ပၢင်သပ်းၸႅင်ႈၶၢဝ်ႇလႄႈၼႄငဝ်းတူင်ႉ ၵုၼ်ႁဵင်တေတူၵ်းတႂ်ႈၽေးၶဵၼ်ၽႅၼ်ၵၢၼ် ၽၢႆ ၼမ်ႉၶူင်း ၵဵဝ်ႇလူၺ်းလွင်ႈ  ၶူဝ်းၶွင်ၵိုၵ်းပိုၼ်း သၽႃႇဝတၢင်းႁၢင်ႈလီလႄႈၾိင်ႈထုင်းတႆး တေလႆႈလူႉသုမ်း ယွၼ်ႉၶူင်းၵၢၼ်လူင်ၾၢႆၼိူဝ်မႄႈၼမ်ႉၶူင်း ၼႂ်းၸိုင်ႈတႆး  ၸတ်းႁဵတ်းတီႈတႃႈၵုင်ႈ တူၼ်ႈတီႈ ၵမ်းလဵဝ်ၵိုၵ်းၵၼ် ။

ပၢင်သပ်းၸႅင်ႈၶၢဝ်ႇ ဢၼ်ၸတ်းႁဵတ်းတီႈဝဵင်းတူၼ်ႈတီး

ပၢင်သပ်းၸႅင်ႈၶၢဝ်ႇဢၼ်ႁဵတ်းတီႈဝဵင်းတႃႈၵုင်ႈ

ဝၼ်းတီႈ28/09/2016 ယၢမ်းၵၢင်ၼႂ် ၸုမ်းတူင်ႉၼိုင်တူင်ႇဝူင်းၵူၼ်းတႆး Shan CBO’s လႄႈၸုမ်း ၵပ်းသၢၼ်တူင်ႉၼိုင်ပိူဝ်ႈတႃႇမႄႈၼမ်ႉၼႂ်းၸိုင်ႈတႆး Shan State River ဢွၼ်ႁူဝ်ၸတ်းႁဵတ်း ပၢင်သၢႆၼႄငဝ်းႁၢင်ႈသဵင် လႄႈ  ပၢင်သပ်းၸႅင်ႈၶၢဝ်ႇ။   ဢၼ်မီးၸိုဝ်ႈဝႃႈ “ငဝ်ႈႁၢင်ႈသဵင်မႂ်ႇ ၵုၼ်ႁဵင်ၼႂ်းၸိုင်ႈတႆးဢၼ်ဢမ်ႇမီးဢၼ်မိူၼ်ၼၼ်ႉ ယူႇၼႂ်းၽေးၶဵၼ်ၽႅၼ် ၵၢၼ်ၾၢႆၼမ်ႉၶူင်း”  ၼၼ်ႉၸတ်းႁဵတ်းၵႂႃႇမိူဝ်ႈလဵဝ်ၵၼ် 2 တီႈ ။


ၼႂ်းငဝ်ႈႁၢင်ႈသဵင်ၼၼ်ႉၼႄဝႆႉပႃးလွင်ႈပေႃႈမႄႈပီႈၵူၼ်းမိူင်းဢၼ်ပိုင်ႈဢိင်ယူႇသဝ်းၵိၼ်သၢင်ႈၸွမ်းသၢပ်ႇၼမ်ႉပၢင်၊ တၢင်းႁၢင်ႈလီၵုၼ်ႁဵင် လႄႈၶူဝ်းၶွင်ၵိုၵ်းပိုၼ်း  မူၺ်ႇတေႃႇထၢတ်ႈၸႅတ်ႈၸိူဝ်းၼႆႉ ။ ပေႃးသၢင်ႈၾၢႆ တႃႈသၢင်းၸိုင် ၼမ်ႉတေထူမ်ႈထိုင်ထုင်ႉဝဵင်းၵုၼ်ႁဵင်။ ၵူၼ်းဝၢၼ်ႈၵူၼ်းမိူင်း  တေလႆႈ ပိုၼ်ႉပွႆႇပႅတ်ႈတီႈလိၼ်သူၼ်ႁႆႈၼႃးၸဝ်ႈၵဝ်ႇ သေ ဢွၼ်ၵၼ်ပၢႆႈၽၢတ်ႇဝၢၼ်ႈယၢၼ်မိူင်း ။ လိူဝ် ၼၼ်ႉ လႆႈတွင်ႈထၢမ်ဝႆႉပႃး လွင်ႈယူႇသဝ်းၵိၼ်သၢင်ႈ ၵူၼ်းၼႂ်းပိုၼ်ႉတီႈ ၊ ဢိၵ်ႇငဝ်းလၢႆးမိူဝ်ႈပၢၼ် ပီ 96-97 ဢၼ်ၺႃးလိုပ်ႈၶၢႆႉၸိူဝ်းၼၼ်ႉၵေႃႈပႃးဝႆႉ   ။


လိူဝ်ၼၼ်ႉၼႂ်းငဝ်းႁၢင်ႈၼၼ်ႉ သပ်းၸႅင်ႈပႃးဝႆႉဝႃႈ ယွၼ်ႉပိူဝ်ႈၾၢႆလူင်ဢၼ်တေႁဵတ်းၼိူဝ်မႄႈၼမ်ႉၶူင်းၼႆႉ ယူႇဝႆႉၼိူဝ်သဵၼ်ႈၽႅၼ်လိၼ် ဢၼ်ၸၢင်ႈဝႆ သင်ဝႃႈမီးၽေးသၽႃႇဝ ၵိုင်ႉၵၢင်ပဵၼ်မႃးၸိုင်ၵူၼ်းဝၢၼ်ႈၵူၼ်း မိူင်းတေ ထူပ်းတၢင်းယၢပ်ႇၽိုတ်ႇ ၼႆႉၵေႃႈသပ်းလႅင်းပႃး ။


ပၢင်သပ်းၸႅင်ႈတီႈဝဵင်းတႃႈၵုင်ႈ ၸတ်းႁဵတ်းတီႈႁူင်းႁႅမ်း Orchid Hotel ၶၢဝ်းယၢမ်း 10:00-12:30 ။  မီးၽူႈယႂ်ႇ ၵူၼ်းလူင်မိူၼ်ၼင်ႇ ႁူဝ်ပဝ်ႈငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ၸဝ်ႈၶုၼ်ထုၼ်းဢူး ၊ ၽူႈၶၢၼ်ပၢၵ်ႇ  ၸၢႆးလဵၵ်ႉ၊ ၽွင်းတႅၼ်းသၽႃး ၵူၼ်းမိူင်းၵုၼ်ႁဵင် ၼၢင်းၶိၼ်ႇၸေႃး ၊ ၽွင်းတႅၼ်းၸႄႈ မိူင်းသႅၼ်ဝီ ၼၢင်းၶိၼ်ႇထႃးယီႇ၊ ၸုမ်းတူင်ႉၼိုင်လွင်ႈမႄႈၼမ်ႉ ၼၢင်းၶမ်းမၢႆ လႄႈၸၢႆးၶိူဝ်းသႅင် ၸိူဝ်းၼႆႉမွၵ်ႇလၢတ်ႈသပ်းလႅင်း ဢဝ်ႁူဝ်ၶေႃႈဢၼ်ဝႃႈ Save our thousand islands “ၵႅတ်ႇၵင်ႈၵုၼ်ႁဵင်ႁဝ်းလႄႈ”ၼႆသေၸတ်းႁဵတ်းၵႂႃႇ။ ၵူၼ်းၼုမ်ႇလႄႈၸုမ်းၶၢဝ်ႇဢိၵ်ႇ ၵူၼ်းၼႂ်းပိုၼ်ႉတီႈ ၶဝ်ႈႁူမ်ႈ ႁိမ်း 100 ၵေႃႉ။


ၸဝ်ႈၶုၼ်ထုၼ်းဢူး ႁူဝ်ပဝ်ႈပႃႇတီႇႁူဝ်သိူဝ် SNLD လၢတ်ႈဝႃႈ - “ ၾၢႆၼမ်ႉၶူင်းၼႆႉဢမ်ႇမီးၼမ်ႉ တွၼ်းတွၼ်ႈတႃႇၵူၼ်းမိူင်းသင် ။ ၵူၺ်းၵႃႈဢၼ်တေတုမ်ႉတိူဝ်ႉလႆႈထူပ်းတၢင်းယၢပ်ႇသမ်ႉပဵၼ်ၵူၼ်းမိူင်း။ ၵွပ်ႈၼၼ်လႄႈ မၼ်းတေၸၢင်ႈတုမ်ႉတိူဝ်ႉလွင်ႈငမ်းယဵၼ်။ ယွၼ်ႉၼၼ်လႄႈ ဢမ်ႇ ႁၼ်လီၸွမ်း လွင်ႈသၢင်ႈၾၢႆၼႆႉ” ဝႃႈၼႆ ။


ၸၢႆးလွႆၶမ်းပၢင်ႇ ၵူၼ်းၼုမ်ႇတႆးဢၼ်လႆႈၶဝ်ႈႁူမ်ႈ ၵေႃႈလၢတ်ႈဝႃႈ - “ ဢၼ်ႁဵတ်းလွင်ႈႁုၼ်ႈမုၼ်းၼႆႉ မၼ်းမီးတၢင်းလွင်ႈလီလႄႈလွင်ႈၸႃႉ။ၵူၺ်းၵႃႈဝႃႈပေႃးၵူၼ်းၸုမ်းလႂ်ၸုမ်းၼိုင်ႈလႆႈၼမ်ႉတွၼ်းၽွၼ်းလီ သေၵူၼ်းတင်းၼမ်သမ်ႉတုမ်ႉတိူဝ်ႉထူပ်းတၢင်းယၢပ်ႇၼၼ်ႉဢမ်ႇထုၵ်ႇလီႁဵတ်း” ဝႃႈၼႆ။


တီႈဝဵင်းတူၼ်ႈတီႈသမ်ႉ ၸတ်းႁဵတ်းတီႈႁူင်းႁေႃၵေႃလိၵ်ႈလၢႆး ဢဝ်ႁူဝ်ၶေႃႈဢၼ်ဝႃႈ “ၼမ်ႉၶူင်းၼႆႉဢမ်ႇၸႂ်ႈတႃႇၶၢႆ” ႁႂ်ႈၵိုတ်းယိုတ်းလွင်ႈၵေႃႈသၢင်ႈၾၢႆႇၵမ်းလဵဝ်ၼႆသေ ၸတ်းႁဵတ်းၵႂႃႇမီးၽူႈယႂ်ႇၵူၼ်းလူင်ၵူၼ်းၼႂ်းပိုၼ်ႉတီႈၶဝ်ႈႁူမ်ႈႁိမ်း100။ ၼၢင်းၼူၼ်းမူဝ် သပ်းလႅင်း လွင်ႈငဝ်းႁၢင်ႈသဵင်၊ ၼၢင်းၶမ်းၼွင်ႉလၢတ်ႈလွင်ႈၵၢၼ်သၢင်ႈၾၢႆၼိူဝ်မႄႈၼမ်ႉၶူင်း ။


ၸဝ်ႈႁေႇမႃႇတႅၵ်ႈ ၵေႃႉပဵၼ်လုၵ်ႈယိင်းၸဝ်ႈၾႃႉလူင်ယွင်ႁူၺ်ႈ ၸဝ်ႈသူၺ်ႇတႅၵ်ႈ လၢတ်ႈဝႃႈ “ မိူင်းတႆးၼႆႉမီးၼႂ်းမိူင်းႁူမ်ႈတုမ်။ ပေႃးတုမ်ႉတိူဝ်ႉမိူင်းတႆး ၵေႃႈတုမ်ႉ တိူဝ်ႉပႃးမိူင်းႁူမ်ႈတုမ် ။ ၵွပ်ႈၼၼ်လႄႈၶႂ်ႈႁႂ်ႈၸၢဝ်းၶိူဝ်းၼႂ်းမိူင်းႁူမ်ႈတုမ်းမႃးၸွႆႈၵူၼ်းမိူင်းတႆး။  ၵႅတ်ႇၵင်ႈ ႁၵ်ႉသႃပီႈၼွင်ႉတႆး။  လိူဝ်ၼၼ်ႉပီႈၼွင်ႉတႆးၸိူဝ်းဢၼ်လႆႈပၢႆႈ ၵႂႃႇယူႇတၢင်ႇဝၢၼ်ႈ တၢင်ႇမိူင်းၼၼ်ႉၵေႃႈ ပဵၼ်ဢၼ်ၸႂ်ဢမ်ႇလီၸွမ်းတႄႉတႄႉ။ပေႃးဝႃႈမိူင်းတႆးႁဝ်းၵတ်းယဵၼ်ဢမ်ႇမီးၽေးၶဵၼ်သင်ၶႂ်ႈႁႂ်ႈမႃးယူႇၶိုၼ်းမိူင်းတႆးႁဝ်း သေၵမ်း” ဝႃႈၼႆ ။


ၸိူင်ႉၼၼ်ၼင်ႇၵဝ်ႇတီႈဝဵင်းၵဵင်းမႆႇၸိုင်ႈထႆးၵေႃႈၸတ်းပၢင်ၼႄငဝ်းႁၢင်ႈသဵင်လႄႈသပ်းၸႅင်ႇၶၢဝ်ႇ လွင်ႈၾၢႆၼိူဝ်မႄႈၼမ်ႉၼႂ်းၸိုင်ႈတႆး  ၶၢဝ်းယၢမ်းၵၢင်ၶမ်ႈ 06:00-09:00 တီႈဝတ်ႉပႃႇပဝ်ႈ ။


ၼမ်ႉၶူင်းၼႆႉလုၵ်ႉတီႈမိူင်းၶႄႇသေလႆလတ်းၵၢင်မိူင်းတႆး။ လူင်ပွင်ၸိုင်ႈမၢၼ်ႈ ႁူမ်ႈမိုဝ်းတင်း ၶွမ်ႊပၼီႇမိူင်းၶႄႇ မိူင်းထႆးသေတေၵေႃႇသၢင်ႈၾၢႆၼိူဝ်မႄႈၼမ်ႉၶူင်း 6 ဢၼ်။ ၼႂ်းမိူင်းတႆး 4 ဢၼ်လႄႈ မိူင်း ယၢင်း 2 ဢၼ် ။


ၾၢႆဢၼ်တေသၢင်ႈၼိူဝ်မႄႈၼမ်ႉၶူင်းၼႆႉ တေမီးမိူၼ်ၼင်ႇၾၢႆမိူင်းတူၼ်၊ တၢင်းႁႅင်းၾႆးၾႃႉ တေႁဵတ်း ဢွၵ်ႇလႆႈ 7,100 မႄႊၵဝတ်ႉ။ ၾၢႆၵုၼ်လူင် တၢင်းႁႅင်း 1,400 မႄႊၵဝတ်ႉ။ ၼွင်ၽႃ 1,200 မႄႊၵဝတ်ႉ။ ၾၢႆမၢၼ်ႈတူင်ႈ 200 မႄႊၵဝတ်ႉ။ လိူဝ်သေၼၼ်ႉ ၾၢႆဢၼ်တေသၢင်ႈ ၼိူဝ်မႄႈၼမ်ႉၶူင်းထႅင်ႈ တီႈၼႂ်းမိူင်းလႅင် တီႈယႂႃႇတိတ်ႉ တၢင်းႁႅင်း 4,000 မႄႊၵဝတ်ႉ။ ၾၢႆႁတ်ႉၵျီး တီႈၼႂ်းမိူင်းယၢင်းၽိူၵ်ႇ တၢင်းႁႅင်း 1,360 မႄႊၵဝတ်ႉ။ သင်ဝႃႈသၢင်ႈၾၢႆၸိူဝ်းၼႆႉယဝ်ႉ ႁႅင်းၾႆးၾႃႉ ၵမ်ႈ ၼမ် တေသူင်ႇၶၢႆပၼ်မိူင်းၶႄႇ တင်းမိူင်းထႆး  ။