ပၢႆႉမႂ်ႇတီႈတၢင်းၶဝ်ႈဝဵင်းတႃႈၶီႈလဵၵ်း ၊ ဢၼ်ထုၵ်ႇၸဝ်ႈဢႃႇၼႃႇသင်ႇၵိုတ်း လွင်ႈတႅမ်ႈလိၵ်ႈတႆးသေ ဢဝ်ၽႅၼ်ႇၶဵဝ်ႁူမ်ႇဝႆႉၼၼ်ႉ ၺႃးၽဝ် ။


မိူဝ်ႈဝၼ်းတီႈ 21/06/2016 ၵၢင်ၶမ်ႈၼၼ်ႉ မီးၵူၼ်းဢဝ်ၼမ်ႉမၼ်းၵႂႃႇ ႁူတ်းသႂ်ႇသေ ဢဝ်ၾႆးၽဝ်ပႅတ်ႈပၢႆႉၼၼ်ႉ ။

ၾၢင်ႁၢင်ႈပၢႆႉမႂ်ႇတၢင်းၶဝ်ႈဝဵင်းတႃႈၶီႈလဵၵ်း ဢၼ်ထုၵ်ႇၾႆးၽဝ်ပႅတ်ႈ Photo: Tachileik News Agency

လူင်ပွင်ၸိုင်ႈမိူင်းတႆး ႁွင်ႈၵၢၼ်လူင်ၾၢႆႇလိူမ်ႈလႆႇ လႆႈပိုၼ်ၽၢဝ်ႇဢၼုၺၢတ်ႈပၼ် တႅမ်ႈလိၵ်ႈတႆးလႆႈၼႆလႄႈ ၵူၼ်းၼႂ်းပိုၼ်ႉတီႈ ဝဵင်းတႃႈၶီႈလဵၵ်းၵေႃႈ ၸင်ႇလႆႈၽွမ်ႉၵၼ်ႁဵတ်းမႃးပၢႆႉလိၵ်ႈတႆး ။ ၵူၺ်းၵႃႈ ႁဵတ်းယဝ်ႉဢမ်ႇတၼ်းႁိုင် သမ်ႉထုၵ်ႇၸီႉသင်ႇႁႂ်ႈပူတ်းယႃႉပႅတ်ႈလႄႈ ၸင်ႇလႆႈဢဝ်ၽႅၼ်ႇၶဵဝ်ပူၵ်ႉဝႆႉ ။


ၸၢႆးၵျေႃႇ ၵူၼ်းပိုၼ်ႉတီႈတႃႈၶီႈလဵၵ်း လၢတ်ႈဝႃႈ - ပၢႆႉဢၼ်ၼႆႉ ဢဝ်ၽႅၼ်ႇၶဵဝ်ပူၵ်ႉႁူမ်ႇဝႆႉ ၸဵမ်မိူဝ်ႈဝၼ်းတီႈ 18 ။ ႁဝ်းၶႃႈၵေႃႈၵႂႃႇတူၺ်းယူႇ၊ မိူဝ်ႈၽွင်းၼၼ်ႉ ဢမ်ႇမီးလိၵ်ႈတႆးယဝ်ႉ ၊ ၶဝ်မွတ်ႇပႅတ်ႈယဝ်ႉ ။ ပွတ်းတွၼ်ႈၼႆႉ ပဵၼ်ပွတ်းတွၼ်ႈဢၼ် လုၵ်ႈသိုၵ်းၶဝ်ယူႇၵမ်ႈၼမ် ၊ ပေႃးဢမ်ႇႁူႉလွင်ႈတၢင်းမၼ်း ၽႂ်တိုၼ်းတေဢမ်ႇႁတ်းၵႂႃႇ ႁဵတ်းၸိူင်ႉၼႆ - ဝႃႈၼႆ ။


ၵေႃႉဢဝ်ၾႆးၽဝ်ပႅတ်ႈပၢႆႉၼႆႉ ပဵၼ်ၽႂ် ၊ ၵွပ်ႈလွင်ႈသင်လႄႈ လႆႈၽဝ်ပႅတ်ႈၼၼ်ႉ ႁၢၼ်ႉတေႃႇမိူဝ်ႈလဵဝ်ၵေႃႈ ပႆႇမီးၽႂ်ႁူႉ - ၼႆယဝ်ႉ ။


ဢၼ်ႁဵတ်းပၢႆႉလိၵ်ႈတႆး တၢင်းၶဝ်ႈဝဵင်းဢွၵ်ႇဝဵင်း ႁူဝ်ဝဵင်းႁၢင်ဝဵင်းၼႆႉ ပႃးၼႂ်းၽႅၼ်ၵၢၼ် 100 ဝၼ်း လူင်ပွင်ၸိုင်ႈ ပႃႊတီႊၼူၵ်ႉယုင်း (NLD) လူင်ပွင်ၸိုင်ႈမိူင်းတႆးလႄႈ ႁွင်ႈၵၢၼ်လူင် ၾၢႆႇလိူမ်ႈလႆႇ ၸၢႆးသူမ်ၶျၢႆး ဢၼ်လူင်ပွင်ၸိုင်ႈႁဵတ်းသၢင်ႈၵႂႃႇယူႇ ယၢမ်းလဵဝ် ။ ဢၼ်တႅမ်ႈပၢႆႉမႃးၸိူဝ်းၼႆႉ လိၵ်ႈမၢၼ်ႈလိၵ်ႈတႆး တႅမ်ႈၵိုၵ်းၵၼ် ။ ၵွပ်ႈၼၼ် ၵူႈဝၢၼ်ႈၵူႈဝဵင်း လႆႈတႄႇႁဵတ်းမႃး ၊ ပႃးၸဵမ်ဝဵင်းတႃႈၶီႈလဵၵ်းၵေႃႈ သႂ်ႇလိၵ်ႈတႆးမႃး ။ ၼင်ႇႁိုဝ်တေဢမ်ႇၽိတ်းၼၼ်ႉၵေႃႈ ၵႂႃႇပိုင်ႈဢိင်တွင်ႈထၢမ်ၵေႃလိၵ်ႈလၢႆးသေ ႁဵတ်းမႃး - ၵႅမ်ၽူႈၸတ်းၵၢၼ် ႁွင်ႈၵၢၼ်ၾၢႆႇလိူမ်ႈလႆႇ ဝဵင်းတႃႈၶီႈလဵၵ်း ဢူးၵျေႃႇၸူဝ်းမူဝ်း လၢတ်ႈဝႃႈၼႆသေ Tachileik news Agency ႁၢႆးငၢၼ်းၶၢဝ်ႇၵႂႃႇ မိူဝ်ႈဝၼ်းတီႈ 18/06/2016 ၼင်ႇၼႆ ။