႈၽုၵ်ႇၾိၼ်ႇ လူတ်းယွမ်း မႃးၵေႃႈ ယႃႈမႃႉ၊ ယႃႈ ဢႆႉသ် ယႃႈမဝ်းၵမ် သမ်ႉၼမ်မႃးလိူဝ်ၵူႈပီ- ၼႆယူႇ ။