ႁူမ်ႈတုမ်ႁႅင်းၵၢၼ်ယၢၼ်မိူင်း (MWF) ၸႄႈတွၼ်ႈၵဵင်းမႆႇ ႁဵတ်းလိၵ်ႈတုၵ်းယွၼ်းထိုင်တီႈ ၼၢင်းဢွင်ႇသၢၼ်း ၸုၵျီႇ တီႈၵိူဝ်းၵုမ်ၸိုင်ႈမိူင်းမၢၼ်ႈ ၊ ၽွင်းမၼ်းၼၢင်း ဢွၵ်ႇၶၢဝ်းတၢင်းမႃးဢႅဝ်ႇယဵမ်ႈ ႁႅင်းၵၢၼ်မိူင်းမၢၼ်ႈ ၸိူဝ်းၶဝ်ႈႁဵတ်းၵၢၼ်တီႈၼႂ်းမိူင်းထႆး ။

ႁႅင်းၵၢၼ်ယၢၼ်မိူင်း ၵူၼ်းမိူင်းမၢၼ်ႈပႂ်ႉႁပ်ႉတွၼ်ႈ ၼၢင်းဢွင်ႇသၢၼ်းၸုၵျီႇ

ၼႂ်းလိၵ်ႈတုၵ်းယွၼ်း ႁူမ်ႈတုမ်ႁႅင်းၵၢၼ်ယၢၼ်မိူင်း (MWF) ၼၼ်ႉ လၢတ်ႈဝႃႈ - ဢိင်ၼိူဝ်ႁဝ်းၶႃႈပဵၼ်ၸုမ်း ႁႅင်းၵၢၼ်ယၢၼ်မိူင်း ၸၢဝ်းၶိူဝ်းတႆး ဢၼ်ယူႇသဝ်းမႃးၼႂ်းၸိုင်ႈမိူင်းႁူမ်ႈတုမ်မၢၼ်ႈသေ လႆႈဢွၵ်ႇၶၢဝ်းတၢင်း မႃးႁဵတ်းၵၢၼ်ၼႂ်းမိူင်းထႆးၼႆႉ ယိၼ်းႁူမ်ၸူမ်းသိူဝ်းၸွမ်း ၼၢင်းဢွင်ႇသၢၼ်းၸုၵျီႇ ၊ ဢၼ်လုမ်ႈၾႃႉၵူႈၸိုင်ႈမိူင်း ယုၵ်ႉယွင်ႈလႄႈ ၵူၼ်းၼႂ်းဝၢၼ်ႈၼႂ်းမိူင်းယုၵ်ႉယွင်ႈပၼ်ႁႅင်းသေ ထိုင်တီႈလႆႈမႃးႁပ်ႉတၼ်းႁဵင်းၽူႈၵိူဝ်းၵုမ် ဝၢၼ်ႈမိူင်း ၸိုင်ႈမိူင်းႁူမ်ႈတုမ်မၢၼ်ႈ ၼႂ်းဝၼ်းမိူဝ်ႈလဵဝ်ၼႆႉ ။ မိူဝ်ႈၼႆႉ တေလႆႈဝႃႈပဵၼ်တိုဝ်ႉတၢင်းလီ ပိူဝ်ႈတႃႇႁဝ်းၸၢဝ်းတႆး ၸိူဝ်းမႃးႁဵတ်းၵၢၼ်ယူႇၼႂ်းမိူင်းထႆး လႆႈမီးတိုဝ်ႉတၢင်းၶဝ်ႈႁူမ်ႈ ပၢင်ႁပ်ႉတွၼ်ႈဝၼ်းမိူဝ်ႈၼႆႉ - ဝႃႈၼႆ ။


ယူႇတီႈၼႂ်းထႃႇၼဢၼ်ၸဝ်ႈၼၢင်း (ၼၢင်းဢွင်ႇသၢၼ်းၸုၵျီႇ) ပဵၼ်တီႈၵိူဝ်းၵုမ် ၸိုင်ႈမိူင်းႁူမ်ႈတုမ်မၢၼ်ႈ ၊ ပဵၼ်ၽူႈပၼ်တၢင်းႁၼ်ထိုင်လႄႈၶေႃႈၼႄႉၼမ်း လူင်ပွင်ၸိုင်ႈမိူင်းႁူမ်ႈတုမ်မၢၼ်ႈသေ ႁူမ်ႈတုမ်ႁႅင်းၵၢၼ်ယၢၼ်မိူင်း ၶႂ်ႈတုၵ်းယွၼ်းတၢင်းၸွႆႈထႅမ် ပိူဝ်ႈတႃႇၵႄႈလိတ်ႈပၼ်ႁႃလႄႈ ပူၵ်းပွင်ပေႃႇလသီႇ မိူၼ်ၼင်ႇပႃႈတႂ်ႈၼႆႉ ။


ၶေႃႈတီႈ 1.တုၵ်းယွၼ်းႁႂ်ႈလူင်ပွင်ၸိုင်ႈမိူင်းမၢၼ်ႈ ၸွႆႈပၼ်လွင်ႈငၢႆႈလူမ် တႃႇၵူၼ်းမိူင်းမၢၼ်ႈၶဝ်ႈမႃးႁဵတ်းၵၢၼ် ၼႂ်းမိူင်းထႆး ။ ၵူၼ်းၸိူဝ်းၶဝ်ႈမႃးယူႇၼႂ်းမိူင်းထႆးယဝ်ႉၼၼ်ႉၵေႃႈ ႁႂ်ႈလႆႈမိူဝ်းႁဵတ်းဝႂ်ဢွၵ်ႇၶၢဝ်းတၢင်း MOU လႆႈတီႈဝဵင်းၸွမ်းလႅၼ်လိၼ် မိူၼ်ၼင်ႇတီႈတႃႈၶီႈလဵၵ်း ၊ မျႃႉဝတီႇလႄႈၵေႃႇသွင် ၸိူဝ်းၼႆႉ ။


2. ယွၼ်းႁႂ်ႈမီးပၢင်ၵုမ်ႁူမ်ႈၵၼ် ဝူင်ႈၵၢင်လူင်ပွင်ၸိုင်ႈမၢၼ်ႈ လႄႈ လူင်ပွင်ၸိုင်ႈထႆးသေ တတ်းမၵ်းပၼ် လွင်ႈသုၼ်ႇလႆႈငိုၼ်းတွင်း တႃႇၸွႆႈထႅမ်ၵူၼ်းထဝ်ႈၵူၼ်းၵႄႇ ၸွမ်းၼင်ႇၵွင်တိုၼ်းပိူင်ၸွႆႈထႅမ် တူင်ႇဝူင်းၵူၼ်း ။


3. ယွၼ်းႁႂ်ႈလူင်ပွင်ၸိုင်ႈမၢၼ်ႈ ၵိုတ်းလွင်ႈႁဵတ်းႁုၵ်းႁၢႆႉတေႃႇၵူႈၸၢဝ်းၶိူဝ်း ၼႂ်းဝၢၼ်ႈၼႂ်းမိူင်းလႄႈ ပူၵ်းပွင်ႁႂ်ႈၵူႈၸၢဝ်းၶိူဝ်း လႆႈမီးသူၼ်ႇႁူမ်ႈၼႂ်းၵၢၼ်ငၢၼ်းၵူႈၸၼ်ႉၸၼ်ႉ ။


4. ယွၼ်းႁႂ်ႈလူင်ပွင်ၸိုင်ႈမိူင်းမၢၼ်ႈ ၸွႆႈဢုပ်ႇဢူဝ်းၵိူဝ်းၵုမ် ႁႂ်ႈလူင်ပွင်ၸိုင်ႈထႆး ဢွၵ်ႇပေႃႇလသီႇ လူလွမ်တူၺ်းထိုင် လွင်ႈသုၼ်ႇလႆႈႁႅင်းၵၢၼ်ယၢၼ်မိူင်းလိူဝ်ၵဝ်ႇ ၊ ႁႂ်ႈၸွတ်ႇတူဝ်ႈထိုင် ၊ မိူၼ်ၼင်ႇ ၵူၼ်းႁဵတ်းၵၢၼ်ၽုၵ်ႇသွမ်ႈလႄႈ ၵူၼ်းႁဵတ်းၵၢၼ်ၼႂ်းႁိူၼ်း ၸဵမ်ၸိူဝ်းၼႆႉ ။


5. ယွၼ်းႁႂ်ႈလူင်ပွင်ၸိုင်ႈမၢၼ်ႈ ၸွႆႈလၢတ်ႈပၼ် လူင်ပွင်ၸိုင်ႈထႆး ၊ ႁႂ်ႈမီးလွင်ႈယွၼ်ႇယၢၼ်းပၼ် ႁႅင်းၵၢၼ်ယၢၼ်မိူင်းၵူႈၵေႃႉ ၸိူဝ်းလူင်းသဵၼ်ႈမၢႆၸိုဝ်ႈသဵင်ႁႅင်းၵၢၼ်ဝႆႉ လိုၼ်းသုတ်းၼႆႉ လႄႈယိပ်းဝႂ်ၶွင်ႇၶဝ် မီးသုၼ်ႇလႆႈၽဵင်ႇပဵင်းဝႂ်ပၢတ်ႊသပွတ်ႊၵဝ်ႇ ။


6. ယွၼ်းႁႂ်ႈလူင်ပွင်ၸိုင်ႈမၢၼ်ႈ ၸွႆႈဢုပ်ႇဢူဝ်းလူင်ပွင်ၸိုင်ႈထႆး ႁႂ်ႈထႆးဢၼုၺၢတ်ႈပၼ်ႁႅင်းၵၢၼ်ယၢၼ်မိူင်း လႆႈႁဵတ်းၵၢၼ်ၸွမ်းႁၢၼ်ႉၶၢႆၶူဝ်းၶွင် ၸိူဝ်းၼႆႉ ။


ၸွမ်းၼင်ႇဢၼ်တုၵ်းယွၼ်းမႃးၸိူဝ်းၼႆႉ ႁူမ်ႈတုမ်ႁႅင်းၵၢၼ်ယၢၼ်မိူင်း (MWF) မုင်ႈမွင်းဝႃႈ တေလႆႈႁပ်ႉ တၢင်းၸွႆႈထႅမ်တီႈၸဝ်ႈၼၢင်း (ၼၢင်းဢွင်ႇသၢၼ်ၸုၵျီႇ) သေ ႁႂ်ႈပေႃးၸၢင်ႈလိတ်ႈပၼ်ႁႃၵႂႃႇမိူဝ်းၼႃႈ - ၼႆယဝ်ႉ ။


ႁူမ်ႈတုမ်ႁႅင်းၵၢၼ်ယၢၼ်မိူင်း (Migrant Workers Federation-M.W.F) ၼႆႉ ပဵၼ်ပီႈၼွင်ႉ ႁႅင်းၵၢၼ်ယၢၼ်မိူင်း ၼႂ်းၸႄႈဝဵင်းၵဵင်းမႆႇလႄႈ ႁိမ်းႁွမ်း ႁူမ်ႈၵၼ်ၵေႃႇတင်ႈၶိုၼ်ႈမႃး ။ မိူဝ်ႈလဵဝ် ႁူဝ်ပဝ်ႈပဵၼ်ၸၢႆးဢုမ်ႈၶိူဝ်း ၶိူဝ်းသုင် ၊ လုၵ်ႈၸုမ်းမီးၼပ်ႉႁူဝ်ပၢၵ်ႇ။ မီးယိူင်းဢၢၼ်း 1. ပူၵ်းပွင်ပၼ်ပၢႆးပၺ်ၺႃ တီႈၵူၼ်းႁႅင်းၵၢၼ်ယၢၼ်မိူင်း ႁႂ်ႈပေႃးမီးတၢင်းႁူႉလႄႈ ၶဝ်ႈထိုင်လွင်ႈသုၼ်ႇလႆႈတူဝ်ၵဝ်ႇ ။ 2. ၸွႆႈထႅမ်လႄႈလူလွမ်တူၺ်းထိုင် သုၼ်ႇလႆႈႁႅင်းၵၢၼ်ယၢၼ်မိူင်း ၼႂ်းၸိုင်ႈထႆးပွတ်းၼိူဝ် (ပွတ်းႁွင်ႇ) ။


ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ် ၸိုင်ႈမိူင်းႁူမ်ႈတုမ်မၢၼ်ႈ မႃးဢႅဝ်ႇယဵမ်ႈမိူင်းထႆးပွၵ်ႈၵမ်းၼႆႉ (ဝၼ်းတီႈ 23/06/2016) ပိူင်လူင်မၼ်း တေၵႂႃႇယဵမ်ႈၸႂ်းႁႅင်းၵၢၼ်ယၢၼ်မိူင်း ၵူၼ်းမိူင်းမၢၼ်ႈ ၸိူဝ်းၶဝ်ႈႁဵတ်းၵၢၼ် ၼႂ်းမိူင်းထႆး တီႈမႁႃၶျႆး ၸႄႈတွၼ်ႈသမုတ်းသႃၶွၼ်း ။ တီႈမႁႃၶျႆးၼႆႉ မီးႁႅင်းၵၢၼ်ၵူၼ်းမိူင်းမၢၼ်ႈ မွၵ်ႈသႅၼ်ပၢႆ ။ ၸွမ်းၼင်ႇၶပ်းမၢႆမီးဝႆႉၼၼ်ႉ ဝၼ်းသုၵ်းတီႈ 24 မိူဝ်ႈၽုၵ်ႈ မၼ်းၼၢင်းတေႁူပ်ႉထူပ်း ဢုပ်ႇဢူဝ်းၸွမ်းတင်း ၽူႈၼမ်းလူင်ပွင်ၸိုင်ႈထႆး - သိုဝ်ႇၶၢဝ်ႇထႆးၵေႃႈ ဢွၵ်ႇၵႂႃႇၼင်ႇၼႆ ။