တီႈမိူင်းပၼ်ႇ ၸိုင်ႈတႆးပွတ်းၸၢၼ်း မိူဝ်ႈဝႃးတင်းမိူဝ်ႈၼႆႉ လႆႈၸတ်းပၢင်ၵမ်ႉထႅမ်ႁၼ်လီၸွမ်းလွင်ႈၵတ်းယဵၼ် ၊ ပၢင်လူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉတူဝ်ႈမိူင်း NCA ။ လွင်ႈၼႆႉ ဢိင်ၼိူဝ်ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်သေ ၼေႃႇၽူႈတႅၼ်း ပႃႊတီႊသိူဝ်ၽိူၵ်ႇ ၸၢႆးၼွင်ႉ တွပ်ႇလၢတ်ႈဝႆႉၼင်ႇၼႆ ။

ထၢမ် - ပၢင်လူင်းလၢႆးမိုဝ်း NCA ၼႆႉ ႁဵတ်းသင်လႄႈၵမ်ႉထႅမ်ၶႃႈ ?။


တွပ်ႇ - ယူႇတီႈၽွင်းတႅၼ်း (သၽႃးၸိူဝ်ႉၸၢတ်ႈ ပႃႊတီႊသိူဝ်ၽိူၵ်ႇ SNDP) ပေႃႈထဝ်ႈမူဝ်းၵီႇ (မူဝ်ၵီႈ) သေ မၼ်းၸဝ်ႈလၢတ်ႈၼႄႁဝ်းၶႃႈဝႃႈ - လွင်ႈၵိုတ်းသိုၵ်းၼႆႉ မၼ်းပဵၼ်ဢၼ်ၵူၼ်းမိူင်းႁဝ်း ၶႂ်ႈလႆႈ တႄႉတႄႉဝႃႈဝႃႈယဝ်ႉ ။ ၵွပ်ႈပိူဝ်ႈဝႃႈ လွင်ႈငမ်းယဵၼ်ၼႆႉ ဢမ်ႇမီးလႄႈ ၵူၼ်းမိူင်းႁဝ်းၶႃႈၼႆႉ လွင်ႈမၢၵ်ႇၶဝ်ႈတဝ်ႈၼမ်ႉၼႆႉ ၶၢဝ်းဢဝ်မၼ်းၵေႃႈဢမ်ႇၸၢင်ႈဢဝ် ၊ ၵွပ်ႈၼၼ် တႃႇႁဵတ်းၵိၼ်ႁႆႈၵိၼ်ၼႃးၼႆႉ ၵူၼ်းမိူင်းႁဝ်းၶႃႈၵေႃႈ မီးတၢင်းယၢပ်ႇၽိုတ်ႇ၊ ပေႃးပဵၼ်လွင်ႈငမ်းယဵၼ်မႃးတႄႉ ႁဝ်းၶႃႈဢွၼ်ၵၼ်ႁပ်ႉႁွင်းၵမ်ႉထႅမ် ၼႆၵူၺ်းၶႃႈ ။


ထၢမ် - ပၢင်ၵမ်ႉထႅမ်ၵမ်းၼႆႉ ၽူႈဢွၼ်ႁူဝ် ၸတ်းႁဵတ်းပဵၼ်ၽႂ်လၢႆလၢႆၶႃႈ ?။


တွပ်ႇ - လုၵ်ႉတီႈၽွင်းတႅၼ်း ပေႃႈထဝ်ႈမူဝ်းၵီႇ ဢွၼ်ႁဵတ်းၵႂႃႇ တင်းပီႈၼွင်ႉၵူၼ်းမိူင်းပၼ်ႇၶႃႈ ။


ထၢမ် - မီးၽႂ်မႃးၵၢဝ်ႇလၢတ်ႈၶေႃႈၵႂၢမ်းၽွင်ႈၶႃႈ ?။


တွပ်ႇ - မီးၽွင်းတႅၼ်း ပေႃႈထဝ်ႈမူဝ်းၵီႇ ၵေႃႉလဵဝ်ၵူၺ်းၶႃႈ ။


ထၢမ် - မီးပီႈၼွင်ႉၵူၼ်းမိူင်းပၼ်ႇ မႃးၶဝ်ႈႁူမ်ႈမွၵ်ႈၵႃႈႁိုဝ်ၶႃႈ ?။


တွပ်ႇ - တင်းသဵင်ႈမီး 120 ၵေႃႉ ။ မိူဝ်ႈဝႃးတႄႉႁဝ်းၶႃႈ ႁၢင်ႈႁႅၼ်းဝႆႉပိူင်ၼိုင်ႈ ၊ ယွၼ်ႉလွင်ႈတၢင်းၵူႈပိူင် ၸွမ်းၼင်ႇမၢႆမီႈမီးဝႆႉလႄႈ ႁဝ်းၶႃႈတေလႆႈတၢင်ႇဝႆႉလူင်ႈၼႃႈ 10 ဝၼ်း ။ ၵွပ်ႈၼၼ် ဢၼ်ဢၢၼ်းပႆတၢင်း ၼႄၵၢင်ၸႂ်ၼၼ်ႉ ဢမ်ႇပဵၼ်ၶႃႈ ။ ၵွပ်ႈၼၼ် လႆႈၶိုၼ်းမႄးလၢတ်ႈတီႈ ပီႈၼွင်ႉၼႂ်းဢိူင်ႇၼႂ်းဝၢၼ်ႈဝႃႈ တေႁဵတ်းတီႈႁိူၼ်းပေႃႈထဝ်ႈ မူဝ်းၵီႇၵူၺ်း ။ မိူဝ်ႈဢွၼ်တၢင်းတႄႉ ပီႈၼွင်ႉၶဝ် 1 ပွၵ်ႉ တေမႃးၼပ်ႉႁူဝ်ပၢၵ်ႇမၼ်းလႄႈ တေမီးၵူၼ်းႁဵင်ပၢႆၶႃႈ ။ ၵွပ်ႈၼၼ် တီႈဝၢင်းႁိူၼ်းၵေႃႈမၼ်းၵိတ်ႇလႄႈ ဢွၼ်ၵၼ်မိူဝ်း ၽူႈယႂ်ႇၵူၼ်းလူင်ႁဝ်းၶႃႈ ၵူၺ်းၵေႃႈလႆႈယဝ်ႉ ၊ ႁဝ်းၶႃႈလႆႈႁွင်ႉဝွၵ်ႇဝႆႉ ၸိူင်ႉၼၼ်ၵူၺ်း ။ ႁိူၼ်းပေႃႈထဝ်ႈမူဝ်းၵီႇ မၢႆႁိူၼ်း 9 ၊ ပွၵ်ႉၵၢင်ဝဵင်း မိူင်းပၼ်ႇ ။


ထၢမ် - ဢၼ်ၵူၼ်းဝၢၼ်ႈၵူၼ်းမိူင်း မိူဝ်းတီႈႁိူၼ်းပေႃႈထဝ်ႈမူဝ်းၵျီႇသေ ဢၼ်ႁွင်ႉသႅၼ်ႇၶေႃႈၵႂၢမ်း ၶေႃႈလဵဝ်ၵၼ်ၼၼ်ႉ ၸွင်ႇမီးၶႃႈ ။ ပေႃးမီး ၶေႃႈၵႂၢမ်းၼၼ်ႉ ဝႃႈႁိုဝ်ၶႃႈ ?။


တွပ်ႇ - မီးၶႃႈဢေႃႈ ။ ၶေႃႈၵႂၢမ်းၼၼ်ႉဝႃႈ ၵမ်ႉထႅမ်ႁၼ်လီၸွမ်းလွင်ႈၵတ်းယဵၼ် ။


ထၢမ် - ၵူၼ်းဝၢၼ်ႈပၢၵ်ႇပၢႆၼႆႉ လုၵ်ႉတီႈဝၢၼ်ႈလႂ်လၢႆလၢႆမႃးၶႃႈ ?။


တွပ်ႇ - ဝၢၼ်ႈလၢၼ်း ၊ တွင်ၵႂၢႆး ၊ ႁူဝ်ၾၢႆလူင် ၊ ႁူၺ်ႈမၢၵ်ႇၽိူင်း ၊ ဢိူင်ႇဝူဝ်းလၢႆး ဝၢၼ်ႈပီႈၼွင်ႉလီႉသေႃးၶႃႈ ။ မီးပႃးပီႈၼွင်ႉပဢူဝ်းထႅင်ႈၶႃႈ ။


ထၢမ် - ၵူၼ်းမိူင်းမႃးၽွမ်ႉၵၼ်သေ ႁၼ်ထိုင်ၼိူဝ် NCA ၸိူင်ႉႁိုဝ်ၶႃႈ ?။


တွပ်ႇ - ႁဝ်းၶႃႈႁၼ်ထိုင်ဝႃႈ NCA ဢၼ်လူင်းလၢႆးမိုဝ်းၵႂႃႇၼႆႉ တေမီးပုၼ်ႈၽွၼ်ႈ တႃႇၵူၼ်းမိူင်းႁဝ်းၶႃႈၵႂႃႇငၢႆႈပႆလူမ်သေ ဢမ်ႇၵႃး ၊ ၼင်ႇႁိုဝ်ၵူၼ်းမိူင်းႁဝ်းၶႃႈ တေမီးလွင်ႈပူၵ်းပွင်ၶိုၼ်ႈယႂ်ႇမႂ်ႇသုင် ( ႁုၼ်ႈမႂ်ႇမုၼ်းလႅင်း ) တီႈဢၼ်ၵူၼ်းမိူင်းႁဝ်းၶႃႈ ဢမ်ႇႁူႉလႄႈသင် ၊ တီႈဢၼ်ႁဝ်းၶႃႈ လႆႈၵူဝ်ၵႂႃႇႁူပ်ႉၺႃးၵူၼ်းသိုၵ်းၸိူဝ်းၼႆႉ ႁဝ်းၶႃႈဢမ်ႇမီးယဝ်ႉ ။ ၵွပ်ႈပိူဝ်ႈ ၸိူင်ႉၼၼ်လႄႈ ၵူၼ်းမိူင်းတႆးႁဝ်းၶႃႈၼႆႉ မၼ်းလႆႈဢွၵ်ႇႁႃၵိၼ်ၼႂ်းထိူၼ်ႇၵမ်ႈၼမ်လႄႈ တေႁူပ်ႉမႅၼ်ႈၵၼ်ၵေႃႈတေမီး ။ ၵွပ်ႈပိူဝ်ႈၸိူင်ႉၼၼ်လႄႈ လွင်ႈဢမ်ႇပဵၼ်ထမ်းတြႃးၼၼ်ႉၵေႃႈ မၼ်းတေႁၢႆလၢႆၵႂႃႇသေ ႁဝ်းၶႃႈၵူၼ်းမိူင်း ဢွၼ်ၵၼ်ယိၼ်းၸူမ်းၸွမ်း တႄႉတႄႉၶႃႈဢေႃႈ ။


ထၢမ် - ၵွပ်ႈသင်လႄႈ မႃးၸတ်းၼႂ်းဝၼ်းတီႈ 14-15 ၼႆႉၶႃႈ ၊ မီးလွင်ႈၶိုင်ၵၢၼ်လူင်ႈၼႃႈဝႆႉၶႃႈႁႃႉ ?။


တွပ်ႇ - လွင်ႈၶိုင်ၵၢၼ်လူင်ႈၼႃႈၼၼ်ႉ ဢမ်ႇမီးၶႃႈ ။ ၵွပ်ႈပိူဝ်ႈ ႁဝ်းၶႃႈငိၼ်းၶၢဝ်ႇဝႃႈ ၸုမ်းၶွင်ႊသီႊဢဝ်ၶိုၼ်းၸိုင်ႈတႆးႁဝ်းၶႃႈ တေလူင်းလၢႆးမိုဝ်းယဝ်ႉၼႆ ႁဝ်းၶႃႈပဵၼ်ဢၼ်ႁူမ်ၸူမ်းၸွမ်းသေ ၸတ်းမိူဝ်ႈဝႃး (ဝၼ်းတီႈ 14-15/10/2015) မႃးမိူဝ်ႈၼႆႉ ၶၢဝ်းတၢင်း 2 ဝၼ်းၶႃႈဢေႃႈ ။ ႁဝ်းၶႃႈဝွၵ်ႇပီႈၼွင်ႉ ၽူႈယႂ်ႇၵူၼ်းလူင် ၵူႈပွၵ်ႉၵူႈဢိူင်ႇသေ မႃးႁူပ်ႉထူပ်းၵၼ် ။ လွင်ႈၼႆႉၵေႃႈ လႆႈဢုပ်ႇဢူဝ်းပႃး ၾၢႆႇၸဝ်ႈၼႃႈတီႈလူင်ပွင်ၸိုင်ႈၶဝ် ဝႃႈတေၸတ်းတီႈႁိူၼ်း ပေႃႈထဝ်ႈမူဝ်းၵီႇ ၵႂႃႇၵူၺ်း ။


ထၢမ် - လိုၼ်းသုတ်း ယူႇတီႈပီႈႁဝ်းၶဝ်သေ ယုမ်ႇယမ်လႆႈၼိူဝ် လွင်ႈၵတ်းယဵၼ် (ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း) NCA မွၵ်ႈၵႃႈႁိုဝ်ၶႃႈ ?။


တွပ်ႇ - ဢၼ်ၼႆႉတႄႉ ၸွမ်းၼင်ႇပုတ်ႉထၸဝ်ႈ (ၽြႃးပဵၼ်ၸဝ်ႈ) ႁေႃးဝႆႉဝႃႈ ဢၼိၸ်ႉၸ ဢမ်ႇမၼ်ႈဢမ်ႇၵိုမ်းၼၼ်ႉ မၼ်းမီးယူႇတႃႇသေႇ ။ ႁဝ်းၶႃႈဝႃႈ ၵတ်းယဵၼ်တေႃႇၸူဝ်ႈႁိုဝ်ႉၼႆၵေႃႈ ႁဝ်းၶႃႈဢမ်ႇလၢမ်းလႆႈ ။ ၵွပ်ႈပိူဝ်ႈဝႃႈ ဢၼ်ႁဝ်းၶႃႈႁၼ်မႃးမီးတင်းၼမ် ။ မိူဝ်ႈႁဝ်းၶႃႈတိုၵ်ႉၸူမ်ၼမ်ႉယူႇၼၼ်ႉ သင်ၸိူဝ်ႉဝႃႈႁဝ်းၶႃႈ မီးတိုဝ်ႉတၢင်းၽုတ်းဢွၵ်ႇမႃးၼိူဝ်ၼႃႈၼမ်ႉသေ ထူၺ်ႈၸႂ်လႆႈၵမ်းၼိုင်ႈၼႆ ႁဝ်းၶႃႈတေမီးႁႅင်းၸူမ်ၼမ်ႉ (လမ်ၼမ်ႉ) လႆႈတင်းႁိုင် ။ ၵွပ်ႈၼၼ် ဢၼ်ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆးၶဝ် လူင်းလၢႆးမိုဝ်း NCA ၼႆႉ ႁဝ်းၶႃႈႁၼ်ထိုင်ဝႃႈ တွၼ်ႈတႃႇပီႈၼွင်ႉတႆးႁဝ်းၶႃႈၵူၺ်းဢမ်ႇၵႃး ၊ ပီႈၼွင်ႉၸိူဝ်းယူႇသဝ်းၵိၼ်သၢင်ႈယူႇ ၼႂ်းမိူင်းသၼ်လွႆႁဝ်းၶႃႈတင်းသဵင်ႈၵေႃႈ တေမီးလွင်ႈပၢႆးပၺ်ၺႃလႄႈသင် ၊ ပၢႆးမၢၵ်ႈမီး လွင်ႈထၢင်ႇႁၢင်ႈလႄႈသင် ၊ ၵႃႈၼင်ႇႁဝ်းၶႃႈၶႂ်ႈလဵပ်ႈႁဵၼ်းၼၼ်ႉ တေဢမ်ႇမီးတိုဝ်ႉတၢင်းႁႄႉႁၢမ်ႈၵၼ် ။ ၵဵဝ်ႇၵပ်းလွင်ႈၼၼ်ႉသေ ၸုမ်းယိပ်းၵွင်ႈၵၢင်ႇ RCSS ၵေႃႈ တေပူၵ်းပွင်ပႃး ၵူၼ်းၼုမ်ႇႁဝ်းၶႃႈယူႇ ၊ ႁၼ်ထိုင်ၸိူင်ႉၼၼ်လႄႈ ႁဝ်းၶႃႈယိၼ်းႁူမ်ၸူမ်းၸွမ်း ၸိူင်ႉၼၼ်ၵူၺ်းၶႃႈ ။