သင်ၶၸဝ်ႈလႄႈ ပေႃႈမႄႈၵူၼ်းမိူင်း ၊ ၽူႈယႂ်ႇၵူၼ်းလူင် ၸႄႈဝဵင်းမိူင်းပွၼ် ႁူမ်ႈၵၼ်ၸတ်းႁဵတ်း ပၢင်ပွႆးပိုတ်ႇႁူင်းႁဵၼ်းထမ်မ တီႈဝတ်ႉဝိႁၢၼ်ဢႃႇၸႃႇၼီႇ လုၵ်ႈႁဵၼ်းတင်းမူတ်း ၶဝ်ႈႁူမ်ႈ  300 ပၢႆ ၼႆယဝ်ႉ ။


ဝၼ်းတီႈ 19/06/2016 ယၢမ်း 08:00-11:00 မူင်း တီႈဝတ်ႉဝိႁၢၼ်ဢႃႇၸႃႇၼီႇ ၸႄႈဝဵင်းမိူင်းပွၼ် ၸိုင်ႈတႆး ပွတ်းၸၢၼ်း သင်ၶၸဝ်ႈ ၸဝ်ႈတူၼ်ၶူး ၺႃႇၼသႃႇမိလင်ႇၵႃႇလ ၊ ၸဝ်ႈတူၼ်ၶူး ဝိၸိၵ်ႉတ လႄႈ တၵ်ႉၵႃႇသတ်းထ ၽူႈယႂ်ႇၵူၼ်းလူင် ဢိၵ်ႇပႃး ၶူးသွၼ် ႁူမ်ႈၵၼ်ၸတ်းႁဵတ်း ပၢင်ပွႆးပိုတ်ႇ ႁူင်းႁဵၼ်းထမ်မ ၼႆယဝ်ႉ ။

ၸဝ်ႈတူၼ်ၶူး ဝိၸိၵ်ႉတ ပၼ်ၶေႃႈဢေႃးဝႃႇတ ဝႃႈ “ ယိူင်းဢၢၼ်း ဢၼ်လႆႈပိုတ်ႇႁူင်းႁဵၼ်းထမ်မၼႆႉ 1. ႁႂ်ႈမီးၼမ်ႉၸႂ်လီ ၊ 2. ႁႂ်ႈမေႃယူႇၸွမ်းမၢႆမီႈပၵ်းပိူင် ၊ 3 . ႁႂ်ႈမေႃၶတ်းၸႂ် လဵပ်ႈႁဵၼ်းႁႃတၢင်းႁူႉ ပၺ်ၺႃ ” ဝႃႈၼႆ ။


ႁူင်းႁဵၼ်းထမ်မၼႆႉ လႆႈပိုတ်ႇသွၼ်ပၼ် လုၵ်ႈဢွၼ်ႇၼႂ်းၸႄႈဝဵင်းမိူင်းပွၼ် လႆႈပိုတ်ႇပူင်သွၼ် ပၼ် ၼႂ်းဝၼ်းသဝ် ဝၼ်းဢႃးတိတ်ႉ ၶၢဝ်းဢိုတ်ႇႁဵၼ်း လူင်ပွင်ၸိုင်ႈမၢၼ်ႈ ။ ၼင်ႇႁိုဝ် လုၵ်ႈဢွၼ်ႇ ႁႂ်ႈလႆႈႁူႉလွင်ႈၾိင်ႈႁိတ်ႈႁွႆးၸိူဝ်ႉၶိူဝ်းၸဝ်ႈၵဝ်ႇ ၊ ႁႂ်ႈမေႃၶဝ်ႈဝတ်ႉၶဝ်ႈဝႃး ၊ ႁႂ်ႈမေႃၶဝ်ႈဢွၵ်ႇမိုတ်ႈၵိုတ်းၵၼ်  ၼမ်လိူဝ်မႃးထႅင်ႈ ၸဵမ်ၸိူဝ်းၼႆႉ ။ ႁူင်းႁဵၼ်းထမ်မၼႆႉ ၶူးပူင်သွၼ်သမ်ႉ မီး 7 ၵေႃႉ ၼႆယဝ်ႉ ။


ၵဵဝ်ႇၵပ်းလူၺ်း လွင်ႈႁူင်းႁဵၼ်းထမ်မၼႆႉ ၼႂ်းမိူင်းတႆး ပွတ်းႁွင်ႇ ၊ ပွတ်းၸၢၼ်း ပိုတ်ႇပူင်သွၼ် လုၵ်ႈဢွၼ်ႇ မႃးလၢႆလၢႆဝဵင်းဝႆႉယူႇ ဝႃႈၼႆ ။