သင်ၶၸဝ်ႈလႄႈတၵ်ႉၵႃႇသတ်ႉထႃး ၸႄႈဝဵင်းလၢႆးၶႃႈ ဢုပ်ႇၵုမ် တႅပ်းတတ်းလႆႈၸႂ်ၵၼ်ဝႃႈ တေပူၼ်ႉ ၶၢပ်ႈတူဝ် ၸဝ်ႈတူၼ်ၶူးသီႇႁၼႃႇတ ၵျွင်းပၢင်ႇ ဝဵင်းလၢႆးၶႃႈ ၼႂ်းဝၼ်းတီႈ 27 သႅပ်ႉထႅမ်ႊၿိူဝ်ႊၼႆႉ ။

Photo: ၸၢႆးမူၼ်းလႅင်း

ဝၼ်းတီႈ 21/09/2016 ယၢမ်းၵၢင်ၼႂ် သင်ၶၸဝ်ႈလႄႈ တၵ်ႉၵႃႇသတ်ႉထႃး ၵူၼ်းမိူင်းလၢႆးၶႃႈ ဢွၼ်ၵၼ်ၸတ်းႁဵတ်းပၢင်ၵုမ် ဢုပ်ႇဢူဝ်းၵၼ် တႃႇႁဵတ်းပွႆးလေႃႉ ၽဝ်ၶၢပ်ႈတူဝ် ၸဝ်ႈတူၼ်ၶူး     သီႇ ႁၼႃႇတၵျွင်းပၢင်ႇလၢႆးၶႃႈ ။


ၽူႈၶဝ်ႈႁူမ်ႈပၢင်ၵုမ် မီးႁိမ်းၸမ် 100၊ ၵုမ်ၵၼ်လႆႈၸႂ်တႅပ်းတတ်း တေပူၼ်ႉၶၢပ်ႈတူဝ် ၼႂ်းဝၼ်းတီႈ 27/09/2016 ၼႆႉဝႃႈၼႆ ။


ၸၢႆးမူၼ်းလႅင်း ၵူၼ်းၼုမ်ႇလၢႆးၶႃႈ ၽူႈၶဝ်ႈႁူမ်ႈပၢင်ၵုမ် လၢတ်ႈဝႃႈ “  ဝၼ်းမိူဝ်ႈၼႆႉ တၵ်ႉၵႃႇသတ်ႉထႃးလႄႈ သင်ၶၸဝ်ႈ လႆႈဢုပ်ႇဢူဝ်းၵၼ်သေ တႅပ်းတတ်းလႆႈၸႂ် တေပူၼ်ႉၶၢပ်ႈတူဝ် သၢင်းၵဵဝ်ႇၸဝ်ႈတူၼ်ၶူး ၼႂ်းဝၼ်းတီႈ 27 လိူၼ်ၼႆႉ။  တေမႅၼ်ႈလိူၼ် 10 လွင်ႈ 11 ၶမ်ႈ ၶၢဝ်းယၢမ်း ဝၢႆးဝၼ်း ၼိုင်ႈမူင်း” ဝႃႈၼႆ ။


တေႃႈလဵဝ် ၶၢပ်ႈတူဝ် ၸဝ်ႈတူၼ်ၶူး သီႇႁၼႃႇတၼႆႉ  ဝႆႉတီႈ ဝတ်ႉၵျွင်းပၢင်ႇ ဝဵင်းလၢႆးၶႃႈ။   တႃႇၶၢဝ်းတၢင်း 6 ဝၼ်းသမ်ႉ တေမီးပၢင်ႁေႃးတြႃး မိူၼ်ၼင်ႇ ၸဝ်ႈသြႃႇသုၶမ်း၊ ၸဝ်ႈသြႃႇ မိူင်းၵုတ်ႈ၊ ၸဝ်ႈသြႃႇ ၵျွင်းဢုတ်ႇ ဝဵင်းလၢႆးၶႃႈ၊ ၸဝ်ႈသြႃႇ ၶေႇမိၼ်ႇတ လွႆၵေႃႇ၊ ၸဝ်ႈသြႃႇ ၸၼ်ႇတႃႇဝရ ၵျွင်းႁူၺ်ႈယဵၼ်ႇ၊ ၸဝ်ႈသြႃႇသုၽေႃးၵ ၽိပႃႇလ ၵျွင်းႁေႃၶမ်း ၸဵမ်ၸိူဝ်းၼႆႉ တေပၼ်ႇပုတ်ႈၵၼ်သေ ႁေႃးထမ်ႇမတြႃးပၼ် ။


ၼႂ်းၶမ်ႈၶိုၼ်းဝၼ်းတီႈ 21 ၼႆႉ ၸဝ်ႈသြႃႇၶေႇမိၼ်ႇတ လွႆၵေႃႇ တေဢွၼ် တႄႇပၢင်တြႃးၵႂႃႇ ဝႃႈၼႆ ။  


သင်ဝႃႈ ပီႈၼွင်ႉတၵ်ႉၵႃႇသတ်ႉထႃး တီႈၸမ်တီႈၵႆ တၢင်းလႂ်  ၶႂ်ႈလူႇတၢၼ်း ပဵၼ်ၸဝ်ႈတႃႇၼ ၵၢပ်ႈသွမ်း ၼႂ်းၶၢဝ်း တၢင်းပၢင်ၸႃႇပၼၸိုင်၊ ၵပ်းသိုပ်ႇလႆႈတီႈ ၸဝ်ႈၶူးပၼ်ႇတဝ မၢႆၾူၼ်း 097-845-89655 ဝႃႈၼႆ ။


ၸဝ်ႈတူၼ်ၶူးသီႇႁၼႃႇတ ၸဝ်ႈၼင်ႈၵျွင်းပၢင်ႇ ဝဵင်းလၢႆးၶႃႈ ၵိုင်ႉၵၢင်ႉလူႉလွၼ်ႇ သုတ်းမုၼ် လူၺ်ႈတၢင်းပဵၼ်သွင်ႁူၼ်မိူဝ်ႈဝၼ်းတီႈ 20/9/2016 ၽွင်းဢႃယုၸဝ်ႈလႆႈ 56 ပီ ဝႃႇသႃ 37 ပီ၊ ၼင်ႈဝတ်ႉၵျွင်းပၢင်ႇမႃး မီး 18 ပီ ။


ပိုၼ်းၵႅပ်ႈၸဝ်ႈတူၼ်ၶူး သီႇႁၼႃႇတ

ပီၵိူတ်ႇ - 1322
ၸိုဝ်ႈပေႃႈမႄႈ - ပူႇၵျွင်းမူး လႄႈ ၼၢႆးၵျွင်းၸၢမ်ႇ ဝၢၼ်ႈၵွင်းႁုင်း ဢိူင်ႇဝၢၼ်ႈသၢင်း၊
ၸႃႇတိတီႈၵိူတ်ႇ-  ဝၢၼ်ႈပႃႇၵၢင်း
ၸိုဝ်ႈမိူဝ်ႈလဵၵ်ႉ - ႁွင်ႉၸၢႆးဢွၼ်ႇသႂ်
ၶိုၼ်ႈပဵၼ်သၢင်ႇ - မိူဝ်ႈဢႃယု လႆႈ 12 ၶူပ်ႇ
ၶိုၼ်ႈပဵၼ်ၸၢင်း - ပီ 1341 ၊ လိူၼ်သၢမ်မႂ်ႇ 8 ၶမ်ႈ
ၵျွင်းဢၼ်ယၢမ်ႈယူႇသဝ်းမႃး - ၵျွင်းဝၢၼ်ႈသၢင်း၊ ၵျွင်းၸလိၼ်း တႃႈလိူဝ်ႇ၊ ၵျွင်းၵဵင်းႁၢႆး မိူင်းထႆး၊ ၵျွင်းဝဵင်းဝၢႆ မိူင်းထႆး၊ ၵျွင်းပၢင်ႇ လၢႆးၶႃႈ ။


ၼႃႈၵၢၼ်ဢၼ်ယၢမ်ႈႁဵတ်းသၢင်ႈ - ႁဵတ်းၶူးသွၼ် ၵျွင်းဝၢၼ်ႈသၢင်း၊ ၵျွင်းပၢင်ႇလၢႆးၶႃႈ၊ ပီ 1362 ႁဵတ်းၵျွင်း ႁုင်မိုဝ်ႉ၊ ပီ 1363 ႁဵတ်းယွင်ၼမ်ႉ၊ ပီ 1364 ႁဵတ်းထၢင်ၽၢႆႈ 6 ႁွင်ႈ၊ ပီ  1365 ႁဵတ်းၸရွပ်ႈ၊ ပီ 1367 ထၢင်ၽၢႆႈ၊ ပီ 1368 ယွင်ၼမ်ႉ၊ ပီ 1369 ယွင်ၼမ်ႉ၊ ပီ 1370 ႁဵတ်းၽၵ်းတူလူင်ၶဝ်ႈဝတ်ႉ၊ ပီ 1371 သိူဝ်ႇဝၢင်းၵျွင်း၊ ႁဵတ်းၸရွပ်ႈ၊ တေႃႇၼမ်ႉတွင်းမႃးၵျွင်း၊ မႄးၵုမ်းထမ်ႇမႃႇရူင်ႇ၊ ပီ 1372 ဢွၼ်ၵေႃႇသၢင်ႈ ၵျွင်းၽြႃးသႅၼ်သႄးဢိၼ်းသၢၼ်၊ ပီ 1373 ၵေႃႇသၢင်ႈ ၵျွင်းပီၵွၼ်းငိုၼ်း တိူၵ်ႈသွၼ်လိၵ်ႈ (25) ပီ ။


တီႈယူႇယၢမ်းလဵဝ်လႄႈၼႃႈၵၢၼ် - ပဵၼ်ၸဝ်ႈၵွၼ်းဝတ်ႉ ၵျွင်းပၢင်ႇ ပဵၼ်ၽူႈၶဝ်ႈၸုမ်းသင်ၶ ၼႃယၵ တူင်ႇဝဵင်းလၢႆးၶႃႈလႄႈ ပဵၼ်တီႈၵိူဝ်းၵုမ်တၵ်ႉၵႃႇသတ်ႉထႃး ၵူၼ်းမိူင်းလၢႆႈၶႃး ၼႆယဝ်ႉ ။