ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်ႈတႆး ပူင်သွၼ် ၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇ၊  ႁူပ်ႉထူပ်းပႃး ပီႈၼွင်ႉၵူၼ်းမိူင်း ပွတ်းၸႄႈဝဵင်းသီႇပေႃႉ၊ ႁိမ်း 200 ၵေႃႉ ။

Photo: Shan Farmers

ဝၼ်းတီႈ 26/09/2016 ယၢမ်း ၵၢင်ၼႂ် 08:00-04:00 မူင်း ဝၢႆးဝၼ်း ၸုမ်းၵေႃႁူမ်ႈသၢင်ႈၸဝ်ႈႁႆႈ ၸဝ်ႈၼႃးၸိုင်ႈတႆး ႁူပ်ႉထူပ်း လႅၵ်ႈလၢႆႈတင်းႁူႉၵူၼ်းမိူင်း၊ ၵဵဝ်ႇၵပ်း လွင်ႈငဝ်းလၢႆးၵေႃႇ သၢင်ႈၾၢႆ လႄႈ ၵၢၼ်ပၢႆးမိူင်း ၸဵမ်ၸိူဝ်းၼႆႉ။ ပၢင်ႁူပ်ႉထူပ်း ၸတ်းႁဵတ်းတီႈ ဝၢၼ်ႈတႃႈလူင်၊ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၼႆယဝ်ႉ ။


ၼၢင်းလၢဝ်ၶမ်း ၽူႈပွင်ၵၢၼ်ၵူႈလွင်ႈလွင်ႈ ပၢင်ႁူပ်ႉထူပ်းၼႆႉ လၢတ်ႈဝႃႈ “ ပၢင်ႁူပ်ႉထူပ်းၼႆႉ ၵူၼ်းဝၢၼ်ႈ ၵူၼ်းလူင်ၼႂ်းဢိူင်ႇၼႂ်းဝၢၼ်ႈပႃးၸဵမ် ၵူၼ်းၼုမ်ႇၸိူဝ်းမႃးၶဝ်ႈႁူမ်ႈ ပၢင်ၽိူမ်ႉ ၼမ်ႉၵတ်ႉ တင်းမူတ်းၼႆႉ တေမီး ႁိမ်း 200 ၵေႃႉ၊ လႆႈဢုပ်ႇဢူဝ်းၵၼ် လွင်ႈယၢပ်ႇၽိုတ်ႇလွင်ႈၼမ်ႉ တေထူမ်ႈ ဝၢၼ်ႈႁဝ်းၶႃႈ သင်ဝႃႈ ပိူၼ်ႈမႃးသၢင်ႈၾၢႆၼိူဝ်မႄႈၼမ်ႉတူႈ၊ ၵဵဝ်ႇၵပ်းလွင်ႈၼႆႉ ၸုမ်းၵေႃႁူမ်ႈ သၢင်ႈၸဝ်ႈႁႆႈ ၸဝ်ႈၼႃး ၸိုင်ႈတႆးတင်း ၵူၼ်းမိူင်းဢုပ်ႇဢူဝ်းလႅၵ်ႈလၢႆႈၵၼ် ႁႃတၢင်းဢွၵ်ႇၸွႆႈၵၼ်” ဝႃႈၼႆ ။


ၼွၵ်ႈလိူဝ်သေၼၼ်ႉ လႆႈၸတ်းႁဵတ်းပၢင်ယင်ႇၵၢင်ၸႂ် ထၢမ်ၵၢင်ၸႂ်ၵူၼ်းမိူင်း လွင်ႈတေၵေႃႇသၢင်ႈ ၾၢႆၼိူဝ်မႄႈၼမ်ႉတူႈ ၽႂ်ၵမ်ႉထႅမ်၊ ဢမ်ႇၵမ်ႉထႅမ်။  တင်းမူတ်း ၽူႈၶဝ်ႈႁူမ်ႈမီး 187 ၵေႃႉ၊ ၵူၼ်းဢမ်ႇ ႁၼ်လီဢမ်ႇၵမ်ႉထႅမ် မီး 183 ၵေႃႉ၊ ၶႅပ်းၵၢင်ၸႂ် ထုၵ်ႇပၢၵ်ႈပႅတ်ႈ မီး 4 ၶႅပ်း ဝႃႈၼႆ ။


မိူဝ်ႈဝၼ်းတီႈ 24-25/09/2016 ၼၼ်ႉၵေႃႈ ၸုမ်းၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆး လူင်း ပၼ်ပၢင်သွၼ် ၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇ တီႈဝၢၼ်ႈတႃႈလူင် ၼႂ်းဢိူင်ႇၼႃးမၢၵ်ႇၶေႃ ၶၢဝ်း တၢင်းသွင်ဝၼ်း တင်းမူတ်း ၵူၼ်းၼုမ်ႇၶဝ်ႈႁူမ်ႈလဵပ်ႈႁဵၼ်း မီး 110 ၵေႃႉ ယိူင်းဢၢၼ်း တႃႇႁၢင်ႈႁႅၼ်း ၵူၼ်းၼုမ်ႇ တႃႇၶဝ်ႈႁူမ်ႈပၢင်ၵုမ် ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆး ပွၵ်ႈၵမ်း 3 ဢၼ်တေ ထိုင်မႃးၼႆႉ။ ၵူၺ်းၵႃႈ တေပဵၼ်မိူဝ်ႈလႂ် တီႈလႂ်တႄႉ ယင်းပႆႇႁူႉ- ဝႃႈၼႆ ။