ၼႂ်းၶၢဝ်းတၢင်း ႁူဝ်သိပ်းပီမိူင်းမႃးၼႆႉ မိူင်းႁူမ်ႈတုမ်မၢၼ်ႈ ၸင်ႇႁႃမီးပၢင်လိူၵ်ႈတင်ႈၶိုၼ်းၼႂ်းပီ 2010 ပူၼ်ႉမႃးၼႆႉၵူၺ်း ။ တင်ႈဢဝ်ၼၼ်ႉမႃးၼႂ်းၶၢဝ်းတၢင်း 5 ပီ ၵူၼ်းမိူင်း ႁဵၼ်းႁူႉၵၢၼ်မိူင်း လႄႈဢၼ်သူၼ်ၸႂ် ၶႂ်ႈႁဵၼ်းႁူႉၵၢၼ်မိူင်း မီးမႃးၼမ် / ဢေႇ ၵႃႈႁိုဝ် ။ ၼင်ႇႁိုဝ်ၵူၼ်းမိူင်း တေ သူၼ်ၸႂ်ၵၢၼ်မိူင်းမႃးၼႆႉ ထုၵ်ႇလႆႈႁဵတ်းႁိုဝ် ။  ၸၢႆးဢွင်ႇမိၼ်ႉဢူး ၼေႃႇၽူႈတႅၼ်းသၽႃး ၵူၼ်းမိူင်း ပႃႊတီႊႁူဝ်သိူဝ်  SNLD တေၶဝ်ႈၶႄႉၶႅင်ႇတီႈဝဵင်းမႂ်ႇ ၸႄႈမိူင်းၶၢင်လၢတ်ႈ ဝႃႈ -  ပေႃးပၢႆးပၺ်ၺႃ တဵမ်ထူၼ်ႈ ၵၢၼ်မိူင်းၸင်ႇပဵၼ်ၵၢၼ် - ဝႃႈၼႆ။  ၼႂ်းပၢင်လိူၵ်ႈတင်ႈပီ 2015 ၼႆႉမၼ်းၸၢႆး တတ်းသိၼ်ၸႂ်ၶဝ်ႈၶႄႉၶႅင်ႇ ၼေႃၽူႈတႅၼ်းၵူၼ်းမိူင်း တီႈၸႄႈမိူင်းၶၢင်ၼႆႉ ၼႂ်းၵၢင်ၸႂ်မၼ်းၸၢႆးမီးၸိူင်ႉႁိုဝ် ၊ ပေႃးပေႉပၢင်လိူၵ်ႈတင်ႈ တေႁဵတ်းသင်ပၼ်ၵူၼ်းမိူင်း ၼႆၼၼ်ႉ - ယိင်းၸၢမ်ႁွမ် ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆဢေႃႈ ။

ထၢမ် ။        ။  တေၶဝ်ႈၶႄႉၶႅင်ႇ တီႈလႂ်ၶႃႈ ။


တွပ်ႇ ။ ။ ၽူႈၶဝ်ႈလိူၵ်ႈၽူႈတႅၼ်းၵူၼ်းမိူင်းတီႈဝဵင်းမႂ်ႇၶႃႈမီးယူႇ 48 ဝၢၼ်ႈ ၊ တီႈတွတ်ႈၶႅပ်း48 တီႈၶႃႈ ။


ထၢမ် ။ ။  လၢတ်ႈၼႄပၼ်ပိုၼ်းတူဝ် ၸၢႆးဢွင်ႇမႅတ်ႉဢူး   ဢိတ်းၼိုင်ႈၶႃႈ ။


တွပ်ႇ ။ ။ ၶႃႈပဵၼ်လုၵ်ႈၸၢႆးလုင်းလႃႉမွင်ႇ လႄႈ ပႃႈလႃႉၵျီႇ ၵိူတ်ႇဝၼ်းတီႈ 18 /06/1981  တီႈဝဵင်းၼမ်ႉၶမ်း ။ ၶိုၼ်ႈႁဵၼ်းၸၼ်ႉငဝ်ႈတီႈ ဝဵင်းၼမ်ႉၶမ်း ။ ၸၼ်ႉၵၢင်တီႈဝဵင်းတူၼ်ႈတီး ။ ၸၼ်ႉသုင်တီႈတႃႈၵုင်ႈ ။ ၸၼ်ႉၸွမ် ၾၢႆႇၵူတ်းမၢႆ (မၢႆမီႈ - Law) တီႈတႃႈၵုင်ႈ (gratuated : B.Sc. Botany,B.A Law,LLB, Diploma  in Applied Psychology, Diploma in  Business Law, Dip.IR International Relations,Dip.Law at University of Yangon. လွင်ႈၼႃႈၵၢၼ် ပဵၼ်တီႈၵိူဝ်းၵုမ် (တိူင်ႇပၢင်ႇ) ၾၢႆႇၵူတ်းမၢႆ (မၢႆမီး) လႄႈပဵၼ်ၽူႈၸတ်းၵၢၼ် လုမ်း ထႆး - ၵျိုဝ်ႊမၼီႊ Community Management (Thai-German Institute) .


လွင်ႈတူင်ႉၼိုင်ၼႂ်းတူင်ႇဝူင်းၵူၼ်း - ဝၢႆးသေယဝ်ႉၸၼ်ႉသိပ်း ပဵၼ်ၶူးသွၼ် ။ ထိုင်မႃး 2008 လႆႈၵႂႃႇ ၸွႆႈတၢင်းတိူင်း ဢီႊရႃႊဝၻီႊ ၽွင်းလူမ်းလႅင်ႉလူင် ၼႃႊၵိတ်ႉသ်ၶဝ်ႈ ၊ 2009 ၵႂႃႇမိူင်းဝႃႉ  ၸွႆႈထႅမ် ပူၵ်းပွင်ဝၢၼ်ႈဢိူင်ႇ ၸိူဝ်းဢၼ်ၽုၵ်ႇယႃႈ ႁႂ်ႈပိၼ်ႇမႃးပဵၼ် ၽုၵ်ႇတၢင်ႇၸိူဝ်းတႅၼ်းတၢင် ၊ ပဵၼ်ႁူဝ်ၼႃႈၵူၼ်းၼုမ်ႇ တီႈဝဵင်းတႃႈၵုင်ႈ ၊ တူင်ႉၼိုင်ၸွမ်းၸုမ်းတႆး လၢႆလၢႆၸုမ်း ၸဵမ်ၸိူဝ်းၼႆႉ ။


ထၢမ် ။ ။  ႁဵတ်းသင်လႄႈလိူၵ်ႈ ၶဝ်ႈမႃး ၼႂ်းပႃႇတီႇႁူဝ်သိူဝ် ။ ယုမ်ႇယမ်ၸိူင်ႉႁိုဝ်ၶႃႈ ။


တွပ်ႇ ။ ။ ယွၼ်ႉပိူဝ်ႈ ပႃႊတီႊႁူဝ်သိူဝ် တိုဝ်းၵမ်မူႇပိူင်လိၵ်ႈႁူမ်ႈမၢႆပၢင်လူင် လႄႈပေႃးပေႉပၢင် လိူၵ်ႈတင်ႈၸိုင် တေလႅၵ်ႈလၢႆႈပိူင်ငဝ်ႈပိုင်းမိူင်း (လၵ်းမိူင်း) ။ ဢမ်ႇၼၼ်တေတႅမ်ႈၶိုၼ်းဢၼ်မႂ်ႇလႄႈသင် ၊ လႆႈႁၼ်ပႃႊတီႊႁူဝ်သိူဝ်ၸုၵ်းၾၢႆႇပေႃႈမႄႈၵူၼ်းမိူင်းယူႇတႄႉလႄႈသင်၊ ပိူင်လူင်ဢၼ်လႆႈႁၼ် သိုဝ်ႈၼႃႈ တၼ်းတႃတႄႉ ပႃႊတီႊႁူဝ်သိူဝ်ၼႆႉ ၵိူတ်ႇမႃးမိူဝ်ႈပီ 1988 ႁဵတ်းၵၢၼ်တႃႇၵူၼ်းမိူင်းမႃးတႃႇသေ ၼႆလႄႈၸင်ႇ လိူၵ်ႈၶဝ်ႈမႃးၼႂ်းပႃႊတီႊႁူဝ်သိူဝ်ၶႃႈ ။


ထၢမ် ။ ။  ၼႂ်းမိူင်းၶၢင်ၼႆႉ ၸွင်ႇမီးပီႈၼွင်ႉတႆးၼမ်ၶႃႈ ။


တွပ်ႇ ။ ။ ၼႂ်းမိူင်းၶၢင်တင်ႈသဵင်ႈ တႄႉဢမ်ႇလႆႈႁူႉၶေႃႈမုလ်းၶႃႈ ၵူၺ်းၵႃႈၼႂ်းဝဵင်းမႂ်ႇဢၼ် ၶႃႈတေၶဝ်ႈၶႄႉၶႅင်ႇၼႆႉတႄႉ ႁူဝ်ၵူၼ်းတင်းမူတ်းမီး 50,000 ၵေႃႉ ။ တႆးမီး 33,047 ၵေႃႉၶႃႈ ။


ထၢမ် ။ ။  တႄႇလူင်းႁႃသဵင်သူၼ်းတုမ်  ယူႇယဝ်ႉၶႃႈႁႃႉ ။ တွၼ်ႈလႂ်လၢႆလၢႆၶႃႈ ။


တွပ်ႇ ။ ။ တႄႇလူင်းသူၼ်းတုမ်ႇယူႇယဝ်ႉၶႃႈ ။ ၸဵမ်မိူဝ်ႈဝၼ်းတီႈ 08/09/2015 – 08/11/2015 ၶၢဝ်းတၢင်း 60 ဝၼ်းၶႃႈ ၊ လၢႆးသူၼ်းတုမ်ၶႃႈၶဝ်ၼႆႉ မီးယူႇ3 လၢႆး ။ 1 - ၶိုၼ်ႈႁိူၼ်း လူင်းႁိူၼ်း ၊  2 - ၸွမ်းၵၢတ်ႇ ၊ ၸွမ်းတၢင်း ၊ ၶိုၼ်ႈပၢႆႉၸွမ်းတၢင်း ၊ 3 - ၸတ်းႁဵတ်းပၢင်ႁူပ်ႉထူပ်း ဢုပ်ႇဢူဝ်းတင်းၵူၼ်းဝၢၼ်ႈၸိူဝ်းၼႆႉၶႃႈ ။


ထၢမ် ။ ။  ၵၢၼ်သူၼ်းတုမ် ၸွင်ႇယၢပ်ႇၽိုတ်ႇၶႃႈ ။


တွပ်ႇ ။ ။ ယၢပ်ႇၶႃႈဢေႃႈ ။ ယွၼ်ႉဝႃႈ ဢမ်ႇမီးတူဝ်ထူပ်း ၊ ၶၢဝ်းယၢမ်းႁၢင်ႈႁႅၼ်းဢေႇ ၊ ဢမ်ႇၸႂ်ႈ ၵူၼ်းၸႃႇတိ ၼႂ်းပိုၼ်ႉတီႈ ။


ထၢမ် ။ ။  ၸွမ်းၼင်ႇလႆႈႁူပ်ႉထူပ်း ၵူၼ်းမိူင်းယဝ်ႉသေ ႁၼ်ထိုင်ဝႃႈ ၵူၼ်းမိူင်းပွင်ႇ ၸႂ်ၼိူဝ်ပၢင် လိူၵ်ႈတင်ႈၼႆႉ ၵႃႈႁိုဝ်ယဝ်ႉ ။


တွပ်ႇ ။ ။ ၵူၼ်းမိူင်းဢၼ်ႁူႉပွင်ႇၵၢၼ်လိူၵ်ႈတင်ႈၼႆႉမီးဢေႇတႄႉတႄႉၶႃႈ ။ ပိူင်ၼိုင်ႈၵေႃႈ ၶဝ်လၢပ်ႇ မိူဝ်ႈပီ 2010 ၼၼ်ႉ လိူၵ်ႈယဝ်ႉၵေႃႈဢမ်ႇမႃးႁဵတ်းသင်ပၼ်ၵူၼ်းဝၢၼ်ႈ ။ ဢမ်ႇပေႃးသူၼ်ၸႂ် ၵူၼ်းဝၢၼ်ႈ ၵႃႈႁိုဝ်ၶႃႈ ။ လိူဝ်ၼၼ်ႉၵူၼ်းမိူင်းယင်းလၢတ်ႈဝႃႈ ပေႃးသူတေသိူဝ်ႇပၼ်သဵၼ်ႈတၢင်း ႁဝ်းတေပၼ်ၶႅပ်းလိူၵ်ႈ(မႄး)သူဝႃႈၸိူင်ႉၼႆ ။


ထၢမ် ။ ။  ဢၼ်ၵူၼ်းမိူင်းပႆႇႁူႉ မီးသင်ၽွင်ႈၶႃႈ ။ ဢၼ်လႆႈသပ်းလႅင်းၼေပၼ်ၵူၼ်းမိူင်း ။


တွပ်ႇ ။ ။ လႆႈသပ်းလႅင်းၵႂႃႇဝႃႈ ၼႃႈတီႈၼေႃႇၽူႈတႅၼ်းပဵၼ်ၸိူင်ႉႁိုဝ် လၢႆးႁဵတ်းၵၢၼ်ပဵၼ်ၸိူင်ႉႁိုဝ် ၵၢၼ်လိူၵ်ႈတင်ႈ လမ်ႇလွင်ႈၸိူင်ႉႁိုဝ်ၸိူဝ်ၼႆႉၶႃႈ ။


ထၢမ် ။ ။  မိူဝ်ႈ 2010 ၸွင်ႇၶဝ်ႈၶႄႉၶႅင်ႇ တူင်ႉၼိုင်ၵၢၼ်မိူင်းမႃးၶႃႈႁႃႉ ။


တွပ်ႇ ။ ။ မိူဝ်ႈ 2010 ၼၼ်ႉ တႄႉလႆႈၸွႆႈတူင်ႉၼိုင်ၼႄလၢႆး တွတ်ႈၶႅပ်းလိူၵ်ႈပၼ်ၵူၼ်းမိူင်း ၸိူဝ်းၼႆႉဢေႃႈ ။


ထၢမ် ။ ။  ပၢင်လိူၵ်ႈတင်ႈ 2010 လႄႈ ယၢမ်းလဵဝ် လွင်ႈတူင်ႉၼိုင်ၵၢၼ်မိူင်း ပိူင်ႈသင်ၵၼ်ၶႃႈ ။ တွၼ်ႈလႂ် ၸိူင်ႉႁိုဝ် ။ ယွၼ်ႉသင်ၶႃႈ ။


တွပ်ႇ ။ ။ ပိူင်ႈၶႃႈဢေႃႈ ပိူင်ႈၼမ်ၼမ်ၵမ်းလဵဝ်ၶႃႈယဝ်ႉ ။ ပီၼႆႉတေလႆႈဝႃႈလွတ်းလႅဝ်းမႃးလိူဝ်ၵဝ်ႇ တႄႉတႄႉ မိူၼ်ၼင်ႇမီးၶၢဝ်းယၢမ်းႁၢင်ႈႁႅၼ်းၼမ် ၊ ၵူၼ်းၼွၵ်ႈမိူင်းၵေႃႈၶဝ်ႈမႃးပၵ်းတႃတူၺ်းၼမ် ၊ သိုဝ်ႇၶၢဝ်ႇၵေႃႈလွတ်ႈလႅဝ်းမႃးလိူဝ်ၵဝ်ႇ ၊ ပၢင်သွၼ်ၵေႃႈမီးၼမ်မႃး ၸဵမ်ၸိူဝ်းၼႆႉၶႃႈဢေႃႈ ။


ထၢမ် ။ ။  ပၢင်လိူၵ်ႈတင်ႈ ဢၼ်တေမႃးၼႆႉ ၸွင်ႇထၢင်ႇဝႃႈ မၼ်းတေလွတ်ႈလႅဝ်း ၽဵင်ႇပဵင်း  Free and Fair ယူႇၶႃႈႁႃႉ ။


တွပ်ႇ ။ ။ ပေႃးမႃးတူၺ်းၼႆႉ မိူၼ်ၼင်ႇၸိုဝ်ႈၵူၼ်းဝၢၼ်ႈၵူၼ်းမိူင်းဢမ်ႇထုၵ်ႇမႅၼ်ႈ သမ်ႉထႅင်ႈ ဢမ်ႇတင်ႈႁူင်းတွတ်ႈၶႅပ်းၵၢင်ၸႂ်ၼႂ်းဝၢၼ်ႈၼွၵ်ႈ မၢင်ဝၢၼ်ႈၼႆႉ လႆႈပႆၶဝ်ႈၵႂႃႇပဵၼ် 4 – 5 ၸူဝ်ႈမူင်းၵေႃႈမီး တႃႇၵူၼ်းဝၢၼ်ႈတေပႆတၢင်း မႃးလိူၵ်ႈတင်ႈၼႂ်းဝဵင်းၼႆႉ ဢမ်ႇထၢင်ႇတေပဵၼ်လႆႈ ။  ၵႃးၵေႃႈၵႂႃႇဢမ်ႇလႆႈ ၸိူဝ်းၼႆႉ ။  ယူဝ်ပဵၼ်ၽႅၼ်ၵၢၼ်ပိူၼ်ႈၵေႃႈ ပဵၼ်လႆႈၶႃႈ ။ ၵွပ်ႈၼၼ်လႄႈပၢင်လိူၵ်ႈတင်ႈပွၵ်ႈၵမ်းၼႆႉ တေလွတ်ႈလႅဝ်းႁူဝ်ပၢၵ်ႇတဵမ်ၼႆ ဢမ်ႇႁတ်းယုမ်ႇၶႃႈ ။


ထၢမ် ။ ။  ဢၼ်တေလႆႈၶႄႉၶႅင်ႇတႄႉတႄႉၼႆႉ  ၼႂ်းဝဵင်းမႂ်ႇၼႆႉ မီးပႃႊတီႊသင်လၢႆလၢႆၶႃႈ ။


တွပ်ႇ ။ ။ ဢၼ်ၶႃႈတေလႆႈၶႄႉၶႅင်ႇၼႆႉတႄႉ  မိူၼ်ၼင်ႇ 1.ပႃႊတီႊသၢင်ႇသီႈ USDP ၊ 2.ပႃႊတီႊၼူၵ်ႉယုင်း NLD ၊ 3.ပႃႊတီႊသိူဝ်ၽိူၵ်ႇ SNDP ၊ 4. ပႃႊတီႊတႆးလႅင်၊ 5. ပႃးတီႊၻီႊမူဝ်ႊၶရႅတ်ႉတိၵ်ႉ မိူင်းၶၢင် ၊ 6. ပႃႊတီႊႁုၼ်ႈမုၼ်းမႂ်ႇသုင်လႄႈ ၽွမ်ႉႁူမ်ႈၸိူဝ်ႉၸၢတ်ႈ လဝေႃႇ ၊ 7. ပႃႊတီႊၶွၼ်ႊရႅတ်ႉ တီႊမွၵ်ႉၶရေႊသီႊၸိူဝ်ႉၸၢတ်ႈၶၢင် ၊ 8. ပႃႊတီႊၽွမ်ႉႁူမ်ႈၸိူဝ်ႉၸၢတ်ႈ တသၺ ၸဵမ်ၸိူဝ်းၼႆႉ ။  


ထၢမ် ။ ။  ပေႃးပေႉပၢင်လိူၵ်ႈတင်ႈ လႆႈတီႈၼင်ႈၼႂ်းသၽႃးၸိုင် တေႁဵတ်းပၼ်ၵူၼ်းမိူင်း သင်လၢႆလၢႆၶႃႈ ။


တွပ်ႇ ။ ။ တေလႅၵ်ႈလၢႆႈ ဢမ်ႇၼၼ် တေမႄးတႅမ်ႈ ပၵ်းပိူင် ပိူင်ငဝ်ႈပိုင်းမိူင်းမႂ်ႇ  ၊ တေတုၵ်းယွၼ်း လွင်ႈမီးသုၼ်ႇလႆႈၽဵင်ႇပဵင်း ၊ တေဢဝ်ပၵ်းပိူင် ပၢင်လူင်သေႁဵတ်းၵၢၼ်ၵႂႃႇ ။


ထၢမ် ။ ။  ၶႂ်ႈၵၢဝ်ႇလၢတ်ႈတိုၵ်းသူၼ်းထိုင် ပီႈၼွင်ႉၵူၼ်းမိူင်းတႆး ၸိူင်ႉႁိုဝ်ၶႃႈ ။


တွပ်ႇ ။ ။ ဢေႃႈၶႃႈမိူဝ်ႈလဵဝ်ပႃႊတီႊၵေႃႈၼမ်မႃး ဢၼ်ၶႂ်ႈၾၢၵ်ႇထိုင်ပီႈၼွင်ႉႁဝ်းၶဝ်တႄႉပေႃးလိူၵ်ႈၼႆ ၸိုင် ယႃႇတူၺ်းတီႈၵူၼ်း ပေႃးႁဝ်းတူၺ်းတီႈၵူၼ်းၸိုင်ႁဝ်းတေၵဵင်ၸႂ် ။ ၵွပ်ႈၼၼ် လဵပ်ႈႁဵၼ်းပၵ်းပိူင်ၶဝ် ဝႃႈ တေၸၢင်ႈပူၵ်းပွင်ဝၢၼ်ႈမိူင်းတႄႉတႄႉ ၸုၵ်းၾၢႆႇၵူၼ်းမိူင်း ၸိုၼ်ႈၸၢင်ႇသေလိူၵ်ႈ ၶႂ်ဝႃႈၼႆဢေႃႈ ။


ယိၼ်းၸူမ်းယႂ်ႇၼမ်ၶႃႈ ။