သင်ၶၸဝ်ႈလႄႈၵူၼ်းမိူင်းႁူမ်ႈၵၼ်ၸတ်းပၢင်တြႃးတိုၵ်းတေႃးယႃႈမဝ်းၵမ်လၢႆၸႄႈဝဵင်းၼႂ်းၸိုင်ႈတႆးပွတ်းၸၢၼ်း ။


ဝၼ်းတီႈ 06 – 14 /06/2016 သင်ၶၸဝ်ႈ ၸုမ်းၵပ်းသၢၼ်လွင်ႈၼၢင်းယိင်းတႆးလႄႈ ပေႃႈမႄႈပီႈ ၼွင်ႉၵူၼ်းမိူင်း ။ ႁူမ်ႈၵၼ်ၸတ်းႁဵတ်းပၢင်ြတႃးတိုၵ်းတေႃးယႃႈမဝ်းၵမ် ၼႂ်းဢိူင်ႇဝၢၼ်ႈ ။

မိူၼ်ၼင်ႇ ဝၢၼ်ႈၼွင်လႅင် ဝဵင်းပၢင်လူင် ၊ ဝၢၼ်ႈၵျွင်း တၢတ်ႇဢေႇ ၊ ဝၢၼ်ႈသၼဵၼ်း ၊ ဝၢၼ်ႈပၢင်ႁူႈ ၊ ဝၢၼ်ႈၽွင်းသႅင် ၊ ၼႃးပုင်ႇ ၊ ႁႆႈၶၢႆး ၊ ၽႃလၢႆး၊ မိူင်းပဵင်း ၊ ဝၢၼ်ႈမၢၵ်ႇလၢင်း  ၊ ဝၢၼ်ႈလၢႆသၵ်ႇ ၸိူဝ်းၼႆႉ ။ ယိူင်းဢၢၼ်းတႄႉ ၶႂ်ႈႁႂ်ႈၵူၼ်းမိူင်းႁူႉၽွၼ်းၸႃႉယႃႈမဝ်းၵမ်ၼင်ႇႁိုဝ်ပေႃးတေဢမ်ႇတူၵ်းပဵၼ်ၶီႈၶႃႈ ယႃႈမဝ်းၵမ်လႄႈၵႆယၢၼ်ယႃႈမဝ်းၵမ် ။


ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ - “ ယႃႈမဝ်းၵမ်ဢၼ်ဝႃႈၼႆႉမၼ်းႁဵတ်းႁၢႆႉ ၽဝၸၢတ်ႈပၢၼ်ၸဝ်ႈၵဝ်ႇ ၼႃႈႁိူၼ်းၸဝ်ႈၵဝ်ႇ ၊ ဝၢၼ်ႈမိူင်းၸဝ်ႈၵဝ်ႇယဝ်ႉ ၊ မၼ်းပဵၼ်မၢၵ်ႇၵွင်ႈ လူင်ဢၼ် ၽူႈၶဵၼ်းႁဝ်းယိုဝ်းႁဝ်းယူႇၵူႈဝၼ်းလူၺ်ႈတီႈႁဝ်းဢမ်ႇႁူႉတူဝ်ၽေးႁၢႆႉယႃႈ မဝ်းၵမ်ၼႆႉ ၼမ်မႃးလိူဝ် ၵဝ်ႇၵူႈမိုဝ်ႉၵူႈဝၼ်း ။ ၵူၼ်းမိူင်းတႆးၵူၼ်းၼုမ်ႇႁဝ်းၵေႃႈဢွၼ်ၵၼ်တိတ်းၸပ်းယႃႈ မဝ်းၵမ်ယၢမ်းလဵဝ်ၵႃႈၶၼ်ယႃႈမဝ်းတူၵ်းၼိုင်ႈမဵတ်ႉလႂ် 250 ၵျၢပ်ႈၵူၺ်း ။


ၵွပ်ႈၼၼ်ၼင်ႇႁိုဝ်ၵူၼ်းၼုမ်ႇလႄႈၵူၼ်း မိူင်းပေႃးတေႁူႉၽွၼ်းႁၢႆႉယႃႈမဝ်းၵမ်ၼႆသေႁဝ်းၸဝ်ႈ ၶဝ်ၶတ်းၸႂ်လူင်ပၼ်တၢင်းႁူႉၸွမ်းၼင်ႇဢၼ်ပွင်ပဵၼ်လႆႈ ” ဝႃႈၼႆ ။


ပၢင်တြႃးတိုၵ်းတေႃးယႃႈမဝ်းၵမ်ၼႆႉယူႇတီႈၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်းဢွၼ်ႁူဝ်သင်ၶ ၸဝ်ႈၵူၼ်းမိူင်းၼႂ်းပိုၼ်ႉတီႈႁူမ်ႈၵၼ်ၸတ်းႁဵတ်းမႃးတႃႇသေႇမိူၼ်ၼင်ႇတၢင်ႉယၢၼ်း ၊ ထုင်ႉပူင်း ၊ သီႇသႅင်ႇ ၊ ပၢင်လူင် ၊ မိူင်းၼွင် ၊ လႃႈသဵဝ်ႈ ၊ ၼမ်ႉၸၢင် ၊ ၵူတ်ႉၶၢႆ ၸဵမ်ၸိူဝ်းၼႆႉ လိူဝ်ၼၼ်ႉၸုမ်းၵပ်း သၢၼ်လွင်ႈၼၢင်းယိင်းတႆး (SWAN) ၵေႃႈၵႂႃႇႁူမ်ႈပၼ်တၢင်းႁူႉၵဵဝ်ႇလူၺ်ႈ ပၢႆးယူႇလီတႃႇႁႂ်ႈၵႆယၢၼ် ယႃႈမဝ်းၵမ်ၸိူဝ်းၼႆႉဝႃႈၼႆ ။