ပီႈၼွင်ႉၵူၼ်းမိူင်း ၵႃလိ ၵုၼ်ႁဵင် ၼပ်ႉႁဵင် ပႂ်ႉႁပ်ႉတွၼ်ႈ ၸဝ်ႈတူၼ်ၶူးဝႃး ဝုၼ်းၸုမ်ႉ ယေႃးမုၼ်မႃး တၢင်ႇထီးထၢတ်ႈ တီႈသၿ်ႉၿေႇၺု မင်ၵလႃ ၸုမ်ႈမိူင်း ဝဵင်းၵႃလိ ။


ဝၼ်းတီႈ 11/07/2016 ယၢမ်းႁူဝ်ၶမ်ႈ ၸဝ်ႈတူၼ်ၶူးဝႃး ဝုၼ်းၸုမ်း ဢွၼ်ႁူဝ်ၼမ်းၼႃႈ သင်ၶၸဝ်ႈလႄႈ ပေႃႈမႄႈတၵ်ႉၵႃႇသတ်ႉထႃး တင်းၼမ်လၢႆ ႁူမ်ႈၵၼ်တၢင်ႇထီးထၢတ်ႈ တီႈထၢတ်ႈ(ၵွင်းမူး) သၿ်ႉၿေႇၺု မင်ၵလႃ ၸုမ်ႈမိူင်း ဢၼ်မီးတီႈ ပွၵ်ႉ 1 ဝဵင်းၵႃလိ ၸိုင်ႈတႆး ပွတ်းၸၢၼ်း ၼႆယဝ်ႉ ။

ၸဝ်ႈတူၼ်ၶူးဝႃး ဝုၼ်းၸုမ်ႉ သင်ႇသွၼ်ပွၼ်ႈထမ်းဝႃႈ “ ႁႂ်ႈပေႃႈမႄႈၵူၼ်းမိူင်းတင်းလၢႆ ႁၵ်ႉသႃတိုဝ်းၵမ် သိၼ်သီလ၊ ႁႂ်ႈႁဝ်းႁႃးတင်းမူတ်း မေႃႁၵ်ႉသူင်တႃႇၼ ႁဵတ်းၵုသူလ် တၢင်းလီၵၼ်ၼမ်ၼမ် ။ ယူႇတီႈႁဝ်းၸဝ်ႈသေ ပေႃးဢႃယု ၸဝ်ႈလႆႈမႃး 55 ပီ ၊ ဝႃႇသႃၸဝ်ႈလႆႈ 30 ပီ ၸိုင် တေဢၢၼ်းၸတ်းႁဵတ်းပၢင်ပွႆး မၢႆတွင်း ယႂ်ႇလူင်” ဝႃႈၼႆ ။


မေႃသွၼ် ၸၢႆးသူၺ်ႇလိၼ်း  ၽူႈၸတ်းၵၢၼ်ၵူႈလွင်ႈလွင်ႈ ၼႂ်းၸုမ်းပွင်ၵၢၼ်ၵေႃႇသၢင်ႈထၢတ်ႈ သၿ်ႉၿေႇၺု ၸုမ်ႈမိူင်း လၢတ်ႈဝႃႈ “ ထၢတ်ႈၵွင်းမူး သႃသၼႃႁိူဝ်ႈႁိူင်းမင်ၵလႃၸုမ်ႈမိူင်းၼႆႉ တၢင်းၵႂၢင်ႈမီး 49 ထတ်း ပၼ်ႇမူၼ်း ၊ တၢင်းသုင် 70 ထတ်း ၊ ၽူႈဢွၼ်ႁူဝ် ၵေႃႇသၢင်ႈ ၵွင်းမူးၼႆႉ ပဵၼ်ပူႇလွႆၵျေႃႇလႃႉ ဝဵင်းလၢႆးၶႃႈ ဢိၵ်ႇပႃးလူၺ်ႈ တၵ်ႉၵႃႇသတ်ႉထႃး တင်းမူတ်း ဢၼ်သၢင်ႈၵႂႃႇမႅၼ်ႈငိုၼ်း 1,800 သႅၼ်ပျႃးပၢႆ ” ဝႃႈၼႆ ။


ၵဵဝ်ႇၵပ်းလူၺ်ႈ ပွႆးတၢင်ႇထီးထၢတ်ႈ သၿ်ႉၿေႇၺု မင်ၵလၸုမ်ႈမိူင်းၼႆႉ ပီႈၼွင်ႉတၵ်ႉၵႃႇသတ်ႉထႃး တီႈၸမ်တီႈၵႆ ၵႃလိ ၵုၼ်ႁဵင် ၶူဝ်လမ် ၼမ်ႉၸၢင် ဢိၵ်ႇပႃးလူၺ်ႈ ပီႈၼွင်ႉၸၢဝ်းၶိူဝ်း ၼႂ်းပိုၼ်ႉတီႈ ႁူမ်ႈၵၼ် ၼုင်ႈဝႆၶူဝ်းၼုင်ႈ ၾိင်ႈထုင်းၽႂ်မၼ်းသေ မႃးပႂ်ႉႁပ်ႉတွၼ်ႈ ၸဝ်ႈတူၼ်ၶူးဝႃးဝုၼ်းၸုမ်ႉ တႄႇဢဝ် ယၢမ်းၵၢင်ဝၼ်း ထိုင်ၵၢင်ၶမ်ႈ ဝႃႈၼႆ ။


ယူႇတီႈ ၸဝ်ႈတူၼ်ၶူးဝႃး ဝုၼ်းၸုမ်းသေ လႆႈလူႇတၼ်းငိုၼ်းၵမ်ႉၸွႆႈထႅမ် ၸုမ်းပီႈၼွင်ႉလွႆ ၵုၼ်ႁဵင် ငိုၼ်း 10 သႅၼ်ပျႃး ၊ လုင်းၵျေႃႇလႃႉ ၽူႈၵေႃႇသၢင်ႈၵွင်းမူး 28 သႅၼ်ပျႃး ၊ ၸုမ်းငဝ်ႈငုၼ်း သင်ၶၸဝ်ႈ ၸိုင်ႈတႆး 500 သႅၼ်ပျႃး တႃႇတေပိၼ်ႇပိတၵၢတ်ႈၾၢႆႇတႆး ၸဵမ်ၸိူဝ်းၼႆႉ ဝႃႈၼႆ ။


ဝၼ်းတီႈ 19/07/2016 တေမႃးၼႆႉ ၸဝ်ႈတူၼ်ၶူးဝႃး ဝုၼ်းၸုမ်ႉ တေယေႃးတူဝ်ၵႂႃႇ ၼႂ်းထမ်ႈ ဢၼ်မီး တီႈဢိူင်ႇမိူင်းပူးဢွၼ်ႇ ၸႄႈဝဵင်းမိူင်းပဵင်း  ၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼႆယဝ်ႉ ။

လႅင်ႇၶၢဝ်ႇ ႁဵဝ်းႁိုၼ်းႁွမ်