ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း လူင်းႁူပ်ႉထူပ်းၵူၼ်းမိူင်း သပ်းလႅင်းလၢတ်ႈၼႄ လွင်ႈတူင်ႉၼိုင်ႁဵတ်းသၢင်ႈ ၼႂ်းသၽႃး လႄႈတွင်ႈထၢမ် လွင်ႈယၢပ်ႇၽိုတ်ႇ ၵူၼ်းမိူင်းၸဵမ်ၸိူဝ်းၼႆႉ ။

ဝၼ်းတီႈ 05/10/2016 ယၢမ်း ၵၢင်ၶမ်ႈ 08:00-10:00 မူင်း ၵၢင်ၶိုၼ်း ၽူႈတႅၼ်းသၽႃးၸိူဝ်ႉ ၸၢတ်ႈ ၸႄႈတွၼ်ႈလႃႈသဵဝ်ႈ ၸၢႆးဝၼ်းလႅင်းၶမ်း လူင်းပိုၼ်ႉတီႈႁူပ်ႉထူပ်းတွင်ႈထၢမ် သဵင်ႁူဝ်ၸႂ် ၵူၼ်းမိူင်း လွင်ႈယၢပ်ႇၽိုတ်ႇၵူၼ်းၼႂ်းပိုၼ်ႉတီႈ ၵူႈၸိူဝ်ႉၵူႈပိူင်လႄႈ သပ်းလႅင်းလၢတ်ႈၼႄ လွင်ႈ ဢၼ်တူဝ်ထူပ်းၼႂ်းသၽႃးမီးၸိူင်ႉႁိုဝ် ႁဵတ်းသၢင်ႈတူင်ႉၼိုင်ဝႆႉၸိူင်ႉႁိုဝ် ၸဵမ်ၸိူဝ်းၼႆႉ။ ပၢင်ႁူပ်ႉ ထူပ်းၵူၼ်းမိူင်းၼႆႉ ၸတ်းႁဵတ်းတီႈ ဝတ်ႉမွၵ်ႇလွၼ်ႉ ဝၢၼ်ႈႁၢင်ၼႃး ဢိူင်ႇႁၢင်ၼႃး ၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ မီးၽူႈၶဝ်ႈႁူမ်ႈ တင်းမူတ်း ႁိမ်း 500 ၼႆယဝ်ႉ ။


ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ လၢတ်ႈဝႃႈ “ ပိူင်ယႂ်ႇမၼ်းတႄႉၵေႃႈ ႁဝ်းၶႃႈ မိူဝ်းသပ်းလႅင်းလွင်ႈဢၼ်တူဝ်ထူပ်း ၼႂ်းသၽႃးပဵၼ်ၸိူင်ႉႁိုဝ် ၽူႈတႅၼ်းဢၼ်ဝႃႈၼၼ်ႉ ႁဵတ်းၵၢၼ် တူင်ႉၼိုင်လႆႈၸိူင်ႉႁိုဝ်၊ ယဝ်ႉၵေႃႈ ႁဝ်းသမ်ႉလႆႈတူင်ႉၼိုင်သင်မႃးလၢႆလၢႆၽွင်ႈ၊ ပေႃးယဝ်ႉၵေႃႈ ထၢမ်သဵင်ႁူဝ်ၸႂ်ပေႃႈမႄႈၵူၼ်းမိူင်း မီးတၢင်း ယၢပ်ႇၽိုတ်ႇသင်၊ ယူႇတီႈၽူႈတႅၼ်းသမ်ႉ တေလႆႈၸွႆႈၵႄႈလိတ်ႈၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ ။


ၵဵဝ်ႇလူၺ်ႈလွင်ႈ လႆႈလူင်းပိုၼ်ႉတီႈ ႁူပ်ႉထူပ်းတွင်ႈထၢမ် သဵင်ႁူဝ်ၸႂ်ၵူၼ်းမိူင်းၼႆႉ လွင်ႈ ယၢပ်ႇၽိုတ်ႇၵူၼ်းမိူင်းၵမ်ႈၼမ်  ပဵၼ်လွင်ႈတီႈလိၼ်၊ ယူႇတီႈၽူႈဢုပ်ႉပိူင်ႇၽွင်းငမ်းၶဝ်ႁဵတ်း ဢမ်ႇၸွမ်းပိူင်ဢမ်ႇၸွမ်းထမ်း တတ်းၶၢႆၵိၼ်ၼင်လိၼ်ၵူၼ်းဝၢၼ်ႈတင်းၼမ်လၢႆ လွင်ႈၼႆႉၵေႃႈ ၵူၼ်းမိူင်း ဢမ်ႇလႆႈၸႂ်၊ ထႅင်ႈလွင်ႈၼိုင်ႈသမ်ႉ လွင်ႈတဵၵ်းတဵင် ၸႂ်ႉၵိၼ်ၵူၼ်းမိူင်း ဢဝ်ၶဝ်ႈဢဝ်ၼမ်ႉ ဢဝ်ၶူဝ်းၶွင်ၵႂႃႇပၼ် ၵႂႃႇပႂ်ႉတပ်ႉပၼ်(ၸုမ်းပျီႇတုၸိတ်ႉ)၊ လွင်ႈႁိမ်တီႈလိၼ်ၵၼ်လႄႈ လွင်ႈယႃႈမဝ်းၵမ် ဢၼ်ၵူၼ်းမိူင်းတႆး ထူပ်းယူႇ ၸဵမ်ၸိူဝ်းၼႆႉ။ ဢၼ်သဵင်ႁူဝ်ၸႂ်ၵူၼ်းမိူင်း တၢင်ႇထိုင် မႃး လွင်ႈယၢပ်ႇၽိုတ်ႇ ၵမ်ႈၼမ်ပဵၼ်ၸိူင်ႉၼႆ ဝႃႈၼႆ ။


ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း လူင်းပိုၼ်ႉတီႈႁူပ်ႉထူပ်းၵူၼ်းမိူင်းၼႆႉ တႄႇဢဝ် ဝၼ်းတီႈ 02/10/2016  လႆႈလူင်းႁူပ်ႉထူပ်း ပီႈၼွင်ႉတၢင်းပွတ်းဢိူင်ႇမိူင်းယေႃ၊ ဝၢၼ်ႈပၢင် ထူဝ်ႇလိၼ်၊ ဝၼ်းတီႈ 04  ႁူပ်ႉထူပ်း တွင်ႈထၢမ်သဵင်ႁူဝ်ၸႂ်ၵူၼ်းမိူင်း ဝၢၼ်ႈဢၢႆႈၼိူဝ်ၸိူဝ်းၼႆႉ ။