ႁူဝ်ပဝ်ႈ ပႃႊတီႊၼူၵ်ႉယုင်း (NLD) ၼၢင်းဢွင်ႇသၢၼ်းၸုၵျီႇ လုၵ်ႉတႃႈၵုင်ႈ မႃးသူၼ်းတုမ် ၵဵဝ်ႇၵပ်း ၵၢၼ်လိူၵ်ႈတင်ႈ တီႈဝဵင်းတႃႈၶီႈလဵၵ်း ။ မီးၵူၼ်းၼႂ်းၸႄႈဝဵင်း တႃႈၶီႈလဵၵ်း ၵူၼ်းၶဝ်ႈထွမ်ႇငိၼ်း ၼပ်ႉႁူဝ်ႁဵင် ၊ ၵူၼ်းၼမ် ။


ဝၼ်းတီႈ 21/10/2015 (မိူဝ်ႈဝႃး) ယၢမ်းဝၢႆးဝၼ်း ႁူဝ်ပဝ်ႈ ပႃႊတီႊၻီႊမူဝ်ႊၶရေႊၸီႊၸိူဝ်ႉၸၢတ်ႈ ႁိုဝ် ပႃႊတီႊၼူၵ်ႉယုင်း (NLD) ၼၢင်းဢွင်ႇသၢၼ်းၸုၵျီႇ မႃးသူၼ်းတုမ်ႁႃသဵင် ၵၢၼ်လိူၵ်ႈတင်ႈ (2015) တီႈဝၢင်းလဵၼ်ႈမၢၵ်ႇၼင် တီႈႁွင်ႈလိုၵ်ႉ ၊ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ။ မီးပီႈၼွင်ႉၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းတႃႈၶီႈလဵၵ်းပတ်းပိုၼ်ႉ ၵူႈတီႈ ၵႂႃႇၶဝ်ႈႁူမ်ႈတီႈၼႂ်းပၢင်သူၼ်းတုမ်ၼၼ်ႉ - ၼႆယဝ်ႉ ။


ၵူၼ်းမိူင်းတႃႈၶီႈလဵၵ်း ၵေႃႉၼိုင်ႈလၢတ်ႈဝႃႈ - ၼၢင်းဢွင်ႇသၢၼ်းၸုၵျီႇၼႆႉ လုၵ်ႈတီႈတႃႈၵုင်ႈသေ မႃးႁွတ်ႈၽႅဝ်တီႈတႃႈၶီႈလဵၵ်းၼႆႉ ယၢမ်း 11 မူင်း ၊ မႃးၵၢပ်ႈသွမ်းဝၼ်း (ပဵလ်း) သင်ၶၸဝ်ႈ တီႈဝတ်ႉၼၵႃးသွင်တူဝ် သၼ်သၢႆး ။ ပေႃးယဝ်ႉဝၢႆးဝၼ်း ၸင်ႇလူင်းသူၼ်းတုမ်ပေႃႈမႄႈၵူၼ်းမိူင်း - ဝႃႈၼႆ ။


ၵူၼ်းမိူင်းတႃႈၶီႈလဵၵ်း ထႅင်ႈၵေႃႉၼိုင်ႈ လၢတ်ႈၼႄဝႃႈ - ၵူၼ်းဢၼ်ၵႂႃႇၶဝ်ႈႁူမ်ႈပၢင်သူၼ်းတုမ်ႁႃသဵင် ဢၼ်ၼၢင်းဢွင်ႇသၢၼ်းၸုၵျီႇမႃးၼႆႉမီးၵူၼ်းၵူႈၸၢဝ်းၶိူဝ်း ၼႂ်းၸႄႈဝဵင်းတႃႈၶီႈလဵၵ်းပတ်းပိုၼ်ႉ ၵူႈတီႈၵူႈတၢင်းၵႂႃႇၶဝ်ႈႁူမ်ႈ ၊ ၵူၼ်းၼမ်တႄႉတႄႉ ။ သင်ဝႃႈ ၶဝ်ႈၵႂႃႇတီႈၼႂ်းဝၢင်းမၢၵ်ႇၼင်ယဝ်ႉ ဢွၵ်ႇမႃးဢမ်ႇလႆႈ ၊ ၵွပ်ႈၵူၼ်းၵိုၼ်းႁႅင်းလိူဝ်လႄႈ ၶဝ်ႈယၢပ်ႇဢွၵ်ႇယၢပ်ႇ ။ ပွႆးပီမႂ်ႇတႆးယင်းဢမ်ႇၵိုၼ်းပဵင်းၼႆႉ ၊ ဢၼ်ၼၢင်းဢွင်ႇသၢၼ်းၸုၵျီႇမႃးၼႆႉ ပဵၼ်ဢၼ်ၵိုၼ်းလူင်ၵိုၼ်းလၢင် လၢၵ်ႇလၢႆးတႄႉတႄႉ - ဝႃႈၼႆ ။


“ သင်ဝႃႈ ၽွင်းတႅၼ်းၵေႃႉလႂ်ၶိုၼ်ႈမႃးသေဢမ်ႇဝႃႈ ၊ ဢမ်ႇဝႃႈပႃႊတီႊလႂ် ၊ သင်ဝႃႈႁဵတ်းႁႂ်ႈၵူၼ်းမိူင်းႁဝ်းလႆႈ ၵႃႉၶၢႆထၢင်ႇႁၢင်ႈလွတ်ႈလႅဝ်းၵေႃႈ ႁဝ်းၶႃႈႁၢၼ်ႉၸႂ်ယဝ်ႉ ” - ၵူၼ်းမိူင်းၵေႃႉၼိုင်ႈ သိုပ်ႇလၢတ်ႈ ။


တီႈပၢင်သူၼ်းတုမ်ၼၼ်ႉ ၼၢင်းဢွင်ႇသၢၼ်းၸုၵျီႇ လၢတ်ႈတိုၵ်းသူၼ်း ထိုင်ပေႃႈမႄႈၵူၼ်းမိူင်းဝႃႈ - ၵူၼ်းမိူင်းႁဝ်းလႄႈသင် ၊ ၵူႈၸၢဝ်းၶိူဝ်းလႄႈသင် တေၶတ်းၸႂ်ႁဵတ်းႁႂ်ႈမီးလွင်ႈၽဵင်ႇပဵင်း ။ ဢၼ်ပေႃႈမႄႈၵူၼ်းမိူင်း ထူပ်းတၢင်းတုၵ်ႉၶယၢပ်ႇၽိုတ်ႇၼၼ်ႉ ပႃႊတီႊ NLD တေၶတ်းၸႂ်ပူၵ်းပွင်ပၼ်ၵူၼ်းမိူင်း ၊ ၼင်ႇႁိုဝ်ၵူၼ်းမိူင်း ပေႃးတေလႆႈမီးလွင်ႈထၢင်ႇႁၢင်ႈလွတ်ႈလႅဝ်း - ဝႃႈၼႆ ။


ဢၼ်လၢၵ်ႇလၢႆးမၼ်း ၵူၼ်းမိူင်းၸိူဝ်းၵႂႃႇ ၶဝ်ႈႁူမ်ႈပၢင်သူၼ်းတုမ်လႄႈသင် ၊ ၸွမ်းရူတ်ႉၶိူင်ႈလႄႈသင် ၊ ၸွမ်းရူတ်ႉၵႃးၸိူဝ်းၼႆႉ ဢွၼ်ၵၼ်တိတ်း ပၢႆႉသတိတ်ႊၵိူဝ်ႊ / ပူဝ်ႊသတိူဝ်ႊ NLD ႁၢင်ႈၼူၵ်ႉယုင်း ။ မၢင်ၵေႃႉသႂ်ႇသိူဝ်လႅင် NLD ၊ မၢင်ၵေႃႉၶဵၼ်းၽႅၼ်ႇမတ်ႉႁူဝ် NLD လႄႈ ယိပ်းတုင်းပႃႊတီႊ NLD ၵၼ် - ၼႆယဝ်ႉ ။


ဝၼ်းတီႈ 22/10/2015 (မိူဝ်ႈၼႆႉ) ၼၢင်းဢွင်ႇသၢၼ်းၸုၵျီႇ တေသိုပ်ႇၵႂႃႇႁႃသဵင် တၢင်းမိူင်းၽျၢၵ်ႈ ၊ ဝၢႆးၼၼ်ႉ တေသိုပ်ႇၵႂႃႇၵဵင်းတုင် ။ တီႈၵဵင်းတုင်ၼၼ်ႉ ဢွင်ႈတီႈသူၼ်းတုမ် ႁႃသဵင် တေၸတ်းႁဵတ်းတီႈႁူဝ်ၵၢတ်ႇ ဝဵင်းၵဵင်းတုင် - ၼႆယဝ်ႉ ။