ၵေႃၵပ်းသၢၼ်ၵူၼ်းၼုမ်ႇတႆး ထုင်ႉမိူင်းယဵၼ် ပိုတ်ႇပၢင်သွၼ် ပိုၼ်ႉထၢၼ် တႅမ်ႈ / လၢတ်ႈၵႂၢမ်းဢိင်းၵလဵတ်ႈ ပွၵ်ႈၵမ်း 1 ၊ မီးၽူႈၶဝ်ႈႁူမ်ႈ လဵပ်ႈႁဵၼ်းၼပ်ႉႁူဝ်ပၢၵ်ႇ ။ ယိူင်းဢၢၼ်း ပိူဝ်ႈတႃႇၵူၼ်းၼုမ်ႇသႅၼ်းႁုၼ်ႈမႂ်ႇ ႁူႉပွင်ႇတႃလႅင်း ။

ပူၼ်ႉမႃးမိူဝ်ႈဝၼ်းတီႈ 01/10/2015 ယၢမ်းၵၢင်ၶမ်ႈ 9 မူင်း ၊ ၵေႃၵပ်းသၢၼ်ၵူၼ်းၼုမ်ႇတႆး ထုင်ႉမိူင်းယဵၼ် ပိုတ်ႇပၢင်ၵႅဝ်ႈ ပၢင်သွၼ် ပိုၼ်ႉထၢၼ် ဢိင်းၵလဵတ်ႈ (English Speaking) ပွၵ်ႈၵမ်း 1 ၊ တီႈထုင်ႉမိူင်းယဵၼ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။ ၽူႈၶိုၼ်ႈႁွတ်ႈလဵပ်ႈႁဵၼ်း မီးၼပ်ႉႁူဝ်ပၢၵ်ႇ ။ ပၢင်ၵႅဝ်ႈၼႆႉ ပိုတ်ႇၵႂႃႇထိုင် ဝၼ်းတီႈ 02/10/2015 ယၢမ်း 12 မူင်း - ၼႆယဝ်ႉ ။


တီႈပၢင်ၵႅဝ်ႈ ပိုတ်ႇပၢင်သွၼ်ၼၼ်ႉ ၸဝ်ႈၼႃႈတီႈ ၸၼ်ႉၸႄႈဝဵင်း ၊ ၽူႈယႂ်ႇၵူၼ်းလူင်ၼႂ်းဢိူင်ႇ / ၸုမ်း / ဝၢၼ်ႈ ၊ ၶွမ်ႊမတီႊပွင်ၵၢၼ် ၵေႃၵပ်းသၢၼ်ၵူၼ်းၼုမ်ႇတႆး မိူင်းတႆးပတ်းပိုၼ်ႉ လႄႈ ပေႃႈမႄႈၵူၼ်းမိူင်း ဢိၵ်ႇ လုၵ်ႈႁဵၼ်း ထုင်ႉမိူင်းယဵၼ်ၸိူဝ်းၼႆႉ ၶဝ်ႈႁူမ်ႈပၢင်ၵႅဝ်ႈၵႂႃႇ ။ လုၵ်ႈႁဵၼ်းမီး 130 ၵေႃႉ ။ ၶၢဝ်းယၢမ်းပၢင်သွၼ် ႁပ်ႉႁွင်းမၵ်းမၼ်ႈပိုတ်ႇတႃႇ 15 ဝၼ်း ၊ မေႃသွၼ်ၸိူဝ်းပူင်သွၼ်ပၼ် ပဵၼ်ၸုမ်းလုၵ်ႈႁဵၼ်း ၵေႃၵပ်းသၢၼ်ၵူၼ်းၼုမ်ႇတႆး မိူင်းတႆးပတ်းပိုၼ်ႉ ပွၵ်ႈၵမ်း 3 သိုပ်ႇႁပ်ႉဢဝ်ပုၼ်ႈၽွၼ်းမေႃသွၼ် ပူင်သွၼ်ၵႂႃႇ ။ မေႃသွၼ်မီး 30 ၵေႃႉ ။


တီႈပၢင်ၵႅဝ်ႈပွႆးပိုတ်ႇပၢင်ၼၼ်ႉ ၵႅမ်ၶုၼ်ႁၢၼ်သၢႆၶမ်း ၽူႈၸတ်းၵၢၼ်ၸႄႈဝဵင်းမၢႆ 17 လၢတ်ႈဝႃႈ -“ ယွၼ်ႉပိူဝ်ႈငဝ်းလၢႆး လူၵ်ႈ (လူဝ်းၵ) တိုၼ်းထုၵ်ႇလီမီး ပုၼ်ႈတႃႇသႅၼ်းႁုၼ်ႈမႂ်ႇ ၼေႃႇတႅၼ်းၶိူဝ်းႁဝ်းၶဝ် ဢၼ်တေသိုပ်ႇပုတ်ႈတိၼ်တၢင်မိုဝ်း ႁဝ်းၶႃႈၵႂႃႇၼၼ်ႉယူႇ ၊ ၾၢႆႇတပ်ႉသိုၵ်းႁဝ်းၶႃႈ ဢၢၼ်းဢဝ်ႁႅင်းတူဝ်ႁႅင်းၸႂ်သေ ၸွႆႈထႅမ်ၵႂႃႇယူႇ ”- ဝႃႈၼႆ ။


ႁူဝ်ပဝ်ႈ ၵေႃၵပ်းသၢၼ်ၵူၼ်းၼုမ်ႇတႆး ထုင်ႉမိူင်းယဵၼ် လုင်းၸၢႆးသၢင်ႇတူး လၢတ်ႈဝႃႈ - “ ႁဝ်းၶႃႈယိၼ်းလီ ႁူမ်ၸူမ်းႁပ်ႉတွၼ်ႈ ပိူဝ်ႈတႃႇတေပိုတ်ႇပၢင်သွၼ်ဢၼ်ၼႆႉၵႂႃႇယူႇ ၊ ၸူမ်းသိူဝ်း တႃႇတေၸွႆႈထႅမ်ၵႂႃႇၵူႈၸိူဝ်ႉၵူႈလွင်ႈ ”- ဝႃႈၼႆ ။


ၵႅမ်ႁူဝ်ပဝ်ႈ ၵေႃၵပ်းသၢၼ်ၵူၼ်းၼုမ်ႇတႆး မိူင်းတႆးပတ်းပိုၼ်ႉ လုင်းငူၺ်ႇယ လၢတ်ႈဝႃႈ -“ ႁဝ်းၶႃႈယၢပ်ႇ / တုၵ်ႉ ၵႃႈႁိုဝ်ၵေႃႈယဝ်ႉ ပိူဝ်ႈတႃႇၵူၼ်းၼုမ်ႇႁဝ်း ႁူႉပွင်ႇတႃလႅင်းၶိုတ်းၵၢပ်ႈပၢၼ်ၼၼ်ႉ တိုၼ်းတေသိုပ်ႇၵပ်းသၢၼ် ႁဵတ်းသၢင်ႈၼႃႈၵၢၼ်ၵႂႃႇယူႇ ”- ဝႃႈၼႆ ။


ဝၢႆးသေပၢင်ၵႅဝ်ႈယဝ်ႉတူဝ်ႈၵႂႃႇ ဢွၼ်ၵၼ်ၶွတ်ႇၽွတ်ႈၶွမ်ႊမတီႊပွင်ၵၢၼ်ပၢင်သွၼ်သေ ႁပ်ႉႁွင်းမၵ်းမၼ်ႈၼႃႈၵၢၼ်ပုၼ်ႈၽွၼ်း ၵၼ်ၵႂႃႇ ။ တႅပ်းတတ်းပႃးပၵ်းပိူင်ပၢင်သွၼ်လႄႈ ၶၢဝ်းယၢမ်းၵၢၼ်ႁဵၼ်း ။ လုၵ်ႈႁဵၼ်းဢၼ်မႃးၶဝ်ႈႁူမ်ႈလဵပ်ႈႁဵၼ်းၼႆႉ ႁပ်ႉႁွင်းဢဝ်ၸၼ်ႉ 4 ၶိုၼ်ႈၼိူဝ် - ၼႆယဝ်ႉ ။


ၵေႃၵပ်းသၢၼ်ၵူၼ်းၼုမ်ႇတႆး ထုင်ႉမိူင်းယဵၼ်ၼႆႉ လုၵ်ႉတီႈၵေႃၵပ်းသၢၼ်ၵူၼ်းၼုမ်ႇတႆး မိူင်းတႆးပတ်းပိုၼ်ႉ ဢွၼ်ၶွတ်ႇၽွတ်ႈမႃးမိူဝ်ႈဝၼ်းတီႈ 27/09/2015 ၼၼ်ႉသေ တႄႇပိုတ်ႇပၢင်သွၼ် ပိုၼ်ႉထၢၼ် ဢိင်းၵလဵတ်ႈ (Basic English Speaking Class) ပွၵ်ႈၵမ်း 1 ၼႆႉ ။ ယိူင်းဢၢၼ်း ပိုတ်ႇပၢင်သွၼ်ၼႆႉ တႃႇႁႂ်ႈၵူၼ်းၼုမ်ႇဝၢၼ်ႈၼွၵ်ႈၼႃးပၢင်ႇ ႁူႉပွင်ႇတႃလႅင်း ၶိုတ်းၸွမ်းၵၢပ်ႈပၢၼ် - ၼႆယဝ်ႉ ။