ၾိုၵ်းသွၼ်ပၼ်ႁႂ်ႈလုၵ်ႈႁဵၼ်း မေႃႁၵ်ႉပႃႇမႆႉပႃႇတွၵ်ႇဝႃႈၼႆသေ ၶူးသွၼ်လႄႈလုၵ်ႈႁဵၼ်း ႁူင်းႁဵၼ်းထမ်မ ဝဵင်းတၢင်ႉယၢၼ်းႁူမ်ႈၵၼ် ၽုၵ်ႇတူၼ်ႈမႆႉ 300 တူၼ်ႈပၢႆ  ။

Photo By - Jao Mendaka Tang Ya

ဝၼ်းတီႈ 10/07/2016 သင်ၶၸဝ်ႈဢွၼ်ႁူဝ် ထူဝ်းၼႃႈၶူးသွၼ်လႄႈလုၵ်ႈႁဵၼ်းႁူင်း ႁဵၼ်းထမ်မသေ လႆႈႁူမ်ႈႁႅင်းၵူၼ်း 130 ၵေႃႉပၢႆ ဢွၼ်ၵၼ်ၽုၵ်ႇတူၼ်ႈမႆႉ ။ မိူၼ်ၼင်ႇမႆႉသၵ်း၊ မႆႉၸီႇလီႇ (ၶီႈလဵၵ်း) ၊ မႆႉၼၢင်းလီ ၸိူဝ်းၼႆႉ တင်းမူတ်း 300 တူၼ်ႈ၊ ၽုၵ်ႇၼႂ်းဝၢင်းဝိႁၢရ်လူင်မု ဢိူင်ႇႁူဝ်မၢင်း ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။


ၸဝ်ႈၶူး မိၼ်ႇတၵ ဝိႁၢရ် လူင်မု လၢတ်ႈဝႃႈ - “တူၼ်ႈမႆႉၼႆႉ မၼ်းပၼ်ၽွၼ်းလီလၢႆၸိူဝ်ႉ လၢႆပိူင်၊ ဢဝ်မႃးၵိၼ်၊ ဢဝ်မႃးႁဵတ်းပဵၼ်ပဵၼ်ယႃႈယႃလႆႈ၊ ပဵၼ်ႁူမ်ႈငဝ်းလႆႈ၊ သတ်းၵူၼ်း လႆႈပိုင်ႈဢိင်။ ၵွပ်ႈၼၼ်လႄႈ ႁဝ်ၶႃႈထုၵ်ႇလီဢွၼ်ၵၼ်ၽုၵ်ႇတူၼ်ႈမႆႉၼမ်ၼမ်၊ ၼင်ႇႁိုဝ် သၽႃႇဝသိင်ႇဝႅတ်ႉလွမ်ႉႁဝ်း ပေႃးတေၶဵဝ်ၸမ်ႉ” ဝႃႈၼႆ ။


ၸဝ်ႈပုၺ်ၺ ဝမ်သ ဝိႁၢရ် ပႃႇသႃတၢင်ႉယၢၼ်း ၵေႃႈလၢတ်ႈဝႃႈ - “တႆးႁဝ်းၶႃႈၼႆႉပဵၼ်ၵူၼ်း ႁဵတ်းၵိၼ်ႁႆႈၵိၼ်ၼႃး လႆႈပိုင်ႈဢိင်ပႃႇမႆႉပႃႇထိူၼ်ႇ၊ ပေႃးပႃႇထိူၼ်ႇမူၺ်ႉၵေႃႈၾိင်ႈၾႃႉ ရႃႇသီႇဢမ်ႇမၢၼ်ႇမႅၼ်ႈ၊ တုမ်ႉတိူဝ်ႉတေႃႇၵၢၼ်ၽုၵ်ႇသွမ်ႈ ။ ၸၢင်ႈတိူဝ်ႉ ပႃးသၢႆၸႂ်ၵူၼ်း သတ်းလူးၵွၼ်ႇ။ ၵွပ်ႈၼၼ် ၼင်ႇႁိုဝ်လုၵ်ႈႁဵၼ်းၶဝ် ပေႃးတေမေႃၽုၵ်ႇ တူၼ်ႈမႆႉ လုမ်းလႃး ႁၵ်ႉသႃသိင်ႇဝႅတ်ႉလွမ်ႉၵႂႃႇၸူဝ်ႈလုၵ်ႈပၢၼ်လၢၼ် ၼၼ်ႉလႄႈ ႁဝ်းၶႃႈ ၸင်ႇဢွၼ်ၵၼ် ၽုၵ်ႇတူၼ်ႈမႆႉ” ဝႃႈၼႆ ။


ႁူင်းႁဵၼ်းထမ်မ ဝဵင်းတၢင်ႉယၢၼ်းၼႆႉ တင်းမူတ်းမီး 40 လင်ပၢႆ၊ ၸတ်းႁဵတ်းပၢင် ဢုပ်ႇဢူဝ်း ၵၼ် မိူဝ်ႈဝၼ်းတီႈ 07/07/ 2016 သေ တူၵ်းလူင်းလႆႈၸႂ်ၵၼ်ဝႃႈ တေဢွၼ်ၵၼ် ၽုၵ်ႇတူၼ်ႈမႆႉ တီႈႁူင်းႁဵၼ်းၽႂ်မၼ်း ။ ႁူင်းႁဵၼ်းထမ်မ ၵျွင်းလူင်မု ၼႆႉ ပဵၼ်ႁူင်းႁဵၼ်း လင်ဢွၼ်တၢင်းသုတ်း ဢၼ်ၽုၵ်ႇတူၼ်ႈမႆႉ ၼႂ်းဝဵင်းတၢင်ႉယၢၼ်း ၼႆယဝ်ႉ။