ၸုမ်းၵပ်းသၢၼ်ယေးငိုၼ်းဝူင်းမဵတ်ႉတႃႇ ၸတ်းပၢင်ပၼ်တၢင်းႁူႉၵူၼ်းမိူင်း လွင်ႈၵၢၼ်ယိပ်းသဵၼ်ႈ မၢႆငိုၼ်း ပိူဝ်ႈႁႂ်ႈၵူၼ်းမိူင်းမေႃၸတ်းၵၢၼ်ငိုၼ်းၶဝ်ႈငိုၼ်းဢွၵ်ႇလႄႈ ႁႂ်ႈသဵၼ်ႈမၢႆငိုၼ်းတႅတ်ႈၼႅတ်ႈ ။

ဝၼ်းတီႈ19-21/09/2016 ၼႆႉ ၸုမ်းၵပ်းသၢၼ်ယေးငိုၼ်းဝူင်းမဵတ်ႉတႃႇ ၸႄႈဝဵင်းၼမ်ႉၶမ်းလႄႈ ထုင်ႉလွႆႁူဝ်သိူဝ် သင်ၶၸဝ်ႈဢိၵ်ႇၵူၼ်းၼႂ်းပိုၼ်ႉတီႈ ႁူမ်ႈၵၼ်ၸတ်းႁဵတ်းပၢင်သွၼ် လၢႆးႁဵတ်းသဵၼ်ႈ မၢႆငိုၼ်း  Community Bank ပွၵ်ႈၵမ်း 3။  ၶူးပွင်သွၼ်ပဵၼ် ၸၢႆးၶျိတ်ႉမွင်ႇ မၢၼ်ႈသွၼ်း လႄႈ ၼၢင်း ၺုၼ်ႉၸိင်ႇ ၵုၼ်လူင် ။ ပူင်သွၼ်ပၼ် မိူၼ်ၼင်ႇလၢႆးႁဵတ်းသဵၼ်ႈမၢႆငိုၼ်းၶဝ်ႈငိုၼ်းဢွၵ်ႇ။ မီးၸုမ်းယေးငိုၼ်း လၢႆလၢႆတီႈ မိူၼ်ၼင်ႇၸုမ်းယေးငိုၼ်းၵုၼ်ႁႆးၸၢၼ်း၊ မၢၼ်ႈသွၼ်း၊မိုင်းဝုၺ်း၊ ၵုင်းၶမ်း၊ သူၼ်ၶႃး၊ မၢၼ်ႈၼမ်ႉမႃႉ၊ မၢၼ်ႈဢၢႆႇတႂ်ႈ၊ႁူဝ်ပုင်ႇ၊ ဝဵင်းၵၢင်း ၸိူဝ်းၼႆႉ သူင်ႇတူဝ်တႅၼ်း မႃးၶိုၼ်ႈႁဵၼ်း 18 ၸုမ်း ႁူမ်ႈၵူၼ်းၶဝ်ႈႁဵၼ်းဢဝ်တင်းမူတ်းမီး 80 ၵေႃႉ ။ ၸတ်းႁဵတ်းတီႈ ဝတ်ႉလႅင်း ပိူင်း မၢၼ်ႈၼမ်ႉတီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။
ယိူင်းဢၢၼ်းၼင်ႇႁိုဝ် ၼႃႈၵၢၼ်ယေးငိုၼ်းလႄႈလွၵ်းလၢႆးသဵၼ်ႈမၢႆငိုၼ်းပေႃးတေၶႅမ်ႉ လႅပ်ႈတႅတ်ႈ တေႃး တိူဝ်းတွၼ်းၽႂ်းၽၢႆၵႂႃႇထႅင်ႈလိူဝ်ၵဝ်ႇၼၼ်ႉ ႁႂ်ႈၵူၼ်းမိူင်းႁူႉပွင်ႇလွင်ႈသဵၼ်ႈမၢႆငိုၼ်း- ဝႃႈၼႆ ။


ၸၢႆးသၢမ် ႁူဝ်ပဝ်ႈၸုမ်းၵပ်းသၢၼ်ယေးငိုၼ်း ထုင်ႉလွႆႁူဝ်သိူဝ် လၢတ်ႈဝႃႈ - “ ၶႂ်ႈႁႂ်ႈၵူၼ်းမိူင်းၵူႈၵေႃႉ ဢွၼ်ၵၼ်လဵပ်ႈႁဵၼ်း လၢႆးႁဵတ်းသဵၼ်ႈသၢႆမၢႆၼႆႉၼမ်ၼမ် ၼင်ႇႁိုဝ်ႁဝ်းပေႃးတေမေႃႁဵတ်းသဵၼ်ႈ သၢႆမၢႆငိုၼ်းၶဝ်ႈငိုၼ်းဢွၵ်ႇႁူႉသဵၼ်ႈမၢႆငိုၼ်းႁႂ်ႈတႅတ်ႈၼႅတ်ႈ ၼင်ႇႁိုဝ်ႁဝ်းပေႃးတေ မိူၼ်တၢင်ႇ ဝၢၼ်ႈတၢင်ႇမိူင်း မိူဝ်ႈလဵဝ်မိူင်းဢၼ်ပိူၼ်ႈၶိုၼ်ႈယႂ်ႇၶဝ်ၼၼ်ႉ ပိူၼ်ႈဢွၼ်ၵၼ်ၾၢၵ်ႇငိုၼ်းဝႆႉတီႈ ယေးငိုၼ်းယဝ်ႉ” ဝႃႈၼႆ ။


ၸၢႆးၼေႃႇသႅင် ၽူႈၶဝ်ႈႁူမ်ႈပၢင်သွၼ် လၢတ်ႈဝႃႈ – “မၼ်းပဵၼ်ငိုၼ်းၵမ်ႉၸွႆႈၵၼ်ၶိုၼ်း ပေႃးႁဝ်းၶဝ်ႈ ပဵၼ်လုၵ်ႈၸုမ်း ပေႃးလူဝ်ႇငိုၼ်းတႃႇႁဵတ်းၼႃး၊ ၵႃႉၶၢႆၸိူဝ်းၼႆႉႁဝ်းၵႂႃႇၵူႈယိုမ်သေဢဝ် မႃးၸႂ်ႉလႆႈ လူၺ်ႈဢမ်ႇလႆႈပၼ်ၶီႈမၼ်းၼမ်၊ လိူဝ်ၼၼ်ႉပေႃးဢဝ်ငိုၼ်းၵႂႃႇႁွမ်(ၾၢၵ်ႇ) ၼႆၸိုင် တေလႆႈယွတ်ႈ မွၵ်ႇငိုၼ်းထႅင်ႈ ” ဝႃႈၼႆ ။


ၼႂ်းပၢင်သွၼ်ၶၢဝ်းတၢင်း 3 ဝၼ်းၼႆႉမီးၸဝ်ႈတႃႇၼ မိူၼ်ၼင် ၸဝ်ႈသြႃႇပုၺ်ၺဝရ၊ ၸဝ်ႈသြႃႇဝၼ် ၼသႃရ ၸုမ်းယေးငိုၼ်းၵုၼ်ႁႆးၸၢၼ်း၊ မၢၼ်ႈသွၼ်း၊ မိုင်းဝုၺ်း၊ ၵုင်းၶမ်း၊ သူၼ်ၶႃး၊မၢၼ်ႈၼမ်ႉမႃႉ၊ မၢၼ်ႈဢၢႆႇတႂ်ႈ၊ ႁူဝ်ပုင်ႇ၊ ဝဵင်းၵၢင်း ဢိၵ်ႇၽူႈမီးၼမ်ႉၸႂ် ၸွႆႈၵမ်ႉထႅမ်ၶဝ်ႈၼမ်ႉတၢင်းၵိၼ် ၼႂ်းၶၢဝ်းတၢင်း ပၢင်သွၼ်ၼႆႉ - ဝႃႈၼႆ ။


မိူဝ်ႈဝၼ်းတီႈ 09/08/2016 ၵေႃပွင်ၵၢၼ်ယေးငိုၼ်း ဝူင်းမဵတ်ႉတႃႇထုင်ႉမၢဝ်း ၸတ်းႁဵတ်းပၢင် ၵုမ်ဢုပ်ႇ ဢူဝ်းထတ်းသၢင် သဵၼ်ႈမၢႆငိုၼ်း ဝၢင်းၽႅၼ်ၵၢၼ်ပူၵ်းပွင်တႃႇမိူဝ်းၼႃႈ ၸတ်းၵႂႃႇတီႈ ႁွင်ႈလုၵ်း “တူၼ်ႈႁုင်းၶမ်း” ပွၵ်ႉၵွင်းမူးလွႆ ဝဵင်းမူႇၸႄႊ ၸိုင်ႈတႆးပွတ်းႁွင်ႇ။ ၵေႃၵမ်ၵၢၼ်လႄႈလုၵ်ႈ ၸုမ်း ပီႈၼွင်ႉၼႂ်းပိုၼ်ႉတီႈ ၶဝ်ႈႁူမ်ႈ 70 ပၢႆ ။