ပိုၼ်းမိူင်းမၢၼ်ႈလႄႈၸိူဝ်ႉၸၢတ်ႈၸိုင်ႈမိူင်းမၢၼ်ႈ ဢၼ်မၢၼ်ႈယုမ်ႇယမ်ဝႃႈ မၢၼ်ႈသၢင်ႈမႃးလူၺ်ႈ ၸိူဝ်ႉၶိူဝ်းလဵဝ် ၽႃသႃလဵဝ် ၸဵမ်မိူဝ်ႈပၢၼ်ပူးၵမ်ႇ ပၢၼ်ၵုင်းပွင်ႇၼၼ်ႉ မၼ်းဢမ်ႇၵဵဝ်ႇၵၼ်တင်းၸၢဝ်းၶိူဝ်း၊ သင်ၸိူဝ်ႉဝႃႈတေၵေႃႇတင်ႈၸိုင်ႈမိူင်းၵႂႃႇ လွၵ်းပိူင်ၸိုင်ႈမိူင်းလဵဝ်ယူႇတိၵ်းတိၵ်းၸိုင် သိုၵ်းၼႂ်းမိူင်း တိုၼ်းတေဢမ်ႇယဵၼ်ႁၢႆလႆႈ- ၻွၵ်ႊတိူဝ်ႊသလၢႆးလျႅင်ႇမူင်း သႃၶူင်း လၢတ်ႈ ။

“ပေႃးဝႃႈဢဝ်ၸွမ်းလၢႆးဢၼ်ဝႃႈ ၵေႃႇတင်ႈမႃးလူၺ်ႈၸိူဝ်ႉၸၢတ်ႈလဵဝ်၊ ၽႃသႃၵႂၢမ်းလၢတ်ႈလဵဝ်၊ ၽႃသႃတီႈၵိူဝ်းလီဢၼ်လဵဝ်၊ ၵူၼ်းၶိူဝ်းၶိူဝ်းလဵဝ်ၼႆၵႂႃႇတိၵ်းတိၵ်းတႄႉ ဝၢၼ်ႈမိူင်းမိူင်းမၢၼ်ႈၼႆႉ မၼ်းတိုၼ်းတေဢမ်ႇလီၶိုၼ်ႈမႃးလႆႈ။ ဝၢၼ်ႈမိူင်းဢၼ်ၵေႃႇတင်ႈမႃးၸဵမ်မိူဝ်ႈပၢၼ်ပူးၵမ်ႇ ပၢၼ်ၵုင်းပွင်ႇပုၼ်ႉၼႆႉ မၼ်းပဵၼ်ဝႃႇတမၢၼ်ႈၶိူဝ်းလဵဝ်ၶိူဝ်းယႂ်ႇ၊ ၸၢဝ်းပုတ်ႉထၽႃသႃဢၼ်လဵဝ် ပဵၼ်ယႂ်ႇၵူၺ်း၊ မၼ်းဢမ်ႇမႃးၵဵဝ်ႇၵၼ်တင်းၸၢဝ်းၶိူဝ်းႁဝ်း၊ ၵွပ်ႈဝႃႈမိူင်းႁူမ်ႈတုမ်ၼႆႉ မၼ်းမီးမႃးယွၼ်ႉၸၢဝ်းၶိူဝ်းႁဝ်းၶႃႈ လႆႈလူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်ၼၼ်ႉသေ ႁဝ်းၶႃႈၸင်ႇလႆႈယူႇႁူမ်ႈႁွမ်းၸွမ်းၵၼ်မႃး ၸင်ႇပဵၼ်မိူင်းႁူမ်ႈတုမ်မႃးၵူၺ်း- Dr. သလၢႆးလျႅင်ႇမူင်း သႃၶူင်း လၢတ်ႈ ။


ၶေႃႈၵႂၢမ်းလၢတ်ႈၼႆႉ ၵေႃႉပဵၼ်ၵႅမ်ႁူဝ်ပဝ်ႈ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) Dr. သလၢႆးလျႅင်ႇမူင်း သႃၶူင်း လႆႈလၢတ်ႈၵႂႃႇမိူဝ်ႈၼႂ်းပၢင်ၵုမ်လူင် ဝၼ်းငမ်းယဵၼ်ၵူႈမိူင်းမိူင်း ဢၼ်ၸတ်းႁဵတ်းတီႈတႃႈၵုင်ႈ မိူင်းမၢၼ်ႈ မိူဝ်ႈဝၼ်းတီႈ 21/09/2016 ၼႆႉ ။


Dr. သလၢႆးလျႅင်ႇမူင်း လၢတ်ႈဝႃႈ-ဢၼ်လမ်ႇလွင်ႈသုတ်းၼႆႉ ႁဝ်းၶႃႈတၵ်းတေလႆႈၼပ်ႉယမ်ၼိူဝ် လွင်ႈငမ်းယဵၼ်လႄႈ လွင်ႈၵိုတ်းယိုဝ်းၵၼ် ၼႂ်းဝၢၼ်ႈမိူင်း။ လိူဝ်သေၼၼ်ႉ တေလႆႈၼပ်ႉယမ်ၼိူဝ်ၼမ်ႉၸႂ် ၸၢဝ်းၶိူဝ်း ဢၼ်ယွမ်းဢဝ်ၼႃႈလိၼ်ပူႇမွၼ်ႇၼၢႆးယႃႈၸဝ်ႈၵဝ်ႇ မႃးႁူမ်ႈလေႃးၵၼ်သေ ၵေႃႇတင်ႈမိူင်းႁူမ်ႈတုမ်၊ ဢၼ်လႆႈလူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်ၼၼ်ႉ။ ၾၢႆႇတၢင်းမၢၼ်ႈလႄႈၵူႈၸၢဝ်းၶိူဝ်းတင်းသဵင်ႈ တေလႆႈဝႆႉၼၵ်း ၼပ်ႉယမ်ၼိူဝ်ၼမ်ႉၸႂ်ၸၢဝ်းၶိူဝ်းဢၼ်ၼႆႉ- ဝႃႈၼႆ ။


“ဢၼ်ၸၢဝ်းၶိူဝ်းႁဝ်းၶႃႈ ၶႂ်ႈလႆႈၶႂ်ႈပဵၼ်ဢွၼ်တၢင်းသုတ်းမိူဝ်ႈလဵဝ်ၼႆႉ ပဵၼ်လွင်ႈၼပ်ႉယမ်ၼိူဝ်ၼမ်ႉၸႂ် ၸၢဝ်းၶိူဝ်း။ မိူၼ်ၼင်ႇႁဝ်းၼႆႉ ပဵၼ်ၸၢဝ်းၶိူဝ်းၶျၢင်း၊ ႁဝ်းဢမ်ႇၸႂ်ႈၶိူဝ်းမၢၼ်ႈ၊ ယွၼ်ႉပိူဝ်ႈၸၢဝ်းၶိူဝ်းၶျၢင်းၼႆႉ ပိူၼ်ႈဢွၼ်ၵၼ်ဝႃႈ မၼ်းတူၵ်းလႃႈတူၵ်းလိုၼ်း၊ ဢမ်ႇၶိုၼ်ႈယႂ်ႇမႂ်ႇသုင်၊ ဢမ်ႇမီးငိုၼ်းၶမ်း၊ ပဵၼ်ဝၢၼ်ႈမိူင်း ၵွတ်းၽၢၼ်။ ၵူၺ်းၵႃႈ ၶျၢင်းၼႆႉ မၼ်းတူၵ်းလႃႈတူၵ်းလိုၼ်းသေတႃႉၵေႃႈ မၼ်းမီးပိုၼ်း၊ မီးၼႃႈလိၼ်ႁင်းၵူၺ်း၊ မီးၾိင်ႈထုင်းႁိတ်ႈႁွႆးႁင်းၵူၺ်း၊ မီးၵၢၼ်ၽွင်းငမ်းႁင်းၵူၺ်းမၼ်း။ လွင်ႈၼႆႉ ၾၢႆႇတၢင်းလူင်ပွင်ၸိုင်ႈၶဝ် တၵ်းတေလႆႈဝႆႉၼၵ်း တၵ်းတေလႆႈႁပ်ႉႁွင်းမၵ်းမၼ်ႈ။ ပေႃးဝႃႈဢမ်ႇဝႆႉၼၵ်းၼိူဝ်လွင်ႈၸၢဝ်းၶိူဝ်းၸိူဝ်းၼႆႉ ပၢင်တိုၵ်းတိုၼ်းတေဢမ်ႇယဵၼ်ႁၢႆလႆႈလႃးလႃး၊ ပေႃးဝႃႈဝႆႉၼၵ်းၼပ်ႉယမ်ၼိူဝ်လွင်ႈၼမ်ႉၸႂ်ၸၢဝ်းၶိူဝ်းတႄႉၸိုင် တၵ်းတေလႆႈမီးမႃးပိူင်ၵေႃႇတင်ႈဝၢၼ်ႈမိူင်း ဢၼ်ၵူႈၸၢဝ်းၶိူဝ်းၸၢင်ႈယူႇသဝ်းႁူမ်ႈၵၼ်ၵႂႃႇမိူဝ်းၼႃႈၼၼ်ႉ”- Dr. သလၢႆးလျႅင်ႇမူင်း လၢတ်ႈၼင်ႇၼႆ ။


ဝၢႆးလင်လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်၊ ဝၢႆးလင်လႆႈလွတ်ႈလႅဝ်းၵွၼ်းၶေႃမႃးယဝ်ႉၼႆႉ ဢၼ်ဢမ်ႇၵိုတ်း လႆႈပၢင်တိုၵ်းၼႂ်းမိူင်းၼႆႉ ပဵၼ်ယွၼ်ႉပိူဝ်ႈဝႃႈ ၾၢႆႇတၢင်းမၢၼ်ႈၶဝ် ၶတ်းၸႂ်ၵေႃႇတင်ႈဝၢၼ်ႈမိူင်းလူၺ်ႈ လွၵ်းပိူင်ၸိုင်ႈမိူင်းလဵဝ် ၸိူဝ်ႉၸၢတ်ႈလဵဝ်။ ဢၼ်ဝႃႈၶႂ်ႈႁႂ်ႈပၢင်ဢုပ်ႇၵုမ်ၵၢၼ်မိူင်း ယဝ်ႉတူဝ်ႈဢွင်ႇမၢၼ် ၼႆၼၼ်ႉၵေႃႈ မၼ်းမီးတီႈၵၢင်ၸႂ် ဢၼ်ၶႂ်ႈၵေႃႇတင်ႈမိူင်းႁူမ်ႈတုမ်ၸိုၼ်ႈၸၢင်ႇၼၼ်ႉ ။


ပေႃးဝႃႈၼပ်ႉယမ်ၼမ်ႉၸႂ်ၸၢဝ်းၶိူဝ်းယဝ်ႉ ၸင်ႇတေၸၢင်ႈၵေႃႇတင်ႈၸိုင်ႈမိူင်း၊ ပေႃးၵေႃႇတင်ႈလႆႈမိူင်းႁူမ်ႈတုမ် ၸိုၼ်ႈၸၢင်ႇၵေႃႈ တေမီးၾိင်ႈငႄႈၾိင်ႈထုင်း ဢၼ်လၢၵ်ႇလၢႆမႃးႁူမ်ႈၵၼ်လႆႈ၊ တေမီးၶိူဝ်းၵူၼ်းလၢႆလၢႆၶိူဝ်း၊ တေမီးလွင်ႈယုမ်ႇယမ်ၽႃသႃလၢႆလၢႆဢၼ်။ ပေႃးဝႃႈ ယွမ်းႁပ်ႉမၵ်းမၼ်ႈလႆႈၸိူဝ်းၼႆႉယဝ်ႉ ၸင်ႇပဵၼ်မိူင်းႁူမ်ႈတုမ်ၸိုၼ်ႈၸၢင်ႇ ဢၼ်ႁဝ်းၶႃႈၶႂ်ႈလႆႈၶႂ်ႈပဵၼ်- ၼႆယဝ်ႉ ။