ႁူဝ်ပဝ်ႈပႃႊတီႊ ၻီႊမွၵ်းၶရႅတ်ႊတိၵ်ႉပႃႇတီႇၸိူဝ်ႉၶိူဝ်းတႆး (SNDP) ႁိုဝ်ပႃႊတီႊသိူဝ်ၽိူၵ်ႇ လၢတ်ႈဝႃႈၼႂ်းပၢင်လိူၵ်ႈတင်ႈ 2015 ၼႆႉ တေၶတ်းၸႂ်ႁႂ်ႈပႄႉ 9 ၸႄႈဝဵင်းတႃႇႁႂ်ႈပဵၼ် ၽွင်း လူင်ၸႄႈဝဵင်းမိူင်းၶၢင် ။

ၸၢႆးဢၢႆႈပဝ်းလၢတ်ႈၼႄ လွင်ႈဢၼ်လႆႈလူင်းသူၼ်းတုမ် ပီႈၼွင်ႉၵူၼ်းမိူင်းတီႈမိူင်းၶၢင် မိူဝ်ႈဝၼ်းတီႈ 04/10/2015 ဝႃႈ - လူင်းသူၼ်းတုမ်ၵူၼ်းမိူင်း တႃႇတေၶဝ်ႈၶႄႉၶႅင်ႇပၢင် လိူၵ်ႈတင်ႈ 2015 ၼႂ်းမိူင်းၶၢင်ၼႆႉ ပႃႊတီႊသိူဝ်ၽိူၵ်ႇႁႅင်းယႂ်ႇလိူဝ်ပိူၼ်ႈ ၊ လူင်းႁူၺ်းသူၼ်း ၵူၼ်းဝၢၼ်ႈၵေႃႈငၢႆႈလိူဝ်ပိူၼ်ႈၶႅမ်ႉလိူဝ်ပိူၼ်ႈ ဝႃႈၼႆ ။


“ လွင်ႈႁူၺ်းသူၼ်းငၢႆႈလီ ၶႅမ်ႉလႅပ်ႈလီၵူႈလွင်ႈ ပီႈၼွင်ႉတႆးဢၼ်ယူႇၼႂ်းမိူင်းၶၢင်ၵေႃႈလၢတ်ႈဝႃႈ တေၵမ်ႉထႅမ်ပႃႊတီႊသိူဝ်ၽိူၵ်ႇ တႃႇတေႁူၺ်းသူၼ်းတႃႇပႃႊတီႊ သိူဝ်ၽိူၵ်ႇၼႆႉ ၵေႃႈပီႈၼွင်ႉတႆး ဢၼ်မီးၼႂ်းမိူင်းၶၢင်ပၼ်ၵႂၢမ်းမၼ်ႈဝႃႈတေ သႂ်ႇဢဵၼ်ႁႅင်းသေၸွႆႈထႅမ်ၵႂႃႇ ၊ ပီႈၼွင်ႉၼႂ်းပိုၼ်ႉတီႈၵေႃႈ ၸွႆႈထႅမ်ႁဝ်း တႄႉတႄႉဝႃႈဝႃႈ ” သိုပ်ႇလၢတ်ႈထႅင်ႈၼင်ႇၼႆ ။


ပၢင်ႁူၺ်းသူၼ်းၵူၼ်းမိူင်းပွၵ်ႈၵမ်းၼႆႉ ၸတ်းႁဵတ်းတီႈဝတ်ႉ(ၵျွင်း) မႁႃႇသိမ်ႇဝဵင်းမၢၼ်ႈမေႃႇ ၊ ပဵၼ်ဝဵင်းဢၼ်ၼိုင်ႈ ၼႂ်း 9 ၸႄႈဝဵင်းဢၼ်ပႃႊတီႊသိူဝ်ၽိူၵ်ႇ တေလူင်းၶႄႉၶႅင်ႇ ။


မိူင်းၶၢင်ၼႆႉမီး 18 ၸႄႈဝဵင်းၼႂ်းၼၼ်ႉ ပႃႊတီႊသိူဝ်ၽိူၵ်ႇၶဝ်ႈၶႄႉတႃႇ 9 ၸႄႈဝဵင်း ။ ၵူၺ်းၵႃႈၼႂ်းဝဵင်းမိတ်ႉၵျီးၼႃးၼၼ်ႉငဝ်းလၢႆးဢမ်ႇပေႃးလီ ။


မိူဝ်ႈပၢင်လိူၵ်ႈတင်ႈပီ 2010 ၼၼ်ႉပႃႊတီႊသိူဝ်ၽိူၵ်ႇ လႆႈဢွင်ႇပေႉတီႈၼင်ႈၼႂ်းသၽႃး 57 တီႈၼင်ႈ။ပဵၼ်ပႃႊတီႊထီႉ 2 ဢၼ်ဢွင်ႇပႄႉၼမ်လိူဝ်ပိူၼ်ႈၼႂ်းမိူင်းတႆး ။