ၸုမ်းၸၢဝ်းၶိူဝ်း ၸိူဝ်းဢမ်ႇလူင်းလၢႆးမိုဝ်း ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်းပတ်းပိုၼ်ႉ တူဝ်ႈမိူင်း (NCA) ၼၼ်ႉ ယူႇတီႈၸုမ်းဝႃႉ ပႃႊတီႊမိူင်းဝႃႉ / တပ်ႉသိုၵ်းမိူင်းဝႃႉၽွမ်ႉႁူမ်ႈ တေႁပ်ႉႁဵတ်းၸဝ်ႈႁိူၼ်း ႁွင်ႉမွၵ်ႇၶဝ်ႈႁူမ်ႈ ပၢင်ၵုမ်လူင် တီႈပၢင်သၢင်း ၼႂ်းႁူဝ်လိူၼ်ၼႃႈၼႆႉ ။

ပၢင်ၵုမ်လူင် ဢၼ်ၸတ်းမိူဝ်ႈၽွင်းႁူဝ်လိူၼ်မေႊ 2015

ပၢင်ၵုမ်လူင်ၼႆႉ ယူႇတီႈ ပႃႊတီႊမိူင်းဝႃႉ / တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSP/UWSA) ဢၢၼ်းၸတ်းႁဵတ်း ဝၼ်းတီႈ 1-3/11/2015 (ၶၢဝ်းတၢင်း 3 ဝၼ်း) ။ ဢၼ်ႁွင်ႉမွၵ်ႇဝႆႉၼၼ်ႉ ပဵၼ်ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ ၸိူဝ်းဢမ်ႇလူင်းလၢႆးမိုဝ်း ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ။ ၵူၺ်းၵႃႈ မိူၼ်ၼင်ႇ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၼႆႉ လူင်းလၢႆးမိုဝ်း NCA ဝႆႉသေ ဢမ်ႇမွၵ်ႇ KNU သေတႃႉ သမ်ႉႁွင်ႉမွၵ်ႇၸုမ်းယၢင်း KNDO (ဢၼ်ယူႇပႃႈတႂ်ႈ KNU) ဢၼ်ၼိူဝ်ၻႃႊမျႃႉ ၵေႃႉပဵၼ်လုၵ်ႈၸၢႆး ပူဝ်ႇမျႃႉ ဢွၼ်ႁူဝ်။ ပိူဝ်ႈတႃႇၵႂႃႇၶဝ်ႈႁူမ်ႈပၢင်ၵုမ်လူင်ၼႆႉ ႁွင်ႉမွၵ်ႇဝႆႉ မိူဝ်ႈဝၼ်းတီႈ 24/10/2015 - ၼႆယဝ်ႉ ။


ၽူႈယႂ်ႇၵူၼ်းလူင် ၼႂ်းၸုမ်းလႆႈႁပ်ႉလိၵ်ႈႁွင်ႉမွၵ်ႇၼၼ်ႉ လၢတ်ႈဝႃႈ - ဢၼ်ဢုပ်ႇၵုမ်ၵၼ်ၼႆႉ လႆႈႁူႉဝႃႈမီးယူႇ 2 လွင်ႈ ။ လွင်ႈၼိုင်ႈ ပၢင်လိူၵ်ႈတင်ႈဢၼ်တေၸတ်းႁဵတ်းၼႆႉ ႁၼ်ထိုင်ၸိူင်ႉႁိုဝ် ၊ တေႁဵတ်းၸိူင်ႉႁိုဝ် ။ 2. ပေႃးပၢင်လိူၵ်ႈတင်ႈယဝ်ႉ ပေႃးမီးလူင်ပွင်ၸိုင်ႈမႂ်ႇၶိုၼ်ႈမႃး တေဝႆႉၸႂ်ၼိူဝ်ၶဝ်ၸိူင်ႉႁိုဝ် ၊ တေဢုပ်ႇၵၼ် 2 လွင်ႈၼႆႉၵူၺ်း - ဝႃႈၼႆ ။


ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင်ၼႂ်း ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ၵေႃႉၼိုင်ႈၵေႃႈ လၢတ်ႈဝႃႈ - ဢၼ်မွၵ်ႇမႃးၸိူဝ်းၼႆႉ ပဵၼ်လုၵ်ႈၸုမ်း UNFC ၵမ်ႈၼမ်ယဝ်ႉ ။ ၵူၺ်းၵႃႈ ဢမ်ႇပႃးၸုမ်းဢၼ်ၵႂႃႇ လူင်းလၢႆးမိုဝ်းၸိူဝ်းၼၼ်ႉ ၼင်ႇၵဝ်ႇ ။ ၵူၺ်းၵႃႈ ပဵၵ်ႉသမ်ႉဝႃႈ ပဵၼ်ၸုမ်း UNFC ၵမ်ႈၼမ်သေတႃႉၵေႃႈ မိူၼ်ၼင်ႇၸုမ်းလႃးႁူႇ LDU ၊ ၸုမ်းဝႃႉ WNO ၊ ၸုမ်းရၶႅင်ႇ ANC ရၶႅင်ႇ ၶဝ်ၸိူဝ်းၼႆႉ သမ်ႉဢမ်ႇမွၵ်ႇပႃး ၼင်ႇၵဝ်ႇ ။ သမ်ႉၵႂႃႇမွၵ်ႇပႃးၸုမ်းယၢင်း ယိပ်းၵွင်ႈၵၢင်ႇ KNDO ဢၼ်ၼိူဝ်ႊၻႃႊမျႃႉဢွၼ်ႁူဝ် ၊ ဢၼ်ပဵၼ်တႂ်ႈ KNU ။ မွၵ်ႇပႃး KNDO ၵူၺ်းပႆႇပေႃး သမ်ႉမွၵ်ႇပႃး ပႃႊတီႊပူတ်းပွႆႇၸိူဝ်ႉၸၢတ်ႈၵယၢၼ်း (KNLP) ဢၼ်ၼႆႉ မၼ်းပဵၼ်လွင်ႈလၢၵ်ႇလၢႆးဢၼ်ၼိုင်ႈယူႇ - ဝႃႈၼႆ ။


ၼႂ်း 12 ၸုမ်း ဢၼ်တေၵႂႃႇၶဝ်ႈႁူမ်ႈ ပၢင်ၵုမ်လူင်ၼၼ်ႉ 1. ပႃႊတီႊမိူင်းမွၼ်းမႂ်ႇ (NMSP) ။ 2.ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ။ 3. တပ်ႉသိုၵ်းဢိူၺ်းလီ ၻီးမူဝ်ႊၶရႅတ်ႊတိၵ်ႊၵူႈၸၢဝ်းၶိူဝ်း မိူင်းမၢၼ်ႈပတ်းပိုၼ်ႉ (MNDAA) ၸုမ်းၵူဝ်းၵၢင်ႉ ဢၼ်ၽိူင်ၵျႃးသိူင်း ဢွၼ်ႁူဝ် ။ 4. တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ဢၼ်မၢႆႇဢၢႆႈမူင်ႉဢွၼ်ႁူဝ် ။ 5.တပ်ႉသိုၵ်းရၶႅင်ႇ (AA) ။ 6. ပႃႊတီႊမႂ်ႇသုင်ၸိူဝ်ႉၸၢတ်ႈ ယၢင်းလႅင် (KNPP) ။ 7. တပ်ႉသိုၵ်းဢူၺ်းလီ ၻီႊမူဝ်ႊရၶရႅတ်ႊတိၵ်ႊၸိူဝ်ႉၸၢတ်ႈ ၸိုင်ႈတႆးပွတ်းဢွၵ်ႇ (NDAA-ESS) တပ်ႉသိုၵ်းမိူင်းလႃး ဢၼ်ၸဝ်ႈၸၢႆးလိုၼ်း ဢွၼ်ႁူဝ် ။ 8. တပ်ႉသိုၵ်းၶၢင်လွတ်ႈလႅဝ်း (KIA) ။ 9. ၸုမ်းယၢင်းၽိူၵ်ႇ (KNDO) ။ 10. ၸုမ်းၵယၢၼ်း (KNLP) ။ 11. ၼႃႇၵ (NSCNK) တင်း ၸဝ်ႈႁိူၼ်း 12.ပႃႊတီႊ / တပ်ႉသိုၵ်း မိူင်းဝႃႉၽွမ်ႉႁူမ်ႈ (UWSP/UWSA) တင်းမူတ်းႁူမ်ႈ 12 ၸုမ်း ။


ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း  ၸိူဝ်းၵႂႃႇလူင်းလၢႆးမိုဝ်း NCA တင်းလူင်ပွင်ၸိုင်ႈမၢၼ်ႈ တီႈၼေႇပျီႇတေႃႇ မိူဝ်ႈဝၼ်းတီႈ 15/10/2015 ၼၼ်ႉ 1. ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ။ 2. တပ်ႉသိုၵ်းယၢင်း ပိူဝ်ႈၽွၼ်းလီ ၻီႊမူဝ်ႊၶရေႊၸီႊ (DKBA) ။ 3. တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်း (KNU/KNLA-PC) 4. တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ။ 5. ၸုမ်းပူတ်းပွႆႇၸိူဝ်ႉၸၢတ်ႈ ပဢူဝ်း (PNLO) ။ 6. ပႃႊတီႊပူတ်းပွႆႇရၶႅင်ႇ (ALP) ။ 7. တႅမ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ။ 8. ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸိူဝ်းၼႆႉ ။ ၸုမ်းၸိူဝ်းၼႆႉ ဢမ်ႇမွၵ်ႇၶဝ်ႈႁူမ်ႈ ပၢင်ၵုမ် ။


ၵဵဝ်ႇၵပ်းလွင်ႈၼႆႉ ၽူႈဢၼ်ၸွႆႈထႅမ် ၵၢၼ်ငမ်းယဵၼ်မိူင်းမၢၼ်ႈ ၸဝ်ႈၼိုင်ႈၵေႃႈလၢတ်ႈဝႃႈ - ပေႃးဝႃႈတူၺ်း ဢၼ်ၶဝ်မွၵ်ႇမႃး 2 ၶေႃႈၼႆႉၵူၺ်းတႄႉ မၼ်းၵိုင်ႇလီလႆႈမွၵ်ႇ ၵူႈမူႇၵူႈၸုမ်းယူႇ ။ မိူၼ်ၸိူင်ႉၼင်ႇ ပၢင်လိူၵ်ႈတင်ႈၵေႃႈလီ ၊ လူင်ပွင်ၸိုင်ႈတေၶိုၼ်ႈမႃးမႂ်ႇၵေႃႈလီ ၊ တေဝႆႉၸႂ်ၼိူဝ်ၶဝ်ၸိူင်ႉႁိုဝ်လႆႈၼႆၼၼ်ႉ မၼ်းၵိုင်ႇလီမွၵ်ႇပႃးၵူႈမူႇၵူႈၸုမ်း ။ ၵူၺ်းၵႃႈ သမ်ႉမွၵ်ႇမႃးၸုမ်းၸိူဝ်း ဢမ်ႇၵႂႃႇလူင်းလၢႆးမိုဝ်း NCA ၼၼ်ႉၵူၺ်းလႄႈ မၼ်းတိုၼ်းတေဢုပ်ႇပႃးလွင်ႈ NCA ယူႇ ။ ၼွၵ်ႈသေၼၼ်ႉ တိုၼ်းတေဢုပ်ႇပႃးလွင်ႈဢၼ်ပဵၼ်ပၢင်တိုၵ်း ၸိူဝ်းၼႆႉယူႇ - ဝႃႈၼႆ ။


ပၢင်ၵုမ်လူင် ၸိူင်ႉၼင်ႇဢၼ်တေၸတ်းၼႆႉ ပူၼ်ႉမႃးမိူဝ်ႈႁူဝ်လိူၼ်မေႊ (ဝၼ်းတီႈ 1-6/05/2015) ၵေႃႈ ယူႇတီႈၸုမ်းဝႃႉ ၸတ်းႁဵတ်းယဝ်ႉၵႂႃႇၵမ်းၼိုင်ႈ ။ တီႈပၢင်ၵုမ်ၼၼ်ႉ ဢွၵ်ႇၶေႃႈပိုၼ်ၽၢဝ်ႇတင်းမူတ်း 12 ၶေႃႈ ။ ၼႂ်း 12 ၶေႃႈၼၼ်ႉ ယင်းလၢတ်ႈဝႆႉပႃးဝႃႈ ဝႃႉတေႁပ်ႉႁဵတ်းၸဝ်ႈတႃႇၼသေ ၸတ်းပၢင်ၵုမ်လူင် ၸၼ်ႉၽူႈၼမ်းထႅင်ႈၵမ်းၼိုင်ႈ ။ လိူဝ်သေၼၼ်ႉ ၵၢၼ်ဢၼ်တေၵေႃႇသၢင်ႈ လွင်ႈငမ်းယဵၼ်တၢင်းၼႃႈၼႆႉၵေႃႈ ယူႇတီႈ UWSP/UWSA သေ တေဢွၼ်ႁူဝ်ႁဵတ်းသၢင်ႈၵႂႃႇ - ၼႆယဝ်ႉ ။