ၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇဢုမ်မူႉ ၸႄႈဝဵင်းသီႇပေႃႉ ဢွၼ်ၵၼ်ဢွၵ်ႇပၢႆႈ ယၢၼ်ႁိူၼ်းယေး ယွၼ်ႉပၢင်တိုၵ်းသိုၵ်းသိူဝ် ႁွတ်ႈထိုင် ဝဵင်းသီႇပေႃႉ 300 ပၢႆ ။

ဝၼ်းတီႈ 08-09/07/2016 ယၢမ်း 09:00 မူင်းပၢႆ ပီႈၼွင်ႉၵူၼ်း ဝၢၼ်ႈလွႆ ဢိူင်ႇဢုမ်မူႉ ၸႄႈဝဵင်းသီႇပေႃႉ ဢွၼ်ၵၼ် ဢွၵ်ႇပၢႆႈ ၵူဝ်လႆႈႁၢပ်ႇၵၢၼ်သိုၵ်း၊ ယွၼ်ႉလႆႈၺႃးၽေးသိုၵ်း၊ ယၢမ်းလဵဝ် ယူႇသဝ်းဝႆႉတီႈ ဝတ်ႉသူၺ်ႇၵူႇ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ။


ၸၢႆးၸၢႆး ၽူႈပွင်ၵၢၼ် ၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈဝႃႈ “ ၵူၼ်းပၢႆႈၽေးသိုၵ်း ၸိူဝ်းဢၼ်လုၵ်ႉတီႈ ဢိူင်ႇဢုမ်မူႉမႃး ယူႇသဝ်းဝႆႉတီႈ ဝတ်ႉသူၺ်ႇၵူႇၼႆႉ ဝၼ်းတီႈ 08 ၼႆႉ မီး 217 ၵေႃႉ၊ မုင်ႉႁေႃႁိူၼ်း 57 လင်၊ ဝၼ်းတီႈ 09 သမ်ႉ ပၢႆႈမႃးထႅင်ႈ 122 ၵေႃႉ၊ မုင်ႉႁေႃႁိူၼ်း 36 လင်၊ ဝၼ်းတီႈ 11 မီး 39 ၵေႃႉ၊ မုင်ႉႁေႃႁိူၼ်း 5 လင် တင်းမူတ်း သၢမ်ဝၼ်းၼႆႉ မီးၵႂႃႇ 378 ၵေႃႉ” ဝႃႈၼႆ ။


ပီႈၼွင်ႉပၢႆႈၽေးသိုၵ်း ဢမ်ႇဢွၵ်ႇၸိုဝ်ႈ လၢတ်ႈဝႃႈ “ ပၢင်တိုၵ်းၼႆႉ တႄႇပဵၼ် ဝၼ်းတီႈ 08 ယၢမ်း ၵၢင်ၼႂ် 03:00 မူင်းပၢႆ ၊ ထိုင်မႃး ယၢမ်းၵၢင်ၼႂ် 09:00 မူင်းပၢႆၼၼ်ႉ ႁဝ်းလႆႈဢွၼ်ၵၼ်ပၢႆႈလူင်းမႃး တီႈဝတ်ႉသူၺ်ႇၵူႇ ၵမ်းလဵဝ်ၶႃႈ တေႃႇထိုင်ယၢမ်းလဵဝ် ၵူၼ်းၼႂ်းဝၢၼ်ႈလွႆႁဝ်းၶႃႈ ၸိူဝ်းၵိုတ်းဝႆႉ ၵေႃႈမီးထႅင်ႈယူႇ ပႆႇၸၢင်ႇဢွၵ်ႇမႃး” ဝႃႈၼႆ။
ၵဵဝ်ႇၵပ်းသဵၼ်ႈမၢႆၵူၼ်းပၢႆႈၽေးသိုၵ်းၼႆႉ မိူဝ်ႈဝၼ်းတီႈ 08 ၼႆႉ ၵူၼ်းၸၢႆး 89 ၵေႃႉ၊ ၼၢင်းယိင်း  128 ၵေႃႉ၊ မုင်ႉႁေႃႁိူၼ်း 57 လင်။ ဝၼ်းတီႈ 09 သမ်ႉ ၵူၼ်းၸၢႆး 41 ၵေႃႉ၊ ၼၢင်းယိင်း 81 ၵေႃႉ၊ မုင်ႉႁေႃႁိူၼ်း 36 လင်၊ ဝၼ်းတီႈ 11 ၵူၼ်းၸၢႆး 16 ၵေႃႉ၊ ၼၢင်းယိင်း 23၊ မုင်ႉႁေႃႁိူၼ်း 5 လင် ၼႆယဝ်ႉ ။


ၶၢဝ်ႇဢမ်ႇယိုၼ်ယၼ် လၢတ်ႈဝႃႈ “ ၵူၼ်းၸိူဝ်းလႆႈပၢႆႈၼႆႉ ၵမ်ႈၼမ်ပဵၼ်ၸၢဝ်းလွႆ၊ ယွၼ်ႉသိုၵ်းလွႆ ၶိၼ်တဵၵ်းၸႂ်ႉၸၢႆး/ယိင်း ၼႂ်းဝၢၼ်ႈႁဵတ်းသိုၵ်း၊ ယွၼ်ႉၵူဝ်လႆႈႁဵတ်းသိုၵ်းလႄႈ ၸင်ႇလႆႈပႃးၵၼ် ပၢႆႈ” ဝႃႈၼႆ ။


တေႃႈလဵဝ် ၵူၼ်းပၢႆႈၽေးသိုၵ်း တီႈဝတ်ႉသူၺ်ႇၵူႇ ၸႄႈဝဵင်းသီႇပေႃႉ တိုၵ်ႉလူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် လႄႈ ၶိူင်ႈၶွင်ၸႂ်ႉ ၸဵမ်ၸိူဝ်းၼႆႉ ၽူႈပွင်ၵၢၼ် ၼႂ်းပႃႇတီႇႁူဝ်သိူဝ် ၸၢႆးၸၢႆး လၢတ်ႈ။