ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ် တၢင်ႇလိၵ်ႈယွၼ်းၶိုၼ်းတီႈ လိၼ်ပၼ်ၵူၼ်းမိူင်း လႃႈသဵဝ်ႈ ဢၼ်လူင်ပွင်ၸိုင်ႈသိုၵ်းမၢၼ်ႈ ႁုပ်ႈယိုတ်း မိူဝ်ႈပီ 1992 တင်းမူတ်း 3.5 ဢေႊၵိူဝ်ႊ ။


ၸၢႆးဝၼ်းလႅင်းၶမ်း တၢင်ႇလိၵ်ႈတုၵ်းယွၼ်းၶိုၼ်းတီႈလိၼ် လုင်းၸၢႆးထုၼ်း ပွၵ်ႉ 12 ၸႄႈဝဵင်းလႃႈ သဵဝ်ႈ တင်းမူတ်း 3.5 ဢေႊၵႃႊ။


ဝၼ်းတီႈ 23/09/2016 ပၢင်ၵုမ်သၽႃးၸိူဝ်ႉၸၢတ်ႈ တီႈၼေႇပျီႇတေႃႇၼၼ်ႉ ၵႅမ်ၽွင်းလူင်ၾၢႆႇ ၼႂ်းမိူင်း ၸွမ်ႁၢၼ် ဢွင်ႇသူဝ်းတွပ်ႇလၢတ်ႈဝႃႈ “ တီႈလိၼ်လုင်းဢၢႆႈထုၼ်းၼႆႉ မိူဝ်ႈပၢၼ်ႁဵတ်းပၢင်ႇ(ၵႂၢင်း) မၢၵ်ႇၼင် လႆႈယိုတ်းပႃးဢိတ်းၼိုင်ႈ၊ ဢမ်ႇလႆႈယိုတ်းတင်းမူတ်း။ ၵူၺ်းၵႃႈ ၽိူဝ်ႇ ႁဵတ်းဝဵင်းမႂ်ႇ ၸင်ႇလႆႈၵႂႃႇယိုတ်းဢဝ်တင်းမူတ်း၊ ၵူၺ်းၵႃႈၶိုၼ်းသၢႆႈတႅၼ်းပၼ်ဝႆႉတီႈ ထိၼ်းယူးမႅင်ႇ တၢင်းၼွၵ်ႈဝဵင်းၼၼ်ႉ ၼိုင်ႈဢေႊၵႃႊယဝ်ႉ။ ၵူၺ်းၵႃႈ ဝၢႆးၼႆႉ ၵွပ်ႈပိူဝ်ႈၵပ်း သိုပ်ႇႁႃလုင်းၸၢႆးဢၢႆႈထုၼ်း ဢမ်ႇလႆႈလႄႈ ဢမ်ႇၸၢင်ႈႁဵတ်းႁိုဝ်ထႅင်ႈ” ဝႃႈၼႆ ။


ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ လၢတ်ႈဝႃႈ “ လိၼ်ၼႆႉ မၼ်းပဵၼ်မိူဝ်ႈပၢၼ် လူင်ပွင်ၸိုင်ႈသိုၵ်းမၢၼ်ႈ ႁုပ်ႈယိုတ်းဝႆႉ မိူဝ်ႈ 1992 ၼၼ်ႉ သမ်ႉပႃးလိၼ်လုင်းၸၢႆးဢၢႆႈထုၼ်းၼႆႉၵႂႃႇ မၼ်းၵေႃႈၶတ်းၸႂ်တၢင်ႇ မႃးၸဵမ်ၸိူဝ်းလႂ်။ မိူဝ်ႈပူၼ်ႉမႃး ၼႂ်းသၽႃးၸိူဝ်းၼၼ်ႉၵေႃႈ တၢမ် တူဝ်မၼ်းၵေႃႈ ၶဝ်ႈမႃးၼႂ်းသၽႃးသေ မၼ်းတၢင်ႇထိုင် ၸွမ်ၸိုင်ႈတဵင်းၸဵင်ႇ၊ ၵႅမ်ၸွမ်ၸိုင်ႈ တွၵ်ႊတိူဝ်ႊ ၸၢႆးမွၵ်ႇၶမ်း၊ ၽွင်းလူင်မိူင်းတႆး ၵူႈတီႈတီႈ ၽႂ်ၵေႃႈ ဢမ်ႇဝႆႉၼမ်ႉၼၵ်းႁဵတ်းပၼ်၊ ၵမ်းၼႆႉ ထိုင်ပၢၼ်ၶႃႈ ၵေႃႈမၼ်းၶတ်းၸႂ်တၢင်ႇမႃးထႅင်ႈလႄႈ  ၶႃႈၸင်ႇဢဝ်မႃးတၢင်ႇ တီႈၼႂ်းသၽႃးတွင်ႈထၢမ်ပၼ်” ဝႃႈၼႆ။


တီႈလိၼ် လုင်းၸၢႆးဢၢႆႈထုၼ်းၼႆႉ ၾၢႆႇလူင်ပွင်ၸိုင်ႈ သၢႆႈတႅၼ်းပၼ်ၶိုၼ်း 1 ဢေႊၵႃႊ ယဝ်ႉဝႃႈၼႆသေတႃႉ တူဝ်မၼ်းၸၢႆးလၢတ်ႈဝႃႈ ထိုင်ယၢမ်းလဵဝ် တၢင်းၾၢႆႇၸႄႈဝဵင်းလႃႈသဵဝ်ႈသေ ယင်းပႆႇလႆႈ တူၵ်းလူင်းသင်ၵၼ်လႆႈ ဝႃႈၼႆ ။


တီႈလိၼ်ၵူၼ်းမိူင်းၼႂ်းၸႄႈဝဵင်းလႃႈသဵဝ်ႈၼႆႉ ဢၼ်ထုၵ်ႇသိုၵ်းမၢၼ်ႈ လူင်ပွင်ၸိုင်ႈႁုပ်ႈယိုတ်းဝႆႉ ၼၼ်ႉ ယင်းတိုၵ်ႉၵိုတ်းထႅင်ႈတင်းၼမ်၊ ယူႇတီႈၾၢႆႇၽွင်းငမ်းၸႄႈဝဵင်း ၶဝ်ၵေႃႈ ဢွၼ်ၵၼ် ၵႄႈလိတ်ႈယူႇ မၼ်းမီးပၼ်ႁႃၼမ်လိူဝ်ႁႅင်းလႄႈ တေၵႄႈၶႆၵႂႃႇ ပဵၼ်ၶၵ်ႉပဵၼ်တွၼ်ႈ ဝႃႈၼႆ ။