ၽူႈၶဝ်ႈၶႅင်ႇၼေႃႇၽွင်းတႅၼ်း ပႃႊတီႊႁူဝ်သိူဝ် (SNLD) သၽႃးၵူၼ်းမိူင်း ဝဵင်းမိူင်းၼၢႆး ၸိုင်ႈတႆးပွတ်းၸၢၼ်း လၢတ်ႈဝႃႈ ၶဝ်ႈမႃးၼႂ်းပႃႊတီႊႁူဝ်သိူဝ် ပိူဝ်ႈတႃႇမႄးၶဵၼ်ႇတႅမ်ႈ ပိူင်ငဝ်ႈပိုင်းမိူင်း 2008 ၊ ယုမ်ႇယမ်ဝႃႈ ပၢင်လိူၵ်ႈတင်ႈပွၵ်ႈၼႆႉ ၵူၼ်းမိူင်းပၼ်ႁႅင်းၼမ် ၊ တေၸုၵ်းၾၢႆႇၸဝ်ႈႁႆႈၸဝ်ႈၼႃး ။ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉၼင်ႇၼႆ ။


ထၢမ် - ႁဝ်းၶႃႈပဵၼ် ၸုမ်းၶၢဝ်ႇၽူႈတွႆႇႁွၵ်ႈ ၊ တေယွၼ်းတွင်ႈထၢမ် လုင်းၸၢႆးၸၢၼ်ႇတဵင်းဢိတ်းၼိုင်ႈ ၊ လုင်းႁဝ်းတေၶဝ်ႈၶႄႉၶႅင်ႇ တီႈသၽႃးလႂ်ၶႃႈ ?။


တွပ်ႇ - ၶႃႈႁဝ်း ပဵၼ်လုၵ်ႈၸုမ်းငဝ်ႈငုၼ်း ၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ၊ ပႃႊတီႊႁူဝ်သိူဝ် (SNLD) တေၶဝ်ႈၶႄႉၶႅင်ႇ ပဵၼ်ၼေႃႇၽွင်းတႅၼ်း ဢွင်ႈတီႈသၽႃးၵူၼ်းမိူင်း ဝဵင်းမိူင်းၼၢႆးၶႃႈဢေႃႈ ။


ထၢမ် - လၢတ်ႈၼႄပိုၼ်းတူဝ် လုင်းၸၢႆးၸၢၼ်ႇတဵင်း တီႈၵႅပ်ႈဢိတ်းၼိုင်ႈၶႃႈ ?။


တွပ်ႇ - ၶႃႈႁဝ်းပဵၼ်ၸႃတိလၢင်းၶိူဝ်း ၊ လႆႈႁပ်ႉၶူး တီႈၸၼ်ႉၸွမ်ပၢႆးမၢၵ်ႈမီး ဝဵင်းတႃႈၵုင်ႈ မိူဝ်ႈပီ 1977 ။ ယၢမ်ႈႁၢပ်ႇၵၢၼ် ၽူႈၸတ်းၵၢၼ် မူႇၸုမ်းသမဝႃႇယႃႇမႃႉလႄႈ ၽူႈၼမ်းၼႂ်း ၶွင်ႊသီႊၵူၼ်းမိူင်း ဝဵင်းလၢင်းၶိူဝ်းမႃး ။ မိူဝ်ႈပၢၼ်လုၵ်ႈႁဵၼ်းၸၼ်ႉၸွမ် သမ်ႉလႆႈၸွႆႈၵၢၼ်ၵေႃလိၵ်ႈလၢႆး ပၢင်သွၼ်လိၵ်ႈတႆး လၢတ်ႈၵႂၢမ်းတႆး ၊ ပၢင်သွၼ်လိၵ်ႈတႆး “မ” ႁႃႈတူဝ် ၸိူဝ်းၼႆႉမႃး ။ ဝၢႆးပၢၼ်လုၵ်ႈႁဵၼ်းယဝ်ႉ လႆႈဢဝ်ပုၼ်ႈၽွၼ်းၽူႈၼမ်းၼႂ်း ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး ပတ်းပိုၼ်ႉ ႁူမ်ႈပႃးၽူႈၼမ်းၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ။ မိူဝ်ႈလဵဝ်တႄႉ ဢဝ်ပုၼ်ႈၽွၼ်းၵႅမ်ႁူဝ်ပဝ်ႈ ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ၸႄႈဝဵင်းတူၼ်ႈတီးဝႆႉယူႇ ၊ တေႃႈလဵဝ် ယူႇသဝ်းဝႆႉတီႈပွၵ်ႉဢူးၵျီးၶမ်း ဝဵင်းတူၼ်ႈတီး ။


ထၢမ် - ၵွပ်ႈသင်လႄႈ လိူၵ်ႈၶဝ်ႈၼႂ်းပႃႊတီႊႁူဝ်သိူဝ် ၊ ယုမ်ႇယမ်ၸိူင်ႉႁိုဝ်ၶႃႈ ? ။


တွပ်ႇ - ပႃႊတီႊႁူဝ်သိူဝ်ၼႆႉ မၼ်းပဵၼ်သဵၼ်ႈတၢင်းၵၢၼ်ပၢႆးမိူင်း ၊ မၼ်းၸွမ်းလၵ်းၵၢၼ် (မူႇပိူင်) ပၢင်လူင် ၊ ဢၼ်ပဵၼ်တႃႇတႄႇတင်ႈ ၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်ၸိုၼ်ႈၸၢင်ႇ ၊ ဢၼ်မီးလွင်ႈၽဵင်ႇပဵင်းလႄႈ သုၼ်ႇလႆႈတႅပ်းတတ်း ၸတ်းပွင်ႁင်းၶေႃ ။ မၼ်းပဵၼ်ၸုမ်းႁဵတ်းၵၢၼ်မိူင်းတႄႉတႄႉ ၊ ဢမ်ႇၸႂ်ႈၸုမ်းႁဵတ်းၵိၼ်ၵၢၼ်မိူင်း ။


ထၢမ် - ယၢမ်းလဵဝ်ၶႃႈလူး ၊ တႃႇၶဝ်ႈၶႄႉၶႅင်ႇၼႂ်းပၢင်လိူၵ်ႈတင်ႈတေမႃးၼႆႉ တႄႇလူင်းႁႃသဵင်သူၼ်းတုမ် ၵူၼ်းမိူင်းယဝ်ႉၶႃႈႁႃႉ ၊ သူၼ်းတုမ်တွၼ်ႈလႂ်လၢႆလၢႆၶႃႈ ? ။


တွပ်ႇ - ပႃႊတီႊႁဝ်းၶႃႈတႄႉ လူင်းႁႃသဵင်သူၼ်းတုမ်ယူႇယဝ်ႉၶႃႈ ။ ၵွပ်ႈၶႃႈႁဝ်းၵေႃႈ ပဵၼ်ၵႅမ်ႁူဝ်ပဝ်ႈတီႈတူၼ်ႈတီးလႄႈ ၼႂ်းၸႄႈဝဵင်းတူၼ်ႈတီး ၵေႃႈလႆႈလူင်းၸွႆႈပႃး ၊ တွၼ်ႈမိူင်းၼၢႆးတႄႉ တႃႇတေလူင်းႁႃသဵင်သူၼ်းတုမ်ၼၼ်ႉ တိုၵ်ႉၶပ်းၶိုင်ယူႇၶႃႈ ။


ထၢမ် - ၵၢၼ်ႁႃသဵင်သူၼ်းတုမ် ၸွင်ႇယၢပ်ႇၽိုတ်ႇၶႃႈ ?။


တွပ်ႇ - တေလႆႈဝႃႈယၢပ်ႇယူႇ ၊ ၵွပ်ႈသင်ၼႆ ၵူၼ်းမိူင်းႁဝ်းလႆႈၶၢတ်ႇယၢၼ်ၵၼ်တင်းပၢႆးမိူင်း 60 ပီပၢႆ ၊ ထိုင်ယၢမ်းလဵဝ် ပႃႊတီႊပၢႆးမိူင်းၵေႃႈၼမ်တႄႉတႄႉ ။


ထၢမ် - တေဢၢၼ်းသူၼ်းတုမ် ၼႂ်းလၢႆၸႄႈဝဵင်းၶႃႈ ?။


တွပ်ႇ - ပဵၼ်ၼႂ်းၼႃႈလိၼ် ၸႄႈဝဵင်းမိူင်းၼၢႆး ၼႆဢေႃႈ ။


ထၢမ် - ၸွမ်းၼင်ႇလႆႈႁူပ်ႉထူပ်း ၵူၼ်းမိူင်းယဝ်ႉသေ ႁၼ်ထိုင်ဝႃႈ ၵူၼ်းမိူင်းၶဝ်ႈၸႂ်ၼိူဝ်ၵၢၼ်လိူၵ်ႈတင်ႈၼႆႉ ၵႃႈႁိုဝ်ၶႃႈ ?။


တွပ်ႇ - ပၢင်လိူၵ်ႈတင်ႈၼႆႉတႄႉ ပေႃးႁဝ်းၶႃႈလူင်းသပ်းလႅင်းၼႆ ၵူၼ်းမိူင်းတေၶဝ်ႈၸႂ် / ပွင်ႇၸႂ်ယူႇၼႆ ယုမ်ႇယမ်ယူႇၶႃႈ ။


ထၢမ် - ဢၼ်လႆႈသပ်းလႅင်းၼႄပၼ်ၵူၼ်းမိူင်း ဢၼ်ၵူၼ်းမိူင်းပႆႇႁူႉ မီးသင်ၽွင်ႈၶႃႈ ?။


တွပ်ႇ - လွင်ႈသဵၼ်ႈတၢင်းၵၢၼ်မိူင်း ပႃႊတီႊႁူဝ်သိူဝ်ႁဝ်းၶႃႈလႄႈ လၢႆးတွတ်ႈယွၼ်ႇဝႂ်ၶႅပ်းၵၢင်ၸႂ် (ၶႅပ်းမႄး) ၼၼ်ႉၶႃႈဢေႃႈ ။


ထၢမ် - မိူဝ်ႈပီ 2010 ၼၼ်ႉ ၸွင်ႇၶဝ်ႈၶႄႉၶႅင်ႇတူင်ႉၼိုင်ၵၢၼ်မိူင်းၶႃႈႁႃႉ ?။


တွပ်ႇ - မိူဝ်ႈပီ 2010 ၼၼ်ႉတႄႉ ပႃႊတီႊႁဝ်းၶႃႈၵေႃႈ ဢမ်ႇလႆႈၶဝ်ႈၶႄႉၶႅင်ႇ ၊ တူဝ်ၶႃႈႁဝ်းၵေႃႈ ဢမ်ႇပဵၼ်ၶဝ်ႈၶႄႉၶႅင်ႇမႃးၶႃႈ ။


ထၢမ် - ပၢင်လိူၵ်ႈတင်ႈ 2010 လႄႈယၢမ်းလဵဝ် လွင်ႈတူင်ႉၼိုင်ၵၢၼ်မိူင်း ၸွင်ႇပိူင်ႈသင်ၵၼ်မႃး ၊ ပိူင်ႈၵၼ်ၸိူင်ႉႁိုဝ် ၊ ယွၼ်ႉသင်ၶႃႈ ?။


တွပ်ႇ - ပၢင်လိူၵ်ႈတင်ႈ 2010 လႄႈယၢမ်းလဵဝ် လွင်ႈတူင်ႉၼိုင်ၵၢၼ်မိူင်း တေလႆႈဝႃႈပိူင်ႈၵၼ်ဝႆႉ ။ မိူဝ်ႈၼၼ်ႉ ဢၼ်ပဵၼ်ၸုမ်းဢဵၼ်ႁႅင်းၾၢႆႇ Democratic ပႃႊတီႊႁႅင်းယႂ်ႇ မိူၼ်ၼင်ႇ NLD လႄႈ ပႃႊတီႊႁူဝ်သိူဝ်ႁဝ်းၶႃႈ ဢမ်ႇၶဝ်ႈပႃး။ ပီ 2015 ၼႆႉတႄႉ ၶဝ်ႈပႃးမႃး ။ သမ်ႉထႅင်ႈမိူဝ်ႈၼၼ်ႉ မူႇၸုမ်းပႂ်ႉလူလွမ်ပၢင်လိူၵ်ႈတင်ႈ ၼွၵ်ႈမိူင်းဢမ်ႇလႆႈၶဝ်ႈမႃး ၊ မိူဝ်ႈၼႆႉ မီးသုၼ်ႇလႆႈၶဝ်ႈမႃးလဵပ်ႈႁဵၼ်း ၊ ၾၢႆႇသိုဝ်ႇၶၢဝ်ႇၵေႃႈ လႆႈဝႃႈမီးတိုဝ်ႉတၢင်းထၢင်ႇႁၢင်ႈလိူဝ် မိူဝ်ႈပီ 2010 ၼၼ်ႉဢေႃႈ ။


ထၢမ် - ပၢင်လိူၵ်ႈတင်ႈ ဢၼ်တေမႃးၼႆႉ ၸွင်ႇထၢင်ႇဝႃႈမၼ်းတေလွတ်ႈလႅဝ်း ၽဵင်ႇပဵင်း Free and Fair ယူႇၶႃႈႁႃႉ ?။


တွပ်ႇ - ပၢင်လိူၵ်ႈတင်ႈ ဢၼ်တေမႃးၼႆႉ တေမီးလွင်ႈလွတ်ႈလႅဝ်း ၽဵင်ႇပဵင်း ဢမ်ႇၽဵင်ႇပဵင်းဢၼ်ဝႃႈၼၼ်ႉ ပႆႇၸၢင်ႈလၢတ်ႈလႆႈတႄႉတႄႉ ။ သဵၼ်ႈမၢႆၶႅပ်းၵၢင်ၸႂ် (ၸရၢင်းမႄး) ၵေႃႈ ၽိတ်းဝႆႉတင်းၼမ်ဝႆႉ ။


ထၢမ် - ယုမ်ႇယမ်ၼိူဝ် ဢဵၼ်ႁႅင်းၵူၼ်းမိူင်း ဢၼ်ၵမ်ႉထႅမ်ပႃႊတီႊႁူဝ်သိူဝ် ၵႃႈႁိုဝ်ၶႃႈ ၊ မီးၼမ်ႁႃႉ မီးဢေႇႁႃႉ ?။


တွပ်ႇ - ပႃႊတီႊႁဝ်းၶႃႈၼႆႉ ႁဵတ်းသိုဝ်ႈသႂ်ၼိူဝ်ပေႃႈမႄႈၵူၼ်းမိူင်းလႄႈ ဢဵၼ်ႁႅင်း ပေႃႈမႄႈၵူၼ်းမိူင်း ၵမ်ႉထႅမ်ပႃႊတီႊႁူဝ်သိူဝ်ႁဝ်းၶႃႈ မီးတင်းၼမ်ယူႇၼႆ ယုမ်ႇယမ်ၼင်ႇၼႆဝႆႉ ၶႃႈဢေႃႈ ။


ထၢမ် - ဢၼ်တေလႆႈၶႄႉၶႅင်ႇတႄႉတႄႉၼႆႉ တေပဵၼ်ပႃႊတီႊဢၼ်လႂ်ၶႃႈ ?။


တွပ်ႇ - ဢၼ်တေလႆႈၶႄႉၶႅင်ႇတႄႉတႄႉၼႆႉ ပဵၼ်ပႃႊတီႊဢၼ်လႂ် ဢၼ်ဝႃႈၼၼ်ႉ ပႆႇၸၢင်ႈဝႃႈၶႃႈ ။


ထၢမ် - ပေႃးပေႉပၢင်လိူၵ်ႈတင်ႈသေ လႆႈတီႈၼင်ႈၼႂ်းသၽႃးၸိုင် တေႁဵတ်းပၼ်ၵူၼ်းမိူင်း သင်လၢႆလၢႆၶႃႈ ?။


တွပ်ႇ - ၵၢၼ်ၶႂ်ႈႁဵတ်းပၼ် ပေႃႈမႄႈၵူၼ်းမိူင်းတႄႉ မီးတင်းၼမ် ။ ႁူဝ်ႁုပ်ႈမၼ်းတႄႉ ၵွပ်ႈပိူင်ငဝ်ႈပိုင်းမိူင်း (လၵ်းမိူင်း) 2008 လႄႈ ၵၢၼ်မိူင်းၼႆႉ ဢမ်ႇၸၢင်ႈၶိုၼ်ႈၼႃႈ ။ တေလႆႈမႄးၶဵၼ်ႇတႅမ်ႈပိူင်ငဝ်ႈပိုင်းမိူင်း 2008 ၼၼ်ႉၶႃႈယဝ်ႉ ။


ထၢမ် - ဢၼ်တေၸၢင်ႈႁဵတ်းပၼ် ဢွၼ်တၢင်းသုတ်း သမ်ႉပဵၼ်သင်ၶႃႈ ?။


တွပ်ႇ - တေပဵၼ်လွင်ႈၶီႇၼဵၵ်းတဵၵ်းတဵင်ၵၼ် ယႃႇႁႂ်ႈလႆႈမီးၼႂ်းမိူင်းႁဝ်းၼႆႉ ။ ပဵၼ်ၸဝ်ႈႁႆႈၸဝ်ႈၼႃးၵမ်ႈၼမ်လႄႈ တေၸုၵ်းမၼ်ႈၾၢႆႇၸဝ်ႈႁႆႈၸဝ်ႈၼႃးလႄႈ ၵူၼ်းမိူင်းသေ ႁဵတ်းသၢင်ႈၵႂႃႇယူႇၶႃႈ ။


ထၢမ် - ၶႂ်ႈၵၢဝ်ႇလၢတ်ႈ တိုၵ်းသူၼ်းထိုင် ပီႈၼွင်ႉၵူၼ်းမိူင်းတႆး ၸိူင်ႉႁိုဝ်ၶႃႈ ?။


တွပ်ႇ - ၵမ်းလိုၼ်းသုတ်း ၶႂ်ႈလၢတ်ႈတိုၵ်းသူၼ်းထိုင် ပီႈၼွင်ႉၵူၼ်းမိူင်းတႄႉ တႃႇတေတွတ်ႈၶႅပ်းၵၢင်ၸႂ်ၼႆႉ ဢမ်ႇတၢပ်ႈၵူဝ် ၊ ႁႂ်ႈယႃႇပေၵူဝ် ပေၵႂင် ၊ တေလႆႈမီးပိုၼ်ႉႁူႉပၢႆးႁၼ် ၊ ၼင်ႇႁိုဝ်တေမီးသမ်ႉ 1.ထုၵ်ႇလႆႈဢၢၼ်ႇလိၵ်ႈလၢႆး ၼမ်ၼမ် ။ 2.တူၺ်းထွမ်ႇၶၢဝ်ႇထီႊဝီႊ (TV) လႄႈ ရေႊၻီႊယူဝ်ႊ ၊ ၶေႃႈလၢတ်ႈသင်ႇသွၼ်ၽူႈၼမ်း ၵူၼ်းလူင် ။ 3. ၵႆႉၵႆႉႁူပ်ႉထူပ်းလႅၵ်ႈလၢႆႈတၢင်းႁူႉတၢင်းႁၼ်ၵၼ် ၸိူဝ်းၼႆႉ ။


ပႃႊတီႊၶႂ်ႈၼမ်ၵႃႈႁိုဝ်ၼမ် ၊ ပေႃးႁဝ်းမီးပိုၼ်ႉႁူႉပၢႆးႁၼ်တႄႉ တေလႆႈတွတ်ႈၶႅပ်းၵၢင်ၸႂ်ပၼ် ပႃႊတီႊလႂ်ဢၼ်ဝႃႈၼၼ်ႉ ပေႃႈမႄႈၵူၼ်းမိူင်းႁဝ်း တေၸၢင်ႈတႅပ်းတတ်းထုၵ်ႇမႅၼ်ႈယူႇ ။ ၵွပ်ႈၼႆ ၵူၼ်းမိူင်းႁဝ်းပတ်းပိုၼ်ႉ ပေႃးထိုင်မႃးပၢႆပီ ၼူဝ်ႊဝႅမ်ႊၿိူဝ်ႊ 8 ဝၼ်းၼႆႉ ၊ လိူၼ်သိပ်းဢဵတ်းလွင်ႈ 11 ၶမ်ႈၸိုင် ၽႂ်မီးၵၢၼ်သင်ၵေႃႈဝၢင်းဝႆႉသေ ဢွၼ်ၵၼ်ႁတ်းႁတ်းႁၢၼ်ႁၢၼ် ၽွမ်ႉၵၼ်တွၵ်ႇၸုမ်ႈသႂ်ႇ ၶႅပ်းၵၢင်ၸႂ်ပၼ် ၸုမ်းပႃႊတီႊႁူဝ်သိူဝ်သေၵမ်း - မီးၼင်ႇၼႆၶႃႈ ။