ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမူႇၸႄႈ ၸတ်းပွႆးလိုဝ်ႈပၢင်သွၼ် လၢႆးႁႆႇၵွင်တႆးပွၵ်ႈၵမ်း 5 မီးၵေႃလိၵ်ႈလၢႆးလၢႆလၢႆတီႈ ၵူၼ်းမိူင်းၼႂ်းပိုၼ်ႉတီႈဢိၵ်ႇၵူၼ်းၼုမ်ႇၶဝ်ႈႁူမ်ႈ 130 ပၢႆ ။

ပွႆးလိုဝ်ႈပၢင်သွၼ်လၢႆး “ ႁႆႇၵွင်တႆး”ၸတ်းႁဵတ်း ဝၼ်းတီႈ 04/10/2016 တီႈဝတ်ႉဝေႇလုဝုၼ်ႇ (ၵျွင်းၸေႃးတိ) ပွၵ်ႉၸၢၼ်း ဝဵင်းမူႇၸႄႈ ၸိုင်ႈတႆးပွတ်းႁွင်ႇ။ ပၢင်သွၼ်ၼႆႉပူင်သွၼ်မႃးမိူဝ်ႈဝၼ်းတီႈ 02-22/10/2016 ၵူၼ်းၼုမ်ႇလုၵ်ႉတီႈ 34 ဝၢၼ်ႈ ၼႂ်းၸႄႈဝဵင်းမူႇၸႄႈ မႃးၶိုၼ်ႈႁဵၼ်းဢဝ် 50 ပၢႆ ။


ၸၢႆးမျၢတ်ႈဢွင်ႇ ၸုမ်းပွင်ၵၢၼ်ပွင်ပဵၼ်ပၢင်သွၼ် လၢတ်ႈဝႃႈ - “မိူဝ်ႈလဵဝ်ၵူၼ်းၼုမ်ႇၵမ်ႈပႃႈၼမ် ဢမ်ႇမေႃႁႆႇၵွင်တႆးယဝ်ႉလႄႈ ၸင်ႇလႆႈၸတ်းႁဵတ်းပၢင်သွၼ်လၢႆးႁႆႇၵွင်တႆး။ ပီၼႆႉဢၼ်လၢၵ်ႇလၢႆး တႄႉမီးမၢႆ Note သေမႃးသွၼ်ပၼ်။ ယိူင်းဢၢၼ်းႁႂ်ႈလႆႈႁဵၼ်းႁူႉငၢႆႈ လိူဝ်ၼၼ်ႉလႆႈသွၼ်ပႃးလၢႆး ႁႆႇတိင်ႇ ၸိူဝ်းၼႆႉ။ ယူႇတီႈၵေႃလိၵ်ႈလၢႆးႁဝ်းၶႃႈသေ တေၶတ်းၸႂ်ႁဵတ်းသၢင်ႈတႃႇၾိင်ႈငႄႈ ႁိတ်ႈႁွႆး ႁဝ်းၶႃႈ ႁႂ်ႈပေႃးၶိုၼ်ႈယႂ်ႇၶိုတ်းပိူၼ်ႈ” ဝႃႈၼႆ ။


ပၢင်သွၼ်လၢႆးႁႆႇၵွင်ၼႆႉ တႄႇပိုတ်ႇမႃးၸဵမ်မိူဝ်ႈပီႈ 2008 ၶူးပူင်သွၼ်တႄႉပဵၼ် ၵူၼ်းၼႂ်းၵေႃလိၵ်ႈ လၢႆးလႄႈၾိင်ႈငႄႈတႆး ဝဵင်းမူႇၸႄႈ ၸိုင်ႈတႆးပွတ်းႁွင်ႇ- ဝႃႈၼႆ ။