ဢိင်ၼိူဝ် သုၼ်ႇလႆႈၸွမ်းၶေႃႈမၵ်းမၼ်ႈပၢင်လူင် ပီ 1947 ဢမ်ႇပဵၼ်ဢမ်ႇလႆႈ ထုၵ်ႇပိူၼ်ႈ (မၢၼ်ႈ) လႅၼ်ၵူတ်ႉၵဝ်းၵႂႃႇလႄႈ တႄႇဢဝ်ပီ 1958 တႆးၶတ်းႁႅင်းလုၵ်ႉၽိုၼ်ႉ တႃႇတိုၵ်းတုၵ်းဢဝ်လႆႈၶိုၼ်းသုၼ်ႇလႆႈ မႃးတေႃႇယၢမ်းလဵဝ် ၶၢဝ်းတၢင်း 50 ပီပၢႆ ၸုမ်းသိုၵ်းလုၵ်ႉၽိုၼ်ႉ ၵိူတ်ႇၵေႃႇတင်ႈမီးမႃး ၸုမ်းသိုပ်ႇၸုမ်း ပၢၼ်သိုပ်ႇပၢၼ် ၵဝ်လူမ်ႉမႂ်းလုၵ်ႉ ၵဝ်ယၢႆႈမႂ်းတႄႇ သိုပ်ႇသႄႇၶတ်းၸႂ် ႁတ်းတိုၵ်းတေႃးမႃးယူႇၵေႃႈ တေႃႈပႆႇႁွတ်ႈယွတ်ႈၽူၺ်းပၢႆ ယိူင်းမၢႆဢၢင်ႈဢၢၼ်းလႆႈ ။

ၸုမ်းလႂ်ၽႂ်ဢွၼ်ႁူဝ် ၵွၼ်းၵၼ်းၵေႃႈဝႃႈ ႁဵတ်းၵၢၼ်ၸိူဝ်ႉၸၢတ်ႈ ဢၢၼ်းတိုၵ်းဢဝ်ၶိုၼ်းသုၼ်ႇလႆႈ တိုၵ်းႁႃႁႂ်ႈၸိုင်ႈတႆးလႆႈပူတ်းပွႆႇလွတ်ႈလႅဝ်းၵွၼ်းၶေႃ ၊ ဢမ်ႇလႆႈၼင်ႇၶေႃႈဢဵၼ်းဢၢၼ်း တိုၼ်းဢမ်ႇမီးဝၼ်းၵူမ်ႈၵွမ်းၼွမ်းႁူဝ်တေႃႇၶဵၼ်လိူင်းမိူၵ်ႈ ဢမ်ႇလိူၵ်ႈလၢႆးဢၢၼ်းႁဵတ်း ၵၢၼ်လုၵ်ႉၽိုၼ်ႉငၢႆးၾႆးၽိူင်း ၊ ဢဝ်ၶေႃႈၵႂၢမ်းၸိူဝ်းၼႆႉ ပဵၼ်ၶေႃႈတိုၵ်းသူၼ်းပူၵ်းတိုၼ်ႇ ၵူၼ်းမိူင်း ၸႂ်ယႂ်ႇၵမ်ႉထႅမ်ယွမ်းပိုၼ်ႉပွႆႇသုၼ်ႇတူဝ် (ၸုၼ်ႉ) လႅၼ်ႈၸွမ်းမႃး တႄႇယၢမ်းၼၼ်ႉထိုင်ၶၢဝ်းၼႆႉ ပၢၼ်သိုပ်ႇပၢၼ်မႃးၸုမ်းသိုပ်ႇၸုမ်း ၵွႆၵႂႃႇလၢႆၸုမ်း တႄႇမႂ်ႇလၢႆၸုမ်း ၵိုတ်းယူႇလၢႆၸုမ်း တိုၵ်းၽႂ်တိုၵ်းမၼ်း ပၼ်ႇတူင်ႇထူင်ႇထူၺ်ႈ ဢမ်ႇထိုင်ယိူင်းမၢႆၵူၼ်းမိူင်းၵူၼ်းသိုၵ်းတုၵ်ႉၶပၢႆႈႁၢႆတၢႆၼမ် ၼပ်ႉဢမ်ႇလႆႈ ။


တေႃႇမႃးထိုင်ပီ 2011 ပူၼ်ႉမႃး ဢိင်ၼိူဝ်ငဝ်းလၢႆးလႅၵ်ႈလၢႆႈ ယွၼ်ႉလုမ်ႈၾႃႉမိပ်ႇငႅၼ်းၵေႃႈႁင်းမၼ်း ၊ ယွၼ်ႉၾႆးၼႂ်းမိူင်းလုၵ်ႉႁုပ်ႇႁႅင်းမႃးၵေႃႈဝႃႈ ၶဵၼ်လိူင်းလႅတ်းၼင်ႇမၢၼ်ႈၶဝ် ဢၼ်တွၵ်ႇၸိုဝ်ႈမႂ်ႇ သႂ်ႇႁဵၵ်ႈႁွင်ႉဝႃႈ လူင်ပွင်ၸိုင်ႈမိူင်းႁူမ်ႈတုမ်မႅၼ်ႇမႃႇ ဢၼ်မီးဢူးတဵင်းၸဵင်ႇပဵၼ်ၵဝ်ႉၵၼ်း ၶတ်းႁၢင်ၵွၼ်းႁူဝ်ၼၼ်ႉ ၸင်ႇလႆႈပိုၼ်ၽၢဝ်ႇယိုၼ်းမိုဝ်းသၢင်ႈလွင်ႈငမ်းယဵၼ် တင်းၸုမ်းၸၢဝ်းၶိူဝ်းလုၵ်ႉၽိုၼ်ႉမႃး။ ဝၢႆးပိုၼ်ၽၢဝ်ႇဢမ်ႇႁိုင် (ဝၼ်းထီႉ 2 လိူၼ်ၻီႊသႅမ်ႊၿိူဝ်ႊ 2011) ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ဢၼ်ၸဝ်ႈယွတ်ႈသိုၵ်းဢွၼ်ႁူဝ် ပဵၼ်ၸုမ်းၵႅၼ်ႇၶႅင်ႁႅင်းၵိုမ်းၸိုဝ်ႈယႂ်ႇလုၵ်ႉၽိုၼ်ႉတိုၵ်းမၢၼ်ႈ လႆႈၶဝ်ႈၼႂ်းႁူမ်ႈလွၵ်းငမ်းယဵၼ် လုၵ်ႉတီႈၸုမ်းသိုၵ်းၶတ်းၶဵၼ် ယဵၼ်းပဵၼ်ၸုမ်းသိုၵ်းၵတ်းယဵၼ်ၵႂႃႇ ပဵၼ်ၸုမ်းဢွၼ်တၢင်းသုတ်း ။


ဝၢႆးၼၼ်ႉ မီးၸုမ်းသိုၵ်းၸၢဝ်းၶိူဝ်းလုၵ်ႉၽိုၼ်ႉလၢႆမူႇလၢႆၸုမ်း ႁပ်ႉႁၼ်လီၽႅၼ် ယိုၼ်ႈယွၼ်းမၢၼ်ႈထႅင်ႈသေ ဢွၼ်ၵၼ်ၸွမ်းၵႂႃႇဢဝ်ငမ်းယဵၼ်ယွတ်းယွတ်းယႅတ်းယႅတ်း ၸိူဝ်းၶဝ်လၢတ်ႈဝႃႈ တိုၵ်းလူၺ်ႈၵွင်ႈမႃးႁိုင် ဢမ်ႇထိုင်လႆႈယိူင်းမၢႆ ၶိုင်လၢႆးၽႅၼ်မႂ်ႇ လူၺ်ႈၸႂ်ႉၵႂၢမ်းဢုပ်ႇတိုၵ်းသႂ်ႇ ႁႆႇၵၼ်ၼိူဝ်ၽိူၼ် ယူဝ်ၶေးၸၢင်ႈလႆႈ ထိုင်ယွတ်ႈႁွတ်ႈပၢႆၽူၺ်းမုင်ႈယူႇႁိုဝ် ဝႃႈၼႆသေ ဢွၼ်ၵၼ်လူင်းလၢႆးမိုဝ်းၵိုတ်းယိုဝ်းၵၼ် တင်းလူင်ပွင်ၸိုင်ႈမၢၼ်ႈမႃး ၼႂ်းၶၢဝ်းတၢင်း 3 ပီပၢႆၼႆႉ ဢုပ်ႇၵၼ် လႆႈၸႂ်ၵၼ်လူင်းလၢႆးမိုဝ်းၵၼ်ယဝ်ႉ လၢႆၸၼ်ႉလၢႆၵမ်း ၊ ၵူၺ်းၵႃႈ ထိုင်မိူဝ်ႈလဵဝ်ၵေႃႈ ယင်းမီးၵၢၼ်တိုၵ်းယိုဝ်းၵၼ် ပဵၼ်တီႈပဵၼ်ပွတ်း ဢမ်ႇၶၢတ်ႇဢမ်ႇယဵၼ် ပႆႇပဵၼ်မႃးလႆႈလွင်ႈငမ်းယဵၼ်တႄႉတႄႉဝႃႈဝႃႈ ။


မိူဝ်ႈၸုမ်း RCSS/SSA ၸဝ်ႈယွတ်ႈသိုၵ်း တႄႇၶဝ်ႈဢဝ်ငမ်းယဵၼ် မီးသဵင်မေႃးပၼ်ထတ်းသၢင်ၵၼ် ၼႂ်းၽူႈၸိူဝ်းႁၼ်လီ ဢမ်ႇႁၼ်လီၸွမ်းတင်းၼမ် ၊ ၸိူဝ်းႁၼ်လီၵေႃႈဝႃႈ တိုၵ်းမႃးႁိုင်ၵေႃႈ ဢမ်ႇထိုင်လႆႈယွတ်ႈယိူင်းမၢႆ ၶိုင်လၢႆးၽႅၼ်မႂ်ႇ ယူဝ်ၸၢင်ႈတူၵ်းတီႈလီသေဢွၼ် တွၼ်းသေၵဝ်ႇႁိုဝ် ၊ ၸိူဝ်းဢမ်ႇႁၼ်လီ သမ်ႉပွင်ႉၼႄးဝႃႈ ယွတ်ႈသိုၵ်းပဵၼ်ယွၵ်းသုတ်းယဝ်ႉ ၊ ဢဝ်ၸိုဝ်ႈတႆးၼဝ်ႈ ၶဝ်ႈၼွမ်းတေႃႇၶဵၼ် ဢမ်ႇပဵၼ်ၵေႃႉငၢၼ်မိူၼ်ယၢမ်ႈလၢတ်ႈမႃး ဢၢၼ်းတိုၵ်းတၢႆတေႃႇတဵင်ႉ ၊ ဢမ်ႇဢၢၼ်းၵူမ်ႈႁူဝ်တေႃႇၶဵၼ် ၊ ၵၢၼ်ၵိုတ်းသိုၵ်းၵတ်းယဵၼ် မီးပိုၼ်းလီႁၢႆႉပဵၼ်ႁိုဝ် လၢႆၸုမ်းပၼ်ႁဵၼ်းႁူႉႁၼ်ယူႇၵေႃႈ ထၢင်ႇၶဵၼ်ပဵၼ်ဢူၺ်းလီ လိုမ်းပႅတ်ႈၵၢၼ်ဢၢင်ႈဢၢၼ်းၵႂႃႇယဝ်ႉလူး - ဝႃႈၼႆ ။


ဝႃႈၼၼ် ဝႃႈၼႆ ယူႇၵႂႃႇယဝ်ႉၵႂႃႇပူၼ်ႉၵႂႃႇ ငမ်းယဵၼ်ၵႂႃႇ တိုၵ်းၵၼ်ၵႂႃႇ ႁဵတ်းၵႂႃႇႁဵတ်းမႃး မၢၼ်ႈသိုပ်ႇၽႅၼ်လၢႆးတိုၵ်းယဵၼ် ဢၢၼ်းၸၼ်ၶဵၼ်ၶဝ်ႈတူင်ႇၸွမ်းတၢင်း တမ်းဝၢင်းထႅင်ႈသေ ယိုၼ်ႈယွၼ်း ႁႂ်ႈၸုမ်းၸၢဝ်းၶိူဝ်း လူင်းလၢႆးမိုဝ်းၵိုတ်းယိုဝ်းပတ်းပိုၼ်ႉတူဝ်ႈမိူင်း (Nationwide Ceasefire Agreement-NCA) လၢတ်ႈဝႃႈ ၸုမ်းလႂ်ၽႂ်ႁပ်ႉ တေမီးသုၼ်ႇဢုပ်ႇလၢတ်ႈ ယိုၼ်ႈယွၼ်းသုၼ်ႇလႆႈတၢင်းၵၢၼ်မိူင်း ဢိင်ယွၼ်ႉၶေႃႈယိုၼ်ႈဝွၼ်းၼႆႉသေ မီးၸုမ်းသိုၵ်းယိပ်းၵွင်ႈၸၢဝ်းၶိူဝ်းႁူမ်ႈ 8 ၸုမ်း (ပႃးတင်းၸုမ်း RCSS/SSA) ႁပ်ႉႁၼ်လီ ယၢင်ႈၸွမ်းၽႅၼ် တူၵ်းလူင်းတႅၵ်ႇလႅင်း ထႅင်ႈ 10 ၸုမ်းပၢႆ ပူၵ်းမိုဝ်းပၢၵ်ႈပႅတ်ႈ ဢမ်ႇႁပ်ႉ လူၺ်ႈလၢတ်ႈဝႃႈ မိူဝ်ႈလႂ်လူင်ပွင်ၸိုင်ႈၸုမ်းသိုၵ်းမၢၼ်ႈ ပိုတ်ႇတၢင်းႁပ်ႉသၢင်ႈလႆႈလွင်ႈငမ်းယဵၼ် တင်းၸုမ်းၸၢဝ်းၶိူဝ်းၵူႈမူႇၵူႈၸုမ်းၵွၼ်ႇယဝ်ႉ ၸင်ႇတေတႅပ်းတတ်း ၊ မိူဝ်ႈလဵဝ် ယင်းမီးၸုမ်းသိုၵ်းၵမ်ႈၽွင်ႈ ယင်းပႆႇလႆႈႁပ်ႉပဵၼ်ၸုမ်းၵိုတ်းယိုဝ်း ။ ပေႃးဝႃႈၸုမ်းလူင်ပွင်ၸိုင်ႈမၢၼ်ႈ ၶႂ်ႈလူင်းလၢႆးမိုဝ်းၵိုတ်းယိုဝ်းပတ်းပိုၼ်ႉတူဝ်ႈမိူင်း မိူၼ်ဝႃႈမႃးၼၼ်ႉ ထုၵ်ႇလီၵိုတ်းယိုဝ်းတေႃႇၵူႈၸုမ်း - ဝႃႈၼႆ ။


ၸုမ်းသိုၵ်းၸၢဝ်းၶိူဝ်း ယိပ်းၵွင်ႈၵၢင်ႇ ၼႂ်းမိူင်းႁူမ်ႈတုမ်မၢၼ်ႈ မီးတင်းမူတ်း 20 ၸုမ်း၊ ဢၼ်လႆႈတူၵ်းလူင်း တေႁူမ်ႈလူင်းလၢႆးမိုဝ်းၵိုတ်းယိုဝ်းပတ်းပိုၼ်ႉ တူဝ်ႈမိူင်း 8 ၸုမ်း ၸႅၵ်ႇပဵၼ်ၸုမ်းသိုၵ်းယၢင်း 3 ၸုမ်း ၊ ပဢူဝ်း 1 ၸုမ်း ၊ ၶျၢင်း 1 ၸုမ်း ၊ ရၶႅင်ႇ 1 ၸုမ်း ၊ ၸုမ်းသိုၵ်းလုၵ်ႈႁဵၼ်း ABSDF လႄႈၸုမ်းတႆး RCSS/SSA ၊ ၸုမ်းသိုၵ်းဢၼ်ဢမ်ႇလႆႈၸႂ် ႁပ်ႉလူင်းလၢႆးမိုဝ်းမီး 12 ၸုမ်း ၊ ၼႂ်းမိူင်းတႆး မီးၸုမ်းဝၢၼ်ႈႁႆး SSPP/SSA ၊ ၸုမ်းဝႃႉ UWSA ၊ ၸုမ်းမိူင်းလႃး NDAA ၊ ၸုမ်းပလွင်ႈ TNLA ၊ ၸုမ်းရၶႅင်ႇ AA ၊ ၸုမ်းၵူဝ်းၵၢင်ႉ MNDAA လႄႈၸုမ်းဝႃႉ WNA ။ ပၢင်လူင်းလၢႆးမိုဝ်းပဵၼ်တၢင်းၵၢၼ် တေၸတ်းႁဵတ်းၼႂ်းဝၼ်းထီႉ 15/10/2015 ၼႆႉ ။


ၵဵဝ်ႇလူၺ်ႈလွင်ႈ လူင်းလၢႆးမိုဝ်းၵိုတ်းယိုဝ်းပတ်းပိုၼ်ႉ တူဝ်ႈမိူင်း (NCA) ၼႆႉ မိူဝ်ႈဝၼ်းထီႉ 08/10/2015 ပူၼ်ႉမႃး ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ပိုၼ်ၽၢဝ်ႇသပ်းလႅင်းၸႅင်ႈၼႄ ပဵၼ်တၢင်းၵၢၼ်ဝႃႈ - ပိူဝ်ႈတႃႇႁပ်ႉႁွင်းပၼ်လႆႈ သုၼ်ႇလႆႈသုၼ်ႇပဵၼ်လွင်ႈၽဵင်ႇပဵင်း လွင်ႈတႅပ်းတတ်းတူဝ်ၵဝ်ႇ ၊ ပိူင်ၾႅတ်ႊၻရႄႊလ် ၻီႊမူဝ်ႊၶရေႊၸီႊ ၸွမ်းၼင်ႇၶေႃႈလႆႈၸႂ်ပၢင်လူင်သေ တင်ႈမိူင်းႁူမ်ႈတုမ်ၸွမ်းၵၼ်လႄႈ RCSS/SSA ၸင်ႇလႆႈတႅပ်းတတ်း လူင်းလၢႆးမိုဝ်း NCA သေ တေသိုပ်ႇၶဝ်ႈႁူမ်ႈပၢင်ဢုပ်ႇဢူဝ်းၵၢၼ်မိူင်း ႁူမ်ႈၵႄႈၶႆပၼ်ႁႃၵၢၼ်မိူင်းၵႂႃႇ - ဝႃႈၼႆ ။


ၸွမ်းၼင်ႇပိူင်ၽႅၼ် တမ်းဝၢင်းလူင်ပွင်ၸိုင်ႈမၢၼ်ႈ ဢၼ်လၢႆၾၢႆႇၶၢတ်ႈလၢမ်း ၵၢၼ်လူင်းလၢႆးမိုဝ်းၶၵ်ႉတွၼ်ႈ NCA ဢၼ်မူႇၸုမ်းၸိူဝ်းႁူမ်ႈလူင်းလၢႆးမိုဝ်း တေၸၢင်ႈလႆႈၼမ်ႉတွၼ်းၼၼ်ႉ မီးမိူၼ်ၼင်ႇ 1.တေထုၵ်ႇပူတ်းထွၼ်ဢွၵ်ႇၸုမ်းၼွၵ်ႈမၢႆမီႈ ။ 2. ၸၢင်ႈလႆႈပိုၼ်ႉတီႈၵေႃႇသၢင်ႈ ၵၢၼ်ပူၵ်းပွင် ၼင်ႇယၢမ်ႈတူၵ်းလူင်းၵၼ် ။ 3. မီးတိုဝ်ႉတၢင်းႁဵတ်းသၢင်ႈပၢႆးမၢၵ်ႈမီး တဵမ်ထူၼ်ႈ ။ 4.မီးတိုဝ်ႉတၢင်းဢုပ်ႇဢူဝ်းၵၢၼ်မိူင်း ၸိူဝ်းၼႆႉ ။


ၸိူင်ႉႁိုဝ်ၵေႃႈလီ ဝၢႆး RCSS/SSA ပိုၼ်ၽၢဝ်ႇလွၵ်းၸုၵ်းတႅၵ်ႇလႅင်းၵႂႃႇ ဢမ်ႇလွတ်ႈသဵင်ထတ်းသၢင် ပွင်ႉၶၢင်း ၼႂ်းမူႇၵူၼ်း တူင်ႇဝူင်းၵၢၼ်မိူင်းၶဝ်ထႅင်ႈ ၊ မၢင်ၸိူဝ်းဢၼ်ပဵၼ်ၸႂ်လိူတ်ႇမႆႈ လူမ်းၶိုၼ်ႈမေႃးၽိုဝ်ႉၽိုဝ်ႉ ၊ သဵင်လၢႆၾၢႆႇလၢႆတၢင်း ဢၼ်ထတ်းသၢင်မေႃး ယိၼ်းမီးမႃးဝႃႈ - ၵၢၼ်သၢင်ႈလွင်ႈငမ်းယဵၼ်ၸိုင်ႈမိူင်းၼႆႉ တိုၼ်းလီလႆႈပဵၼ် ၊ ၵွပ်ႈယွၼ်ႉဝၢၼ်ႈမိူင်းဢမ်ႇငမ်းယဵၼ် ၵတ်းယဵၼ်လႄႈ ဢမ်ႇမီးလွင်ႈၶိုၼ်ႈယႂ်ႇ ၊ ၵူၼ်းမိူင်းထုၵ်ႇတူတ်ႈ (ၶၢမ်ႇတၢမ်ႇ) တုၵ်ႉၶၵိၼ်းၸႂ် ၊ ၵူၺ်းၵႃႈ ၽွင်းယၢမ်းငဝ်းလၢႆးၼႂ်းၸိုင်ႈတႆး တိုၵ်ႉယုင်ႈယၢင်ႈ မီးၸုမ်းသိုၵ်းယိပ်းၵွင်ႈၵၢင်ႇၼမ်လၢႆၼႆႉ ထုၵ်ႇလီၶတ်းၸႂ်သၢင်ႈလွင်ႈငမ်းယဵၼ် ၊ သၢင်ႈလွင်ႈပွင်ႇၸႂ်ၼႂ်းၸၢဝ်းၶိူဝ်း ၸိူဝ်းပဵၼ်ပီႈၼွင်ႉ ယူႇႁွင်ႈႁိူၼ်းလဵဝ်ၵၼ်ၵွၼ်ႇသေ တႅပ်းတတ်းႁူမ်ႈၵၼ်ၶိုင်သၢင်ႈၵႂႃႇၼႆႉ လီဢိူဝ်ႈ ။


ၾၢႆႇၼိုင်ႈၵေႃႈဝႃႈ ၸုမ်း RCSS/SSA ၸဝ်ႈယွတ်ႈသိုၵ်း လိူၵ်ႈပႆသဵၼ်ႈတၢင်းႁင်းၵူၺ်း ၊ ပဵၼ်သင်ဢမ်ႇႁူမ်ႈယၢင်ႈတိုၵ်းၸွမ်း မူႇပီႈၸုမ်းၼွင်ႉၸၢဝ်းၶိူဝ်းၼႂ်းမိူင်းလဵဝ်ၵၼ် မူႇၸုမ်းယိပ်းၵွင်ႈၼႂ်းၸိုင်ႈတႆးၵမ်ႈၼမ် ပိူၼ်ႈဢမ်ႇႁပ်ႉႁၼ်လီ ၊ ၸုမ်းသိုၵ်းပွတ်းႁွင်ႇ SSPP/SSA တိုၵ်ႉထုၵ်ႇသိုၵ်းမၢၼ်ႈလေႃႇတိုၵ်းႁၢဝ်ႈႁႅင်းယူႇၸိူင်ႉၼႆၼႆႉ ထုၵ်ႇလီပၼ်ႁႅင်းၸုၵ်းၾၢႆႇယိူင်းမၢႆလဵဝ်ၵၼ် ၊ လႄႇလႅၼ်ႈႁႃပိူၼ်ႈ ႁဵတ်းၵေႃႉပိူၼ်ႈ ႁဵတ်းဢူၺ်းၵေႃႉယၢင်းၶဝ်ႈၸူးမၢၼ်ႈ ၊ ႁဝ်းပီႈၼွင်ႉမီးၼမ် ဢမ်ႇႁၼ်ယိူင်ႈယၢင်ႈၸွမ်းပၢႆးတိုၵ်း လၢႆးတိုၵ်း ႁူမ်ႈဢဝ်ၵၼ်ဝႃႈပႃးၵၼ်ပဵၼ် ၊ ၽိူဝ်ႇတေၶိုၼ်ႈၼႃႈၵႂႃႇတိၵ်းတိၵ်းၼႆႉ တႃႉသိုပ်ႇတုၵ်းယွၼ်းႁႂ်ႈလႆႈၸွမ်းၶေႃႈတူၵ်းလူင်းၵၼ် ၸိူဝ်းပူၼ်ႉမႃးၼၼ်ႉသဵင်ႈသဵင်ႈၵွၼ်ႇလႃႈ - ဝႃႈၼႆ ။


ၾၢႆႇၼိုင်ႈမီးၵႂၢမ်းထၢမ်ဝႃႈ - RCSS/SSA ၸဝ်ႈယွတ်ႈသိုၵ်း ၶတ်းၸႂ်ၵေႃႇသၢင်ႈလွင်ႈငမ်းယဵၼ် ပိူဝ်ႈတႃႇလႆႈတိုဝ်ႉတၢင်းဢုပ်ႇဢူဝ်းၵၢၼ်မိူင်း ၊ သင်ၸိူဝ်ႉဝႃႈ မၢၼ်ႈပၼ်လႆႈၸွမ်းၼင်ႇတုၵ်းယွၼ်းတႄႉၸိုင် ၸွင်ႇသမ်ႉတေၸၢင်ႈပဵၼ်လွင်ႈငမ်းယဵၼ်ၵတ်းယဵၼ်လႆႈ ၊ ၸွင်ႇတေၸၢင်ႈၵႄႈၶႆပၼ်ႁႃၵၢၼ်မိူင်း ၸိုင်ႈတႆးလႆႈ ? ၊ ၵွပ်ႈၼႂ်းမိူင်းၸိုင်ႈတႆး ယင်းပႆႇၸၢင်ႈငမ်းယဵၼ် တိုၵ်ႉပဵၼ်သိုၵ်းပဵၼ်သိူဝ် ဝၢၵ်ႇဝိူဝ်တူဝ်ႈၸွတ်ႇယူႇလူး ၊ ႁဝ်းလႆႈဢမ်းၼၢၸ်ႈ (ဢႃႇၼႃႇ) ႁဝ်းလႆႈသုၼ်ႇလႆႈမႃးၵေႃႈ ၸွင်ႇၽႂ်သမ်ႉတေၸွမ်းတေထွမ်ႇႁိုဝ် ? ၊ လၢမ်းလိမ်းႁဵတ်းၵႂႃႇႁင်းၵူၺ်း ၸၢင်ႈတူၵ်းလွၵ်းထုၵ်ႇႁႅဝ်ႉဢိူဝ်ႈ ၊ ၵၢၼ်ၸိူဝ်ႉၸၢတ်ႈတႆးၼႆႉ ႁဵတ်းႁင်းၵူၺ်း တႅပ်းတတ်းႁင်းၵူၺ်း ဢမ်ႇပဵၼ်လႆႈယူဝ်ႉ ? ၼႆယူႇ ။


ထမ်းမၻႃးၾိင်ႈပိူင် ၵၢၼ်ပုၼ်ႈၵူၼ်းၼမ် ၽူႈလႂ်ၽႂ်ႁဵတ်းလီ ဢွၼ်လီ ထုၵ်ႇမႅၼ်ႈ ၸိုဝ်ႈၸႂ်ႈ တိုၼ်းလႆႈႁပ်ႉလွင်ႈယုၵ်ႉယွင်ႈႁူမ်ၸူမ်းၵမ်ႉထႅမ် ၊ ၽူႈလႂ်ၽႂ်ႁဵတ်းၽိတ်း ဢွၼ်ပိူင်ႈ ဢမ်ႇၼႄလၢႆးတိုတ်ႉတၢႆးၵူၼ်းၼမ် ယၢင်ႈယိူင်ႈၸွမ်းလႆႈ တိုၼ်းတၵ်းလႆႈထုၵ်ႇထတ်းသၢင်ဝႃႈၼႄး ၊ ငဝ်းလၢႆးၵၢၼ်ၸိူဝ်ႉၸၢတ်ႈတႆးဝၼ်းမိူဝ်ႈၼႆႉ သုၵ်ႉသၵ်ႉ သူၼ်ႈသိၼ်းသၢၼ် ႁႃတၢင်းဢွၵ်ႇပေႃးဢမ်ႇႁၼ် တိပ်ႇတၼ်ယုင်ႈယၢင်ႈၼႃႇလိူဝ်ယႂ်းၵူင်ႇၵၢဝ် ၊ ၸုမ်းၽႂ် ၽူႈဢွၼ်ႁူဝ်ၸဝ်ႈလႂ်ႁဵတ်းၸိုဝ်ႈဝႃႈၸႂ်ႈ ၊ ၸုမ်းလႂ် ၽႂ်ပႆတၢင်းသဵၼ်ႈလူမ်ႇလုၵ်းၼႆ ပႆႇၸၢင်ႈတႅပ်းတတ်း ၊ ယွင်ႈမုၼ် ယုမ်ႇယမ် ယွၼ်းႁႂ်ႈၵူႈမူႇၵူႈၸုမ်းႁၢပ်ႇႁၢမ်ႁဵတ်းၵၢၼ်တႃႇၸိူဝ်ႉၸၢတ်ႈတႆးၸိုၼ်ႈၸၢင်ႇ ဢမ်ႇမၢင်ႇဝၵ်ႉတိုဝ်ႉတၢင်း သၢင်ႈလွင်ႈၵတ်းယဵၼ် လီပဵၼ်ပုၼ်ႈသုၼ်ႇတူဝ် မေႃဢွၼ်ႁူဝ်ၶိုၼ်ႈၼႃႈ ဝူၼ်ႉသၢင်ႈၶိုတ်းတၼ်းငဝ်းလၢႆး တိုတ်ႉတၢႆးၸုင်ၸၼ် ႁူမ်ႈမိုဝ်းၵၼ်လၢႆၾၢႆႇ ပဵၼ်ၸုမ်းၸိုင်ႈလဵဝ် ပၼ်ၵဵဝ်မၼ်ႈၵႅၼ်ႇ သႅၼ်ႇဝႃႈႁဵတ်းၸွမ်း ဢွၼ်ၵွၼ်းႁႂ်ႈၵူႈၸၢဝ်းၶိူဝ်းၸိုင်ႈတႆး ပူၼ်ႉၸၢတ်ႈၶီႈၶႃႈတႄႉတႄႉ ။


ဢၢၼ်းတႆး ၶႆးၶၢၼ်ႇၾႃႉ
13/10/2015