ၶူဝ်းၶွင်လီ မီးမင်ႇၵလႃႇၵိုၵ်းပိုၼ်း မဵတ်ႉလဵၼ်ႁုၼ်ႇႁၢင်ႈ ၸဝ်ႈၼရေးသူၼ် တင်း ၸဝ်ႈၶမ်းၵၢႆႇၼွႆႉ ပၢၼ်ၸဝ်ႈယွတ်ႈသိုၵ်းႁဵတ်း ၸုပ်ႈ 1 ဢၼ်ၾၢႆႇလင် မီးႁုၼ်ႇႁၢင်ႈပုတ်ႉထၸဝ်ႈယွတ်ႈတုင်းၼၼ်ႉ ၸတ်းပၢင်ပွႆး သႂၢင်းၸႂ် ယဝ်ႉတူဝ်ႈၵႂႃႇ တီႈဝတ်ႉၵူႇတဝ်ႈ ဝဵင်းၵဵင်းမႆႇ။ ပီႈၼွင်ႉၽူႈသတ်ႉထႃႇၶဝ် ပူႇၸေႃႇဢဝ်လႆႈယဝ်ႉ ပိူဝ်ႈတႃႇငိုၼ်းၵွင်ၵၢင် ၸွႆႈထႅမ်ၸိူဝ်ႉၶိူဝ်း ဝၢၼ်ႈမိူင်း ။

ၵဵဝ်ႇၵပ်းလွင်ႈၼႆႉ ဝၼ်းတီႈ 19/06/2016 ၵၢင်ၶမ်ႈ တင်ႈတႄႇယၢမ်း 19:19 မူင်းၵႂႃႇ (ၶမ်ႈၶိုၼ်း လိူၼ်ၸဵတ်းမူၼ်း မိူင်းထႆး) မီးၵၢၼ်ၸတ်းပၢင်ၵႅဝ်ႈ ပၢင်ပွႆးသႂၢင်းၸႂ်ႁုၼ်ႇႁၢင်ႈပုတ်ႉထ / ၽြႃးပဵၼ်ၸဝ်ႈရၶႅင်ႇ လႄႈ ၸဝ်ႈသီဝလီး ဢိၵ်ႇ ပၢင်ပွႆးသႂၢင်းၸႂ် ႁုၼ်ႇႁၢင်ႈမဵတ်ႉ / လဵၼ် ၸဝ်ႈၼရေးသူၼ် မႁႃရႃၸႃ တင်း ၸဝ်ႈၶမ်းၵၢႆႇၼွႆႉ တီႈဝတ်ႉၵူႇတဝ်ႈ ဢိူင်ႇသီၽုမ်း မိူင်းၵဵင်းမႆႇ မိူင်းထႆး ။ ပၢင်ပွႆးၼႆႉ ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး (RCSS) ပဵၼ်ၵဝ်ႉပဵၼ်ၵၼ်း ႁပ်ႉႁဵတ်းၸဝ်ႈတႃႇၼလူင် ဢွၼ်ႁူဝ်ၼမ်းၼႃႈၸတ်းႁဵတ်း ။ မီးပီႈၼွင်ႉတႆးလၢႆမူႇလၢႆၸုမ်း လၢႆၵေႃႉၶဝ်ႈႁူမ်ႈမွၵ်ႈ 100 ပၢႆ ။ ပၢင်ပွႆးယဝ်ႉတူဝ်ႈၵႂႃႇယၢမ်းတဵင်ႈၶိုၼ်းပၢႆ ။


ၼႂ်းပၢင်ၵႅဝ်ႈၼႆႉ လႆႈၼိမၼ်တၼ သင်ၶၸဝ်ႈၼႂ်းၸႄႈတွၼ်ႈၵဵင်းမႆႇ ၊ တူၼ်ဢၼ်ၸိုဝ်ႈလိုဝ်းလင် ဢႃႇယုယၢဝ်း ၊ ဝႃႇသႃယႂ်ႇမႃး ဝၢၼ်းပရိတ်ႈ မဵတ်ႈတႃႇပၼ်လၢႆၸဝ်ႈလၢႆတူၼ် ၊ ပႃးၸဵမ်ၸဝ်ႈၶူးဝႃး ၸၼ်ႉတရင်းသီ ၸဝ်ႈၵွၼ်းဝတ်ႉၵူႇတဝ်ႈလႄႈ သင်ၶလုၵ်ႈဝတ်ႉလၢႆၸဝ်ႈလၢႆတူၼ် ။


လဵၼ် / မဵတ်ႉႁုၼ်ႇႁၢင်ႈ ၸဝ်ႈၼရေးသူၼ် မႁႃရႃၸႃ တင်း ၸဝ်ႈၶမ်းၵၢႆႇၼွႆႉ ဢၼ်ၸတ်းႁဵတ်းပၢင်ပွႆး သႂၢင်းၸႂ် တီႈဝတ်ႉၵူႇတဝ်ႈပွၵ်ႈၵမ်းၼႆႉ ပဵၼ်ပၢၼ်ၸဝ်ႈၸဝ်ႈသိုၵ်းႁဵတ်း သႅၼ်း 1 ။ လဵၼ်သႅၼ်းၼႆႉ ၼႃႈသွင်ၾၢႆႇၼၼ်ႉ ၾၢႆႇၼိုင်ႈ မီးၸဝ်ႈၽရႃႉၼရေးသူၼ် တင်း ၸဝ်ႈၶမ်းၵၢႆႇၼွႆႉၸုၵ်းၸွမ်းၵၼ်ဝႆႉ ။ မီးလိၵ်ႈတႆးတႅမ်ႈဝႆႉဝႃႈ ၸဝ်ႈၾႃႉၼရေးသူၼ် တင်း ၸဝ်ႈၶမ်းၵၢႆႇၼွႆႉ ၊ ပၢၼ်ၸဝ်ႈယွတ်ႈသိုၵ်းႁဵတ်း 1 ။ မီးလိၵ်ႈထႆးဝႆႉဝႃႈ (สมเด็จพระนเรศวร เจ้าคำก่ายน้อย)  ။ ထႅင်ႈၾၢႆႇၼိုင်ႈ ပဵၼ်ႁုၼ်ႇႁၢင်ႈပုတ်ႉထၸဝ်ႈ / ၽြႃးပဵၼ်ၸဝ်ႈယွတ်ႈတုင်း ။ လေႃႇမႃးတီႈမိူင်းၵွၵ်ႇ (ၵုင်းထဵပ်ႈ) ၊ တင်းၼမ်ၼိုင်ႈသႅၼ်မဵတ်ႉ / လဵၼ် (100,000) ။ ၵႃႈၶၼ်ပူႇၸေႃႇၼိုင်ႈလဵၼ် 219 ဝၢတ်ႇ ။


ၼၢင်းမူၺ်ၽူး မုၵ်ႉၸုမ်းၸၢဝ်းၶိူဝ်းတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ - ဝတ်ႉထုငိုၼ်းတွင်း ၵႃႈပူႇၸေႃႇလဵၼ် ဢၼ်လႆႈမႃးၸိူဝ်းၼႆႉ 1. တွၼ်ႈတႃႇသၢင်ႈႁူင်းႁေႃၵူၼ်းပဵၼ် ၸိူဝ်းမႃးယူတ်းယႃတူဝ် ၼႂ်းၵဵင်းမႆႇ ။ မိူဝ်ႈလဵဝ် ႁူင်းႁေႃၼႆႉသၢင်ႈဝႆႉပဵၼ်တၢင်းၵၢၼ် တီႈႁိမ်းႁူင်းယႃပႃႇငႄႉ (ႁူင်းယႃၼၶွၼ်းၽိင်း) ၼႂ်းဝဵင်းၵဵင်းမႆႇ ၊ ဢၢၼ်းသၢင်ႈတိူၵ်ႈလူင် 4 ၸၼ်ႉ ၊ မိူဝ်ႈလဵဝ်ယဝ်ႉတူဝ်ႈၵႂႃႇသွင်ၸၼ်ႉ ။ ႁႂ်ႈၼႂ်းမူႇၸုမ်း ၸိူဝ်းမႃးယူတ်းယႃတူဝ် ပႃးၸဵမ်ၵူၼ်းဝၢၼ်ႈၵူၼ်းမိူင်း ႁႂ်ႈလႆႈမႃးပိုင်ႈဢိင်ယူႇၵိၼ်ၼွၼ်းၾရီႊ ။ 2. ပူၵ်းပွင်ႁူင်းပွႆႇသဵင် လွႆတႆးလႅင်း ၊ ၵွပ်ႈဝႃႈၵၢၼ်သိုဝ်ႇ ပဵၼ်ၵၢၼ်လမ်ႇလွင်ႈ တႃႇၸိူဝ်ႉၶိူဝ်းဝၢၼ်ႈမိူင်းႁဝ်း ။ 3. ပိူဝ်ႈတႃႇ ၸွႆႈထႅမ်ၵူၼ်းထူပ်းၽေး ၼႂ်းမိူင်းတႆးၸိူဝ်းၼႆႉ - ဝႃႈၼႆ ။


ၸၢႆးလိူၼ် ၽူႈတူင်ႉၼိုင်ၵၢၼ်တူင်ႇဝူင်းၵူၼ်း ၵေႃႈလၢတ်ႈဝႃႈ - ပၢင်ပွႆးၼႆႉ ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး ႁပ်ႉပဵၼ်ၸဝ်ႈတႃႇၼလူင် ဢွၼ်ႁူဝ်ၸတ်းႁဵတ်း ။ ၵူၺ်းၵႃႈ တူဝ်ႁူဝ်ပဝ်ႈလူင်ၸဝ်ႈယွတ်ႈသိုၵ်း ဢမ်ႇပဵၼ်မႃး ၊ ၵွပ်ႈမီးၼႃႈၵၢၼ်ၶိုၵ်ႉၶမ်ႇတၢင်ႇလွင်ႈ ။ မိူဝ်ႈလဵဝ် လဵၼ်ၸဝ်ႈၾႃႉၼရေးသူၼ် တင်း ၸဝ်ႈၶမ်းၵၢႆႇၼွႆႉၼႆႉ တိုၵ်ႉႁဵတ်းယဝ်ႉမႃးတႃႇမိုၼ်ႇၼိုင်ႈ (10,000) ၵူၺ်း ၊ ပေႃးမႃးထႅင်ႈၵေႃႈ တေၸတ်းႁဵတ်းပၢင်ပွႆး သႂၢင်းၸႂ်ၵႂႃႇထႅင်ႈ ။ တွၼ်ႈတႃႇတိူၵ်ႈႁူင်းႁေႃလူင်ၼၼ်ႉ ပေႃးမီးၵူၼ်းၼႂ်းမူႇၸုမ်း ၵူၼ်းဝၢၼ်ႈၵူၼ်းမိူင်း လူင်းမႃးယႃတူဝ်ၼႂ်းၵဵင်းမႆႇ တႃႇပီႈၼွင်ႉၵူၼ်းပဵၼ်ၼၼ်ႉ ၵွပ်ႈတီႈၼႂ်းႁူင်းယႃဢမ်ႇမီးတီႈလိုဝ်ႈၼွၼ်းလႄႈ ႁႂ်ႈမႃးယူႇၵိၼ်လိုဝ်ႈၼွၼ်းလႆႈ တီႈႁူင်းႁေႃၼႆႉ ။ တွၼ်ႈတႃႇႁူင်းပွႆႇသဵင်ၼၼ်ႉ ႁႂ်ႈပေႃးပူၵ်းပွင်ပဵၼ်မႃးလႆႈ ႁူင်းပွႆႇႁၢင်ႈသဵင် TV Online (ထီႊဝီႊဢွၼ်ႊလၢႆႊ) ၊ ၵွပ်ႈဝႃႈတီႈလွႆတႆးလႅင်း တိုၵ်ႉမီးႁူင်းပွႆႇသဵင် လၢႆလၢႆၵူၺ်း - ဝႃႈၼႆ ။


ၼွၵ်ႈသေၼၼ်ႉ ပၢင်ႈၵႅဝ်ႈသႂၢင်းၸႂ် လဵၼ်ၸဝ်ႈၼရေးသူၼ် တင်း ၸဝ်ႈၶမ်းၵၢႆႇၼွႆႉၼႆႉ မီးႁူမ်ႈၵိုၵ်းၵၼ်တင်း ပၢင်ၵႅဝ်ႈသႂၢင်းၸႂ်ႁုၼ်ႇႁၢင်ႈပုတ်ႉထ / ၽြႃးပဵၼ်ၸဝ်ႈရၶႅင်ႇ တင်းၸဝ်ႈသီဝလီ ဢၼ်ၸဝ်ႈၵွၼ်းဝတ်ႉၵူႇတဝ်ႈ ဢွၼ်ႁူဝ်ၼမ်းၼႃႈၶိုင်ပွင် ႁဵတ်းသၢင်ႈမႃး ။


ပီႈၼွင်ႉ ၸဝ်ႈၽူႈၵူၼ်းလီ ၸိူဝ်းသူၼ်ၸႂ်ၶႂ်ႈပူႇၸေႃႇၵိူဝ်းလီ ၊ မီးဝႆႉၵိုၵ်းတူဝ်ၵိုၵ်းၶိင်း ၵိုၵ်းႁိူၼ်းၵိုၵ်းယေး ပိူဝ်ႈတႃႇပဵၼ်မင်ႇၵလႃႇတႃႇတူဝ်ၵဝ်ႇ ႁိူၼ်းယေးႁႂ်ႈပေႃးလွတ်ႈၽေးၼၼ်ႉ ႁုၼ်ႇႁၢင်ႈပုတ်ႉထၸဝ်ႈရၶႅင်ႇ တိတ်းတေႃႇလႆႈတၢင်းသင်ၶၸဝ်ႈ ဝတ်ႉၵူႇတဝ်ႈ။ တွၼ်ႈတႃႇလဵၼ် ၸဝ်ႈၼရေးသူၼ်လႄႈ ၸဝ်ႈၶမ်းၵၢႆႇၼွႆႉၼၼ်ႉ တိတ်းတေႃႇၵပ်းသိုပ်ႇ ပူႇၸေႃႇလႆႈတီႈ ၼၢင်းမူၺ်ၽူး ၊ မၢႆၾူၼ်ႊ 083 691 7881 ။