ဢိင်ၼိူဝ်ၽႅၼ်ၵၢၼ်ၽဵဝ်ႈမူၺ်ႉယႃႈမဝ်းၵမ် ၼႂ်းၸႄႈဝဵင်းသီႇပေႃႉ တီႈၼမ်ႉလၼ်ႈသေ ဢၼ်ၾၢႆႇ RCSS/SSA လႆႈတီႉၺွပ်းဝႆႉၵူၼ်းသူႇ သမ်း ၵိၼ်ယႃႈ 57 ၵေႃႉၼၼ်ႉ လႆႈၵုမ်းဝႆႉၵမ်းၼိုင်ႈ၊ ပၼ်တၢင်းႁူႉတၢင်းႁၼ်သေ ပွႆႇပၼ်ၶိုၼ်းယဝ်ႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈ ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 17/09/2016 ၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႆႈတီႉၺွပ်းၵူၼ်း သူႇ သမ်း ၵိၼ်ယႃႈ ၶၢႆယႃႈမဝ်းၵမ် တီႈၼႂ်းဢိူင်ႇၼမ်ႉလၼ်ႈ ႁူမ်ႈတင်းမူတ်း 57 ၵေႃႉ။ လွင်ႈၼႆႉ RCSS/SSA လႆႈတီႉၺွပ်းၵုမ်းတူဝ်ဝႆႉၵမ်းၼိုင်ႈသေ ပၼ်တၢင်းႁူႉတၢင်းႁၼ်ၶဝ် ၵဵဝ်ႇၵပ်းၽေးယႃႈမဝ်းၵမ်ယဝ်ႉၵေႃႈ ပွႆႇပၼ်ၶိုၼ်း- ၼႆယဝ်ႉ ။


“ႁဝ်းၶႃႈလႆႈၵုမ်းတူဝ်ဝႆႉၸူဝ်ႈၵႅပ်ႉၵူၺ်း၊ ဢိင်ၼိူဝ်ၶဝ်ယွမ်းႁပ်ႉသေ မိူဝ်ႈလဵဝ်ၼႆႉ  ႁဝ်းၶႃႈပွႆႇပၼ်ၶိုၼ်းယဝ်ႉ။ ၵူၼ်းၵူႈၵေႃႉၵေႃႉၼၼ်ႉ လႆႈထၢႆႇဝႆႉၶႅပ်းႁၢင်ႈၶဝ်ယူႇ၊ ၶေႃႈမုလ်းၵေႃႈလႆႈၵဵပ်းဝႆႉယူႇ။  ယိူင်းဢၢၼ်း ဢၼ်လႆႈတီႉၺွပ်းၼႆႉၵေႃႈ ပိူဝ်ႈတႃႇၽဵဝ်ႈမူၺ်ႉ ယႃႈမဝ်းၵမ်ၵူၺ်း- ၽူႈၶၢၼ်ပၢၵ်ႇ ၸဝ်ႈသိုၵ်းလူင်ၸၢႆးလႃႉ လၢတ်ႈမိူဝ်ႈဝၼ်းတီႈ 19/09/2016 ၼင်ႇၼႆ ။


ၶူဝ်းၶွင်ဢၼ်တီႉၺွပ်းလႆႈၼၼ်ႉ ယႃႈမႃႉ 673 မဵတ်ႉ၊ ၵွင်ႈပွတ်း မၢႆတူဝ်ၵွင်ႈ 380 ၼိုင်ႈလဝ်း၊ ၵွင်ႈယၢမ်း 2 လဝ်း တင်းၸၢၵ်ႈလၢတ်ႈ ၸိူဝ်းၼႆႉ ။


ၵဵဝ်ႇၵပ်းလွင်ႈၼႆႉ ၶၢဝ်ႇ RFA ဢွၵ်ႇဝႆႉဝႃႈ- ၾၢႆႇ RCSS/SSA ဝႃႈ ဢိင်ၼိူဝ်ၽႅၼ်ၵၢၼ်တႃႇၽဵဝ်ႈမူၺ်ႉ ယႃႈမဝ်းၵမ်သေ ၸင်ႇလႆႈတီႉၵူၼ်းၵႂႃႇၼႆသေတႃႉ ၾၢႆႇတပ်ႉသိုၵ်းမၢၼ်ႈသမ်ႉဝႃႈ ၾၢႆႇ RCSS/SSA ၵဵပ်းသိုၵ်း ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)  ဢၼ်ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈၼႆႉ လႆႈလူင်းလၢႆးမိုဝ်းၵိုတ်းတိုၵ်းၵၼ်တင်း လူင်ပွင်ၸိုင်ႈမၢၼ်ႈ ပၢၼ်ၸွမ်ၸိုင်ႈတဵင်းၸဵင်ႇ ပူၼ်ႉမႃးမိူဝ်ႈၽွင်းႁူဝ်ပီ 2012 ၊ ဝၢႆးၼၼ်ႉ မႃးၵေႃႈလႆႈႁဵတ်းၽႅၼ်ၵၢၼ် ၽဵဝ်ႈမူၺ်ႉယႃႈမဝ်းၵမ် တီႈၼႂ်းမိူင်းတႆး။ လိူဝ်သေၼၼ်ႉ လႆႈပိုတ်ႇဝႆႉႁူင်းတိုတ်းယႃႈ တီႈၼႂ်းမိူင်းတႆးလၢႆလၢႆတီႈ ။