ပၢႆႉၶဝ်ႈဝဵင်း / ဢွၵ်ႇဝဵင်း ၼႂ်းမိူင်းတႆး လၢႆလၢႆတီႈ ဢၼ်တႅမ်ႈလိၵ်ႈတႆး ၺႃးသင်ၵိုတ်း ၊ ၽွင်းပၢႆႉဝဵင်း တႃႈၶီႈလဵၵ်း ၺႃးၽဝ်ၼၼ်ႉ ၶၢဝ်ႇတၢင်းဝဵင်းလၢင်းၶိူဝ်း ၵေႃႈ ဝႃႈမီးၵူၼ်းယႃႉ ၼႆၼၼ်ႉ ၵူၼ်းဝဵင်း လၢင်းၶိူဝ်းၵမ်ႈၼမ် ယိုၼ်ယၼ်ဝႃႈ ဢမ်ႇမီးၽႂ်ၵေႃႉလႂ် တင်ႈၸႂ်ယႃႉ ဝႃႈၼႆ ။

ဢိင်ၼိူဝ် ပၢႆႉၶဝ်ႈဝဵင်းတႃႈၶီႈလဵၵ်းၺႃးၽဝ်သေ ဝၼ်းတီႈ 22/06/2016 ၼၼ်ႉ ၶႅပ်းႁၢင်ႈ ႁူဝ်ႉ ပၢႆႉၶဝ်ႈဝဵင်း လၢင်းၶိူဝ်း ၺႃးၵူၼ်းႁၢႆႉပေႃႉထုပ်ႉလႅဝ် ၊ လႆႈႁၼ်ၼႂ်းၶႅပ်းႁၢင်ႈ ၶႅပ်းပုၼ်ဢုတ်ႇ ၵူၼ်ပၵ်း လုၵွႆဝႆႉတင်းၼမ် ။ ၵဵဝ်ႇၵပ်းလွင်ႈၼႆႉ ၵူၼ်းဝဵင်းလၢင်းၶိူဝ်း ၸိူဝ်းပႆႇႁူႉ ဢွၼ်ၵၼ်ၵႂႃႇထတ်းတူၺ်း ၊ ၸိူဝ်းႁူႉၵေႃႈ ယိုၼ်ယၼ်ဝႃႈ ပဵၼ်ၵူၼ်းၸိူဝ်းၵႂႃႇထၢႆႇႁၢင်ႈ ဢမ်ႇမီးပၵ်းပိူင် သေ ဢဝ်လုၵွႆ၊ လုၵ်ႈဢွၼ် လဵၼ်ႈ ၊ ဝူဝ်းၵႂၢႆးၵႂႃႇမႃးထုၺ်ထုၺ်ႇၽႃႇလႅဝ် - ဝႃႈၼႆ ။


“လႆႈႁၼ်လုၵွႆမႃး ၵမ်းလွႆးလွႆး ၸဵမ်မိူဝ်ႈ လိူၼ်ၽႅပ်ႉပိဝ်ႊဝရီႊ ပုၼ်ႉယဝ်ႉ ။ တေႃႈလဵဝ် မီးၶၢဝ်ႇဝႃႈ ပၢႆႉ ဝဵင်းဢၼ်တႅမ်ႈလိၵ်ႈတႆး ၺႃးယႃႉ ၊ ၺႃးႁၢမ်ႈ - သူင်ႉၶၢဝ်ႇၵၼ်သေ လိုဝ်းၵႂႃႇၵူၺ်း ။ ဢမ်ႇမီးၽႂ်တင်ၸႂ်မႃးယႃႉ ။ ၶႃႈၵႂႃႇသူင်ၶႅၵ်ႇ ၶႅၵ်ႇၽႃႇၺႃး ယင်းဢဝ် ပုတ်းၵႂႃႇ ဢၼ်ၼိုင်ႈယူႇ ။ ၵၢၼ်ၵေႃႇသၢင်ႈ ပၢႆႉၶႅမ်ႉယူႇ ။ ႁိၼ်သၢႆးဢၼ်လိူဝ်သ မ်ႉဢဝ်ႁဵတ်းႁူဝ်ႉ ဝႆႉ ၸိူင်ႉၼင်ႇႁူဝ်ႉၶူး ဝဵင်း ၼၼ်ႉ ႁၢၵ်းပုတ်းတူၵ်း ” - ၼႆ ၸၢႆးမၢဝ်ႇသူၺ်ႇပီႇလၢတ်ႈၼႄ ၼင်ႇၼႆ ။


ပၢႆႉၶဝ်ႈဝဵင်းလၢင်းၶိူဝ်းၼႆႉ ဢိင်ၼိူဝ်ၾၢႆႇၽွင်းငမ်း ၵမ်ႉထႅမ်သေ ၸဝ်ႈတူၼ်ၶူး ၼမ်းၼႃႈ ဢွၼ်ဢတၵ်ႉၵႃႇသတ်ႉထႃး သေ ႁဵတ်းမိူဝ်ႈႁၢင်ပီ 2015 ။ ပိုတ်ႇပၢႆႉယၢတ်ႇၼမ်ႉမိူဝ်ႈလိူၼ် ၻီႊသႅမ်ႊပိူဝ်ႊ ။ ပၢႆႉဢၼ်တႅမ်ႈလိၵ်ႈမၢၼ်ႈ တႄႉ မီးဝႆႉယူႇႁင်းၵူၺ်းမၼ်းတီႈၼၼ်ႈ။ ၼၼ်ႉတႄႉ ဢမ်ႇပဵၼ်သင် - ၼႆ ပႃႈၼၢင်းၼုမ်ႇ ဝဵင်းလၢင်းၶိူဝ်းလၢတ်ႈ ။


ၸၢႆးသူမ်ၶျၢႆး ၽွင်းလူင်ၾၢႆႇလိူမ်ႈလႆႇ လူင်ပွင်ၸိုင်ႈမိူင်းတႆး ၸိသင်ဝႃႈ ဝဵင်းလႂ် ၵေႃႈ ဢဝ်လိၵ်ႈတႆး တႅမ်ႈႁဵတ်းပၢႆႉ ႁူမ်ႈၸူမ်းႁပ်ႉတွၼ်ႈ ၊ သူင်ႇသင်ပွၵ်ႈလွႆးလွႆး ဢၼ်ပူၵ်းတင်ႈ ႁူဝ်ဝဵင်း ႁၢင်ဝဵင်းလႆႈ ၼႆ သေ ၽူႈႁၵ်ႉလိၵ်ႈတႆး ဢွၼ်ၵၼ်ႁဵတ်း ။ ဝၢႆးၼၼ်ႉဢမ်ႇႁိုင် သမ်ႉမီးဢွၵ်ႇမႃးဝႃႈ ဝၢၼ်ႈလႂ် မိူင်းလႂ်ၵေႃႈ ပၢႆႉၶဝ်ႈဝဵင်း တေဢမ်ႇလႆႈတႅမ်ႈလိၵ်ႈတႆး ဝႃႈၼႆသေ ဢမ်ႇၵႃး ၸိူဝ်းႁဵတ်းယဝ်ႉ ၸႂ်ႉမွတ်ႇယႃႉ၊ ၸိူဝ်းတိုၵ်ႉႁဵတ်း ၺႃးသင်ယင်ႉ ။


ၼႂ်းၸိုင်ႈတႆးပွတ်းဢွၵ်ႇ မိူၼ်ၼင်ႇ ဝဵင်းတႃႈၶီးလဵၵ်း ၊ ၵဵင်းတုင် ၊ တၢင်းတူၵ်းၶူင်း မိူၼ်ၼင်ႇ ၵုၼ်ႁဵင် လွႆလႅမ် ၊ ၸိူဝ်းၼႆႉ ၺႃးထူ မွတ်ႇယႃႉပႅတ်ႈ ။ မိူၼ်ၼင်ႇ ဝဵင်းယႂ်ႇ ဝဵင်းလူင် တႅမ်ႈလိၵ်ႈၶႄႇ ၊ လိၵ်ႈမၢၼ်ႈ ဝႆႉလွၼ်ႉလွၼ်ႉ ၸိူဝ်းၼၼ်ႉ သမ်ႉ ဢမ်ႇမီးၽႂ်ယႃႉ ႁၢမ်ႈႁႄႉသေၵေႃႉဝႃႈၼႆ ။