ၸဝ်ႈသင်ၶတႆး ထုင်ႉမၢဝ်း 21 တူၼ် ပႃးတင်းႁူဝ်ပဝ်ႈလူင် ငဝ်ႈငုၼ်းသင်ၶၸိုင်ႈတႆး Dr.ၸဝ်ႈပၺ်ႇၺႃႇ ၼၼ်ႇတ ထၢတ်ႈတေႃႇလွႆလႅမ် လႆႈၵႂႃႇၶဝ်ႈႁူမ်ႈပၢင်ၵုမ်လူင် (Conference) ၾၢႆႇပုတ်ႉထသႃသၼႃ ဢၼ်ၸတ်းႁဵတ်းတီႈလၢၼ်ႉၸဝ်ႈ (တႃႇလီး) ၸိုင်ႈမိူင်းၶႄႇ ။

ပၢင်ၵုမ်ၶွၼ်ႊၾရႅၼ်ႊၼႆႉ မီးသင်ၶၸဝ်ႈလႄႈ ၽူႈတၢင်တူဝ်ပုတ်ႉထသႃသၼႃ ၼႂ်းလုမ်ႈၾႃႉ 23 မိူင်း ၶိုၼ်ႈႁွတ်ႈၶဝ်ႈႁူမ်ႈ၊ ၸဝ်ႈသင်ၶတႆးၾၢႆႇထေရဝႃတ လႆႈဢွၼ်ႁူဝ်ၼမ်းၼႃႈ ပိုတ်ႇပၢင်ပွႆးလႄႈ လႆႈဢဝ်ၵႂၢမ်း သူင်ႇမဵတ်ႉတႃႇၸဝ်ႈတူၼ်ၶူးဝုၼ်းၸုမ်ႈ ပိုၼ်ၽႄႈမဵတ်ႉတႃႇၵႂႃႇ ပိူဝ်ႈတႃႇလေႃးၵၵတ်းယဵၼ်- ၼႆယဝ်ႉ ။


ပၢင်ၵုမ်ၶွၼ်ႊၾရႅၼ်ႊ ယဝ်ႉတူဝ်ႈၵႂႃႇမိူဝ်ႈဝၼ်းတီႈ 25/09/2016 သေ ၸဝ်ႈၶဝ် 21 တူၼ် ဢွၼ်ၵၼ်ဢႅဝ်ႇယဵမ်ႈတူၺ်းၵွင်းမူးသၢမ်သူႇ ဢၼ်ၼႂ်းပိုၼ်းၶႄႇၶဝ်တႅမ်ႈဝႆႉဝႃႈ ပဵၼ်တႆးၵေႃႇသၢင်ႈမႃး မိူဝ်ႈပၢၼ်လၢၼ်ႉၸဝ်ႈၼၼ်ႉ ။


ဝၢႆးၼၼ်ႉသမ်ႉ လႆႈဢွၼ်ၵၼ်ၶီႇႁိူဝ်းလူင်လၢႆၸၼ်ႉ ဢၼ်ႁဝ်းၵူၺ်းယၢမ်ႈႁၼ်ၼႂ်းငဝ်းတူင်ႉမႃးၼၼ်ႉ ဢႅဝ်ႇယဵမ်ႈႁႃတူၺ်း ၼၢင်းမွၵ်ႇၽပ်ႉၽဝတီႇ ဢၼ်ၵိုၵ်းပႃးၼႂ်းပိုၼ်းၶုၼ်တိုင်းၶမ်းၶဝ်ၼၼ်ႉ တီႈၼႂ်း “ၶွင်သႄလူင်” ပေႃးၸွတ်ႇၵေႃႈဢမ်ႇၺႃး၊ ဝၢၵ်ႈၶိုၼ်းမႃး ဢႅဝ်ႇယဵမ်ႈတူၺ်းဢွင်ႈႁေႃၵဝ်ႇ ဝဵင်းၵဝ်ႇတီႈ ပူႇမွၼ်ႇၵွၼ်ႇလဵၼ်ႁဝ်း ယၢမ်ႈသၢင်ႈသဝ်း ႁဵတ်းၶုၼ်ႁိူဝ်ႈႁိူင်းပိူင်းသႂ်မႃး ၼႂ်းပၢၼ်လၢၼ်ႉၸဝ်ႈႁူဝ်ႁဵင်ပီ ။


မိူင်းလၢၼ်ႉၸဝ်ႈၼႆႉ ပဵၼ်မိူင်းႁၢင်ႈလီ မီးၼမ်ႉမီးလွႆ ရႃႇသီႇၾိင်ႈၾႃႉၵေႃႈၵတ်းယဵၼ်၊ ပဵၼ်ၼမ်ႉၵတ်ႉ ပူႇမွၼ်ႇၵွၼ်ႇလဵၼ်တႆးႁဝ်းမိူဝ်ႈၵွၼ်ႇ မေႃလိူၵ်ႈၼမ်ႉလိၼ်ႁိၼ်ၽႃသေ ယူႇသဝ်းမႃးတႄႉတႄႉ။ ၵူၺ်းၵႃႈယၢမ်းလဵဝ်တႄႉ လႆႈတၢင်းတူၺ်းလၢႆလၢႆ လႆႈတၢင်းသေလၢႆတဵမ်ဢူၵ်း ၼႃႈတႃယုမ်ႉယူႇၵေႃႈ ၼႂ်းႁူဝ်ၸႂ်တႄႉ ဢမ်ႇသိူဝ်းလႆႈ ။


ဝၼ်းတီႈ 26/09/2016 ပဵၼ်ဝၼ်းဢၼ်တေပွၵ်ႈဝၢႆႇသၢႆႇမိူဝ်းၶိုၼ်းတၢင်းထုင်ႉမၢဝ်း တင်းၸဝ်ႈပီႈၸဝ်ႈၼွင်ႉ (ၸုမ်းလၢၼ်ႉၸဝ်ႈ) လႆႈဢွၼ်ၵၼ်ၵႂႃႇလဵပ်ႈႁဵၼ်းတူၺ်းၶိုၼ်း လၵ်းသဝ်ႁိၼ်ၵိုၵ်းပိုၼ်း ဢၼ်ပူၵ်းတင်ႈမႃး မိူဝ်ႈပၢၼ်ၸဝ်ႈႁေႃသႅင်လၢၼ်ႉၸဝ်ႈ၊ ၽႂ်ၵေႃႈဢွၼ်ၵၼ်ၶဝ်ႈၸႂ်တႄႉတႄႉ။ လၵ်းသဝ်ႁိၼ်ၼႆႉ ၼႂ်းပိုၼ်းၶႄႇတႅမ်ႈဝႆႉဝႃႈ ပူၵ်းတင်ႈမႃးမိူဝ်ႈ 776 ပီ၊ တၢင်းသုင်မၼ်းမီး 7 သွၵ်ႇၶိုပ်ႈ၊ ၼႃႈၵႂၢင်ႈ 5 သွၵ်ႇယွမ်း၊ တၢင်းၼႃမီး 1 သွၵ်ႇ။ တူဝ်လိၵ်ႈမၼ်းဢၼ်တႅမ်ႈဝႆႉၼႂ်းလၵ်းသဝ်ႁိၼ် မီးဝႆႉမွၵ်ႈ 8000 တူဝ်၊ ၵူၺ်းၵႃႈ ၵွပ်ႈပိူဝ်ႈၶၢဝ်းယၢမ်းႁိုင်ယဝ်ႉလႄႈ တူဝ်လိၵ်ႈႁၢႆၵႂႃႇတင်းၼမ်၊ တူဝ်လိၵ်ႈဢၼ်တူၺ်းၸႅင်ႈလႆႈယၢမ်းလဵဝ်ၼႆႉ မီးဝႆႉ 776 တူဝ်ၵူၺ်းယဝ်ႉ။ ၵွပ်ႈပိူဝ်ႈတူဝ်လိၵ်ႈမၼ်းႁၢႆၼမ်လိူဝ်ႁႅင်းသေ ပေႃးတူၺ်းၼႂ်းသဝ်ႁိၼ်ၼၼ်ႉ ဢမ်ႇႁူႉလႆႈတီႈပွင်ႇမၼ်းဝႃႈ ၶႂ်ႈဝႃႈႁိုဝ်တႄႉတႄႉ ။


လႆႈငိၼ်းၸဝ်ႈပၢႆးပိုၼ်းၶဝ်ၵမ်ႈၽွင်ႈဝႃႈ ၼႂ်းလၵ်းသဝ်ႁိၼ်ၼႆႉ မီးဝႆႉတီႈၵႅပ်ႈပၢႆးၵၢၼ်ၽွင်းငမ်း (ဢုပ်ႉပိူင်ႇ)၊ ပၢႆးပၵ်းပိူင်မၢႆမီႈ၊ ပၢႆးမၢၵ်ႈမီး၊ ပၢႆးပၺ်ၺႃ၊ ပၢႆးၵပ်းသိုပ်ႇတိတ်းတေႃႇၸိူဝ်းၼႆႉ ဢိၵ်ႇတင်းၵႂၢမ်းသင်ႇၸဝ်ႈႁေႃသႅင် လၢၼ်ႉၸဝ်ႈ ဢၼ်ဝႃႈ- “လုၵ်ႈလၢၼ်ၵဝ်ဢိူၺ်း… တႆးၼႆႉဢမ်ႇၸႂ်ႈၶီႈၶႃႈၽႂ်၊ ယႃႇသၢၵ်ႈၶွၼ်ႇတေႃႇၽႂ်၊ ယႃႇၵူမ်ႈႁူဝ်ၼွမ်းတေႃႇၽႂ်၊ ႁၵ်ႉၼမ်ႉႁၵ်ႉလိၼ် ႁၵ်ႉမၢၼ်ႈႁၵ်ႉမိူင်းလႃႈ၊ ယႃႇသုတ်ႉပၢႆႈၶၢႆႉၼီၵႂႃႇမိူင်းလႂ်၊ ၶဵင်ႇတႃႉတေႃႇၽူႈၶဵၼ်ၶႂၢၵ်ႈမိူင်းလႃႈ။ မိူင်းၸိုင်ႈတႆးၼႆႉ ၸင်ႇပဵၼ်မိူင်းသူလုၵ်ႈလၢၼ်ၸိုၼ်ႈၸၢင်ႇယဝ်ႉ”- ဝႃႈၼႆ ။


ဝၢႆးၼၼ်ႉ ၸဝ်ႈသြႃႇလူင် ၼရၼႃႇတ ဢွၼ်ႁူဝ်ႁဝ်းၶႃႈသုတ်ႇမုၼ်း ၵႂၢမ်းမင်ႇၵလႃႇလႄႈ သူင်ႇၼၢႆမဵတ်ႉတႃႇထိုင် ၸဝ်ႈၶုၼ်တႆးႁဝ်းၵူႈပၢၼ်ပၢၼ်လႄႈ ယွၼ်းႁႂ်ႈၽဝတႆးႁဝ်း လႆႈလွတ်ႈၽေးၶဵၼ် လႆႈပဵၼ်ၶုၼ်ႁိူဝ်ႈႁိူင်းမိူၼ်ပၢၼ်လၢၼ်ႉၸဝ်ႈ ။


လိူဝ်သေၼၼ်ႉ တီႈမိူင်းလၢၼ်ႉၸဝ်ႈၼႆႉ မီးသႅင်ႇ/ႁၢၼ်ႉၶဝ်ႈႁိူၼ်းတႆး။ ၸဝ်ႈၶွင်ပဵၼ်ၼၢင်းၶမ်းဢေး မၢၼ်ႈၼွင်သွင်မိူင်းမၢဝ်း၊ မၼ်းၼၢင်းၼႆႉ ဢၼ်လႆႈတင်ႈသႅင်ႇ/ႁၢၼ်ႉမႃးတီႈမိူင်းသေ (ၶုၺ်ႊမိၼ်ႉ)သေ ပဵၼ်ႁၢၼ်ႉၸိုဝ်ႈသဵင်ယႂ်ႇ ၵူၼ်းၶွၼ်ႈၵိုၼ်းႁၢၼ်ႉၼိုင်ႈ။ ႁၢၼ်ႉတီႈမိူင်းသေၼႆႉ မီးလုၵ်ႈၼွင်ႉၵူၼ်းထႅမ် 100 ၵေႃႉပၢႆ၊ ၼိုင်ႈဝၼ်းတေၶၢႆလႆႈၽတ်ႉၽဵင်ႇမွၵ်ႈ 300 ၽိူၼ်ၼႆႉ။ ပဵၼ်သႅင်ႇဢၼ်မီးမွၵ်ႇၼႃႈတႃမၢၼ် တႃႇတႆးႁဝ်းတႄႉတႄႉ။ မၼ်းၼၢင်းမီးသႅင်ႇ/ႁၢၼ်ႉၵိင်ႇၽႄလၢႆလၢႆတီႈ၊ ဢၼ်လႆႈမႃးတင်ႈထႅင်ႈ တီႈႁိမ်းၼမ်ႉၼွင်သေလူင် မိူင်းလၢၼ်ႉၸဝ်ႈၼႆႉ ပဵၼ်ႁၢၼ်ႉၽႄမၢႆ 4 တႃႇမၼ်းၼၢင်း ။


ၵွပ်ႈမၼ်းၼၢင်း မီးၸႂ်ႁၵ်ႉႁွမ်ပုတ်ႉထသႃသၼႃတႄႉတႄႉဝႃႈဝႃႈသေ မိူဝ်ႈဝၼ်းတီႈ 26/09/2016 လႆႈၼိမၼ်တၼၽိတ်ႈပၢင်းသင်ၶၸဝ်ႈတႆး 21 တူၼ် ယေႃးတူဝ်တီႈႁၢၼ်ႉ သုတ်ႇမုၼ်းပိုတ်ႇႁၢၼ်ႉမႂ်ႇထႅင်ႈ။ ယွၼ်းႁႂ်ႈပီႈၼွင်ႉတႆး လႆႈမၢၵ်ႈမီးလီပဵၼ် ႁၢၼ်ႉၶဝ်ႈၽၵ်းတႆး ႁႂ်ႈလႆႈၸွတ်ႇတူဝ်ႈ၊ ပီႈၼွင်ႉတႆး ႁႂ်ႈမေႃႁၵ်ႉႁွမ်ၵၼ်၊ ၶွတ်ႇလိူတ်ႈၵၼ်ပၼ်ႈၵႅၼ်ႇၼႅၼ်ႈၼႃၵူႈတီႈၵူႈမိူင်းသေၵမ်း ။


ၸဝ်ႈၶူးတိုၼ်းတႆး မိူင်းမၢဝ်း
26/09/2016