ႁႅင်းၵၢၼ်ယၢၼ်မိူင်းဢၼ်ႁဵတ်းၵၢၼ်ၼႂ်းႁိူၼ်း ( ႁိုဝ်မႄႈဝၢၼ်ႈ) ၼၼ်ႉတုၵ်းယွၼ်းလူင်ပွင် ၸိုင်ႈထႆး ႁႂ်ႈမီးသုၼ်ႇလႆႈၽဵင်ႇပဵင်းလႄႈလွင်ႈႁူမ်ႇလူမ်ႈၼႂ်းၼႃႈၵၢၼ် ။

ဝၼ်းတီႈ 16/06/2016 ၼႆႉဢိင်ၼိူဝ်ပဵၼ်ဝၼ်းၵူၼ်းႁဵတ်းၵၢၼ်ၼႂ်းႁိူၼ်းလုမ်ႈၾႃႉ (International Domestic Worker Day) ၼႆလႄႈတူဝ်တႅၼ်းၵူၼ်းႁဵတ်းၵၢၼ်ၼႂ်းႁိူၼ်း ၊ ၸုမ်းၸွႆႈလိူဝ်ႁႅင်းၵၢၼ်ယၢၼ်မိူင်း ၸုမ်းမႅပ်ႊ (MAP Foundation) လႄႈ ၸုမ်းၵဝ်ႉငဝ်ႈ သုၼ်ႇလႆႈၵူၼ်း (HRDF) ၸဵမ်ၸိူဝ်းၼႆႉ ႁူမ်ႈၵၼ်ယိုၼ်ႈၽိုၼ်လိၵ်ႈထိုင်လူင်ပွင်ၸိုင်ႈထႆး လႄႈၽူႈၵွၼ်းၸႄႈဝဵင်းၵဵင်းမႆႇ ႁႂ်ႈၵႄႈလိတ်ႈပၼ်ႁႃလႄႈတုၵ်းယွၼ်းႁႂ်ႈလႆႈႁပ်ႉငိုၼ်း လိူၼ်ၸွမ်းၼင်ႇလူင်ပွင်ၸိုင်ႈမၵ်းမၼ်ႈဝႆႉ ၼႆယဝ်ႉ ။


ႁႅင်းၵၢၼ်ယၢၼ်မိူင်းဢၼ်ႁဵတ်းၵၢၼ်ၼႂ်းႁိူၼ်းၼႆႉၵမ်ႈၼမ်ပဵၼ်ၼၢင်းယိင်း ။ ပဵၼ်ႁႅင်းၵၢၼ် ဢၼ်လႆႈႁဵတ်းၵၢၼ်ႁိုင်လိူဝ်ၼႃႈၵၢၼ်တၢင်ႇဢၼ် ။ ၸွမ်းၼင်ႇပၵ်းပိူင်မၢႆမီႈမီးဝႆႉၼၼ်ႉ ႁႅင်းၵၢၼ်ၼႆႉႁဵတ်းၵၢၼ်ၼိုင်ႈဝၼ်း 8 ၸူဝ်ႈမူင်း ။ ၵူၺ်းၵႃႈႁႅင်းၵၢၼ်ၼႂ်းႁိူၼ်းသမ်ႉႁဵတ်းၵၢၼ် 10 ၸူဝ်ႈမူင်းပၢႆ သေဢမ်ႇၵႃးၵႃႈတွပ်ႇတႅၼ်းၵေႃႈလႆႈဢေႇလိူဝ်ၸွမ်းၼင်ႇ မၢႆမီႈမၵ်းမၼ်ႈဝႆႉ ၼႆယဝ်ႉ ။


ၵွပ်ႈၼၼ်လႄႈတီႈပၢင်ၵုမ်ၼၼ်ႉၸင်ႇလႆႈ တုၵ်းယွၼ်းႁႂ်ႈလူင်ပွင်ၸိုင်ႈမီးပၵ်းပိူင် (ပေႃႊလႃႊသီႊ) ႁႂ်ႈတူၺ်းထိုင်လူလွမ် ၵူၼ်းႁဵတ်းၵၢၼ်ၼႂ်းႁိူၼ်းႁႂ်ႈလႆႈႁပ်ႉၵႃႈႁႅင်းၸၼ်ႉ တႅမ်ႇသုတ်း ၸွမ်းၼင်ႇလူင်ပွင်ၸိုင်ႈတမ်းဝႆႉ ။
လိူဝ်သေၼၼ်ႉယင်းတုၵ်းယွၼ်းပႃးႁႂ်ႈလူင်ပွင်ၸိုင်ႈမီးပၵ်းပိူင်တႃႇပေႃႈလဵင်ႉ / မႄႈလဵင်ႉမိူၼ်ၼင်ႇႁႂ်ႈၵူၼ်းႁဵတ်းၵၢၼ်ၼႂ်းႁိူၼ်းမီးသုၼ်ႇလႆႈႁဵတ်းဝႂ်ႁပ်ႉႁွင်းပၢႆးယူႇလီ(ပရႃႊၵၼ်ႊသင်ၶူမ်း) လႄႈႁႂ်ႈပေႃႈလဵင်ႉ / မႄႈလဵင်ႉႁဵတ်းၸွမ်းပၵ်းပိူင်မၢႆမီးႁႅင်းၵၢၼ်လႄႈ ဢမ်ႇၸႅၵ်ႇၽႄၸၼ်ႉ ထၢၼ်ႈ ။


ၼႂ်းလုမ်ႈၾႃႉၼႆႉႁႅင်းၵၢၼ်ဢၼ်ႁဵတ်းၵၢၼ်ၼႂ်းႁိူၼ်းမီးမွၵ်ႈ 67 လၢၼ်ႉၵေႃႉ ၊ ၵမ်ႈၼမ်ဢမ်ႇ လႆႈၵႃႈတွပ်ႇတႅၼ်း ၸွမ်းၼင်ႇမၢႆမီႈတမ်းဝႆႉ ။ တီႈၼႂ်းၵဵင်းမႆႇသမ်ႉ ႁႅင်းၵၢၼ်မိူင်းမၢၼ်ႈ ဢၼ်ႁဵတ်းၵၢၼ်ၼႂ်းႁိူၼ်းမွၵ်ႈ 4000 ၵေႃႉပၢႆ ။ ၶဝ်ၸိူဝ်းၼႆႉၵမ်ႈၼမ်ဢမ်ႇလႆႈႁပ်ႉၵႃႈတွပ်ႇတႅၼ်းတဵမ်ထူၼ်ႈ လႄႈဢမ်ႇလႆႈႁပ်ႉတၢင်း ၸွႆႈလိူဝ်ၵဵဝ်ႇလူၺ်ႈသုၼ်ႇလႆႈသုၼ်ႇပဵၼ်ၶဝ်တဵမ်ထူၼ်ႈ ဝႃႈၼႆ ။


ၵဵဝ်ႇၵပ်းလွင်ႈၼႆႉ ၼၢင်းငမ်းယဵၼ်ၵေႃႉ ဢၼ်ပဵၼ်တီႈတိူင်ႇ ပၢင်ႇၸုမ်းၵူၼ်းႁဵတ်းၵၢၼ်ၼႂ်း ႁိူၼ်းလၢတ်ႈဝႃႈ - “ပီႈၼွင်ႉႁဝ်းၶႃႈဢၼ်မႃးႁဵတ်း ၵၢၼ်ယူႇတီႈၼႂ်းမိူင်းထႆး ၼႆႉႁဝ်းလူဝ်ႇ ဢွၼ်ၵၼ်လဵပ်ႈႁဵၼ်းလွင်ႈပၵ်းပိူင်မၢႆမီႈၼႂ်းဝၢၼ်ႈမိူင်းပိူၼ်ႈ၊ႁဝ်းလူဝ်ႇႁတ်းလၢတ်ႈႁတ်းၸႃ၊ႁတ်းႁၢၼ်လူဝ်ႇလႆႈမေႃၶဝ်ႈႁႃၵၼ်မီးသင်ၵေႃႈတိူင်ႇပၢင်ၵၼ်ၸွႆႈထႅမ်ၵၼ်ၵႂႃႇ” ဝႃႈၼႆ ။
ၼႂ်းပၢင်ၵုမ်ၼၼ်ႉတုၵ်းယွၼ်း ႁႂ်ႈလူင်ပွင်ၸိုင်ႈထႆးလူင်းလၢႆးမိုဝ်းႁပ်ႉႁွင်းၵူၼ်းႁဵတ်း ၵၢၼ်ၼႂ်းႁိူၼ်းႁႂ်ႈၶဝ်ႈၼႂ်းမၢႆမီႈႁႅင်းၵၢၼ်လုမ်ႈၾႃႉ ၼႆယဝ်ႉ ။