ၸဝ်ႈလၢဝ်မိူင်း ပၢင်လူင် ၽူႈႁၵ်ႉၸၢတ်ႈ ဢၼ်ယၢမ်ႈႁၢပ်ႇၵၢၼ်ၸိူဝ်ႉၸၢတ်ႈ ၸိုင်ႈတႆးမႃး ၼႂ်းလၢႆးလုၵ်ႉၽိုၼ်ႉ လႆႈလူႉသဵင်ႈသုတ်းမုၼ်ၵႂႃႇ တီႈဝဵင်းပၢင်လူင် ၸိုင်ႈတႆးပွတ်းၸၢၼ်း။ တေပူၼ်ႉၶၢပ်ႈတူဝ် မိူဝ်ႈၽုၵ်ႈ ။

ၽူႈႁၵ်ႉၸၢတ်ႈ ၸဝ်ႈလၢဝ်မိူင်း ပၢင်လူင်ၼႆႉ လူႉသဵင်ႈၵႂႃႇယွၼ်ႉတၢင်းပဵၼ် မၢၵ်ႇႁဵင်းတပ်း၊ ၽွင်းဢႃယုသႅၼ်းပၢၼ် 59 ပီ တီႈႁိူၼ်းမၼ်းၸဝ်ႈ ပွၵ်ႉ 4 ပွၵ်ႉတုမ်ႇမူဝ် ဝဵင်းပၢင်လူင်၊ မိူဝ်ႈဝၼ်းတီႈ 21/09/2016 ၶၢဝ်းယၢမ်း 05:30 မူင်း။ တေပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းတီႈ 23/09/2016 ၼႆႉ- ၼႆယဝ်ႉ ။


ၸဝ်ႈလၢဝ်မိူင်းၼႆႉ ၵိူတ်ႇမိူဝ်ႈပီ 1319 ၊ ဝၼ်းပုတ်ႉတီႈ 02/10/1957 ။ ပေႃႈၸိုဝ်ႈလုင်းၸၢင်းထမ်းဢူ၊ မႄႈၸိုဝ်ႈပႃႈၸၢင်းသူၺ်ႇလီႇ၊ ပဵၼ်ၵူၼ်းၸႃႇတိ ဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ မီးပီႈၼွင်ႉႁူမ်ႈတွင်ႉ 7 ၵေႃႉ ပဵၼ်ၵေႃႉထီႉ 1 ။ ၵၢၼ်ႁဵၼ်းယဝ်ႉၸၼ်ႉ 10 ။ မေးၼၢင်းၸိုဝ်ႈပႃႈၶိုၼ် မီးလုၵ်ႈလၢင်းႁူမ်ႈၵၼ် 2 ၵေႃႉ ၸၢႆး 1 ယိင်း 1 ။


ၶၢဝ်းတၢင်းႁၢပ်ႇၵၢၼ်ၸိူဝ်ႉၸၢတ်ႈၼၼ်ႉ ပီ 1983 ၶဝ်ႈႁၢပ်ႇၵၢၼ်ၼႂ်း တပ်ႉသိုၵ်းၸိူဝ်ႉၸၢတ်ႈလုၵ်ႉၽိုၼ်ႉ ၸိုင်ႈတႆး (SURA) ဢၼ်ၸဝ်ႈၵွၼ်းၸိူင်းဢွၼ်ႁူဝ်။ ၶဝ်ႈသိုၵ်းတီႈ ၸဝ်ႈၵွၼ်းၸိူင်း တီႈပၢင်မႂ်ႇသုင် (ပၢင်ၵမ်ႉၵေႃႇ) လႅၼ်လိၼ်တႆး-ထႆး ဢၼ်တေႃႇၼႃႈၵၼ်တင်းမိူင်းထႆး ဝၢၼ်ႈလၵ်းတႅင်ႇ ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ။ ပဵၼ်ၸၼ်ႉၶုၼ်သိုၵ်းလူင်၊ ႁဵတ်းၽူႈမၢႆၸဝ်ႈသိုၵ်းမူၼ်းသေ တူင်ႉၼိုင်ၸွမ်းတပ်ႉၵွင် 275 တေႃႇ ၶုၼ်သႃႇ ပေႃးဢွၼ်ႁူဝ်တပ်ႉသိုၵ်းမိူင်းတႆး (MTA) ယွမ်းတူဝ်ဝၢင်းၶိူင်ႈ ပၼ်ၸုမ်းသိုၵ်းမၢၼ်ႈ မိူဝ်ႈႁူဝ်ပီ 1996 ။


ၽူႈမီးၸၼ်ႉ ၼႂ်းတပ်ႉသိုၵ်းၵူၼ်းမိူင်း (ၸုမ်းပီႇတုၸိတ်ႉ) ၸုမ်းၼိုင်ႈ ဢၼ်ယၢမ်ႈႁၢပ်ႇၵိုတ်ႉၵၢၼ်သိုၵ်း ၼႂ်းတပ်ႉသိုၵ်းမိူင်းတႆးၸွမ်းၵၼ်မႃး လၢတ်ႈၼႄဝႃႈ- “မၼ်းၸဝ်ႈၼႆႉ ပေႃးလွင်ႈႁႅင်းၸႂ် လွင်ႈႁၵ်ႉၸိူဝ်ႉၶိူဝ်း ဝၢၼ်ႈမိူင်းၼႆႉတဵမ်ထူၼ်ႈယဝ်ႉ။ ၵူၺ်းၵႃႈ ယွၼ်ႉပၢႆးယူႇလီဢမ်ႇၶႅမ်ႉလႄႈ ဝၢႆးဝၢင်းၶိူင်ႈၵိုတ်းလိုဝ်ႈၵၢၼ်သိုၵ်း မႃးၼႆႉ ဢမ်ႇပေႃးလႆႈႁဵတ်းၵၢၼ်ၸိူဝ်ႉၸၢတ်ႈသင်”- ဝႃႈၼႆ ။