ပၢႆႉတၢင်းၶဝ်ႈဝဵင်းဢွၵ်ႇဝဵင်း ၊ ႁူဝ်ဝဵင်းႁၢင်ဝဵင်း ၼႂ်းၸိုင်ႈတႆးပွတ်းႁွင်ႇ ပွတ်းဢွၵ်ႇ ပွတ်းၸၢၼ်း ဢၼ်ႁွင်ႈၵၢၼ်လူင်ၾၢႆႇလိူမ်ႈလႆႇမိူင်းတႆး ႁႂ်ႈႁဵတ်းၼၼ်ႉ ထုၵ်ႇၸီႇသင်ႇယႃႉမွတ်ႇၶိုၼ်း ။ ပၢႆႉလိၵ်ႈၼႆႉ မၢင်ဝဵင်းၸိူဝ်းတိုၵ်ႉတႅမ်ႈ တိုၵ်ႉႁဵတ်းယူႇၵေႃႈ ၸႂ်ႉၵိုတ်း ၊ ၸိူဝ်းႁဵတ်းယဝ်ႉၵေႃႈၸႂ်ႉယႃႉ ၊ ႁဵတ်းႁႂ်ႈၵူၼ်းၼႂ်းပိုၼ်ႉတီႈငမ်းငဝ်းၵႂင်ၸႂ် ။

ၵဵဝ်ႇၵပ်းလွင်ႈၼႆႉ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ယူႇတီႈၽွင်းလူင်ၾၢႆႇလိူမ်ႈလႆႇ မိူင်းတႆး ၊ လူင်ပွင်ၸိုင်ႈမိူင်းတႆး ၸၢႆးသူမ်ၶျၢႆး လၢတ်ႈဝႃႈ - ပၢႆႉႁူဝ်ဝဵင်းႁၢင်ဝဵင်းၼႆႉ မိူင်းတႆးၵေႃႈႁႂ်ႈတႅမ်ႈလိၵ်ႈတႆး ၼႆသေသင်ႇႁႂ်ႈႁဵတ်းပၢႆႉလိၵ်ႈတႆး ။ ၵွပ်ႈၼၼ်လႄႈ ၼႂ်းၸိုင်ႈတႆးလၢႆလၢႆဝဵင်း ဢွၼ်ၵၼ်ႁဵတ်းပၢႆႉလိၵ်ႈတႆးၶိုၼ်ႈမႃး ။


ၵူၺ်းၵႃႈ ဢၼ်ႁွင်ႈၵၢၼ်ၾၢႆႇလိူမ်ႈလႆႇ သင်ႇႁႂ်ႈႁဵတ်းပၢႆႉလိၵ်ႈတႆးၼၼ်ႉ မီးႁူဝ်ၼႃႈပီႇတုၸိတ်ႉၸုမ်းၼိုင်ႈ ၵေႃႉၼိုင်ႈ တႅမ်ႈလိၵ်ႈသၢၼ်ၶတ်း ထိုင်တီႈၽူႈၵွၼ်းတိူင်းသိုၵ်းဝႃႈ - မိူင်းတႆးၼႆႉ ဢမ်ႇၸႂ်ႈတႆးယူႇသဝ်း ၸၢဝ်းၶိူဝ်းလဵဝ်ၵူၺ်း ၊ ၵွပ်ႈၼၼ် ဢမ်ႇလီပဵၼ်လိၵ်ႈတႆး ။ ၵပ်းၵၢႆႇလွင်ႈၼႆႉ ၽူႈၵွၼ်းတိူင်း သမ်ႉၸီႉသင်ႇလူင်းမႃး တီႈႁွင်ႈၵၢၼ်လူင်ၾၢႆႇႁူမ်ႇလူမ်ႈလႅၼ်လိၼ် ၊ ႁွင်ႈၵၢၼ်လူင် ၾၢႆႇႁူမ်ႇလူမ်ႈလႅၼ်လိၼ် ၸင်ႇၸီႉသင်ႇလူင်းဝႃႈ ဢၼ်လႆႈႁဵတ်းပၢႆႉလိၵ်ႈတႆးဝႆႉၸိူဝ်းၼၼ်ႉ ႁႂ်ႈၵိုတ်းယင်ႉဝႆႉ ၊ ၸိူဝ်းဢၼ်ႁဵတ်းယဝ်ႉၵေႃႈႁႂ်ႈမွတ်ႇ- ၽူႈဢၼ်ယူႇၼႂ်းတူင်ႇဝူင်း လူင်ပွင်ၸိုင်ႈမိူင်းတႆး ၵေႃႉၼိုင်ႈလၢတ်ႈ ။


ယွၼ်ႉပိူဝ်ႈဢမ်ႇလႆႈႁူႉလွင်ႈတၢင်းမၼ်း ပဵၼ်ၸိူင်ႉႁိုဝ်တႄႉတႄႉ ၊ ဢမ်ႇမီးၵၢၼ်ၸႅင်ႈလၢတ်ႈတႅၵ်ႇတႅၵ်ႇ လႅင်းလႅင်းလႄႈ ၶူးမေႃသွၼ် ၸိူဝ်းႁၵ်ႉလိၵ်ႈလၢႆးပၢႆပေႇတႆးၶဝ် ဢွၼ်ၵၼ်ၵႂင် ။


ၵဵဝ်ႇၵပ်းလွင်ႈၼႆႉ ၶူးသွၼ်လိၵ်ႈတႆးတီႈဝဵင်းတူၼ်ႈတီး ဢၼ်ယူႇၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ၵေႃႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - ဢိင်ၼိူဝ်ၽွင်းလူင် ႁွင်ႈၵၢၼ်လူင်ၾၢႆႇလိူမ်ႈလႆႇ လၢတ်ႈဝႃႈ - ပၢႆႉၶဝ်ႈဝဵင်းၼႆႉ တႅမ်ႈလိၵ်ႈတႆးလႄႈ တႅမ်ႈလိၵ်ႈၽႃသႃၵႂၢမ်းလၢတ်ႈ ပေႃႈမႄႈၸဝ်ႈၵဝ်ႇ ၊ ၵူၼ်းၶိူဝ်းဢၼ်ယူႇ ၼႂ်းပိုၼ်ႉတီႈလႄႈ တင်းလိၵ်ႈဢိင်းၵလဵတ်ႈၸိူဝ်းၼႆႉ သႂ်ႇလႆႈၼႆသေ ၵူၼ်းၼႂ်းပိုၼ်ႉတီႈဢွၼ်ၵၼ်ၸူမ်း ။ မိူၼ်ၼင်ႇလွႆလႅမ် ၵေႃႈဢမ်ႇတႅမ်ႈလိၵ်ႈတႆးပိူင်လဵဝ် ၊ တႅမ်ႈလိၵ်ႈမၢၼ်ႈလိၵ်ႈတႆးၸွမ်းၵၼ် ။ ပၢႆႉႁူဝ်ဝဵင်းႁၢင်ဝဵင်းၼႆႉ တိုၼ်းမီးလိၵ်ႈမၢၼ်ႈဝႆႉယူႇၵူႈဢၼ် ။ ၵွပ်ႈၼၼ် ဢၼ်ၵႂႃႇႁဵတ်းဢၼ်မႂ်ႇထႅင်ႈၼႆႉ မၼ်းဢမ်ႇၵႂႃႇယႃႉဢၼ်ၵဝ်ႇ ။ ၸိုင်ႈမိူင်းႁူမ်ႈတုမ်မၢၼ်ႈၼႆႉ လိၵ်ႈမၢၼ်ႈၼႆႉ မၼ်းပဵၼ်လိၵ်ႈတၢင်းၵၢၼ် ၸႂ်ႉၼႂ်းလုမ်းၼႂ်းၸႆးၼႆ ႁဝ်းၵေႃႈပွင်ႇၸႂ်ယူႇ ၊ လွင်ႈၼႆႉ ႁဝ်းၵေႃႈဢမ်ႇၵႂႃႇယႃႉ ။


ၵွပ်ႈၼၼ်လႄႈ ၼင်ႇႁိုဝ်ၵူၼ်းၼွၵ်ႈမိူင်းၶဝ်၊ ၵူၼ်းၼႂ်းပိုၼ်ႉတီႈၵႂႃႇမႃးၸိူဝ်းၼႆႉ ႁႂ်ႈပေႃးႁၼ်ဝႃႈ - ၼႂ်းပိုၼ်ႉတီႈၼႆႉ မီးၵူၼ်းၸၢဝ်းၶိူဝ်းၼႆႉပိုင်ႈဢိင်ယူႇသဝ်း ။ ၵွပ်ႈၼၼ်လႄႈ ႁဝ်းၶႃႈၶႂ်ႈတႅမ်ႈၵႂၢမ်းပေႃႈမႄႈ ႁဝ်းလႄႈ ဢိင်းၵလဵတ်ႈ ႁႂ်ႈၵူႈမိူင်းမိူင်းပေႃးလႆႈႁူႉ ။ လႆႈငိၼ်းၶၢဝ်ႇလွင်ႈႁႂ်ႈတႅမ်ႈပၢႆႉလိၵ်ႈတႆးၼႆႉ ၵူၼ်းဝၢၼ်ႈၵူၼ်းမိူင်းဢွၼ်ၵၼ်ၸူမ်းသေ ဝၢင်းၽႅၼ်တႃႇႁဵတ်းပၢႆႉဢၼ်ၼႆႉ ။ မၢင်တီႈတိုၵ်ႉတေႁဵတ်းၵူၺ်း ။ ၵူၺ်းၵႃႈ ၼႂ်းၶၢဝ်းတၢင်း 1-2 ဝၼ်းၵူၺ်း သမ်ႉပေႃးၸႂ်ႉၵိုတ်း ၸႂ်ႉယႃႉပႅတ်ႈယဝ်ႉ ၊ ပဵၼ်ၵွပ်ႈသင် ၸိူင်ႉႁိုဝ်ၸိူဝ်းၼႆႉ ႁဝ်းၶႃႈၶႂ်ႈႁူႉတႅၵ်ႇတႅၵ်ႇလႅင်းလႅင်း - ၶူးသွၼ်လိၵ်ႈတႆး ဝဵင်းတူၼ်ႈတီး လၢတ်ႈ ။


ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈသေ လႆႈတွင်ႈထၢမ်ၶိုၼ်း ႁွင်ႈၵၢၼ်လူင်ၾၢႆႇလိူမ်ႈလႆႇ ။ ၵူၺ်းၵႃႈ ၶတ်းၸႂ်တိတ်းတေႃႇၵပ်းသိုပ်ႇတၢင်းၾူၼ်ႊလၢႆလၢႆၵမ်းၵေႃႈ ဢမ်ႇႁပ်ႉသၢႆတုမ်ႉတွပ်ႇၶိုၼ်း ။


တေႃႈလဵဝ်ၼႆႉ ၼႂ်းမိူင်းတႆးႁဝ်းၶႃႈ ဢၼ်ဝၢင်းၽႅၼ် တႃႇတေႁဵတ်းပၢႆႉလိၵ်ႈတႆးၼႆႉ ဝဵင်းလူင်တူၼ်ႈတီး ။ ၸိူဝ်းတိုၵ်ႉႁဵတ်းယူႇ ပၢင်လူင် ၼမ်ႉၸၢင် ။ ဢၼ်ႁဵတ်းယဝ်ႉ တီႈၵုၼ်ႁဵင်ၵေႃႈ ၵွၵ်းၶိုၼ်း ။ တီႈၼႂ်းၸိုင်ႈတႆး ပွတ်းဢွၵ်ႇ တီႈတႃႈၶီႈလဵၵ်းႁဵတ်းယဝ်ႉယဝ်ႉ ၊ ၼၼ်ႉၵေႃႈဢမ်ႇပိုတ်ႇပၢႆႉ ၊ ဢဝ်ၽႅၼ်ႇၶဵဝ်ပူၵ်ႉဝႆႉ ။ တီႈဝဵင်းၵဵင်းတုင် ႁဵတ်းယဝ်ႉၵေႃႈထူပႅတ်ႈၶိုၼ်း ။ ၼႂ်းၸိုင်ႈတႆးပွတ်းႁွင်ႇလၢႆလၢႆဝဵင်းၵေႃႈ တေႃႈၼင်ႇၼၼ် ၊ မိူၼ်ၼင်ႇတီႈမိူင်းသူႈ ၵေးသီးၸိူဝ်းၼႆႉ တေပၵ်းသဝ်မၼ်းမိူဝ်ႈၼႆႉ ။ ၵူၺ်းၵႃႈ ယွၼ်ႉပိူဝ်ႈမီးၶေႃႈၸီႉသင်ႇလူင်းမႃးလႄႈ လႆႈၵိုတ်းဝႆႉ ။


ၸၢႆးသု ၵူၼ်းၼုမ်ႇၼႂ်းၵေႃလိၵ်ႈလၢႆးလႄႈ ၾိင်ႈငႄႈတႆး ဢၼ်ႁႃၵဵပ်းငိုၼ်းၵူၼ်းဝၢၼ်ႈၵူၼ်းသူၼ်သေ ႁဵတ်းပၢႆႉတီႈႁူဝ်ဝဵင်းႁၢင်ဝဵင်း တီႈဝဵင်းပၢင်လူင် လၢတ်ႈဝႃႈ - တေႃႈလဵဝ်ၼႆႉ ၶဝ်ဝႃႈႁႂ်ႈၵိုတ်းၼႆလႄႈ ႁဝ်းၶႃႈၵေႃႈၵိုတ်းဝႆႉၵူၺ်း ။ ၵွပ်ႈသင်လႄႈၸႂ်ႉၵိုတ်းၼၼ်ႉ ႁဝ်းၶႃႈၵေႃႈလႆႈတွင်ႈထၢမ်ဝႆႉတီႈ ၽူႈမီးၼႃႈတီႈ ပုၼ်ႈၽွၼ်းၶဝ် ၸၼ်ႉတၢင်းၼိူဝ်ယူႇ ။ လိၵ်ႈဢၼ်ဢွၵ်ႇမႃးပဵၼ်တၢင်းၵၢၼ်ၵေႃႈဢမ်ႇမီး ၊ ၵွပ်ႈၼၼ်လႄႈ ၵၢၼ်ဢၼ်ႁဵတ်းယူႇတၢင်းသဵင်ႈၵေႃႈ ၵိုတ်းဝႆႉၵမ်းၼိုင်ႈ မွၵ်ႈၼၼ်ႉၵူၺ်း - ဝႃႈၼႆ ။


ပိူဝ်ႈတႃႇတေႁဵတ်းပၢႆႉတီႈႁူဝ်ဝဵင်းႁၢင်ဝဵင်းပၢင်လူင်ၼႆႉ ၵူၼ်းၼုမ်ႇၼႂ်းၵေႃလိၵ်ႈလၢႆး လႆႈသႂ်ႇဢဵၼ်သႂ်ႇႁႅင်း ၵၼ်သေ ႁႃၵဵပ်းငိုၼ်းၼႂ်းဝၢၼ်ႈၼႂ်းသူၼ် ၸင်ႇလႆႈငိုၼ်းတွင်းမႃး ။ တေဢၢၼ်းႁဵတ်းပၢႆႉ 2 တီႈ၊ ႁူဝ်ဝဵင်းတင်းႁၢင်ဝဵင်း ။


ၵဵဝ်ႇၵပ်းလွင်ႈၼႆႉ ၸၢႆးသု သိုပ်ႇလၢတ်ႈထႅင်ႈဝႃႈ - ပေႃးထႅင်ႈ 3-4 ဝၼ်းမႃးတႄႉ ႁဝ်းၶႃႈႁူႉလွင်ႈတၢင်းမၼ်း ၵေႃႈလီ ၊ ဢမ်ႇႁူႉလွင်ႈတၢင်းမၼ်းၵေႃႈယဝ်ႉ ပၢႆႉဢၼ်ၼႆႉ ႁဝ်းၶႃႈတေၶိုၼ်းႁဵတ်းၶိုၼ်းယဝ်ႉ ၊ ႁဝ်းၶႃႈဢမ်ႇလႆႈ ၵႂႃႇယႃႉဢၼ်ၵဝ်ႇ၊ ဢၼ်ၵဝ်ႇၵေႃႈမီးယူႇ ၊ ႁဝ်းၶႃႈႁဵတ်းထႅင်ႈဢၼ်မႂ်ႇၵူၺ်း ။ ယူႇတီႈလူင်ပွင်ၸိုင်ႈ မိူင်းတႆးသေ မၼ်းဢမ်ႇမႅၼ်ႈပၵ်းပိူင်ဢၼ်လႂ်ၼႆ ႁဝ်းၶႃႈၶႂ်ႈႁူႉတႅၵ်ႇတႅၵ်ႇလႅင်းလႅင်း - ဝႃႈၼႆ ။


မိူၼ်ၼင်ႇဢၼ်ဢဝ်ၽႃသႃၵႂၢမ်းလၢတ်ႈ လိၵ်ႈလၢႆး ၵူၼ်းၼႂ်းပိုၼ်ႉတီႈသေ တႅမ်ႈဝႃႈဝဵင်းႁဝ်းၶႃႈႁပ်ႉတွၼ်ႈယူႇ၊ ဝဵင်းႁဝ်းၶႃႈသူင်ႇသင်ႇႁႂ်ႈၵႂႃႇငၢႆႈမႃးလူမ်ၸိူဝ်းၼႆႉ ဢၼ်မႃးသင်ႇႁၢမ်ႈႁႂ်ႈၵိုတ်းၼႆႉ မၼ်းဢမ်ႇမီးလွင်ႈသိုဝ်ႈသႂ်၊ ဢမ်ႇႁူႉတီႈပွင်ႇမၼ်း ။ လွင်ႈၼႆႉမၼ်းမႃးသၢၼ်ၶတ်းၵၼ်တင်း လွင်ႈၽႃသႃၵႂၢမ်းလၢတ်ႈလိၵ်ႈလၢႆးၼႂ်းပိုၼ်ႉတီႈ ထၢင်ႇႁၢင်ႈပူင်သွၼ်လွတ်ႈလႅဝ်း ၊ ထၢင်ႇႁၢင်ႈၸႂ်ႉတိုဝ်း၊ မၼ်းမႃးသၢၼ်ၶတ်းပၵ်းပိူင်ဢၼ်ၼႆႉ - မေႃသွၼ်ၼၢင်းၼူၼ်းမူဝ် လၢတ်ႈ ။


မၼ်းၼၢင်းလၢတ်ႈဝႃႈ - “ ၸိုင်ႈမိူင်းႁူမ်ႈတုမ်မၢၼ်ႈ ဢၼ်ယၢင်ႈၵႂႃႇၸွမ်းလွၵ်းပိူင် ၻီႊမူဝ်ႊၶရေႊၸီႊယူႇၼႆႉ ၊ ဢၼ်မီးပိူင်ဝႆႉဝႃႈ ၵူႈၸၢဝ်းၶိူဝ်းၼႆႉ မီးသုၼ်ႇပူၵ်းပွင်ၽႃသႃၵႂၢမ်းလၢတ်ႈၸဝ်ႈၵဝ်ႇ လႆႈလွတ်ႈလွတ်ႈလႅဝ်းလႅဝ်း ၼႆၼၼ်ႉ ၵႂႃႇမီးတီႈလႂ်ယဝ်ႉ ၊ ႁဝ်းၶႃႈဢမ်ႇပွင်ႇၸႂ်၊ ၼႆႉပဵၼ်မိူင်းတႆးၼႆ ၽႂ်ၵေႃႈႁူႉယူႇ ၊ တေလႆႈတႅမ်ႈလိၵ်ႈတႆး ။ ဢၼ်တႅမ်ႈလိၵ်ႈတႆးၼႆႉ မၼ်းဢမ်ႇမီးၽႂ်မႃးလူႉသုမ်းၸွမ်းသင် ။ ၵွပ်ႈၼၼ် ဢၼ်ၶဝ်ၸႂ်ႉမွတ်ႇၼႆႉ ယွၼ်ႉသင် ၊ ၵွပ်ႈသင် ဢၼ်ဝႃႈၼႆႉ ႁဝ်းၶႃႈတေလႆႈႁူႉတႅၵ်ႇတႅၵ်ႇလႅင်းလႅင်း ။ ဢိင်ၼိူဝ်လွင်ႈတၢင်းၸိူဝ်းၼႆႉသေ ၼႂ်း CBO တႆး ထုၵ်ႇလီႁူပ်ႉၵၼ် ထၢမ်ၵၢင်ၸႂ်ၵၼ်လီလီ၊ ႁူမ်ႈၵၼ်ႁႃလွၵ်းလၢႆးၵႄႈလိတ်ႈပၼ်ႁႃဢၼ်ၼႆႉ ႁႂ်ႈလႆႈ ”- ဝႃႈၼႆ ။


ၼႂ်းၸိုင်ႈတႆးပွတ်းဢွၵ်ႇ တီႈဝဵင်းတႃႈၶီႈလဵၵ်းၼႆႉ ပၢႆႉလိၵ်ႈတႆးဢၼ်ႁဵတ်းယဝ်ႉၵႂႃႇၼၼ်ႉ  ဢဝ်ၽႅၼ်ႇၶဵဝ်လူင် ပူၵ်ႉမတ်ႉဝႆႉသေ ဢမ်ႇႁၼ်လိၵ်ႈတႆးလႆႈယဝ်ႉ ။ ဢၼ်ႁဵတ်းပၢႆႉလိၵ်ႈတႆး တၢင်းၶဝ်ႈဝဵင်းဢွၵ်ႇဝဵင်း ႁူဝ်ဝဵင်းႁၢင်ဝဵင်းၼႆႉ ပဵၼ်ၽႅၼ်ၵၢၼ်ပႃႊတီႊၼူၵ်ႉယုင်း (NLD) လူင်ပွင်ၸိုင်ႈမိူင်းတႆး ႁွင်ႈၵၢၼ်လူင် ၾၢႆႇလိူမ်ႈလႆႇ ၸၢႆးသူမ်ၶျၢႆး ၶႂ်ႈပဵၼ်သေ သႂ်ႇၼႂ်းၽႅၼ်ၵၢၼ် 100 ဝၼ်း ဢၼ်လူင်ပွင်ၸိုင်ႈႁဵတ်းသၢင်ႈၵႂႃႇယူႇ ယၢမ်းလဵဝ် ။


ဢၼ်တႅမ်ႈပၢႆႉမႃးၸိူဝ်းၼႆႉ လိၵ်ႈမၢၼ်ႈလိၵ်ႈတႆးတႅမ်ႈၵိုၵ်းၵၼ် ။ ၵွပ်ႈၼၼ် ၵူႈဝၢၼ်ႈၵူႈဝဵင်း လႆႈတႄႇႁဵတ်းမႃး၊ ပႃးၸဵမ်ဝဵင်းတႃႈၶီႈလဵၵ်းၵေႃႈ ႁဝ်းၶႃႈၵေႃႈဢွၼ်သႂ်ႇလိၵ်ႈတႆးမႃးယူႇ။ ၼင်ႇႁိုဝ်တေဢမ်ႇၽိတ်းၼၼ်ႉၵေႃႈ ၵႂႃႇပိုင်ႈဢိင်တွင်ႈထၢမ်ၵေႃလိၵ်ႈလၢႆးသေ ႁဵတ်းတႄႉႁဵတ်းဝႃႈ - သိုဝ်ႇၶၢဝ်ႇ (Tachilek news Agency) တႅမ်ႈဢွၵ်ႇဝႆႉၵႂၢမ်းလၢတ်ႈ ၵေႃႉပဵၼ်ၵႅမ်ၽူႈၸတ်းၵၢၼ် ႁွင်ႈၵၢၼ်ၾၢႆႇလိူမ်ႈလႆႇ ဝဵင်းတႃႈၶီႈလဵၵ်း ဢူးၵျေႃႇၸူဝ်းမူဝ်း မိူဝ်ႈဝၼ်းတီႈ 18/06/2016 ၼင်ႇၼႆ ။


ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇဝဵင်းၼမ်ႉၶမ်း ။ ၼႂ်းၸိုင်ႈတႆးပွတ်းၸၢၼ်း ဝဵင်းလၢင်းၶိူဝ်း ၊ ၵဵင်းတွင်း ၊ လွႆလႅမ် ၸိူဝ်းၼႆႉတႅမ်ႈပၢႆႉလိၵ်ႈတႆးယဝ်ႉတူဝ်ႈ ၸဵမ်လႂ်ယဝ်ႉ ။ ဢၼ်ဝၢင်းၽႅၼ် တေႁဵတ်းၼႂ်း 1-2 ဝၼ်းၼႆႉ ပဵၼ်ဝဵင်းလူင်တူၼ်ႈတီး ၊ မိူင်းသူႈ ၊ ၵေးသီး၊ မိူင်းၼွင် ၸိူဝ်းၼႆႉ ။


မီးၶၢဝ်ႇဢၼ်ဢမ်ႇယိုၼ်ယၼ်လႆႈ လၢတ်ႈဝႃႈ - ပၢႆႉၶဝ်ႈဝဵင်းလွႆလႅမ် ဢၼ်ႁဵတ်းယဝ်ႉၵႂႃႇၼၼ်ႉ ထုၵ်ႇၸီႉၸင်ႇမိူဝ်ႈဝႃး ႁႂ်ႈထူမွတ်ႇပႅတ်ႈၼႆသေ ၼႂ်ၼႆႉၸဵမ်ၸဝ်ႉ မွတ်ႇထူပႅတ်ႈယဝ်ႉ- ၼႆယဝ်ႉ ။