တပ်ႉသိုၵ်းတဢၢင်း (ပလွင်ႈ) TNLA တပ်ႉၸုမ်း (2) 717 တိၺွပ်းၵူၼ်းဝၢၼ်ႈၶိုမ်းၵဝ်ႇ သွင်ၵေႃႉ ပေႃႉထုပ်ႉ လိူဝ်ႁႅင်းသေ ၸႂ်ႉၵူၼ်းဝၢၼ်ႈ ဢဝ်ငိုၼ်းၼပ်ႉသႅၼ် မႃးထုတ်ႇဢဝ် ။


ဝၼ်းတီႈ 13/06/2016 ယၢမ်း 06:30-21:30 မူင်း တပ်ႉသိုၵ်းတဢၢင်း TNLA တပ်ႉၸုမ်း (2) 717 ဢဵၼ်ႁႅင်းသိုၵ်း 60 ပၢႆၶဝ်ႈလွမ်ႉဝႅတ်ႉႁိူၼ်းၵူၼ်းဝၢၼ်ႈၶိုမ်းၵဝ်ႇ ဢိူင်ႇၶိုမ်း ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ မၢပ်ႇၼႄးၵူၼ်းဝၢၼ်ႈဝႃႈ ပဵၼ်ၵူၼ်းႁဵတ်းၵၢၼ်ပၼ် ၸုမ်းRCSS/SSA ၼႆသေ တိၺွပ်းပေႃႉထုပ်ႉ လုင်းဢုင်ႇ ဢႃယု 40 ပီ တင်း ၸၢႆးထွၼ်း ဢႃယု 25 ပီ ။

ၵူၼ်းဝၢၼ်ႈဢၼ်လႆႈႁူပ်ႉႁၼ်တႂ်ႈၼႃႈတႂ်ႈတႃ လၢတ်ႈဝႃႈ “ သိုၵ်းလွႆၼႆႉ ၶဝ်ႈမႃးၼႂ်းဝၢၼ်ႈသေ ဢမ်ႇထၢမ်လွင်ႈသင်သေမဵဝ်း မႃးဝႅတ်ႉ ႁိူၼ်းၶဝ်သေ  တိမၢတ်ႉၵမ်းလဵဝ်။ ထၢမ် ၶႃႈသွင်ၵေႃႉလွင်ႈ သိုၵ်းတႆး ။ ပေႃႉၵေႃႈပေႃႉ ၊ ပိတ်ႉၵေႃႈပိတ်ႉ ဢဝ်မႆႉဝွင်သေ ပေႃႉ ၊ ထုပ်ႉၸွမ်းတူဝ် ၊ ၸွမ်းၶႃလႄႈ ၸွမ်းၵွၵ်းႁူဝ် ” ဝႃႈၼႆ ။


သိုၵ်းလွႆတိၺွပ်းၶႃသွင်ၵေႃႉ တႄႇၸဵမ်ၸဝ်ႉထိုင်ၵၢင်ၶမ်ႈ ဢမ်ႇပွႆႇၶိုၼ်း ။ သင်ဝႃႈ ႁႂ်ႈပွႆႇပၼ်ၶိုၼ်းၸိုင် ႁႂ်ႈသႂ်ႇငိုၼ်းၵႃႈထုတ်ႇတူဝ်ၶႃႈသွင်ၵေႃႉ တႃႇငိုၼ်း 259000 ပျႃး ၊ သင်ဢမ်ႇပၼ်ၸိုင် တိုၼ်းတေ ဢမ်ႇပွႆႇ ဝႃႈၼႆ ။


ၵူၼ်းလူင် ဝၢၼ်ႈၶိုမ်းၵဝ်ႇ ၶဝ်လၢတ်ႈၼႄဝႃႈ “ ၶဝ်သွင်ၵေႃႉၼႆႉ ဢမ်ႇၸႂ်ႈသိုၵ်းတႆး ဢမ်ႇၵဵဝ်ႇၶွင်ႉၵၼ်တၢင်းသိုၵ်းတႆး ပဵၼ်ၵူၼ်းဝၢၼ်ႈႁဵတ်းၵၢၼ်ၵူၺ်း။ ၵူၼ်းမိူင်းၼႆႉ ဢမ်ႇလိူဝ်လႆႈသေၸုမ်း၊ ၸုမ်းယိပ်းၵွင်ႈၸုမ်းလႂ်မႃးၵေႃႈ လႆႈႁူပ်ႉယဝ်ႉ ” ဝႃႈၼႆ ။


ၵူၼ်းဝၢၼ်ႈ ႁူမ်ႈၵၼ်ၵႂႃႇလၢတ်ႈဝွၼ်း ၵမ်းလိုၼ်းလႆႈ ၵဵပ်းငိုၼ်းၵၼ် လႆႈ190000 ပျႃး သေ ၸွႆႈထုတ်ႇတူဝ် ၶႃသွင်ၵေႃႉမႃး ဝႃႈၼႆ ။


လိူဝ်သေၼၼ်ႉ သိုၵ်းလွႆတဢၢင်း(ပလွင်ႈ) TNLA တပ်ႉၸုမ်း (2) 717 ၼႆႉ ပႆတဵင်ၵႂၢမ်းၼၵ်းဝႆႉဝႃႈ ၵူၼ်းသွင်ၵေႃႉၼႆႉ ပေႃးပဵၼ်ၵူၼ်းဝၢၼ်ႈတႄႉၸိုင် ၶၢဝ်းတၢင်းသွင်လိူၼ်ၼႆႉ တေဢမ်ႇလႆႈႁၢႆၵႂႃႇတၢင်းလႂ်၊ တေလႆႈယူႇၼႂ်းဝၢၼ်ႈၼႆႉ ။ ႁဝ်းလူဝ်ႇမိူဝ်ႈလႂ်ၼႆၸိုင် ႁဝ်းတေမႃးႁႃ မိူဝ်ႈလႂ်ၵေႃႈ တေလႆႈမီး ။ ပေႃးဢမ်ႇမီးၶႃသွင်ၵေႃႉၸိုင် ၵူၼ်းတင်းဝၢၼ်ႈ တေလႆႈဢဝ်ပုၼ်ႈၽွၼ်း ဝႃႈၼႆ ။


တင်ႈတႄႇႁၢင်ပီ 2015 မႃး သိုၵ်း TNLA တင်း RCSS လႆႈပဵၼ်ပၢင်တိုၵ်းၵၼ် ၼႂ်းၸႄႈဝဵင်း ၵျွၵ်ႉမႄး ၊ ၼမ်ႉသၼ်ႇ ၊ မၢၼ်ႈတူင်ႈ ၊ ၼမ်ႉၶမ်း ၸိူဝ်းၼႆႉ ။ ယွၼ်ႉပၢင်တိုၵ်းသေ ၵူၼ်းဝၢၼ်ႈၺႃးၸၢၵ်ႇသိုၵ်း လႆႈပၢႆႈယၢၼ်ႁိူၼ်းယေးတီႈယူႇ ႁူဝ်ၵူၼ်းၼပ်ႉႁဵင် ။