တူဝ်တႅၼ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉ  ၸိူဝ်းပႆႇလူင်းလၢႆးမိုဝ်း NCA ႁွင်ႉပၢင်ၵုမ်ၼႂ်းၵဵင်းမႆႇ၊ လိူၵ်ႈသၢင်ၽူႈၼမ်း 4 ၵေႃႉ ပိူဝ်ႈတႃႇၵႂႃႇႁူပ်ႉၽူႈၵိူဝ်းၵုမ်ဝၢၼ်ႈမိူင်း ၼၢင်းဢွင်ႇသၢၼ်းၸုၵျီႇ တီႈၼေႇပျီႇတေႃႇ ။

ၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈ SSPP/SSA လႄႈ ၸွမ်သိုၵ်းလူင် ဢႅၼ်ႇပၢၼ်းလႃႉ KIA

ပိူဝ်ႈတႃႇ တေၵႂႃႇႁူပ်ႉၽူႈၵိူဝ်းၵုမ်ဝၢၼ်ႈမိူင်း ၼၢင်းဢွင်ႇသၢၼ်းၸုၵျီႇ တီႈၼေႇပျီႇတေႃႇ ၼႂ်းဝၼ်းတီႈ 17/07/2016 တေထိုင်ၼႆႉသေ  ယူႇတီႈတူဝ်တႅၼ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ၼၼ်ႉ လိူၵ်ႈဝႆႉတူဝ်တႅၼ်း မိူၼ်ၼင်ႇၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၊ ၸွမ်သိုၵ်းလူင် ဢႅၼ်ႇပၢၼ်းလႃႉ တပ်ႉသိုၵ်းလွတ်ႈလႅဝ်းၶၢင် (KIA) ၊ ႁူဝ်ပဝ်ႈပႃႇတီႇမႂ်ႇသုင် ၸိူဝ်ႉၸၢတ်ႈယၢင်းလႅင် (KNPP) ဢေႊပိူဝ်ႊထႂတ်ႊ၊ ႁူဝ်ပဝ်ႈပႃႇတီႇမိူင်းမွၼ်းမႂ်ႇ (NMSP) ၼၢႆႇထေႃးမုၼ်ႇ ၸိူဝ်းၼႆႉ ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉ ဢၼ်ၶဝ်ႈႁူမ်ႈပၢင်ၵုမ်ၸဝ်ႈၼိုင်ႈ လၢတ်ႈဝႃႈ - တေႃႈလဵဝ် ႁဝ်းၶႃႈၵေႃႈတိုၵ်ႉႁဵတ်း ပၢင်ၵုမ်ၵၼ်ဝႆႉယူႇ ။ တႃႇတေၵႂႃႇႁူပ်ႉ ဢွင်ႇသၢၼ်းၸုၵျီႇၼၼ်ႉ တေၵႂႃႇဢုပ်ႇဢီႈသင်ၼႆ ႁဝ်းၶႃႈဢုပ်ႇဢူဝ်း ၵၼ်ဝႆႉ ။ ပိူင်လူင်မၼ်းတႄႉ ဢၼ်ႁဝ်းၶႃႈတေၵႂႃႇႁဵတ်း ပၢင်ၵုမ်လူင်ၸုမ်းယိပ်းၵွင်ႈၵၢင်ႇၵူႈၸုမ်း တီႈမၢႆႇၵျႃႇယၢၼ်ႇ ၼႂ်းႁၢင်လိူၼ်ၼႆႉ ၊ သမ်ႉတႃႇၵႂႃႇႁူပ်ႉ ၼၢင်းဢွင်ႇသၢၼ်းၸုၵျီႇၼၼ်ႉ တေၵႂႃႇဢုပ်ႇဢီႈသင် ၸိူဝ်းၼႆႉ ၊ ပဵၼ်ၵၢၼ်ႁၢင်ႈႁႅၼ်းဝႆႉ ပိူဝ်ႈတႃႇပၢင်ၵုမ်လူင် ပီႁူဝ်ပၢၵ်ႇ 21 - ဝႃႈၼႆ ။


ၸုမ်းၸိူဝ်းပႆႇလူင်းလၢႆးမိုဝ်း NCA ၵမ်ႈၼမ် ပဵၼ်လုၵ်ႈၸုမ်း ၶွင်ႇသီႇႁူမ်ႈတုမ်ၵူႈၸၢဝ်းၶိူဝ်း (UNFC) ၼႆႉ ႁူပ်ႉထူပ်းဢုပ်ႇဢူဝ်းၵၼ်ဝႆႉ တီႈဝဵင်းၵဵင်းမႆႇ မိူင်းထႆး ဝၼ်းတီႈ 11-12/07/2016 (ၶၢဝ်းတၢင်း 2 ဝၼ်း) ။ လုၵ်ႈၸုမ်း UNFC ဢၼ်ယွၼ်းထွၼ်တူဝ်ဢွၵ်ႇ မိူၼ်ၼင်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ၊ တပ်ႉသိုၵ်းဢူၺ်းလီ တီႇမူဝ်ႇၶရႅတ်ႉတိၵ်ႉၵူႈၸၢဝ်းၶိူဝ်းမိူင်းမၢၼ်ႈ (MNDAA) ၸိူဝ်းၼႆႉ ဢမ်ႇမႃးၶဝ်ႈႁူမ်ႈ - ၼႆယဝ်ႉ ။