ၸၢႆးမၢဝ်ႇတႆးလႄႈၼၢင်းသၢဝ်တႆး ၾၢႆႇလဵၼ်ႈႁႅင်း တူဝ်ၶိင်းႁၢင်ႈလီ ၵၢမ်ႈဝိုၼ်းၶဝ်ႈၶႄႉၶႅင်ႇပၢင်ပွႆး Olympic Day Movement ၸၼ်ႉမိူင်းႁူမ်ႈတုမ် တီႈတႃႈၵုင်ႈၼၼ်ႉၶဝ်ၸၼ်ႉထိ2-ထိ3 ။


ဝၼ်းတီႈ 18/06/2016 တီႈဝဵင်းတႃႈၵုင်ႈၸတ်းႁဵတ်းပၢင်ၶႄႉၶႅင်ႇၸၢႆးမႃႇၶႅင်ႁႅင်းၵိုမ်းလႄႈၼၢင်း ႁၢင်ႈလီလဝ်းဝိုၼ်း Olympic Day Movement ၸၼ်ႉမိူင်းႁူမ်ႈတုမ် ။ ၼႂ်းပၢင်ၶႄႉၶႅင်ႇၼႆႉမၢဝ်ႇတႆးမႃႇၶႅင်ႁႅင်းၵိုမ်း ၸၢႆးႁၢၼ်မိူင်း (ႁွင်ႉ) ၸၢႆးၶျိတ်ႉငူၺ်ႇၶဝ်ႈၶႅင်ႇလႆႈထိ 3၊ သၢဝ်တႆးႁၢင်ႈလီလဝ်းဝိုၼ်းၼၢင်းလၢဝ်ၶမ်း ၶဝ်ႈၶႅင်ႇလႆႈထိ 2 ။

ၸၢႆးၶျိတ်ႉငူၺ်ႇ လၢတ်ႈဝႃႈ - “ဢၼ်ၶႂ်ႈၾၢၵ်ႇတွၼ်ႈထိုင်ပေႃႈမႄႈပီႈၼွင်ႉၵူၼ်းမိူင်းတႆးႁဝ်းၶႃႈ တင်းသဵင်ႈတႄႉႁဝ်းၶႃႈလူဝ်ႇဢွၼ်ၵၼ်ဢွၵ်ႇဢဵၼ်ႁႅင်း ၊ ၵိၼ်တၢင်းၵိၼ်ဢၼ်မီးၽွၼ်းလီ ၊ ၼွၼ်းႁႂ်ႈမႅၼ်ႈၶိင်ႇ ၊ ၼင်ႇႁိုဝ်ပၢႆးယူႇလီႁဝ်းပေႃးတေတဵမ်ထူၼ်ႈ ၊ ပေႃးပၢႆးယူႇလီႁဝ်းတဵမ်ထူၼ်ႈၵေႃႈ ႁဝ်းၸင်ႇၸၢင်ႈတူၺ်းလွမ်ပိူၼ်ႈလႆႈ လိူဝ်ၼၼ်ႉတေႁဵတ်းႁႂ်ႈႁဝ်းၵႆယၢၼ်ယႃႈမဝ်းၵမ်လူးၵွၼ်ႇ ” ဝႃႈၼႆ ။


ပၢင်ၶႄႉၶႅင်ႇၼႆႉၽူႈၸၢႆးမီးသၢမ်သႅၼ်း။သႅၼ်းၼမ်ႉၼၵ်းတူဝ် 50 KL ၶိုၼ်ႈၼိူဝ်မီး 12 ၵေႃႉ၊ သႅၼ်း50 KL လူင်းတႂ်ႈမီး 20 ၵေႃႉ ၊ ထႅင်ႈသႅၼ်းၼိုင်ႈသမ်ႉမီး 14 ၵေႃႉ ပဵၼ်ၵူၼ်းမီးတူဝ်ထူပ်း ၶဝ်ႈပၢင်ၶႄႉၶႅင်ႇၵူႈမိူင်းမိူင်း ။
ၽူႈယိင်းသမ်ႉမီး 2သႅၼ်း တၢင်းသုင် 160 လူင်းတႂ်ႈလႄႈ160 ၶိုၼ်ႈၼိူဝ် ။


ၸၢႆးႁၢၼ်မိူင်း တင်း ၼၢင်းလၢဝ်ၶမ်း ၼႆႉဢိင်ၼိူဝ်ၼမ်ႉၵတ်ႉ ၼႂ်းတူဝ်ၶိင်းလႄႈတၢင်းၶတ်းၸႂ်သေ လႆႈၵႂႃႇၶႅင်ႇၼွၵ်ႈမိူင်းၼႂ်းမိူင်းလၢႆၵမ်းသေပိတ်ႉဢဝ်လူင်ႇမွၵ်ႇမႃးယဝ်ႉလၢႆလၢႆပၢင်။