ႁူဝ်ပဝ်ႈပႃႊတီႊႁူဝ်သိူဝ် ၶုၼ်ထုၼ်းဢူး ႁွတ်ႈၽႅဝ်ဝဵင်းၼမ်ႉၶမ်းသေ ပိုတ်ႇလုမ်းမႂ်ႇ ၊ သူၼ်းတုမ် ႁႃသဵင် တွၼ်ႈတႃႇပၢင်လိူၵ်ႈတင်ႈ တီႈဝဵင်းၼမ်ႉၶမ်း ၊ မီးၵူၼ်းၶဝ်ႈႁူမ်ႈႁဵင်ပၢႆ ။

ပႃႊတီႊႁူဝ်သိူဝ် သူၼ်းတုမ် ႁႃသဵင်ပၢင်လိူၵ်ႈတင်ႈ တီႈဝဵင်းၼမ်ႉၶမ်း

ဝၼ်းတီႈ 21/10/2015 (မိူဝ်ႈဝႃး) ၼႆႉ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ပိုတ်ႇလုမ်းမႂ်ႇ တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။ တူဝ်ႁူဝ်ပဝ်ႈ ၸဝ်ႈၶုၼ်ထုၼ်းဢူး ႁွတ်ႈၽႅဝ်ဝဵင်းၼမ်ႉၶမ်း ၵၢဝ်ႇလၢတ်ႈၶေႃႈၵႂၢမ်း တီႈပၢင်ပွႆးၵၢင်ဝဵင်းၼမ်ႉၶမ်း ၊ ၵူၼ်းၶဝ်ႈႁူမ်ႈ 2 ႁဵင်ပၢႆ ။


ၸဝ်ႈၶုၼ်ထုၼ်းဢူးလၢတ်ႈဝႃႈ - “ ႁဝ်းၶႃႈၼႆႉ ဢမ်ႇလႆႈၶဝ်ႈႁူမ်ႈပႃး ၼႂ်းပၢင်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း ။ ႁဝ်းၶႃႈၵေႃႈႁၼ်ထိုင်ဝႃႈ ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်း ၵိုင်ႇထုၵ်ႇလႆႈၶဝ်ႈပႃး ၊ ပေႃးၶဝ်ၶဝ်ႈပႃးတင်းမူတ်းၵွၼ်ႇ ႁဝ်းၶႃႈၸင်ႇၶဝ်ႈလူင်းလၢႆးမိုဝ်းၸွမ်း ။ မိူဝ်ႈလဵဝ် ပၢင်တိုၵ်းၵေႃႈဢမ်ႇပႆႇယဵၼ် ၊ ၵွပ်ႈၼၼ် ဢမ်ႇလႆႈၶဝ်ႈပႃး ၼႂ်းပၢင်လူင်းလၢႆးမိုဝ်းၼၼ်ႉ ”- ၸၢႆးဝၼ်းလႅင်း ၼေႃႇၽူႈတႅၼ်းသၽႃးၸိူဝ်ႉၶိူဝ်း ၶိုၼ်းသိုပ်ႇၶႆႈၼႄ ၼင်ႇၼႆ ။


ၸၢႆးဝၼ်းလႅင်း ဢၼ်ၵႂႃႇၸွမ်းၶၢဝ်းတၢင်း ႁူဝ်ပဝ်ႈၸဝ်ႈၶုၼ်ထုၼ်းဢူး သိုပ်ႇလၢတ်ႈဝႃႈ - ဢၼ်မႃးၶဝ်ႈႁူမ်ႈၼႆႉ မီးၵူၼ်းႁူဝ်ႁဵင် ၊ ယုမ်ႇယမ်ဝႃႈ ၵူၼ်းဝၢၼ်ႈၵူၼ်းမိူင်း ၶဝ်ႈၸႂ်ၼိူဝ်ပႃႊတီႊႁူဝ်သိူဝ်မႃးယဝ်ႉ ။ ဢိင်ၼိူဝ် ၵၢၼ်ဝၢၼ်ႈၵၢၼ်မိူင်း ပိၼ်ႇပႅင်လႅၵ်ႈလၢႆႈမႃးသေ ပႃႊတီႊႁူဝ်သိူဝ်ၵေႃႈ လႆႈၶဝ်ႈလိူၵ်ႈတင်ႈ ။ ၵွပ်ႈၼၼ်လႄႈ လႆႈလူင်းႁႃသဵင် ။ ၾၢႆႇၼိုင်ႈၵေႃႈ ဢိင်ၼိူဝ်ၵူၼ်းမိူင်းလႆႈ ဢၢၼ်ႇၶၢဝ်ႇၼႂ်းၼႅင်ႈၵၢၼ်သိုဝ်ႇ (Social media) ၸိူဝ်းၼႆႉသေ လႅပ်ႈတေၶဝ်ႈၸႂ်မႃးထႅင်ႈ ၊ ယွၼ်ႉၼၼ် ၸင်ႇမႃးတီႈဝဵင်းၼမ်ႉၶမ်းၼႆႉ - ဝႃႈၼႆ ။


ၽူႈယႂ်ႇၵူၼ်းလူင် ပႃႊတီႊႁူဝ်သိူဝ် တီႈဝဵင်းၼမ်ႉၶမ်း ၵေႃႈလၢတ်ႈဝႃႈ - ဢမ်ႇထၢင်ႇဝႃႈၵူၼ်းမႃးၶဝ်ႈႁူမ်ႈ တေၼမ်မွၵ်ႈၼႆႉ ။ ဢၼ်လႆႈႁၼ်ၵူၼ်းမႃးႁပ်ႉတွၼ်ႈ ၼမ်ၼမ်ၸိူင်ႉၼႆၵေႃႈ ၸႂ်လီ ။ ၵွပ်ႈၼၼ် ဢၼ်တေႁဵတ်းၵၢၼ်ၵႂႃႇတၢင်းၼႃႈၼႆႉ ယုမ်ႇယမ်ဝႃႈ တေဢမ်ႇၵူဝ်ဢမ်ႇဢၢႆ ၊ တေၵပ်းသိုပ်ႇမိုတ်ႈၵိုဝ်း ၶဝ်ႈႁႃၵၼ်သေ ႁဵတ်းသၢင်ႈၵႂႃႇ - ဝႃႈၼႆ ။


ၸၢႆးဝၼ်းလႅင်း သိုပ်ႇလၢတ်ႈထႅင်ႈဝႃႈ - မိူဝ်ႈလဵဝ်ၼႆႉ ၵူၼ်းဝၢၼ်ႈၵူၼ်းမိူင်းၵေႃႈ ႁပ်ႉႁူဝ်သိူဝ်မႃးၼမ်ယဝ်ႉ ။ တူဝ်ၸဝ်ႈၶုၼ်ထုၼ်းဢူးၵေႃႈမႃးလႄႈ ၵူၼ်းဝၢၼ်ႈၵူၼ်းမိူင်း ၶႅၼ်းမႃးႁူမ်ၸူမ်းႁပ်ႉတွၼ်ႈၼမ် ၊ တၢင်းပွတ်းသႅၼ်ဝီ ၵျွၵ်ႉမႄးၸိူဝ်းၼႆႉၵေႃႈ မိူၼ်ၼင်ႇၼၼ်ယဝ်ႉ ။ ပေႃးယုမ်ႇၶၢဝ်ႇၽၢင်းၶၢဝ်ႇလိုဝ်း ၸိူဝ်းၼႆႉတႄႉ မၼ်းတေဢမ်ႇလၢၵ်ႇလၢႆးသင်မႃး ၊ ပေႃးဢမ်ႇလႆႈလူင်းပိုၼ်ႉတီႈသေ ႁဵတ်းၸိူင်ႉၼႆၼႆႉ ဢမ်ႇလႆႈႁူႉတီႈပွင်ႇမၼ်း - ဝႃႈၼႆ ။