လူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၵမ်ႈၽွင်ႈ ၶဝ်ႈမၢႆမီႈ ထုၵ်ႇမႅၼ်ႈၸွမ်းတၢင်းၵၢၼ်ပဵၼ်ထမ်း/ ၶဝ်ႈတြႃး။ ၾၢႆႇၼိုင်ႈၵေႃႈ ႁၢင်ႈသိုၵ်းပဵၼ်ပၢင်တိုၵ်းယူႇ မိူင်းတႆးပွတ်းႁွင်ႇ။

မိူဝ်ႈဝၼ်းတီႈ 12/10/2015 လူင်ပွင်ၸိုင်ႈမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇ 2/2015 ပူတ်းၸိုဝ်ႈ ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ 3 ၸုမ်း ဢွၵ်ႇၼႂ်းၸုမ်းၼွၵ်ႈမၢႆမီႈ (ဢမ်ႇပဵၼ်ထမ်း) 17/1 ဝႃႈ ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၊ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) 3 ၸုမ်းၸိူဝ်းၼႆႉ တႄႇဢဝ်ဝၼ်းတီႈ 12/10/2015 ၵႂႃႇၼႆႉ ပဵၼ်ၸုမ်းၶဝ်ႈမၢႆမီႈ ပဵၼ်တၢင်းၵၢၼ်မႅၼ်ႈပိူင်ထမ်း/ၶဝ်ႈတြႃးယဝ်ႉ- ဝႃႈၼႆ။


ၼွၵ်ႈသေၼၼ်ႉ မီးၶေႃႈပိုၼ်ၽၢဝ်ႇ 3/2015 ထႅင်ႈ။ ပိုၼ်ၽၢဝ်ႇဝႃႈ- တႅဝ်းႁူမ်ႈ ၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ  (ABSDF) လႄႈ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉတႄႇဝၼ်းတီႈ 12/10/2015 ၼႆႉၵႂႃႇ ဢမ်ႇၸႂ်ႈၸုမ်းၵေႃႇၵၢၼ်ႁၢႆႉယဝ်ႉ-  ၽွင်းလူင်ၾၢႆႇၼႂ်းမိူင်း ၸိုင်ႈမိူင်းႁူမ်ႈတုမ် ၸွမ်သိုၵ်းၵူဝ်ႇၵူဝ်ႇ ဢွၵ်ႇၶေႃႈၸီႉသင်လႄႈ ဢွၵ်ႇၶေႃႈပိုၼ်ၽၢဝ်ႇ ၼင်ႇၼႆ။


တပ်ႉသိုၵ်းၸိုင်ႈတႆး (RCSS/SSA) ၼႆႉ လူင်ပွင်ၸိုင်ႈမၢၼ်ႈ ပိုၼ်ၽၢဝ်ႇပူတ်းဢွၵ်ႇ ၵၢၼ်ပဵၼ်ၸုမ်းၼွၵ်ႈမၢႆမီႈယဝ်ႉသေတႃႉ ၾၢႆႇၼိုင်ႈတၢင်းၼိုင်ႈၵေႃႈ တပ်ႉသိုၵ်းၸိုင်ႈတႆး (SSPP/SSA) တင်းတပ်ႉသိုၵ်းလူင်ပွင်ၸိုင်ႈမၢၼ်ႈ ယင်းတိုၵ်ႉပဵၼ်ပၢင်တိုၵ်းၵၼ်ယူႇ။