မိူဝ်ႈၽွင်းႁူဝ်လိူၼ်သႅပ်ႊထႅမ်ႊၿိူဝ်ႊၼႆႉ ၸွမ်းၼင်ႇပေႃႇလသီႇၽဵဝ်ႈမူၺ်ႉယႃႈမဝ်းၵမ် ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) မီးဝႆႉၼၼ်ႉသေ ၾၢႆႇ RCSS/SSA လႆႈလူင်းပိုၼ်ႉတီႈ တီႉၺွပ်းၵူၼ်းသူႇ သမ်း ၸႂ်ႉ ၵႃႉၶၢႆယႃႈမဝ်းၵမ် တီႈထုင်ႉဝဵင်းၼမ်ႉလၼ်ႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။

ၵဵဝ်ႇၵပ်းလွင်ႈၼႆႉ ၼႂ်းသိုဝ်ႇ (Media) လူင်ပွင်ၸိုင်ႈမၢၼ်ႈ လႆႈႁၼ်ပိုၼ်ၽၢဝ်ႇဢွၵ်ႇမႃးဝႃႈ- ႁႂ်ႈ RCSS/SSA ပွႆႇပၼ်ၶိုၼ်းၵူၼ်းမိူင်း ၸိူဝ်းသူႇသမ်း ၵိၼ်ယႃႈမဝ်းၵမ် ဢၼ်တီႉၺွပ်းၵႂႃႇၸိူဝ်းၼၼ်ႉဝႆးဝႆး။ ၵဵဝ်ႇၵပ်းပိူင်ပဵၼ်လွင်ႈၼႆႉ မီးၸိူင်ႉႁိုဝ်ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ လႆႈႁူပ်ႉထူပ်းတွင်ႈထၢမ် ၽူႈၼမ်းၼႂ်း ၶွမ်ႊမတီႊၵေႃႇသၢင်ႈလွင်ႈငမ်းယဵၼ် RCSS/SSA  ၸဝ်ႈသိုၵ်းၸၢႆးငိုၼ်း ဝႆႉၼင်ႇၼႆ ။


ထၢမ်-ၵဵဝ်ႇၵပ်းလွင်ႈပိူင်ပဵၼ် RCSS/SSA လႆႈလူင်းတီႉၺွပ်း ၵူၼ်းသူႇ သမ်း ၵိၼ် ၵႃႉၶၢႆယႃႈမဝ်းၵမ် ၼႂ်းထုင်ႉၼမ်ႉလၼ်ႈ၊ တင်းမူတ်းၵူၼ်းၸိူဝ်းဢၼ်တီႉၺွပ်းၵႂႃႇၼၼ်ႉ မီးလၢႆၵေႃႉၶႃႈ? ။


တွပ်ႇ-လွင်ႈၼႆႉ ပေႃႇလသီႇမုၵ်ႉၸုမ်းႁဝ်းၶႃႈ မီးဝႆႉဝႃႈၽဵဝ်ႈမူၺ်ႉယႃႈမဝ်းၵမ်။ ဢိင်ၼိူဝ်ၼၼ်ႉသေ ႁဝ်းၶႃႈလႆႈတူင်ႉၼိုင်ႁဵတ်းသၢင်ႈ မႃးလၢႆပွၵ်ႈလၢႆၽဝ်ႇ။ တီႈၼမ်ႉလၼ်ႈၼႆႉ ပဵၼ်မိူဝ်ႈၶိုၼ်းဝၼ်းတီႈ 17/09/2016 ယၢမ်း 2 မူင်း၊ ပဵၼ်ၵၢင်ၼႂ်ဝၼ်းတီႈ 18 ။ ႁဝ်းၶႃႈၶဝ်ႈၵႂႃႇၵူတ်ႇထတ်း ၵူၼ်းသူႇသမ်း ၵိၼ် ပႃးၵူၼ်းၵႃႉၶၢႆ။ တီႈၼမ်ႉလၼ်ႈၼႆႉ တေမီးယူႇ 11 ပွၵ်ႉ။ ဢၼ်ႁဝ်းၶႃႈလႆႈၶၢဝ်ႇသေ ၵႂႃႇၶဝ်ႈတီႉၺွပ်းၵူၼ်းၸိူဝ်းမီးတၢင်းၽိတ်း ၵဵဝ်ႇၵပ်းလွင်ႈယႃႈမဝ်းၵမ်ၼႆႉ မိူၼ်ၼင်ႇတီႈပွၵ်ႉယူင်ႇၸၢၵ်ႈ၊ ပွၵ်ႉၵုင်းလၢင်း၊ ပွၵ်ႉပၢင်သိုဝ်ႇ၊ ပွၵ်ႉၵုင်းၺွင်ႇ၊ ပွၵ်ႉၶႄႇ၊ ပွၵ်ႉပၢင်ႁႆး၊ ပွၵ်ႉမၢၵ်ႇမူင်ႈႁဵဝ်ႇ ၸဵမ်ၸိူဝ်းၼႆႉ ။


ၼႂ်းၼၼ်ႉ လႆႈတီႉၺွပ်းၵူၼ်းသူႇသမ်းၵႃႉၶၢႆယႃႈမဝ်းၵမ် တင်းမူတ်း 57 ၵေႃႉ။ ဢၼ်လႆႈပႃးၶူဝ်းၶွင် ပဵၼ်လၵ်းထၢၼ် မၼ်းမီး မိူၼ်ၼင်ႇယႃႈမႃႉၸိူဝ်းၼႆႉမွၵ်ႈ 673 မဵတ်ႉ၊ ယႃႈၶၢဝ် 32 လွတ်ႇ၊ ၵွင်ႈယၢမ်း 2 လဝ်း၊ ၵွင်ႈပွတ်း 1 လဝ်း၊ ၸၢၵ်ႈလၢတ်ႈဢၼ်ၸႂ်ႉၼႂ်းသိုၵ်း 3 လုၵ်ႈ ။


ထၢမ်-ဢၼ်တီႉၺွပ်း ၵူၼ်းသူႇသမ်းၵိၼ်ယႃႈမဝ်းၵမ်ၼႆႉ ပဵၼ်ပေႃႇလသီႇ RCSS/SSA ၶႃႈႁႃႉ၊ ၸွင်ႇလႆႈႁူမ်ႈပႃးတင်း လူင်ပွင်ၸိုင်ႈၶႃႈႁႃႉ? ။


တွပ်ႇ-ဢၼ်ၼႆႉပဵၼ်ပေႃႇလသီႇမုၵ်ႉၸုမ်းႁဝ်းၶႃႈ။ ၾၢႆႇၼိုင်ႈတၢင်းၼိုင်ႈၵေႃႈ ပေႃးမႃးတူၺ်းမိူဝ်ႈႁဝ်းၶႃႈ လူင်းလၢႆးမိုဝ်းၵၢၼ်ၵိုတ်းတိုၵ်း ၸၼ်ႉၸႄႈမိူင်း ၸၼ်ႉမိူင်းႁူမ်ႈတုမ် 2 ပွၵ်ႈၸိူဝ်းၼႆႉ တိုၼ်းပႃးဝႃႈႁဝ်းတင်း သွင်ၾၢႆႇတေႁူမ်ႈမိုဝ်းၵၼ် ၽဵဝ်ႈမူၺ်ႉယႃႈမဝ်းၵမ်၊ ႁဝ်းၶႃႈမီးဝႆႉတႅၵ်ႇလႅင်း။ ၵူၺ်းၵႃႈ ဝႃႈၼၼ်သေတႃႉ ပေႃးဝႃႈလူင်းၵၢၼ်ထူပ်းမိုဝ်းတႄႉ လွင်ႈႁူမ်ႈမိုဝ်းႁဵတ်းသၢင်ႈ ၾၢႆႇလူင်ပွင်ၸိုင်ႈၼႆႉ ၶဝ်ယူပ်ႈယွမ်း၊ ၾၢႆႇၶဝ်ပႆႇတူဝ်ႈတၼ်းႁူမ်ႈမိုဝ်းႁဝ်းၶႃႈ ႁဵတ်းသၢင်ႈ ။


ၵွပ်ႈပိူဝ်ႈၼၼ် ႁဝ်းၶႃႈတႄႉၸွမ်းၼင်ႇ ပေႃႈမႄႈၵူၼ်းမိူင်းၼႂ်းၼမ်ႉလၼ်ႈတုၵ်းယွၼ်းမႃး၊ ပၼ်ၶၢဝ်ႇမႃးဝႃႈ တီႈႁဝ်းၼႆႉ ၵူၼ်းသူႇသမ်းၵိၼ်ယႃႈၵႃႉၶၢႆယႃႈၵေႃႈၼမ်၊ ၾၢႆႇလူင်ပွင်ၸိုင်ႈၵေႃႈ ၶဝ်ဢမ်ႇၸၢင်ႈၵုမ်းၵမ်၊ ၶဝ်ဢမ်ႇယိုၼ်ႈမိုဝ်းလႆႈ။ ၵွပ်ႈၼၼ် ႁဝ်းၶႃႈၸင်ႇလႆႈၸတ်းတပ်ႉႁဝ်းၶႃႈ တပ်ႉၵွင် 2 ၵွင်ၼႂ်းပိုၼ်ႉတီႈ တင်းတပ်ႉၾၢႆႇၽဵဝ်ႈမူၺ်ႉယႃႈမဝ်းၵမ်၊ ဢိၵ်ႇ ႁူမ်ႈႁွမ်းၵၼ်တင်းပေႃႈမႄႈၵူၼ်းမိူင်းၼႂ်းပိုၼ်ႉတီႈသေ လႆႈဝၢင်းၽႅၼ် ၶဝ်ႈၵႂႃႇတီႉၺွပ်းၵူၼ်းသူႇသမ်း ၵိၼ်ယႃႈ ၵႃႉၶၢႆယႃႈၸိူဝ်းၼႆႉ တင်းမူတ်း 57 ၵေႃႉ ။


ထၢမ်-ဝၢႆးလင်တီႉၺွပ်းယဝ်ႉ မိူဝ်ႈဝၼ်းတီႈ 19/09/2016 ၼႆႉ လႆႈႁၼ်ၾၢႆႇသိုဝ်ႇလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ ဢွၵ်ႇမႃးဝႃႈ RCSS/SSA ၵႂႃႇတီႉၺွပ်းၵူၼ်းၼႂ်းဝၢၼ်ႈၼႂ်းဢိူင်ႇ၊ ႁႂ်ႈပွႆႇပၼ်ၶိုၼ်းဝႆးဝႆး။ ၼွၵ်ႈသေပိုၼ်ၽၢဝ်ႇဢွၵ်ႇမႃးၼႆႉ ၸဝ်ႈၼႃႈတီႈလူင်ပွင်ၸိုင်ႈ ၸွင်ႇလၢတ်ႈမႃးတီႈ RCSS/SSA ၸိူင်ႉႁိုဝ်ၽွင်ႈၶႃႈ? ။


တွပ်ႇ-ဢၼ်ၶဝ်ဢွၵ်ႇၶၢဝ်ႇၸိူဝ်းၼႆႉ ၶဝ်ၵေႃႈဢမ်ႇဝႃႈ ႁဝ်းၵႂႃႇၽဵဝ်ႈမူၺ်ႉယႃႈမဝ်းၵမ်၊ ၶဝ်ဝႃႈႁဝ်းၵႂႃႇတီႉၺွပ်း ၵူၼ်းမိူင်း၊ မိူၼ်ၼင်ႇၶဝ်ဝႃႈႁင်းႁဝ်းၾၢႆႇလဵဝ်ဝႃႈ ႁဝ်းၵႂႃႇၵဵပ်းသိုၵ်း။ ၵဵဝ်ႇၵပ်းလွင်ႈၼႆႉ တိူင်းသိုၵ်းဝၼ်းဢွၵ်ႇၵၢင်၊ ၾၢႆႇၶွမ်ႊမတီႊပႂ်ႉတူၵ်းၵၢၼ်ၵိုတ်းတိုၵ်း (JMC) လူင်ပွင်ၸိုင်ႈၵေႃႈ တႅမ်ႈလိၵ်ႈမႃးတီႈႁဝ်းၶႃႈ မိူၼ်ၼင်ႇႁဝ်း ၵႂႃႇၶေႉၶဵင်ႇၶဝ်၊ ၵႂႃႇပူၼ်ႉပႅၼ်မၢႆမီႈၶဝ်လူဝ်လူဝ်။ ဢၼ်တႄႉမၼ်း ဢမ်ႇၸႂ်ႈႁဝ်းၶႃႈၵႂႃႇတဵၵ်းၶိၼ်တီႉၺွပ်း ၵူၼ်းမိူင်းႁဵတ်းသိုၵ်း။ ၸွမ်းၼင်ႇပေႃႇလသီႇမုၵ်ႉၸုမ်းႁဝ်းၵေႃႈလီ၊ ၸွမ်းၼင်ႇႁဝ်းၶႃႈလႆႈတူၵ်းလူင်းၵၼ်ဝႆႉ တင်းလူင်ပွင်ၸိုင်ႈဝႃႈ တေႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ်ၼၼ်ႉသေ ႁဝ်းၶႃႈႁဵတ်းၸွမ်းၽႅၼ်ၵၢၼ်ၵူၺ်း၊ ၾၢႆႇၼိုင်ႈၵေႃႈ ၵွပ်ႈၵူၼ်းမိူင်းတုၵ်းယွၼ်းမႃး ။


ဢၼ်ႁဝ်းၶႃႈၽဵဝ်ႈမူၺ်ႉယႃႈမဝ်းၵမ် တီႈၼမ်ႉလၼ်ႈၼႆႉ မၼ်းဢမ်ႇၸႂ်ႈႁဝ်းၶႃႈၵႂႃႇၸိမ် ၵႂႃႇႁိမ် ၵႂႃႇၶေႉၶဵင်ႇ လူင်ပွင်ၸိုင်ႈသေႁဵတ်း။ ၾၢႆႇ RCSS/SSA ႁဝ်းၶႃႈႁၼ်ထိုင်ဝႃႈ ဢၼ်ႁဝ်းၶႃႈၵႂႃႇႁဵတ်းသၢင်ႈၽဵဝ်ႈမူၺ်ႉ တီႉၺွပ်းၼႆႉ ပဵၼ်တႃႇလွင်ႈၵမ်ႉထႅမ်ၵၢၼ်ၽဵဝ်ႈမူၺ်ႉယႃႈမဝ်းၵမ် ဢၼ်တၢင်းၾၢႆႇလူင်ပွင်ၸိုင်ႈၶဝ် ဢမ်ႇယိုၼ်ႈမိုဝ်းထိုင်လႆႈၼၼ်ႉ၊ ႁဝ်းၵႂႃႇၸွႆႈၶဝ်ၼိုင်ႈၾၢႆႇၼိုင်ႈတၢင်း ဢၼ်ႁဝ်းပွင်ပဵၼ်လႆႈၵူၺ်း ။


ထၢမ်-ဢၼ်ၾၢႆႇလူင်ပွင်ၸိုင်ႈၶဝ် လႆႈသူင်ႇယိုၼ်ႈလိၵ်ႈမႃးၼၼ်ႉ တၢင်း RCSS/SSA လႆႈတွပ်ႇၵႂႃႇယဝ်ႉၶႃႈႁႃႉ၊ တွပ်ႇၶိုၼ်းၸိူင်ႉႁိုဝ်ၽွင်ႈၶႃႈ? ။


တွပ်ႇ-ႁဝ်းၶႃႈလႆႈတွပ်ႇၵႂႃႇဝႃႈ ဢၼ်သူၸဝ်ႈၼႄးဝႃႈႁဝ်းပူၼ်ႉပႅၼ်ၼၼ်ႉ မၼ်းဢမ်ႇၸႂ်ႈ။ ဢၼ်ႁဝ်းၶႃႈ ၵႂႃႇၽဵဝ်ႈမူၺ်ႉယႃႈမဝ်းၵမ်ၼႆႉ ႁဝ်းၶႃႈမီးလၵ်းထၢၼ်/သၢၵ်ႈသေႇမၼ်းၵူႈပိူင်၊ ႁဝ်းလႆႈထၢႆႇဝႆႉၶႅပ်းႁၢင်ႈ ႁၢင်ႉတူင်ႉ (Video) ၵူၼ်းမိူင်းၵေႃႈလႆႈႁူႉၸွမ်း။ သင်ၸိူဝ်ႉဝႃႈ ၶႂ်ႈၵူတ်ႇၸွပ်ႇထတ်းတူၺ်း ပိူင်ပဵၼ်တီႈၼမ်ႉလၼ်ႈၼႆႉ ၼႆၵေႃႈ ႁဝ်းၶႃႈၽွမ်ႉ တူဝ်ႈတၼ်းတႃႇသေႇ။ ႁဝ်းၶႃႈႁူမ်ႈၵၼ်ၶွတ်ႇၽွတ်ႈၶွမ်ႊမတီႊၵူႈၾၢႆႇၾၢႆႇ ဢၼ်ပႃးၵူၼ်းမိူင်း ၽွင်းတႅၼ်း ၾၢႆႇမူႇၸုမ်း CBO ၸိူဝ်းၼႆႉ၊ ႁဝ်းၶႃႈတွပ်ႇၵႂႃႇၼင်ႇၼႆ ။


ၾၢႆႇမၢၼ်ႈၶဝ်ၼႆႉ ၶဝ်ဝႃႈႁင်းႁဝ်းတႃႇသေႇဝႃႈ သူၼႆႉပူၼ်ႉပႅၼ်ၶေႃႈတူၵ်းလူင်း ၵၢၼ်ၵိုတ်းတိုၵ်းတူဝ်ႈမိူင်း (NCA) သူဢမ်ႇယူႇၼႂ်းၶွပ်ႇတူင်ႇမၼ်း။ ႁဝ်းၶႃႈၵေႃႈတွပ်ႇၵႂႃႇဝႃႈ ႁဝ်းၶႃႈဢမ်ႇတွၼ်ႉပူၼ်ႉပႅၼ် NCA ႁဝ်းၶႃႈယူႇၼႂ်းၶွပ်ႇမၼ်းၵူၺ်း၊ ဢၼ်ပူၼ်ႉပႅၼ်ၼႆႉ မီးတပ်ႉသိုၵ်း(တပ်ႉမတေႃႇ)ၵူၺ်းၼႆၵေႃႈ လႆႈတႅမ်ႈတွပ်ႇၵႂႃႇပႃး ။


ထၢမ်-ၵူၼ်းမိူင်းဢၼ်တီႉၺွပ်းၸိူဝ်းၼၼ်ႉ ပွႆႇပၼ်မူတ်းယဝ်ႉၶႃႈႁႃႉ? ။


တွပ်ႇ-ၸွမ်းၼင်ႇပိူင်မၼ်းမီးဝႆႉ ႁဝ်းၶႃႈတေလႆႈပၼ်ၾၢင်ႉၶဝ်၊ လၢတ်ႈၼႄၶဝ်လွင်ႈၽေးယႃႈမဝ်းၵမ် မိူၼ်ၼင်ႇၵၢၼ်သူႇသမ်းၵိၼ်ၵႃႉၶၢႆယႃႈမဝ်းၵမ်ၼႆႉ မီးၽွၼ်းလီၽွၼ်းၸႃႉၸိူင်ႉႁိုဝ်၊ ႁဝ်းၶႃႈႁႂ်ႈၶဝ်လူင်းလၢႆးမိုဝ်း ပၼ်ၶေႃႈမၼ်ႈၵႅၼ်ႇဝႃႈ တေဢမ်ႇႁဵတ်းထႅင်ႈယဝ်ႉၸိူဝ်းၼႆႉ။ ၸွမ်းၼင်ႇဢၼ်ပိူင်ႁဝ်းၶႃႈမီးဝႆႉၼၼ်ႉ ၸိူဝ်းတူတ်ႈတၢမ်ႇၼၵ်းၼႃၼၼ်ႉၵေႃႈ ႁဝ်းၶႃႈလႆႈႁႂ်ႈၶဝ်ႁပ်ႉၵႂႃႇ၊ ၸိူဝ်းတၢမ်ႇမဝ်ၼၼ်ႉၵေႃႈ လႆႈပွႆႇပၼ်ၶိုၼ်း ။


ထၢမ်-ဢၼ် RCSS လႆႈလူင်းၽဵဝ်ႈမူၺ်ႉယႃႈမဝ်းၵမ်ယူႇ ယၢမ်းလဵဝ်ၼႆႉ ၸွမ်းၼင်ႇပေႃႇလသီႇမီးဝႆႉၼၼ်ႉ ထိုင်ၸၼ်ႉလႂ်ယဝ်ႉၶႃႈ? ။


တွပ်ႇ-ၼႂ်းပိုၼ်ႉတီႈ ဢၼ်ႁဝ်းၶႃႈတူင်ႉၼိုင်ယူႇတင်းမူတ်း ဢၼ်ႁဝ်းၶႃႈယိုၼ်ႈမိုဝ်းထိုင်လႆႈ ဢမ်ႇဝႃႈပွတ်းဢွၵ်ႇ ပွတ်းၸၢၼ်း ပွတ်းႁွင်ႇၸိူဝ်းၼႆႉ။ ၼႂ်းတပ်ႉၵွင်ၽႂ်မၼ်း ၼႃႈတီႈၽႂ်မၼ်းၸိူဝ်းၼႆႉ ႁႂ်ႈႁဵတ်းသၢင်ႈၵႂႃႇၵႃႈၼင်ႇ ပွင်ပဵၼ်လႆႈ ။


ထၢမ်-ပေႃးတေလူင်းၽဵဝ်ႈမူၺ်ႉ ယႃႈမဝ်းၵမ်ၼႂ်းပိုၼ်ႉတီႈၼႆ ၸွင်ႇလႆႈပွင်ႇၶၢဝ်ႇဝႆႉ၊ ဢမ်ႇၼၼ် ၸွင်ႇမီးပၢင်သွၼ်ပၼ်ပိုၼ်ႉႁူႉ တီႈၵူၼ်းမိူင်းၽွင်ႈၶႃႈႁႃႉ? ။


တွပ်ႇ-မီးယူႇၶႃႈ။ ၼႂ်းၼႃႈတီႈၽႂ်မၼ်း ႁဵတ်းသၢင်ႈယူႇၵူႈပီ၊ ႁဝ်းၶႃႈလႆႈႁွင်ႉမႃးၵူၼ်းၼုမ်ႇ ၵူၼ်းလူင်သေပၼ်ပၢင်သွၼ်။ ၸိူဝ်းဢၼ်ၵိၼ်ၵေႃႈႁဝ်းၶႃႈတိုတ်းပၼ်၊ ၸိူဝ်းဢၼ်ၵႃႉၶၢႆၵေႃႈပၼ်တူတ်ႈတၢမ်ႇ ၸွမ်းၼင်ႇပိူင်ပေႃႇလသီႇ ႁဝ်းၶႃႈမီးၼၼ်ႉ ။


ထၢမ်-ၽဵဝ်ႈမူၺ်ႉယႃႈမဝ်းၵမ်ၼႆႉ လႆႈတီႉၺွပ်းသေပၼ်ပိုၼ်ႉႁူႉ ပၢႆးပၺ်ၺႃသေပွႆႇပၼ်ၶိုၼ်းၼႆ ဝၢႆးလင်ႁဵတ်းၸိူင်ႉၼႆၼႆႉ လႆႈႁၼ်မီးၼမ်ႉတွၼ်းၽွၼ်းလီ ၽွၼ်းၸႃႉၸိူင်ႉႁိုဝ်ၽွင်ႈၶႃႈ? ။


တွပ်ႇ-မီးၼမ်ႉတွၼ်းၽွၼ်းလီတႄႉတႄႉ။ ၵမ်ႈၽွင်ႈ ပွၵ်ႈၼိုင်ႈပႆႇလႆႈၵေႃႈ ႁွင်ႉမႃးထႅင်ႈပွၵ်ႈၼိုင်ႈ၊ သွင်ပွၵ်ႈပႆႇလႆႈ ႁွင်ႉမႃးထႅင်ႈပွၵ်ႈၼိုင်ႈ၊ သၢမ်ပွၵ်ႈသေၶိုၼ်းလီၵႂႃႇၵေႃႈ မီးမႃးတင်းၼမ်ၶႃႈ ။


ထၢမ်-လွင်ႈၶူင်းၵၢၼ်ၽုၵ်ႇတႅၼ်းတၢင်တူၼ်ႈယႃႈၾိၼ်ႇၼႆႉ ၾၢႆႇတၢင်း RCSS ၸွင်ႇပႃႈလႆႈလူင်းမိုဝ်းႁဵတ်းၵၢၼ် သေတီႈတီႈၶႃႈႁႃႉ? ။


တွပ်ႇ-တင်ႈတႄႇပီ 2012-13 မႃးၼႆႉ ႁဝ်းၶႃႈမီးၶေႃႈလႆႈၸႂ် တူၵ်းလူင်းၵၼ်တင်းလူင်ပွင်ၸိုင်ႈ ႁူမ်ႈႁဵတ်းၶူင်းၵၢၼ်ၽုၵ်ႇတႅၼ်းတၢင်တူၼ်ႈယႃႈမဝ်းၵမ်။ တူၵ်းလူင်းၵၼ်သေတႃႉ ၵူၺ်းၵႃႈလွင်ႈႁူမ်ႈမိုဝ်း ႁဵတ်းသၢင်ႈ တင်းတပ်ႉမတေႃႇၼႆႉ ဢမ်ႇမီး၊ ဢမ်ႇပဵၼ်ၼမ်ႉပဵၼ်တူဝ်မႃး၊ ႁဝ်းဝၢင်းၽႅၼ်ဝႆႉၶႂ်ႈႁဵတ်းၵႂၢင်ႈၵႂၢင်ႈ တီႈတၢင်းမိူင်းပၼ်ႇ၊ မိူင်းၼၢႆး ဝႃႈၼႆသေတႃႉဢမ်ႇပဵၼ်မႃး။ ၵူၺ်းၵႃႈ ၸွမ်းၼင်ႇႁဝ်းၶႃႈပွင်ပဵၼ်လႆႈၵေႃႈ ႁဵတ်းပၼ်ယူႇ မိူၼ်ၼင်ႇၽုၵ်ႇၶဝ်ႈၵၢပ်ႇ/ၶဝ်ႈၶႄႇ ၸိူဝ်းၼႆႉ၊ ပွတ်းလၢႆးၶႃႈ ပွတ်းမိူင်းၼၢႆးၸိူဝ်းၼႆႉ ႁဝ်းၶႃႈႁဵတ်းပဵၼ်ပွတ်းပဵၼ်တွၼ်ႈယူႇ ။


ထၢမ်-ၵဵဝ်ႇၵပ်းလွင်ႈ RCSS လႆႈလူင်းၽဵဝ်ႈမူၺ်ႉယႃႈမဝ်းၵမ်ၼႆႉ တီႉၺွပ်းၵူၼ်းမိူင်းသေ ၾၢႆႇလူင်ပွင်ၸိုင်ႈ ၸႂ်ႉပွႆႇပၼ်ၶိုၼ်းၼႆႉ မီးပွၵ်ႈၼႆႉၵူၺ်းၶႃႈႁႃႉ၊ မိူဝ်ႈၵူႈပွၵ်ႈၸွင်ႇယၢမ်ႈမီးမႃးၶႃႈႁႃႉ? ။


တွပ်ႇ-မီးယူႇ၊ မိူဝ်ႈၵူႈပွၵ်ႈၶဝ်ၵေႃႈတူင်ႉတၵ်ႉမႃးယူႇ၊ ၵူၺ်းၵႃႈ မၼ်းဢမ်ႇပေႃးႁၢဝ်ႈႁႅင်းတၢၼ်ႇပွၵ်ႈၼႆႉ။ ပွၵ်ႈၼႆႉ ၵွပ်ႈႁူဝ်ၵူၼ်းၵေႃႈၼမ်ႁိုဝ် ၶဝ်ၵေႃႈတၵ်ႉတိူၼ်မႃးႁၢဝ်ႈႁႅင်း ။


ထၢမ်-လိုၼ်းသုတ်း ၶႂ်ႈသင်ႇထိုင်ပေႃႈမႄႈၵူၼ်းမိူင်းႁဝ်း မီးၸိူင်ႉႁိုဝ်။ ၸွမ်းၼင်ႇပေႃႇလသီႇ RCSS မီးၼၼ်ႉ မိူဝ်းၼႃႈတေႁဵတ်းသၢင်ႈၵႂႃႇၸိူင်ႉႁိုဝ် ၶႅၼ်းတေႃႈမွၵ်ႇလၢတ်ႈပၼ် ဢိတ်းၼိုင်ႈၶႃႈ? ။


တွပ်ႇ- ပေႃႇလသီႇမုၵ်ႉၸုမ်းႁဝ်းၶႃႈၼႆႉ ပိူင်လူင်မီး 3 ၶေႃႈ- 1.ယႃႇႁႂ်ႈၵူၼ်းမိူင်း ၵူၼ်းသႅၼ်းႁုၼ်ႈမႂ်ႇၶဝ် ၵိၼ်သူႇသမ်းယႃႈမဝ်းၵမ်သေ တၢင်းယၢမ်ႈလူႉ။ 2.ၼင်ႇႁိုဝ်ၵူၼ်းမိူင်းႁဝ်းလႄႈ ဝၢၼ်ႈမိူင်းႁဝ်းတေမီး ၸိုဝ်ႈသဵင်လီ၊ ဢမ်ႇမီးၸိုဝ်ႈသဵင်လူႉယွၼ်ႉယႃႈမဝ်းၵမ် ၼႂ်းလုမ်ႈၾႃႉသေ ၶိုၼ်ႈယႂ်ႇမၢၵ်ႈမီး၊ ႁဵတ်းၵၢၼ်ငၢၼ်း ဢၼ်ထုၵ်ႇမႅၼ်ႈၸွမ်းမၢႆမီႈ ၸိုင်ႈမိူင်းလုမ်ႈၾႃႉ၊ ႁႂ်ႈယၢၼ်ၵႆယႃႈမဝ်းၵမ်။ 3.ၼႂ်းၶၢဝ်းယၢမ်းၵိုတ်းတိုၵ်းၼႆႉ ႁဝ်းၶႃႈတေႁူမ်ႈမိုဝ်းၵူႈၾၢႆႇၵူႈၸုမ်းသေ ၽဵဝ်ႈမူၺ်ႉယႃႈမဝ်းၵမ် ႁႂ်ႈမွတ်ႇႁၢႆ ။


ထႅင်ႈဢၼ်ၼိုင်ႈ ၼႂ်းႁွင်ႈၵၢၼ်လူင်ၾၢႆႇၽဵဝ်ႈမူၺ်ႉယႃႈမဝ်းၵမ် မီးပေႃႇလသီႇထႅင်ႈ 6 ၶေႃႈ- 1.တိုတ်းယႃႈပၼ် မူၼ်ႉမႄးပၼ် ၵူၼ်းသူႇသမ်းၵိၼ်ယႃႈမဝ်းၵမ်။ 2.ပၼ်တၢင်းႁူႉၵဵဝ်ႇၵပ်းၽေးယႃႈမဝ်းၵမ်။ ၸိူဝ်းၼႆႉ ၼႂ်းၼႃႈတီႈတပ်ႉၵွင်ၽႂ်မၼ်း ႁဵတ်းမႃးယူႇယဝ်ႉ။ 3.ၽုၵ်ႇတူၼ်ႈတႅၼ်းတၢင်ယႃႈမဝ်းၵမ်။ မိူဝ်ႈလဵဝ်တိုၵ်ႉၶတ်းၸႂ်ယူႇ။ 4.ဢဝ်ၶၢဝ်ႇၵဵဝ်ႇၵပ်းယႃႈမဝ်းၵမ်။ ဢဝ်ၶၢဝ်ႇမိူၼ်ၼင်ႇ ၵူၼ်းသူႇၵိၼ်သမ်းယႃႈ ၵႃႉၶၢႆယႃႈ။ 5.ၵဵပ်းပိုၼ်းၶေႃႈမုလ်းယႃႈမဝ်းၵမ်။ 6. ၶူၼ်ႉၶႂႃႉၶေႃႈမုလ်း ၵဵဝ်ႇၵပ်းယႃႈမဝ်းၵမ်။ ၼႆႉပဵၼ်ယိူင်းဢၢၼ်းမူႇၸုမ်းႁဝ်းၶႃႈလႄႈ ပိူင်ၵၢၼ်ႁွင်ႈၵၢၼ်လူင်ၾၢႆႇၽဵဝ်ႈမူၺ်ႉယႃႈမဝ်းၵမ် ။


ထႅင်ႈတွၼ်ႈၼိုင်ႈ ႁဝ်းၶႃႈလႆႈႁဵတ်းၸွမ်းပိူင်ၵၢၼ် ပေႃႇလသီႇႁဝ်းၶႃႈလႄႈ ႁဵတ်းၸွမ်းပိူင်ၵၢၼ် ဢၼ်ႁဝ်းၶႃႈလႆႈတူၵ်းလူင်းၵၼ်တင်း လူင်ပွင်ၸိုင်ႈ ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ် 3 ပွၵ်ႈ။ ၼႂ်းၼၼ်ႉပႃးဝႃႈ ႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ်ၼႆလႄႈ ႁဝ်းၶႃႈၼႆႉ တႃႇပုၼ်ႈပၢင်ႈၽွၼ်းလီၵူၼ်းမိူင်း ႁဝ်း ၵႂႃႇမိူဝ်းၼႃႈၼႆႉ ၼင်ႇႁိုဝ်ၵူၼ်းမိူင်းႁဝ်းပေႃးတေယၢၼ်ၵႆယႃႈမဝ်းၵမ်ၼၼ်ႉ ႁဝ်းၶႃႈတေသိုပ်ႇႁဵတ်းၵႂႃႇ ။


ထႅင်ႈတွၼ်ႈၼိုင်ႈ ပေႃႈမႄႈၵူၼ်းမိူင်းႁဝ်းၵေႃႈ ၼင်ႇႁိုဝ်လုၵ်ႈလၢင်းလၢၼ်ႁဝ်း ပေႃးတေၵႆယၢၼ် ယႃႈမဝ်းၵမ်ၼၼ်ႉ ႁဝ်းၶႃႈတေလႆႈမေႃသင်ႇသွၼ်၊ မေႃလၢတ်ႈၼႄပိုၼ်ႉႁူႉလွင်ႈၽေးယႃႈမဝ်းၵမ် ႁႂ်ႈယၢၼ်ၵႆယႃႈမဝ်းၵမ်။ ၾၢႆႇပေႃႈမႄႈၵေႃႈမီးပုၼ်ႈၽွၼ်း ၾၢႆႇမူႇၸုမ်းႁဝ်းၵေႃႈမီးပုၼ်ႈၽွၼ်း လၢႆၾၢႆႇထုၵ်ႇလႆႈႁူမ်ႈမိုဝ်းၵၼ်ႁဵတ်းသၢင်ႈ၊ ၼင်ႇႁိုဝ်တူင်ႇဝူင်းၵူၼ်းႁဝ်း ပေႃးတေၶႅမ်ႉလႅပ်ႈ၊ ယၢၼ်ၵႆၽေး ယႃႈမဝ်းၵမ်ၼၼ်ႉ ႁဝ်းတေလႆႈႁူမ်ႈၵၼ်ၵူႈၾၢႆႇၾၢႆႇသေ ႁဵတ်းသၢင်ႈၵႂႃႇၼႆ ၶႂ်ႈယွၼ်းၾၢၵ်ႇထိုင် ပေႃႈမႄႈၵူၼ်းမိူင်းႁဝ်းၶႃႈ မီးၼင်ႇၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ လႆႈလူင်းလၢႆးမိုဝ်းၵိုတ်းတိုၵ်းၵၼ်တင်း လူင်ပွင်ၸိုင်ႈမၢၼ်ႈ ၸဵမ်မိူဝ်ႈပီ 2011 ပူၼ်ႉမႃး။ ဝၢႆးလင်လူင်းလၢႆးမိုဝ်းၵိုတ်းတိုၵ်း ၸၼ်ႉၸႄႈမိူင်း ၸၼ်ႉၸိုင်ႈမိူင်းႁူမ်ႈတုမ်ယဝ်ႉ ၵေႃႇသၢင်ႈလွင်ႈငမ်းယဵၼ်ၵၼ်မႃး ႁၢၼ်ႉတေႃႇလႆႈၶိုၼ်ႈႁွတ်ႈၶဝ်ႈႁူမ်ႈ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၸတ်းယဝ်ႉတူဝ်ႈၵႂႃႇ မိူဝ်ႈၽွင်းႁူဝ်လိူၼ် သႅပ်ႊထႅမ်ႊၿိူဝ်ႊၼႆႉ။ ဝၢႆးလင်လူင်းလၢႆးမိုဝ်းၵိုတ်းတိုၵ်းမႃးၼႆႉ ၸွမ်းၼင်ႇပေႃႇလသီႇ RCSS မီးဝႆႉ ၵဵဝ်ႇၵပ်းလွင်ႈၽဵဝ်ႈမူၺ်ႉ ယႃႈမဝ်းၵမ်ၼၼ်ႉသေ လႆႈႁၼ်ပူၵ်းပွင်ပၼ်ၵူၼ်းၼုမ်ႇ၊  ၶိုၼ်းမႄးပူၵ်းတင်ႈပၼ်ႁူင်းသဝ်း ၵူၼ်းၼုမ်ႇၼႂ်းမိူင်းမႃးလၢႆလၢႆတီႈ ။