ၸုမ်းႁၵ်ႉသႃ ပႃႇမႆႉၶဵဝ်ၸမ်ႉၼမ်ႉလိူင်ႇ (Green Enviroment Kyaing Tong) ဢွၼ်ႁူဝ် ၸတ်းႁဵတ်း ပၢင်ဢုပ်ႇၶႆႈ လွင်ႈငဝ်းလၢႆး ၽေးသၽႃႇဝ ၽွၼ်းလီ/ႁၢႆႉၼႂ်းမိူင်းၸတ်းႁဵတ်း တီႈႁူင်းႁေႃး တႆးၼိူဝ် ၸႄႈဝဵင်းၵဵင်းတုင် မီးၽူႈၶဝ်ႈႁူမ်ႈ 500 ပၢႆ ။

ဝၼ်းတီႈ 21/06/2016 ယၢမ်း 13:30-17:30 မူင်း ၸုမ်းႁၵ်ႉသႃပႃႇမႆႉ ၶဵဝ်ၸမ်ႉၼမ်ႉလိူင်ႇ (Green Enviroment Kyaing Tong) ဢွၼ်ႁူဝ်ၸတ်းႁဵတ်း ပၢင်ဢုပ်ႇၶႆႈ လွင်ႈငဝ်းလၢႆးၽေးသၽႃႇဝ ၼႂ်းမိူင်းႁူမ်ႈတုမ် ၽွၼ်းလီၽွၼ်းႁၢႆႉ ၵူၼ်းမိူင်းႁူပ်ႉထူပ်း ပၢင်ဢုပ်ႇၶႆႈၼႆႉ လႆႈၸတ်းႁဵတ်းတီႈ ႁူင်းႁေႃ တႆးၼိူဝ် ဝၢၼ်ႈၼွင်ၵႅဝ်ႈ ပွၵ်ႉ 2 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼႆယဝ်ႉ ။


ၸၢႆးၶမ်းၼႅင်ႇ ႁူဝ်ပဝ်ႈ ၸုမ်းႁၵ်ႉသႃ ပႃႇမႆႉၶဵဝ်ၸမ်ႉၼမ်ႉလိူင်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၶႃႈၶဝ်လႆႈဢွၼ်ႁူဝ်ႁဵတ်းၼႆႉ ၵဵဝ်ႇလူၺ်ႈ ၾိင်ႈၾႃႉၾူၼ်လူမ်း သိင်ႇဝႅတ်ႉလွမ်ႉ လႅၵ်ႈလၢႆႈ မႃးၸိုင်ႉႁိုဝ် ၼင်ႇႁိုဝ် ၵူၼ်းမိူင်းႁဝ်းပေႃးတေလႆႈႁူႉ ၵဵဝ်ႇၵပ်းလူၺ်ႈလွင်ႈၼႆႉသေ ၸင်ႇလႆႈၸတ်းႁဵတ်း ပၢင်ဢုပ်ႇၶႆႈ သပ်းလႅင်းၼႄ လွင်ႈတုမ်ႉတိူဝ်ႉၽေးသၽႃႇဝ၊ ယိူင်းဢၢၼ်း ႁႂ်ႈၵူၼ်းမိူင်း ႁဝ်းပေႃးတေလႆႈႁူႉ” ဝႃႈၼႆ ။


ပၢင်ဢုပ်ႇၶႆႈ လွင်ႈၽေးသၽႃႇဝ သိင်ႇဝႅတ်ႉလွမ်ႉၼႆႉ တေမီးၽူႈမီးပိုၼ်းႁူႉ ပၢႆးႁၼ် မႃးဢုပ်ႇၶႆႈလႅၵ်ႈ လၢႆႈၼႄ မိူၼ်ၼင်ႇ တွၵ်ႊတိူဝ်ႊ ထုၼ်းလုၼ်ႇ ၊ တွၵ်ႊတိူဝ်ႊ သေႃးမုၼ်ႇတဵင်းလႄႈ တေႃႇတေႇဝီတၼ်ႉသိင်ႇ ၸဵမ်းၸိူဝ်းၼႆႉ မႃးဢုပ်ႇလၢတ်ႈၼႄၼႆယဝ်ႉ ။


ဝဵင်းၵဵင်းတုင်ၼႆႉ ၵူႈပွၵ်ႈပႃႇမႆႉၶဵဝ်ၸမ်ႉၼမ်ႉလိူင်ႇ ၊ မီးမႆႉသၵ်း ၊ မႆႉတိုင်း ၊ မႆႉၼိူဝ်ႉၵႅၼ်ႇ ၊ တူဝ်ႇထိူၼ်ႇ ၽၢၼ်း ၊ ၵႂၢင် ၊ သိူဝ် ၸိူဝ်းၼႆႉၵေႃႈမီး ။ ၼႂ်းၶၢဝ်းတၢင်း 20-30 ပီ မႃးၼႆႉ မီးတႄႇၵူၼ်းတႅပ်ႉၶၢႆ ဢမ်ႇမီးၵူၼ်းလုမ်းလႃးၽုၵ်ႇသွမ်ႈလႄႈ ထိူၼ်ႇလု၊ ၼမ်ႉၵႆႉၼွင်း ။ ၵူၼ်းၼုမ်ႇၽူႈႁၵ်ႉသိင်ႇဝႅတ်ႉလွမ်ႉ ၸင်ႇမႃးၶွၼ်ႈတုမ်ၵၼ်သေ တင်ႈၸုမ်းႁၵ်ႉသႃ ပႃႇမႆႉၶဵဝ်ၸမ်ႉၼမ်ႉလိူင်ႇသေ ၽုၵ်ႇတူၼ်ႈမႆႉမႃးၵူႈပီ ။ ႁႂ်ႈၵူၼ်းမိူင်းမေႃႁၵ်ႉထိူၼ်ႇၶိူဝ်း ၽိူဝ်မႆႉ တူၼ်ႈမႆႉ တူၼ်ႈတွၵ်ႇလႄႈ ၸင်ႇၸတ်းပၢင်ပၼ်တင်းႁူႉ တင်းႁၼ်ယဝ်ႉ ဝႃႈၼႆ ။