ၸုမ်းၵူၼ်းၼုမ်ႇတႆး TYO ၸတ်းႁဵတ်းပွႆးလူင်းပၢင်ၾိုၵ်းၽွၼ်ႉ ၵဵဝ်ႇၵပ်း ၵၢၼ်မိူင်း၊ ၵၢၼ်ငမ်းယဵၼ် လႄႈ ပိူင်ၸတ်းၵၢၼ်လုမ်း  တူဝ်တႅၼ်းၵူၼ်းၼုမ်ႇတႆး ၶဝ်ႈႁူမ်ႈ တင်းမူတ်း 11 ၸႄႈဝဵင်း ။

ဝၼ်းတီႈ 20/09/2016 ယၢမ်း ၵၢင်ၼႂ် 10:00-12:00 ၸုမ်းၵူၼ်းၼုမ်ႇတႆး Tai Youth organization (TYO) ၸတ်းႁဵတ်းပွႆးလူင်းပၢင်သွၼ် တီႈလုမ်းၵူၼ်းၼုမ်ႇတႆး TYO ၸႄႈဝဵင်း တူၼ်ႈတီး ၸိုင်ႈတႆး ပွတ်း ၸၢၼ်း ။


ပၢင်သွၼ်ၼႆႉ ၽိူမ်ႉထႅမ်ပၼ်ၼမ်ႉၵတ်ႉၵူၼ်းၼုမ်ႇတႆး ၸတ်းႁဵတ်း ဝၼ်းတီႈ 13 ထိုင် ဝၼ်းတီႈ 19 လိူၼ် သႅပ်ႉထႅမ်ႊၿိူဝ်ႊၼႆႉ ၵူၼ်းၼုမ်ႇၵူႈၸႄႈဝဵင်း ၸိူဝ်းမႃးၶဝ်ႈႁူမ်ႈလဵပ်ႈႁဵၼ်း ၼင်ႇ ႁိုဝ် ပေႃးတေမိူဝ်းပူၵ်းပွင် ၼႂ်းပိုၼ်ႉတီႈၽႂ်မၼ်းၶိုၼ်း ။


ပူင်သွၼ်ပၼ် ပိူင်ၵၢၼ်လုမ်း၊ ၵၢၼ်ၵပ်းသိုပ်ႇမိုတ်ႈၵိုဝ်း ၶဝ်ႈဢွၵ်ႇၵၼ်၊ လိူဝ်ၼၼ်ႉ ဢုပ်ႇၶႆႈၼႄ ၵဵဝ်ႇၵပ်း ၵၢၼ်ၵိုတ်းယိုဝ်းတူဝ်ႈမိူင်း NCA လႄႈ လွင်ႈၵၢၼ်ငမ်းယဵၼ် ၸဵမ်ၸိူဝ်းၼႆႉ ဝႃႈၼႆ ။


ပွႆးလူင်းပၢင်သွၼ်ၼႆႉ မီးၽူႈယႂ်ႇၵူၼ်းလူင် မိူၼ်ၼင်ႇၸဝ်ႈၶႂၼ်မိူင်း၊ ၸဝ်ႈၸၢႆးဢူး၊ ၸဝ်ႈဢုမ်ႈၶိူဝ်း၊ လုင်းၸၢႆးမဵဝ်းမိၼ်ႉ၊ ၸၢႆးထုၼ်းလႃႉ ႁူဝ်ပဝ်ႈၵူၼ်းၼုမ်ႇတႆး၊ ၼၢင်းယိင်းၼွင်ႉ ၵႅမ်ႁူဝ်ပဝ်ႈ ၵူၼ်းၼုမ်ႇတႆး လႄႈ တူဝ်တႅၼ်းၵူၼ်း ၼုမ်ႇတႆး ၼၢင်းသူၺ်ႇဢူး ဢိၵ်ႇ လၢႆလၢႆၵေႃႉမွၵ်ႇလၢတ်ႈၶေႃႈၵႂၢမ်း တိုၵ်းသူၼ်း ပၼ်ႁႅင်း ၵူၼ်းၼုမ်ႇ ။


ၸဝ်ႈၶႂၼ်မိူင်း ၽူႈၵိူဝ်းၵုမ် ၸုမ်းၵူၼ်းၼုမ်ႇတႆး TYO လၢတ်ႈဝႃႈ “  တႃႇတေမီးၼမ်ႉၵတ်ႉ ပူၵ်းပွင်မူႇၸုမ်းၼႆႉ ဢွၼ်တၢင်းသုတ်းႁဝ်းလူဝ်ႇပူၵ်းပွင်တူဝ်ၸဝ်ႈၵဝ်ႇ ဢွၼ်တၢင်း။ ယဝ်ႉၵေႃႈ ႁူမ်ၸူမ်းၸွမ်း ၵူၼ်းၼုမ်ႇ ၵူႈၸႄႈဝဵင်း တီႈလႆႈဝႆႉၵၢၼ်ဝႆႉငၢၼ်းသေ မႃးၶိုၼ်ႈလဵပ်ႈႁဵၼ်း။  ဢဝ်ၵုင်ႇမုၼ်ၸွမ်းတႄႉတႄႉ” ဝႃႈၼႆ ။


ၸဝ်ႈဢုမ်ႈၶိူဝ်း ၽူႈၵိူဝ်းၵုမ် ၸုမ်းၵူၼ်းၼုမ်ႇတႆး TYO လၢတ်ႈဝႃႈ “ ႁႂ်ႈၵူၼ်းၼုမ်ႇႁဝ်းၵူႈၵေႃႉ မေႃႁၵ်ႉၸိူဝ်ႉၸၢတ်ႈ၊ ၸိူဝ်ႉၶိူဝ်းႁဝ်း။ ၼင်ႇႁိုဝ် တေဢမ်ႇယဵၼ်းပဵၼ်ပိူၼ်ႈၵႂႃႇ။ မိူဝ်ႈဢွၼ်တၢင်း ၼၼ်ႉ ႁူဝ်ပၢၵ်ႇ 60 ၼႆႉ ပဵၼ်ႁူဝ်ၵူၼ်းတႆး ။ တေႃႈလဵဝ်သမ်ႉ ႁူဝ်ပၢၵ်ႇၵိုတ်း 20 ၵူၺ်း။ ၵွပ်းၼၼ်လႄႈ ၼင်ႇႁိုဝ် တေဢမ်ႇယဵၼ်းၼၼ်ႉ ႁဝ်းတၵ်းလႆႈတူင်ႉတိုၼ်ႇ ၵၼ်တႄႉတႄႉဝႃႈဝႃႈ” ဝႃႈၼႆ ။


တီႈလူင်းပၢင်သွၼ်ၼၼ်ႉ ႁူဝ်ပဝ်ႈလႄႈ ၵႅမ်ႁူဝ်ပဝ်ႈ ၵူၼ်းၼုမ်ႇတႆး လႆႈမွၵ်ႇလၢတ်ႈၶေႃႈၵႂၢမ်း ၸူမ်းသိူဝ်းၶွပ်ႈၸႂ် ၽူႈမႃးၶဝ်ႈႁူမ်ႈလဵပ်ႈႁဵၼ်း၊ ၵူၼ်းၼုမ်ႇ ၵူႈၸႄႈဝဵင်းလႄႈ ၸုမ်းၸဝ်ႈတႃႇၼ ၸိူဝ်းလႆႈၵမ်ႉထႅမ်ၸွႆႈ ပွင်ပဵၼ်မႃး ပၢင်ၾိုၵ်းၽွၼ်ႉ ၶၢဝ်းတၢင်း 7 ဝၼ်းၼႆႉ ဝႃႈၼႆ ။


ၼၢင်းသူၺ်ႇဢူး  ၽူႈၶဝ်ႈႁူမ်ႈလဵပ်ႈႁဵၼ်း လၢတ်ႈဝႃႈ “ ဢၼ်လႆႈမႃးၾိုၵ်းၽွၼ်ႉၽိူမ်ႉၼမ်ႉၵတ်ႉ  ၵူၼ်းၼုမ်ႇ ပွၵ်ႈၵမ်းၼႆႉ ၵႃႈၼင်ႇပွင်ပဵၼ်လႆႈ တေဢဝ်မိူဝ်းၸႂ်ႉ ၶိုၼ်းတီႈဝၢၼ်ႈၵိူတ်ႇ မိူင်းၼွၼ်း တေၶတ်းၸႂ်တူင်ႉတိုၼ်ႇႁဵတ်းသၢင်ႈၵႂႃႇ” ဝႃႈၼႆ ။


ပၢင်ၾိုၵ်းၽွၼ်ႉၼႆႉ တူဝ်တႅၼ်းၵူၼ်းၼုမ်ႇၵူႈၸႄႈဝဵင်း မႃးၶဝ်ႈႁူမ်ႈလဵပ်ႈႁဵၼ်း မီး 11 ၸႄႈဝဵင်း၊ ၸၢႆး 6 ၵေႃႉ၊ ယိင်း 14 ၵေႃႉ ႁူမ်ႈလူၺ်ႈ ၽူႈပွင်ၵၢၼ် တီႈလုမ်းၵူၼ်းၼုမ်ႇထႅင်ႈ လၢႆလၢႆၵေႃႉ၊ ၶူးပူင်သွၼ်ပၼ်မီး ၵူဝ်ႇၺီႇၺီႇမူဝ်း၊ မၸၼ်ႇတႃႇဢူး၊ မၽိဝ်ႇၽိဝ်ႇလိၼ်းလႄႈ ၸေႃးယီႇမုၼ်ႇ ၸဵမ်ၸိူဝ်းၼႆႉ ဝႃႈၼႆ ။


လႅင်ႇၶၢဝ်ႇ ႁဵဝ်းႁိုၼ်းႁွမ်