ဝတ်ႉပႃႇပဝ်ႈ ၵဵင်းမႆႇ ဝၼ်းမိူဝ်ႈၼႆႉ သင်ၶၸဝ်ႈလႄႈ ပီႈၼွင်ႉတႆး ၸိူဝ်းႁဵတ်းၵၢၼ်ၼႂ်းၵဵင်းမႆႇ ဢွၼ်ၵၼ်ၸတ်းႁဵတ်း ပၢင်တၢင်းလီသူင်ႇမဵတ်ႉတႃႇ၊ၽႄၵုသူလ်ထိုင် ၽူႈဢွၼ်ႁူဝ်ၵူၼ်းမိူင်းတႆးလႄႈ ၵူၼ်းၸိူဝ်းလူႉသဵင်ႈၵၢမ်ႇသုတ်းမုၼ် ။

ဝၼ်းတီႈ 05-06/10/2016 ယၢမ်း ၵၢင်ၼႂ် 09:00-03:00 မူင်း ဝၢႆးဝၼ်း ၸဝ်ႈတူၼ်ၶူးဢိၼ်းတႃး ၽူႈၵွၼ်းဝတ်ႉဝိႁၢရ်ပႃႇပဝ်ႈၵဵင်းမႆႇ ပဵၼ်ငဝ်ႈ ဢွၼ်ႁူဝ်သတ်ႉထႃး ပီႈၼွင်ႉတႆးၼႂ်းၵဵင်းမႆႇသေ ၸတ်း ႁဵတ်းပၢင်တၢင်းလီပၼ် ၽူႈဢွၼ်ႁူဝ်ၵူၼ်း မိူင်းတႆး၊ ၶုၼ်ႁေႃၶမ်း ၼႂ်းမိူင်းထႆးလႄႈ ၵူၼ်းမိူင်းၸိူဝ်း လႆႈလူႉသဵင်ႈၵၢမ်ႇ သုတ်းမုၼ်ၵႂႃႇ။ ပၢင်တၢင်းလီၼႆႉ ၸတ်းႁဵတ်းၵူႈပီ ၼႂ်းလိူၼ်သိပ်းဢဵတ်းမႂ်ႇ ပွၵ်ႈၼႆႉ ပဵၼ်ၵမ်းတီႈ 15 ။


ၸဝ်ႈၶူးသုဝၼ်း ၽူႈပွင်ၵၢၼ်ပၢင်ႁႅၼ်းတၢၼ်း လၢတ်ႈဝႃႈ “ ယိူင်းဢၢၼ်းတႄႉ လူႇတၢၼ်း ပၼ်ဢမ်ႇဝႃႈၵူၼ်းထဝ်ႈၵူၼ်းၵႄႇ ဢမ်ႇလိူၵ်ႈၵူၼ်းမီးၵူၼ်းၽၢၼ်။ ယူႇတီႈၸဝ်ႈတူၼ်ၶူး ဢိၼ်းတႃးၵေႃႈလၢတ်ႈဝႃႈ ၼင်ႇႁိုဝ် ၵုသူလ်ၽွၼ်းလီ တေထိုင် ၵူၼ်းၸိူဝ်းဢၼ်ႁဵတ်းၵၢၼ်ဝၢၼ်ႈ ၵၢၼ်မိူင်းလႄႈသင် ၸိူဝ်းဢၼ်လူႇၼိူဝ်ႉလူႇလိူတ်ႈၼိူဝ်ၽႅၼ်ႇလိၼ်မိူင်းတႆးလႄႈသင်၊ လိူဝ်သေၼၼ်ႉ ဢမ်ႇၵႃး ႁူမ်ႈပႃး ၸဝ်ႈမုၼ်ယႂ်ႇၶုၼ်ႁေႃးၶမ်း ၸိူဝ်းဢၼ်ၼွၼ်းၽႄးၵႂႃႇ ၸိူဝ်းၼၼ်ႉတင်းသဵင်ႈသေ လႄႈ ယူႇတီႈၸဝ်ႈသြႃႇႁဝ်းၶႃႈသေ ဢွၼ်ႁူဝ်ႁဵတ်းတၢင်းလီပၼ်” ဝႃႈၼႆ ။


ၼၢင်းၶိၼ်ႇၼု ၸဝ်ႈတႃႇၼ ပၢင်ႁႅၼ်းတၢၼ်း လၢတ်ႈဝႃႈ “ ထုင်းၸၢမ်ႇတႆးႁဝ်း ၸဵမ်မိူဝ်ႈ ပၢၼ်ပူႇပၢၼ် မွၼ်ႇႁဝ်း ဢွၼ်ႁဵတ်းမႃး ၸိူဝ်းပဵၼ်ပေႃႈမႄႈႁဝ်း ပီႈၼွင်ႉၶိူဝ်းႁဝ်းလူႉႁၢႆတၢႆၵႂႃႇၼၼ်ႉ ၸိူဝ်းႁဝ်းပဵၼ် ၵူၼ်းလိပ်းၵေႃႈ ႁႂ်ႈလႆႈပဵၼ်ၵုသူလ်၊ ၸိူဝ်းဢၼ်တၢႆၵႂႃႇၼၼ်ႉၵေႃႈ ႁႂ်ႈပဵၼ်ၽွၼ်းလီ ၸင်ႇဢွၼ်ၵၼ်ႁႅၼ်းတၢၼ်းလူႇပၼ်။ ႁဝ်းၵေႃႈဢမ်ႇလီလူင်လိုမ်း ထုင်းၸၢမ်ႇႁဝ်း တိုၵ်းသူၼ်းထိုင် ႁႂ်ႈဢွၼ်ၵၼ်သိုပ်ႇ ၵႂႃႇထႅင်ႈ သေၵမ်း” ဝႃႈၼႆ ။


ပီႈၼွင်ႉတႆး ၼွၵ်ႈမိူင်း/ၼႂ်းမိူင်းႁူမ်ႈၵၼ်ၸတ်းႁဵတ်းတၢၼ်းပၼ် ၸိူဝ်းပဵၼ်ပီႈၼွင်ႉၸိူဝ်ႉၶိူဝ်း ပေႃႈမႄႈ ၸဝ်ႈၵဝ်ႇၸိူဝ်ႉလူႉသဵင်ႈၵၢမ်ႇသုတ်းမုၼ်၊ ၽူႈဢွၼ်ႁူဝ်ၵူၼ်း မိူင်းတႆး မိူၼ်ၸဝ်ႈၾႃႉ ၼႂ်းမိူင်းတႆး လႄႈ ၸဝ်ႈမုၼ်ယႂ်ႇၶုၼ်ႁေႃၶမ်း ၼႂ်းမိူင်းထႆး ၸဵမ်ၸိူဝ်းၼႆႉ ဝႃႈၼႆ ။


ပူၼ်ႉမႃး ဝၼ်းတီႈ 01-02/10/2106 ၵေႃႈ တီႈဝိႁၢရ်ပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆးၵေႃႈ ဢွၼ်ၵၼ်ၸတ်းႁဵတ်းပၢင်ႁႅၼ်းတၢင်းလီပၼ် ၸိူဝ်းလူႉသဵင်ႈသုတ်း မုၼ်ၵႂႃႇပႃးၸဵမ်တႃႇၽူႈဢွၼ်ႁူဝ်ၵူၼ်းမိူင်းတႆး ၸိူဝ်းလႆႈလူႇၼိူဝ်ႉလူႇလိူတ်ႈၵႂႃႇ ၸဵမ်ၸိူဝ်းၼႆႉ ဝႃႈၼႆ ။