ၵူၼ်းဝၢၼ်ႈၵူၼ်းမိူင်းၼႂ်းၸႄႈဝဵင်းပၢင်လူင် ဢိူင်ႇႁၢႆးၼၢင်း ၸိူဝ်းထုၵ်ႇယိုတ်းတီႈလိၼ်ဝႆႉ မိူဝ်ႈ 7-8 ပီပူၼ်ႉမႃး ၊ တၢင်းၵႂၢင်ႈမွၵ်ႈ 60 ဢေႊၵႃႊ ၊ ဢၼ်ထုၵ်ႇၽူႈၵွၼ်းဢိူင်ႇႁၢႆးၼၢင်း ႁူမ်ႈၸဝ်ႈၼႃႈတီႈမၢၼ်ႈသေ ႁုပ်ႈယိုတ်းတီႈလိၼ် ၶၢႆပၼ်ၶွမ်ႊပၼီႊ ၶုတ်းထၢၼ်ႇႁိၼ်ၼၼ်ႉ ႁဵတ်းလိၵ်ႈတုၵ်းယွၼ်းၶိုၼ်း တီႈလူင်ပွင်ၸိုင်ႈ ၻီႊမူဝ်ႊၶရေႊၸီႊ NLD ပွၵ်ႈၵမ်းႁႅၵ်ႈ ။

ပိူဝ်ႈတႃႇလႆႈၶိုၼ်းတီႈလိၼ် ဢၼ်ထုၵ်ႇႁုပ်ႈယိုတ်းၵႂႃႇၼၼ်ႉ ၵူၼ်းဝၢၼ်ႈမႂ်ႇ ဢိူင်ႇႁၢႆးၼၢင်း ၸႄႈဝဵင်းပၢင်လူင်ၶဝ်ၼႆႉ မိူဝ်ႈပၢၼ်လူင်ပွင်ၸိုင်ႈ ဢူးတဵင်းၸဵင်ႇၼၼ်ႉ ႁဵတ်းလိၵ်ႈတုၵ်းယွၼ်းမႃး 9 ပွၵ်ႈယဝ်ႉသေတႃႉ ပႆႇလႆႈၶိုၼ်း ။ ယွၼ်ႉၼႆ ပၢၼ်လူင်ပွင်ၸိုင်ႈၻီႊမူဝ်ႊၶရေႊၸီႊ NLD ၼႆႉ တႅမ်ႈလိၵ်ႈတၢင်ႇယွၼ်းၶိုၼ်းထႅင်ႈ ပွၵ်ႈၵမ်း 10 ။ ဢၼ်တႅမ်ႈလိၵ်ႈတၢင်ႇယွၼ်းၶိုၼ်း တီႈလူင်ပွင်ၸိုင်ႈမႂ်ႇ NLD ၼႆႉ ပဵၼ်ပွၵ်ႈဢွၼ်တၢင်းသုတ်း ၊ ပူၼ်ႉမႃးမိူဝ်ႈဝၼ်းတီႈ 16/06/2016 ၼႆႉ - ၼႆယဝ်ႉ ။


ၸဝ်ႈၶွင်လိၼ်သူၼ်ႁႆႈၼႃး ၸၢႆးသေႃးၼ လၢတ်ႈဝႃႈ - မိူဝ်ႈလဵဝ်ၼႆႉ မၼ်းပဵၼ်ပၢၼ်လူင်ပွင်ၸိုင်ႈ ၻီႊမူဝ်ႊၶရေႊၸီႊ ၊ ပၢၼ်လူင်ပွင်ၸိုင်ႈၵူၼ်းမိူင်းၼႆလႄႈ တီႈလိၼ်သူၼ်ဢၼ်လႆႈထုၵ်ႇ ႁုပ်ႈယိုတ်းၵႂႃႇၼႆႉ မီးတၢင်းမုင်ႈမွင်းဝႃႈတေလႆႈၶိုၼ်းယူႇ ၼႆသေၵေႃႈ လႆႈတႅမ်ႈလိၵ်ႈတၢင်ႇယွၼ်းၶိုၼ်း မိူဝ်ႈလိူၼ်ၵျုၼ်ႊၼႆႉ ဝၼ်းတီႈ 16 ။ ပေႃးပႃးပွၵ်ႈၵမ်းၼႆႉ တႅမ်ႈလိၵ်ႈတၢင်ႇယွၼ်းၶိုၼ်းၼႆႉ မီး 10 ပွၵ်ႈယဝ်ႉ ၊ ယွၼ်ႉပဵၼ်လိၼ်ႁဝ်းလႄႈ ႁဝ်းၶႂ်ႈလႆႈၶိုၼ်း ၊ ႁဝ်းၶႂ်ႈၽုၵ်ႇသွမ်ႈၶိုၼ်းမၢၵ်ႇၶဝ်ႈတဝ်ႈၼမ်ႉႁဝ်းၶိုၼ်း ၊ ႁဝ်းတေၶတ်းၸႂ်ၵႂႃႇႁၢၼ်ႉတေႃႇပေႃးလႆႈၶိုၼ်း - ဝႃႈၼႆ ။


တီႈလိၼ်သူၼ်မွၵ်ႈ 60 ဢေႊၵႃႊ ၊ ၸဝ်ႈၶွင် 27 ၵေႃႉ ဢၼ်မီးၾၢႆႇႁွင်ႇဝၢၼ်ႈမႂ်ႇ ဢိူင်ႇႁၢႆးၼၢင်း ၸႄႈဝဵင်းပၢင်လူင် ၸိုင်ႈတႆးပွတ်းၸၢၼ်းၼႆႉ ထုၵ်ႇၽူႈၵွၼ်းဢိူင်ႇႁၢႆးၼၢင်း (ၵေႃႉၵဝ်ႇ) ၶုၼ်ႇဢွင်ႇဝိၼ်း ႁုပ်ႈယိုတ်းဢဝ်ၵႂႃႇမိူဝ်ႈပီ 2008 ။ မၼ်းၼႆႉ ႁူမ်ႈမိုဝ်းၵၼ်တင်းၸဝ်ႈၼႃႈတီႈမၢၼ်ႈသေ ႁဵတ်းဝႂ်တီႈလိၼ် (ပူင်ႇၸၢၼ်ႇ) 105 ဝႃႈပဵၼ်တီႈလိၼ်ၶွင်မၼ်းၼႆသေ တတ်းႁဵတ်းလွၵ်းသေၶၢႆၶိုၼ်း ။ ၾၢႆႇၸဝ်ႈတီႈလိၼ်ၶဝ်ၵေႃႈ တင်ႈတႄႇပီ 2010 မႃး တႅမ်ႈလိၵ်ႈသေတၢင်ႇယွၼ်းၶိုၼ်း ။ မိူဝ်ႈလဵဝ်ၼႆႉ ၶုၼ်ႇဢွင်ႇဝိၼ်းတၢႆၵႂႃႇယဝ်ႉလႄႈ တေႃႇထိုင်မိူဝ်ႈလဵဝ်ၵေႃႈပႆႇလႆႈၶိုၼ်း - ၼႆယဝ်ႉ ။


ၸဝ်ႈၶွင်တီႈလိၼ် ထႅင်ႈၵေႃႉၼိုင်ႈလၢတ်ႈဝႃႈ - တီႈၼႆႈၼႆႉ မၼ်းပဵၼ်ၸႃႇတိတီႈၵိူတ်ႇပေႃႈတင်းမႄႈၵဝ်ၶႃႈ ။ ယွၼ်ႉပဵၼ်တီႈလိၼ်ႁဝ်းလႄႈ ႁဝ်းၶႂ်ႈလႆႈၶိုၼ်း ၊ လူင်ပွင်ၸိုင်ႈလႂ်ၶိုၼ်ႈမႃးၵေႃႈ ႁဝ်းတေတုၵ်းယွၼ်းၵႂႃႇ တိၵ်းတိၵ်း ။ မိူဝ်ႈလဵဝ် ဝၢၼ်ႈမိူင်းၵေႃႈမီးလွင်ႈငမ်းယဵၼ်မႃးယဝ်ႉ ၊ ႁိမ်းႁွမ်းၼႆႉၵေႃႈ ၵူၼ်းမိူင်းၵေႃႈမႃးယူႇ ၼမ်ယဝ်ႉလႄႈ ႁဝ်းၶႃႈၶႂ်ႈမႃးႁဵတ်းသူၼ် ၶႂ်ႈမႃးၽုၵ်ႇသွမ်ႈၶိုၼ်း၊ ၶႂ်ႈမႃးယူႇၶိုၼ်း ၊ လွင်ႈၸိူဝ်းၼႆႉ မၼ်းပဵၼ်တၢင်းမုင်ႈမွင်းႁဝ်း - ဝႃႈၼႆ ။


ဢၼ်တီႈလိၼ်သူၼ်ထုၵ်ႇယိုတ်းၼႆႉ မိူဝ်ႈပူၼ်ႉမႃးမွၵ်ႈ 70 ပီၼၼ်ႉ မၼ်းပဵၼ်ဝၢၼ်ႈ ၊ ၸိုဝ်ႈဝၢၼ်ႈ ပဵၼ်ဝၢၼ်ႈမေႃႈ ။ ယွၼ်ႉတီႈဝၢၼ်ႈမေႃႈၼႆႉ မီးမႃးရေႃးၵႃႇတၢင်းပဵၼ်ၵႃႇလလႄႈ ၵူၼ်းဝၢၼ်ႈၵူၼ်းသူၼ်ၶဝ်ၵေႃႈ ဢွၼ်ၵၼ်ၶၢႆႉၵႂႃႇတႄႇဝၢၼ်ႈမႂ်ႇ ၊ ၸိုဝ်ႈဝၢၼ်ႈၵေႃႈတင်ႈဝႃႈ ဝၢၼ်ႈမႂ်ႇ ၊ မီးၾၢႆႇၸၢၼ်းဝၢၼ်ႈမေႃႈ ။ ၵူၼ်းဝၢၼ်ႈၵူၼ်းမိူင်းၵေႃႈ ၵႂႃႇယူႇတီႈဝၢၼ်ႈမႂ်ႇသေ မႃးႁဵတ်းသူၼ်ၶိုၼ်းတီႈဝၢၼ်ႈမေႃႈ ၊ မႃးၽုၵ်ႇသွမ်ႈ မၢၵ်ႇၶဝ်ႈတဝ်ႈၼမ်ႉၶိုၼ်း - ၸဝ်ႈတီႈလိၼ်သူၼ် ၵေႃႉဢၼ်မီးဢႃယု 70 ပၢႆၵေႃႉၼိုင်ႈ လၢတ်ႈ ။


ဢၼ်ၼႆႉ မၼ်းပဵၼ်လိၼ်သူၼ်ၸဝ်ႈႁႆႈၸဝ်ႈၼႃး ၊ မီးၸဝ်ႈၶွင်ယဝ်ႉ ၊ တေဢမ်ႇလႆႈသိုဝ်ႉၶၢႆၼႆ ၸဝ်ႈတီႈလိၼ်ၶဝ်ၼႆႉ 15 ဝၼ်းၼိုင်ႈပွၵ်ႈ ၊ ၼိုင်ႈလိူၼ်ၼိုင်ႈပွၵ်ႈ ႁဵတ်းလိၵ်ႈသေဢဝ်ၵႂႃႇတိတ်းတီႈၸိူၵ်ႈလဵၵ်း ဢၼ်ၶဝ်ႁဵတ်းႁူဝ်ႉဝႆႉၸိူဝ်းၼႆႉ ။ ၵူၺ်းၵႃႈ ၶွမ်ႊပၼီႊၶုတ်းထၢၼ်ႇႁိၼ် ဢၼ်ဝႃႈၶဝ်ပဵၼ်ၸဝ်ႈၶွင်တီႈလိၼ် ၼၼ်ႉသမ်ႉ မႃးယႃႉမွတ်ႇပႅတ်ႈၶိုၼ်းတိၵ်းတိၵ်း ။ ၵူၺ်းၵႃႈ ပဵၼ်ၸိူင်ႉႁိုဝ်ၵေႃႈယဝ်ႉ ၸဝ်ႈၶွင်တီႈလိၼ်တႄႉ တေဢၢၼ်းတုၵ်းယွၼ်းၵႂႃႇ တေႃႇထိုင်ပေႃးလႆႈၶိုၼ်း ။ ယုမ်ႇယမ်ဝႃႈ လူင်ပွင်ၸိုင်ႈ NLD ၼႆႉ တေယူႇၾၢႆႇထုၵ်ႇမႅၼ်ႈသေ တေၵႄႈလိတ်ႈပၼ် ၊ ၸဝ်ႈၶွင်တီႈလိၼ်ၶဝ်ၼႆႉ ယုမ်ႇယမ်ဝႆႉၼင်ႇၼႆ ။