ဢိင်ၼိူဝ် သိုၵ်းမၢၼ်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA)သေ မိူဝ်ႈလဵဝ် မီးၵူၼ်းပၢႆႈၽေးယဝ်ႉ သၢမ်ႁဵင်ပၢႆ ။ ၽူႈလႂ် ၽႂ်ၶႂ်ႈၵမ်ႉထႅမ်ငိုၼ်းတွင်း တႃႇၸွႆႈထႅမ်ၵူၼ်းပၢႆႈၽေး တိတ်းတေႃႇၵပ်းသိုပ်ႇ လူႇတၢၼ်းလႆႈ ။


ဝၼ်းတီႈ 22/10/2015 (မိူဝ်ႈၼႆႉ) တင်ႈတႄႇၵၢင်ၼႂ် ယၢမ်း 7 မူင်းမႃး ၊ သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး (SSPP/SSA)  တႄႇပၢင်တိုၵ်းၵၼ်ထႅင်ႈတီႈ ဝၢၼ်ႈၼမ်ႉပူ (ႁိမ်းဝၢၼ်ႈႁႆး) ႁၢဝ်ႈႁႅင်း။ ဝၼ်းတီႈ 21/10/2015 (မိူဝ်ႈဝႃး) ၵေႃႈ တင်ႈတႄႇယၢမ်း 11 မူင်းတေႃႇထိုင်ၵၢင်ဝၼ်းၶမ်ႈ ပဵၼ်ပၢင်တိုၵ်း တၢင်းၵုင်းၼိမ် ႁိမ်းတႃႈသၢမ်ပူး ႁၢဝ်ႈႁႅင်း ။ ၵွပ်ႈၼၼ် မိူဝ်ႈဝႃးတင်းမိူဝ်ႈၼႆႉ ၵူၼ်းဝၢၼ်ႈၵူၼ်းမိူင်း တိုၵ်ႉလႆႈပၢႆႈၽေးသိုၵ်းထႅင်ႈယူႇတိၵ်းတိၵ်း ။


တႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ် သိုၵ်းမၢၼ်ႈႁၢင်ႈႁႅင်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းမိူင်းသူႈ ႁၢဝ်ႈႁႅင်း ။ ယွၼ်ႉပိူဝ်ႈပၢင်တိုၵ်းၵၼ်သေ ယၢမ်းလဵဝ် မီးၵူၼ်းဝၢၼ်ႈၵူၼ်းမိူင်းသၢမ်ႁဵင်ပၢႆ လႆႈပၢႆႈယၢၼ်ႁိူၼ်းယေးတီႈယူႇ ။ ၸိူဝ်းပၢႆႈၵႂႃႇပိုင်ႈဢိင်ယူႇသဝ်း တီႈဝတ်ႉ (ၵျွင်း) မုၼ်ၸဝ်ႈႁၢႆးပႃ (ၸဵင်ႇၸၢၼ်းဝၼ်းတူၵ်းမိူင်းသူႈ) မီး 3,000 ပၢႆ ။ ၸိူဝ်းပၢႆႈၵႂႃႇမီးယူႇတီႈဝၢၼ်ႈသေႃႉ 1,200 ပၢႆ ။ ၸိူဝ်းပၢႆႈၵႂႃႇမီးတီႈမိူင်းၼွင်ၵေႃႈမွၵ်ႈ 200 ။ ၸိူဝ်းပၢႆႈယူႇသဝ်းမီးဝႆႉတီႈငဝ်ႈငုၼ်း SSPP/SSA တီႈဝၢၼ်ႈႁႆးၵေႃႈ မီး 800 ပၢႆ ။ ၼွၵ်ႈသေၼၼ်ႉ တီႈမိူင်းၸၢင်ၵေႃႈ မီးၵူၼ်းပၢႆႈၽေးၵႂႃႇပိုင်ႈဢိင်ယူႇသဝ်း ၊ ၵူၺ်းၵႃႈ မီးႁူဝ်ၵူၼ်းၵႃႈႁိုဝ်ၼၼ်ႉ တိုၵ်ႉၸွပ်ႇထၢမ်ႁူဝ်ယွႆႈမၼ်းယူႇ ။


ယွၼ်ႉပၢင်တိုၵ်းသေ ဢၼ်ၵူၼ်းဝၢၼ်ႈၵူၼ်းမိူင်း ထူပ်းၽေးသိုၵ်းၸိူဝ်းၼႆႉ သင်ဝႃႈၽူလႂ် ၽႂ်ၶႂ်ႈၵမ်ႉၸွႆႈလူႇတၢၼ်းငိုၼ်းတွင်းၸိုင် တိတ်းတေႃႇၵပ်းသိုပ်ႇလႆႈတီႈ -

ၼၢင်းၶမ်းဢိင်ႇ မၢႆၾူၼ်ႊ +6689 636 6895 ။ ၸၢႆးလၢၼ်တႆး +6681 764 5501 ။ ၸၢႆးႁေႃသႅင် +6662 941 9600 ။ ၸၢႆးႁၵ်ႉၶိူဝ်း +6685 717 4906 ။ လူႇတၢၼ်းဢူၼ်းငိုၼ်းၶဝ်ႈၼႂ်းသဵၼ်ႈမၢႆငိုၼ်း (Account Number) นายเตโชพล หว่าหลิ่งต๊ะ (สาขา บิ๊กซี หงดง) เชียงใหม่ 402-387907-6